Lukas 12
12
Panessaꞌ si Isa sabab pagkamā-māhin
(Mateo 10:26-27)
1Sābu miyaꞌan, ibuhan meꞌ aꞌa mapatipunin hangkan maglewlaray siye. Manjari missā si Isa dehellu si meꞌ tindegnen, paꞌinne, “Pahatul-hatul kaꞌam kaw kaꞌam katimboꞌohan weꞌ hinangan meꞌ Pariseohin. Maghinang hadja siye duk siye takite weꞌ aꞌa. Addatde iyan kuweꞌ pasulig palatag. 2Gaꞌ niyaꞌ dinebbunan weꞌ gaꞌi ujud paguwaꞌ, gaꞌ niyaꞌ tinapukan weꞌ gaꞌi ujud kataꞌuhan. 3Ine-ine pagsuwi-suwibi sangem, takale du bang ellew ne. Ine-ine pagkemotbi dem bilik, pinalataꞌ du si meꞌ aꞌa si tabuꞌan.”
Sine subey katalewanin
(Mateo 10:28-31)
4“Akahante kaꞌam, meꞌ bagay, daꞌa kaꞌam tinalew si meꞌ makapapatey baranbin duk ubus gaꞌ du niyaꞌ tahinangde namba. 5Saguwaꞌ akahante kaꞌam bang sine subey katalewanbin. Iye subey katalewanbin, Tuhanin, peggeꞌ dumaꞌin hadja baran tapapateynen, saguwaꞌ taga balakat iye ngalakasan niyawabin pī dem narkaꞌ. Aweꞌ, asal iye subey katalewanbin.” 6Paꞌin si Isa pe, “Niyaꞌ meꞌ manuk-manuk dikiꞌ tabellite lime kayuꞌ duwe sīn. Bisan mura du halgaꞌden saguwaꞌ gaꞌ niyaꞌ siye bisan dambuwaꞌ takayipat weꞌ Tuhanin. 7Na, pasōng ne kaꞌam, gaꞌi kaꞌam takayipat weꞌ Tuhanin. Bisan kōkbin kataꞌuhanne bang piye lamba ekkahannen. Hangkan daꞌa kaꞌam tinalew. Mahalgaꞌ pe kaꞌam si iye amban meꞌ manuk-manuk maꞌekkahin.”
Magbennal nuhut Almasi
(Mateo 10:32-33; 12:32; 10:19-20)
8“Akahante kaꞌam,” paꞌin si Isa, “weꞌ sine-sine magbennal si harapan aꞌa weꞌ patuhut iye si aku, Anak Manusiyaꞌin, asal magbennal du ku isab si harapan meꞌ malaꞌikat Tuhanin weꞌ patuhut iye si aku. 9Saguwaꞌ sine-sine masuwey si harapan aꞌa weꞌ gaꞌi iye patuhut si aku, Anak Manusiyaꞌin, masuwey du ku isab si harapan meꞌ malaꞌikat Tuhanin weꞌ gaꞌi iye patuhut si aku. 10Sine-sine missā laꞌat si aku, Anak Manusiyaꞌin, makajari du iye inampun. Saguwaꞌ bang Niyawa Sutsihin binissā-bissāhannen asal gaꞌi teꞌed iye inampun. 11Bang si pasōngan siggew meꞌ aꞌa kaꞌam bu boꞌode pī si meꞌ langgalde hinukum, atawa boꞌode kaꞌam pī si harapan meꞌ nakuraꞌde duk meꞌ magbayaꞌ si lahatin, daꞌa kaꞌam magsuse bang saꞌingge pamēbbegbi dibin atawa bang ine binissābin. 12Peggeꞌ panoloꞌan Niyawa Sutsihin du kaꞌam si waktu miyaꞌan bang ine subey binissābin.”
Dalilan sabab aꞌa madupangin
13Manjari niyaꞌ dangan amban meꞌ aꞌa mabanesin missā. Paꞌinne pu si Isa, “O Tuwan, daꞌakun be sakakun ambat ku bahagiꞌanne pusakaꞌ amban sama kamiley.” 14Saguwaꞌ paꞌin si Isa si iye, “Oy lella. Gaꞌ ku kaꞌurungan kapatut ngahukum kaꞌam duk gaꞌ niyaꞌ kapatutku mahagiꞌ alataꞌbin.” 15Manjari paꞌin si Isa si meꞌ aꞌahin, “Pahatul-hatul kaꞌam. Halliꞌanun bi kēmon bayuꞌ-bayuꞌan napsu, peggeꞌ bisan aꞌahin dayahan manamal, dumaꞌin alataꞌ maꞌekkahin makaꞌellum iyehin.”
16Ubus inakahan siye weꞌ ne dambuwaꞌ dalilan, paꞌinne, “Niyaꞌ dambuwaꞌ aꞌa dayahan taga meꞌ bulakan. Manjari teꞌed kēmon meꞌ tinanemnen. 17Manjari paꞌinne dem ateyne, ‘Ine enteꞌ hinangku peggeꞌ gaꞌ ne niyaꞌ pangennaꞌanku jari meꞌ tinanemkun? 18A, kataꞌuhanku bang ine subey hinangku,’ paꞌinne. ‘Larakku meꞌ kamaligkun bu matengge ku hadje pe amban tagnaꞌin, duk ennaꞌku laꞌi kēmon jari tinanemkun duk kēmon alataꞌkun. 19Ubus paꞌinku si diku: Asal hāp sukudkun. Ekka ne taꞌennaꞌku para si meꞌ tahun maꞌekka si pasōnganin. Pahali-hali ne ku. Mangan ku, nginum ku duk magadjak-adjak ku.’ 20Saguwaꞌ paꞌin Tuhanin si iye, ‘Asal dupang kew iyan! Sangem inin du, ineddoꞌ ne amban kaꞌu umulnun. Manjari, pu sine ne meꞌ alataꞌ pinanyapnun?’ ” 21Ubus miyaꞌan paꞌin si Isa, “Na, asal sa iyan du isab aꞌahin bang nipun iye alataꞌ para si dine bu miskin iye si matahan Tuhan.”
Sabab sandel si Tuhan
(Mateo 6:25-34)
22Manjari missā si Isa si meꞌ tindegnen, paꞌinne, “Hangkan hep paꞌinku si kaꞌam, daꞌa kaꞌam maggagal sabab kaꞌellumanbin, bang ine kinakanbin atawa sabab baranbin, bang ine panemmekbin. 23Peggeꞌ mahalgaꞌ pe hep umulin amban kinakan duk mahalgaꞌ pe hep baranin amban semmek. 24Payamanun bi meꞌ owakin. Gaꞌi siye magtanem atawa magpagani duk gaꞌ niyaꞌ pagennaꞌ-ennaꞌande kinakan. Saguwaꞌ pakan Tuhanin du siye. Pasōng teꞌed kaꞌam mahalgaꞌ amban meꞌ manuk-manukin. 25Sine kaꞌam tapatahaꞌbi umulbin bisan da ora bang kaꞌam magsuse? 26Bang gaꞌi du tahinangbi bisan kuweꞌahat inin, weꞌey pe pagsusehanbi sinduwehin? 27Payamanun bi meꞌ sumpingin bang saꞌingge panuligden. Gaꞌi siye maghinang, gaꞌi siye magtennun. Bu paꞌin akahante kaꞌam, bisan Sultan Sulaiman madayahan awwalley, gaꞌ bakas makapagsemmek hāpnen kuweꞌ dambuwaꞌ meꞌ sumping inin. 28Bang Tuhanin tapasemmekanne pahāp-hāp meꞌ sumping sabetin bu gaꞌi du siye natas, ellum siye kuweꞌitu, pagsumu ineggas, na, kaꞌam pe gaꞌi tapasemmekanne? Asal kulang sandelbi si Tuhanin. 29Daꞌa kaꞌam suse duk daꞌa iye luwal pinikilbin bang ine kinakanbin atawa ininumbin. 30Meꞌ aꞌa manggaꞌi mangataꞌuhan Tuhanin, iye hep inin luwal pinikilden. Saguwaꞌ kaꞌam, subey kaꞌam gaꞌi magsuse peggeꞌ kataꞌuhan Samabi Tuhanin weꞌ iye inin meꞌ sukalbin. 31Saguwaꞌ iye subey pinikilbin, sabab pagbayaꞌan Tuhanin duk sabab panuhut kinabayaꞌannen. Manjari urunganne du kaꞌam kēmon sukalbi inin.”
Alataꞌ laꞌi si surgaꞌ
(Mateo 6:19-21)
32“Kaꞌam, meꞌ tindegkun,” paꞌin si Isa, “daꞌa kaꞌam tinalew bisan kaꞌam kulang. Peggeꞌ sinna Samabi Tuhanin weꞌ magbayaꞌ kaꞌam kuweꞌ iyehin. 33Pabellihanun bi alataꞌbin duk pangurungun bi ulinen si meꞌ mamiskinin. Bang hinangbi inin, kuweꞌ du kaꞌam dalil ngennaꞌ alataꞌbin dem pitaka gaꞌi ngaꞌandang, hātinen alataꞌbin gaꞌ niyaꞌ kaꞌubusne laꞌi si surgaꞌ. Duk laꞌi gaꞌ niyaꞌ aꞌa nangkewne duk gaꞌ niyaꞌ aney makaꞌatanne. 34Peggeꞌ antag-antag pangennaꞌanbi alataꞌbin, laꞌi isab patetegan ateybin.”
Meꞌ daraꞌakan magjagahin
35-36Manjari paꞌin si Isa pe, “Subey kaꞌam luwal memes ngagadan pabalikkun, kuweꞌ meꞌ daraꞌakan ngagadan amuden bang moleꞌ amban pagkawinan. Magsemmek siye paghinang duk gaꞌi palemde payitaꞌanin. Pagtekka amuden bu ngalingan amban bukut, magtawus iye lukahande. 37Asal kēgan meꞌ daraꞌakan miyaꞌan bang pagtekka amuden ngape pe siye duk andang siye panyap. Sabennal akahante kaꞌam, weꞌ patingkoloꞌ amuden siye si lamisahan duk tāgadne siye. 38Bisan tengaꞌ bahangi atawa subu-subu katekkanen, bang kitene pe siye magjaga, bugtuꞌ ne kēg meꞌ daraꞌakan miyaꞌan. 39Saguwaꞌ essebun bi inin, weꞌ bang kataꞌuhan dapuꞌ lumaꞌin bang lisag piye katekka panangkewin, tapagjaga iye duk gaꞌi tapasagadanne lumaꞌnen ilangkat duk inasek. 40Damikkiyan isab kaꞌam, subey kaꞌam luwal panyap peggeꞌ aku, Anak Manusiyaꞌin, tekka du ku pitu balik baytu gaꞌi ku ase-asebi.”
Daraꞌakan kapangandelan duk daraꞌakan gaꞌi kapangandelan
(Mateo 24:45-51)
41Manjari tilew si Petros iye, paꞌinne, “Tuwan, dalilan inakanu miyaꞌan, para si kami ke hadja atawa para si kēmon?” 42Nambung si Isa magdalilan balik, paꞌinne, “Bang niyaꞌ daraꞌakan tapangandelan, duk hantap maghinang, iye iyan tahinang amunen nakuraꞌ meꞌ daraꞌakanne sinduwehin. Bang taꞌabut gantaꞌ pagurung-urungin, iye mangurung bānyaꞌ si meꞌ daraꞌakanin. 43Pagtekka amunen balik, sinna manamal daraꞌakan miyaꞌan bang kite amunen weꞌ tuhutne kēmon pangandaꞌakan iyehin. 44Sabennal akahante kaꞌam, weꞌ pangandel amunen du si iye kēmon alataꞌnen. 45Saguwaꞌ bang saꞌupama paꞌin daraꞌakan miyaꞌan dem ateyne, weꞌ tiggel pe du tekka amunen, ubus bu papeddiꞌanne meꞌ pagkasine daraꞌakanin sampay meꞌ dendehin, duk iye bahannen, magkakan duk maginuman duk maglangohan, 46ubus bu bessuwang tekka amunen ellew gaꞌi ase-asene duk waktu gaꞌi kataꞌuhanne. Na, manjari bininasa teꞌed iye weꞌ amunen duk pinatuhut iye pī si lugal pinasukuꞌ si meꞌ manggaꞌi makahagad si Tuhanin.
47“Bang daraꞌakanin kataꞌuhanne bang ine kinabayaꞌan amune hininangnen, bu gaꞌi iye magmemes duk hinangne, ilagutan iye manamal. 48Saguwaꞌ bang daraꞌakanin awam sabab kinabayaꞌan amunen, bu niyaꞌ tahinangne pataꞌ pangaleggahan iye, ilagutan isab iye saguwaꞌ gaꞌi du kuweꞌ ingge. Sine-sine kaꞌurungan ekka, ekka isab inase-ase si iyehin. Duk bang pasōng pe ekka pinangandel si iyehin, pasōng pe isab ekka inase-ase si iyehin.”
Si Isa jān pagsaggaꞌan
(Mateo 10:34-36)
49Paꞌin si Isa pe, “Pitu ku moꞌo ebbut si dunya duk kabayaꞌankun weꞌ asal kayat ne siꞌ. 50Niyaꞌ meꞌ kabinasahan subey talabeyku. Kabohatan ku teꞌed samantaꞌan gaꞌi pe inin puwas. 51Weꞌ kannalbi pitu ku moꞌo kasanyangan si dunya? Dumaꞌin kasanyangan, saguwaꞌ akahante kaꞌam, pitu ku moꞌo jān pagsaggaꞌan. 52Peggeꞌ tinagnaꞌan maꞌin, bang niyaꞌ lime magdambuwaꞌ lumaꞌ, magsaggaꞌ du siye, tellungan kuntara duwangan duk duwangan kuntara tellungan. 53Magsaggaꞌ siye, samahin kuntara anakne lellahin, duk anak lellahin kuntara samanen; saꞌihin kuntara anakne dendehin, duk anakne dendehin kuntara saꞌinen; matoꞌa dendehin kuntara eyuꞌanne dendehin, duk eyuꞌan dendehin kuntara matoꞌane dendehin.”
Taꞌu ngaka hāti meꞌ maꞌumantagin
(Mateo 16:2-3)
54Paꞌin si Isa isab si meꞌ aꞌa mabanesin, “Tuꞌu si lahatte bi inin, bang maglindem langitin si tampal seddepan, magtawus paꞌinbi, ‘Sōng ulan;’ ubus ujud ulan du. 55Duk bang nihup sātanin, paꞌinbi, ‘Sōng panas teꞌed ellewin;’ duk ujud panas du. 56Kaꞌam iyan, magmā-mā awam kaꞌam. Kataꞌuhanbi hatiꞌ bang ine hāti meꞌ tapandogabi si bantuk langit duk bulakin, weꞌey managhāꞌ gaꞌi kataꞌuhanbi hāti meꞌ maꞌumantag si waktu kuweꞌitu inin?”
Boꞌohun maghāp manuntutan kaꞌuhin
(Mateo 5:25-26)
57“Weꞌey kaꞌam gaꞌi taꞌu magpikil dihananbi bang ine patut hinangbi? 58Bang saꞌupama niyaꞌ aꞌa nuntutan kaꞌu sabab utangnu bu binoꞌo kew weꞌ ne pī si paghukuman, iye mahāpin si kaꞌu, bang sābubi pe si lān, boꞌonu ne maghāp manuntutan kaꞌuhin. Peggeꞌ bang gaꞌi inin hinangnu, kaw kew lalasne pī si hukum, bu kew sōngan hukumin pī si pulis, duk isi pulisin kew dem kalabusu. 59Akahante kew, weꞌ gaꞌi teꞌed kew lumuwas billaꞌi samantaꞌan gaꞌi tapuwasannu kēmon pinamulta si kaꞌuhin. Bisan dambuwaꞌ sīn gaꞌi kakulangan.”
Okuqokiwe okwamanje:
Lukas 12: yakV
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2019, Wycliffe Bible Translators, Inc. All rights reserved.
