Lukas 15

Bili-bili masumapeꞌin

(Mateo 18:12-14)

1Dambuwaꞌ ellew ekka meꞌ aꞌa magpāku-pāku sukey para si gubelno duk meꞌ aꞌa sinduwehin gaꞌi nuhut saraꞌ āgama, pī siye patapit pu si Isa peggeꞌ bayaꞌ siye pakale si usihatnen. 2Manjari meꞌ Pariseohin duk meꞌ guru si saraꞌ āgamahin ngunub-ngunub, paꞌinde, “Aꞌa inin magtuhut-tuhut duk meꞌ aꞌa dusehanin duk sampay mangan magsawu siye.” 3Hangkan inaka weꞌ si Isa si siye dalilan inin, paꞌinne,

4“Saꞌupama, bang niyaꞌ kaꞌam taga bili-bili dahatus ekkahannen bu ne niyaꞌ dambuwaꞌ sumapeꞌ, ine enteꞌ hinangbi? Bugtuꞌ ambananbi siyampūꞌ duk siyamin laꞌi si kahayangan duk pī kaꞌam miha dambuwaꞌ masumapeꞌin tiggelan gaꞌi takasuwaꞌbi. 5Duk pagtakasuwaꞌbi ne, sinna teꞌed kaꞌam hangkan pinippi weꞌ bi binoꞌo hap lumaꞌ. 6Pagtekka si lumaꞌ, ilinganan weꞌ bi meꞌ bagaybin duk meꞌ saweꞌbi magtapit lumaꞌin dinaꞌak magtipun laꞌi si lumaꞌbi, duk paꞌinbi si siye, ‘Magkēg kite bi peggeꞌ takasuwaꞌku ne bili-biliku masumapeꞌin.’ 7Akahante kaꞌam,” paꞌin si Isa, “damikkiyan du isab pasōng magkēg malaꞌi si surgaꞌin bang niyaꞌ dambuwaꞌ aꞌa dusehan magsusun duk ngalebbahan dusenen amban magkēg siye sabab siyampūꞌ duk siyam meꞌ aꞌa magpaꞌin weꞌ bentel siye duk gaꞌi siye subey magsusun.”

Dublun malepasin

8“Atawa,” paꞌinne, “saꞌupama niyaꞌ dende taga sampūꞌ dublun bu ne lepas dambuwaꞌin, ine enteꞌ hinangne? Bugtuꞌ mekket iye payitaꞌan bu pahidanne dem lumaꞌin duk pihane pahāp-hāp tiggelan gaꞌi takasuwaꞌne. 9Duk pagtakasuwaꞌne ne, lingananne meꞌ bagaynen duk meꞌ saweꞌne magtapit lumaꞌin dinaꞌak magtipun si lumaꞌne. Duk paꞌinne si siye, ‘Magkēg kite bi, peggeꞌ takasuwaꞌku ne dublunku malepasin.’ 10Akahante kaꞌam,” paꞌin si Isa, “damikkiyan magkēg du isab meꞌ malaꞌikat Tuhanin bang niyaꞌ dambuwaꞌ aꞌa dusehan magsusun duk ngalebbahan dusenen.”

Anak lella matahalaꞌin

11Manjari paꞌin si Isa pe, “Niyaꞌ dambuwaꞌ aꞌa taga anak lella duwangan. 12Dambuwaꞌ ellew paꞌin salihin si samanen, ‘Ammaꞌ, bahagiꞌun ne alataꞌnun duk pangurungun ne aku bahagiꞌkun.’ Na, iye ne miyaꞌan, binahagiꞌ ne weꞌ aꞌahin alataꞌnen si duwangan anaknen. 13Gaꞌ tiggel, pinabellihan weꞌ salihin bahagiꞌnen, eddoꞌne sīnnen, ubus bu lumengngan iye pī si lahat tala. Paglaꞌi iye, inubus weꞌ ne sīnnen si meꞌ bayuꞌ-bayuꞌan gaꞌ niyaꞌ kagunahanne. 14Pagubus ne tagastune kēmon, bessuwang isab inunus teꞌed lahat miyaꞌan. Manjari kasukalan teꞌed iye. 15Hangkan pī iye si dambuwaꞌ aꞌa si lahat miyaꞌan duk manjari daraꞌakanne. Dinaꞌak iye pī weꞌ aꞌahin si bulakne ngipat meꞌ bawi. 16Hawal kawugtuꞌnen, mabayaꞌ ne kakanne bisan kinakan bawihin, saguwaꞌ gaꞌ niyaꞌ ngurungan iye bisan ine. 17Manjari bahune makapikil kadupangannen duk paꞌinne dem ateyne, ‘Kēmon daraꞌakan samakun, maglabi-labi kinakanden. Bu aku inin tiyaꞌ ne ku sōng matey tuꞌu weꞌ kawugtuꞌin. 18Hāp pe ku moleꞌ pī pu si Ammaꞌ duk paꞌinku si iye: Ammaꞌ, kapagduse ku si Tuhan duk si kaꞌu. 19Gaꞌi ne ku pataꞌ ēnannu anaknu. Kimmatanun ne ku hadja kuweꞌ dambuwaꞌ meꞌ daraꞌakannun.’ 20Ubus bu tahalaꞌ ne iye duk lumengngan ne iye pī balik si samanen.

“Saguwaꞌ tala-tala pe iye, takite ne iye weꞌ samanen. Maꞌaseꞌ teꞌed samanen si iye duk magubas iye pī ngalipunesan anaknen. 21Paꞌin anaknen si iye, ‘Ammaꞌ, kapagduse ku si Tuhan duk si kaꞌu. Gaꞌi ne ku pataꞌ ēnannu anaknu.’ 22Saguwaꞌ ilinganan weꞌ samanen meꞌ daraꞌakanin duk paꞌinne si siye, ‘Palakkes kaꞌam, boꞌohun bi pitu semmek tamanan mahāp lu duk pasemmekanun bi iye. Pasinsimanun bi isab duk patehompaꞌanun bi. 23Ubus pī kaꞌam, eddoꞌun bi anak sapiꞌ pinalemmekante bi ley bu sumbaliꞌun bi. Magjamu-jamu kite bi duk maglami-lami. 24Peggeꞌ anakku inin kuweꞌ bakas matey, bu ellum du balik. Kuweꞌ iye bakas lepas, bu tapoleꞌ du.’ Manjari nagnaꞌ ne siye maglami-lami.

25“Saguwaꞌ anakne sakahin baytu laꞌi miyaꞌan si tanaꞌ. Pag hap lumaꞌ ne iye duk sakaliꞌ iye tapit, niyaꞌ takalene magkulintang duk magpansak laꞌi diyalem lumaꞌden. 26Ilinganan weꞌ ne dangan meꞌ daraꞌakanin duk tinilew weꞌ ne bang ine paglami-lamihanin. 27Paꞌin daraꞌakanin si iye, ‘Tekka ne salinun duk dinaꞌak sinumbaliꞌ weꞌ samanun sapiꞌ pinalemmekanin peggeꞌ salinu inin gaꞌ niyaꞌ baya-bayane.’ 28Saguwaꞌ astel iye duk gaꞌi iye bayaꞌ padiyalem. Paluwas samanen pī muyuꞌ-muyuꞌ iye binoꞌo padiyalem. 29Saguwaꞌ sambunganne samanen, paꞌinne, ‘Payamanun Ammaꞌ, piyen tahun ne paghinangku si kaꞌuhin kuweꞌ dambuwaꞌ banyagaꞌnu. Gaꞌ niyaꞌ pangandaꞌakannu aku weꞌ gaꞌi hinangku. Saguwaꞌ gaꞌ ku bakas kaꞌurungannu bisan dambuwaꞌ anak kambing duk ku kapagjamu-jamu duk meꞌ bagaykun. 30Saguwaꞌ pagtekka pitu anaknu iyan, pagubus pakaꞌatanne alataꞌnun si meꞌ dende dupang, sinumbaliꞌ ne weꞌ nu para si iye sapiꞌ pinalemmekannun.’ 31‘Totoꞌ,’ paꞌin samanen, ‘luwal du kew tuꞌu si aku duk kēmon maniyaꞌ si akuhin, si kaꞌu du. 32Talep kite maglami-lami duk magkēg, peggeꞌ salinu iyan kuweꞌ bakas matey, bu ellum du balik. Kuweꞌ iye bakas lepas, bu tapoleꞌ du.’ ”

Okuqokiwe okwamanje:

Lukas 15: yakV

Qhakambisa

Dlulisela

Kopisha