Ñwaè' Matïìyoè 5
5
1Jisòs à ka' yɛ ku' bèe, a ko' mbe rtùu, a ka' bà' mbo, a cu à nshè. Ŋgǎa yɛ'ni yì buu a vʉsè, 2e kɛ' a ce yɛ'ni wowèe a laa enɛ̂,
3“Mbǒŋtu mi yu nè bèe ce a yu ŋgǎa fùp à yʉ',
njobè' kʉʉ Nyʉ̀ yu yap.
4Mbǒŋtu mi yu nè bèe ce a ce koosimnse,
njobè' a be kèe gèe tɛ nyor wase wowèe.
5Mbǒŋtu mi yu nè bèe ce a ce nàa nyor ka',
njobè' Nyʉ̀ be kèe fa ŋgòŋ ca nè wowèe.
6Mbǒŋtu mi yu nè bèe ce njè ce yaŋ wowèe,
ntee yi ce yuushi wowèe à rgèe buu ce vi yu yɛɛnì,
njobè' Nyʉ̀ be kèe gèe tɛ wowèe a yu' rbòŋ.
7Mbǒŋtu mi yu nè bèe ce a ce koosimnse nè bèe mo',
njobè' a be kèe koosimnse nè wowèe.
8Mbǒŋtu mi yu nè bèe ce yap ntee yi yu rara,
njobè' wowèe a be kèe yɛ Nyʉ̀.
9Mbǒŋtu mi yu nè bèe ce a ce gèe bèe a ce cu nè cumʉnyaŋ-ŋwɛ̀,
njobè' a be kèe too wowèe enɛ boo Nyʉ̀.
10Mbǒŋtu mi yu nè bèe ce a ce fa wowèe ŋgɛ'
njobè' wowèe a ce gèe buu ce vi yu yɛɛnì.
Kʉʉ Nyʉ̀ yu yap.
11Mbǒŋtu mi yu nè wèe ce bèe a ka' cɛp wèe, fa ŋgɛ' nè wèe, ker nya' mnde' laa ku' buu bbebep àmbò wèe njo' mɛ̀. 12Yu'-nè rbòŋ ce lu'shi njobè' wee blà' embe bùu vi yu gòr sê. Wowèe a m ku fa ŋgɛ' nè ŋgǎa ncep ntuu Nyʉ̀ ce a m ba entombì nè wèe nà wa'a.
13“Wèe yu mgwaŋ enjep ŋgòŋ na. Ka' yi yu wa'a, mgwaŋ mi ka' cir, àde' a gee ekɛ mi ka' ker lêe? Mi be kèr ba yuu ŋgèe yuu ka', tɛ a cu' tɛ bèe a ce càa ce nyɛ̀ŋshi nè mkùu. 14Wèe yu rraa enjep ŋgòŋ na. A ka' ba'ri rla' mbe rtùu, àde' bèe a buu efa ryɛ li ka'. 15Yi yu foŋ enɛ àde' ŋwɛ̀ cʉ' lâm, lor ghee kʉpshi àgho ka'. Ŋwɛ̀ à ka' cʉ' lâm, banɛ e be tɛr ba mbe tɛbùr tɛ ndap bo raa nè bèe wɛɛwɛ ce a yu mbe ndàp. 16Banɛ wee wèe ma'shi tɛ le rraa li raa à bsii bèe, tɛ wowèe a bo yɛ me mfǎ' mmbòŋmboŋ, kù'si yè Ta ce e yu mbe bùu.
17“Wèe fa ce kwà'shi enɛ mɛ̀ vʉ̀ à rsiŋsi mncir ker ba yuu ce ŋgǎa ncep ntuu Nyʉ̀ a m làa ka'. Mɛ̀ vʉ̀ à rsiŋsì ka'. Mɛ̀ vʉ̀ ba à rgèe tɛ buu embe mŋwà' anà vi bo ghɛɛte njo. 18M ce làa nè wèe nè mini-ŋwɛ̀ enɛ, tɛ rbuu li ka' kèe mì, tɛ ŋgòŋ yi mi foŋ, àde' mʉ yuu mo' embe ŋwǎ' mncir yi ke du fà yuu ka', caar tɛ buu wɛɛwɛ ghɛɛte njo. 19Banɛ ŋwɛ̀ ce e ka' lor mʉ ncir efa mncir ca àtɛ̀r, yɛ'ni bèe mo' foŋ enɛ a gee wa'a, banɛ ŋgàŋ be kèe ba ŋwɛ̌ ŋkɛ' mbe dǐ' kʉʉ Nyʉ̀. Ŋwɛ̀ ce e ka' lɛ mncir ca, ce yɛ'ni bèe vi, banɛ ŋgàŋ be ba ŋwɛ̌ ŋgòr mbe dǐ' kʉʉ Nyʉ̀. 20M ce suŋ wèe mɛnɛ ye ŋgěe yɛɛnì yi ka' tɛ càa yǐ ŋgǎa ryɛ'ni mncir ba yǐ bèe Farìsi ka', banɛ àde' wèe niŋ mbe dǐ' kʉʉ Nyʉ̀ ka'.
21“Wèe à yu' enɛ a m làa nè bèe elǔuŋgòŋ enɛ̂, ‘Fa yʉ ka', ŋwɛ̀ ce e ka' yʉ ŋwɛ̀ banɛ a be lòr ye à mnsa'.’ 22M ce làa ya nè wèe mɛnɛ ntee yi ka' yaŋ ŋwɛ̀ nè nfʉr yì, banɛ a be lòr ŋgàŋ à mnsa'. Ŋwɛ̀ ce e ka' laa nè nfʉr yì enɛ̂, ‘À yu yuu cicì’ banɛ a be lòr ŋgàŋ à mnsa'. Ŋwɛ̀ ce e ka' laa nè ŋwɛ̀ enɛ̂, ‘À yu lʉr’, banɛ àde' ŋgàŋ ke du njep dǐ' ŋgɛ' ce mor yi yu njo. 23Banɛ wɛ̀ ka' ce dù nè rfa mbe dǐ' ntòo rfa, kuushi enɛ nfʉrò tʉr wɛ̀ à ntee bebep, 24à lɛ lo rfa anà mbe gee dǐ' ntòo rfa, be du yɛ ye tɛ wèe ye nashi bcùu, tɛ à ka' kʉti fa lo rfa anà.
25“Ŋwɛ̀ à ka' somir wɛ̀, wèe ye ce dù mbe kôr, à yɛ enɛ wèe ye à sèesi a ba cǔu mo'sir, fà dì' e du nè wɛ̀, fa wɛ̀ nè ŋwɛ̀ nsa' mnsa' tɛ ŋwɛ̀ nsa' mnsa' fa wɛ̀ nè ŋwɛ̀ ncir tɛ ŋwɛ̀ ncir fa wɛ̀ mbe shaŋ ka'. 26M ce suŋ wɛ̀ nè mini-ŋwɛ̀ enɛ à be kù cu mbe shaŋ anà caar, là' yi mbàa ce yi yu nè wɛ̀ wɛɛwɛ, ka' fʉʉ embo.
27“Wèe à yu' weenɛ a m làa enɛ̂, ‘Fa koo ŋgwa ŋwɛ̀ mò' kɛ̀ nduu ŋwɛ̀ mò' ka'.’
28M ce làa ya nè wèe enɛ ŋwɛ̀ à ka' yɛ njeŋwɛ̀ ce kwà'shi enɛ a ye a ba nòŋ, banɛ e koo njeŋwɛ̀ anà wɛɛ. 29Lo rlir mà' li ka' gee wɛ̀ à gee yuu bebep, à so'nì li enje tù, ma'. Yi yu àndèe enɛ à buu ŋgʉ̀' mò' efa wɛ̌ nyòr nè ce enɛ a ma' yò nyor wɛɛwɛ njep mor. 30Yo bo mà' yi ka' gee wɛ̀ à gee yuu bebep, à tee yi ma'. Yi yu àndèe enɛ à buu ŋgʉ̀' mò' efa wɛ̌ nyòr nè ce enɛ yò nyor wɛɛwɛ du njep mor.
31“A m làa foŋ enɛ̂, ‘Ŋwɛ̀ à ka' juu ŋgwa yì, banɛ e fa ye ŋwà' à rdùŋshi enɛ e jùu ye.’ 32M ce làa ya nè wèe enɛ ŋwɛ̀ à ka' juu ŋgwa yì, ke' ba njobè' ŋgwa yì anà à nòŋ a mbaŋrùŋwɛ̀ mò' ka', banɛ e gèe ŋgwa yì anà à noŋ a nduu ŋwɛ̀ mò'. Ŋwɛ̀ ce e ka' lor njeŋwɛ̀ ce e fʉʉ bgùu, banɛ e koo ŋgwa ŋwɛ̀ mò'.
33“Wèe à ker yu' foŋ enɛ a m làa nè bèe elǔuŋgòŋ enɛ̂, ‘Ŋwɛ̀ à ka' ye lè' à rgèe yuu mo' nè Tata Nyʉ̀, ŋgàŋ fa buu efa rgèe yuu anà ka'.’ 34M ce làa ya nè wèe enɛ ŋwɛ̀ fa kàa ka', koo mʉcàr. Ka' ce enɛ e kaa à rlii rbuu ɛ̀, e fa kàa ka', njobè' rbuu yu kàbàrà' Nyʉ̀. 35Ka' ce enɛ e kaa à rlii nshe ɛ̀, e fa kàa ka', njobè' nshe yu dì' ce Nyʉ̀ e ke tɛr mi mkùu. Ka' ce enɛ e kaa à rlii Jɛ̀rusalɛ̀m ɛ̀, e fa kàa ka' njobè' rla' Jɛ̀rusalɛ̀m yu rla' ŋkʉʉ ŋgòr. 36Fa kàa à yo tu ka', njobè' àde' à gee mbʉ̀ nyʉ̀'tu mò' fʉp kɛ̀ sii ka'. 37Kù laa ba wɛnɛ, ɛ̀no, tɛ yi ba wa' ghup, laa wɛnɛ, kaka', tɛ yi ba wa' ghup. Wɛ̀ ka' ker laa yuu mo' caa embo nà, banɛ yì anà yi lò ba ese Satàn ce e yu ŋwɛ̌ mbembep.
38“Wèe à yu' enɛ a m làa enɛ̂, ‘Ŋwɛ̀ à ka' bʉ' ŋwɛ̀ rlir, banɛ a be bʉ' li foŋ. Ŋwɛ̀ à ka' co' ŋwɛ̀ rsòŋ banɛ a be co' li foŋ.’ 39M ce làa ya nè wèe enɛ, ŋwɛ̀ fa kʉʉsi yuu bebep nè yuu bebep ka'. Ŋwɛ̀ à ka' lip wɛ̀ nè bo à gè', à beesì gè' mo' nè ye foŋ tɛ e lîp. 40Ŋwɛ̀ à ka' ce kòŋ enɛ wèe ye sa' mnsa', koo cɛ̀' ese wɛ̀, à ma'shì tɛ e koo yò kur foŋ. 41Ŋwɛ̀ à ka' ku koo wɛ̀ à ŋger enɛ wèe ye jɛr mar mò'sir, à jɛr wèe ye mar baa. 42Ŋwɛ̀ à ka' laa enɛ à fa ye yuu, à fa ŋgàŋ yuu anà. Ŋwɛ̀ à ka' ce kòŋ à rfòo yuu ese wɛ̀, à fa shè ka'.
43“Wèe à yu' enɛ a m làa enɛ̂, ‘Kòŋ nfʉrò, baa ŋwɛ̀ ce e bàa wɛ̀’. 44M ce làa ya nè wèe enɛ, kòŋ nè bèe ce a bàa wèe, loo nè nè bèe ce a ce fa wèe ŋgɛ', 45tɛ wèe bo ba boo yè Ta ce e cu mbe bùu. E ke gèe nyʉ̀ saŋ mbendù běe bbebep ba běe bbòŋboŋ, gee mbèŋ gwe à mnsuu bèe ce a cu rcu yɛɛnì ba bèe ce a cu rcu yɛɛnì ka'. 46Wèe à ka' ku koŋ ba bèe ce a kòŋ wèe, àde' wèe koo ba njɛ̀ɛ blà' kɛ? Mbò ŋgǎa ŋkùu mbǎa bàrà' a ke gèe wa' foŋ a? 47Wèe à ka' ku ce cà'ni ba bfʉr wee, banɛ yuu ce wèe à gèe a caa bèe mo' yu ba kɛ? Mbò bèe enje jɛɛ a ke gèe wa' foŋ a? 48Banɛ wèe ba yɛɛnì sê, àmbò yè Ta embe bùu yu yɛɛnì foŋ nà.
Okuqokiwe okwamanje:
Ñwaè' Matïìyoè 5: LNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Limbum New Testament © Bible Society of Cameroon, 2003.
