Ñwaè' Matïìyoè 6
6
1“Lòr nè nfè' fà dì' wèe gee ŋgěe yɛɛnì à bsii bèe tɛ a bo yɛ yuu ce wèe à gèe ka'. Wèe à ka' gee wa'a, banɛ àde' yè Ta ce e yu mbe bùu la' wèe ka'. 2Banɛ wèe à ka' ce fa yuu nè bèe ce a buu yuu, wèe fa fyɛp msòŋ tɛ bèe a bo rìŋ yuu ce wèe à gèe ka'. Ŋgǎa mbo'ni a ke gèe wa'a à mndap mloo ker ba à btase tɛ bèe a bo ce yòŋshi wowèe. M ce suŋ wèe nè mini-ŋwɛ̀ enɛ wowèe a koni wap blà' wɛɛ. 3Wèe ka' ce fa yuu nè bèe ce a buu, wèe fa mà'shi tɛ ye bo ŋkòp yi riŋ yuu ce ye bo mà' yi ce gèe ka', 4tɛ ŋwɛ̀ mò' bo rìŋ yuu ce wèe à fa ka'. Wèe à ka' gee wa'a, banɛ yè Ta ce e ke yɛ buu ce bèe a gèe à bsʉ̀ti, be là' wèe.
5“Wèe à ka' ce gèe rloo, wèe fa gèe àmbò ŋgǎa mbo'ni a ke gèe nà ka'. Wowèe a ke kòŋ à rtɛɛ mbekì à mndap mloo ker ba à btase, gee rloo tɛ bèe a bo yɛ wowèe. M ce suŋ wèe nè mini-ŋwɛ̀, wowèe a koo wap blà' wɛɛ. 6Wɛ̀ ka' ce loo, à du mbe wɛ̌ rum ndap, cete kèŋ, loo nè yò Ta ce a ke yɛ ye ka', tɛ yò Ta ca ce e ke yɛ buu ce bèe a gèe à bsʉ̀ti bo là' wɛ̀. 7Wèe ka' ce loo, wèe fa ce làa blǎa bcicì àmbò bèe enje jɛɛ a ke gèe nà ka'. Wowèe a ke gèe wa'a ce kwà'shi enɛ Nyʉ̀ be yu' map mloo njobè' wowèe a loo laa buu gòr. 8Wèe fa ba àmbò wowèe ka', njobè' yè Ta rìŋ yuu ce wèe à buu wɛɛ, tɛ wèe ka' kèe bipshi enɛ e gee yi nè wèe. 9Banɛ wèe ce loo ba à njɛ̀ɛ enɛ̂,
‘Yèr Ta ce e yu embe bùu,
tɛ lo rlii li ba rrara,
10tɛ yo kʉʉ yi kɛ',
tɛ bèe a gee yuu ce à ce kòŋ njep ŋgòŋ na àmbò a ce gèe mbe bùu.
11Fa wèr byee ce vi ghɛɛte nè wèr ntìni.
12Fòosi wèr efa yèr buu bbebep àmbò wee wèr à fòosi bèe ce a gèe buu bbebep nè wèr.
13Fa mà'shi tɛ rmòoshì li vʉ nè wèr ka',
fʉr wèr embà mmbo Satàn ce e yu ŋwɛ̌ mbembep.
[Gèe buu ca nè wèr njobè' kʉʉ yu yo, ŋger à ba yo, bkù' à ba wo nfesè.
Yi yu wa'a.]’
14Wèe à ka' foosi bèe ce a gèe buu bbebep nè wèe, banɛ yè Ta embe bùu be fòosi wèe foŋ. 15Wèe à ka' tɛ fòosi bèe ce a gèe buu bbebep nè wèe ka', yè Ta embe bùu foosì wèe yè buu bbebep ce wèe à gèe foŋ ka'.
16“Wèe à ka' ce jì mdip, wèe fa ce koosimnse àmbò ŋgǎa mbo'ni a ke gèe nà ka', njobè' wowèe a ke jì mdip wa'a, su'si mmir ka', tɛ bèe a bo yɛ enɛ wowèe a ce jì mdip. M ce suŋ wèe nè mini-ŋwɛ̀ enɛ wowèe a koo wap blà' wɛɛ. 17Wèe à ka' ce jì mdip, wèe yo' mgʉr mbe tù, yɛr mmir, 18fà dì' bèe a bo rìŋ enɛ wèe ce jì mdip ka', tɛ ku rìŋ ba yè Ta Nyʉ̀ ce bèe a ke yɛ ye ka', tɛ yè Ta ca ce e ke yɛ buu ce bèe a gèe à bsʉ̀ti bo là' wèe.
19“Wèe fa lɛ̀ wee bkù' njep ŋgòŋ njep dì' ce àde' mfyɛp vi ye, nlo ye, byɛ̀ɛ vi kep ndap yɛɛ ka'. 20Lɛ̀ nè wee bkù' ba mbe bùu mbe dì' ce àde' mfyɛp vi ye ka', nlo ye ka', byɛ̀ɛ vi kep mbo yɛɛ buu ka'. 21Fàdì' ce yò buu yu, a fàdì' ce yo ntee yi yu foŋ.
22“Rlir li yu àmbò lam nè nyor. Me mmir mi ka' ba yɛɛnì, banɛ rraa li yu à yè nyòr wɛɛwɛ. 23Me mmir mi ka' tɛ ba yɛɛnì ka', banɛ yè nyor wɛɛwɛ be ba à tʉ̀'nji. Ka' ba enɛ rraa enjep wèe yu tʉ̀'nji, banɛ tʉ̀'nji anà be sii àmbò kɛ?
24“Àde' ŋwɛ̀ fa' nè mmasǎ bbaa ka'. E ka' gee wa'a, banɛ e be bàa mò', kòŋ mò', yu'ni nè mò', lòr mò' à yuu ka'. Àde' à ce fà' nè Nyʉ̀ ker ce fà' nè mbàa ka'.
25“Banɛ m ce suŋ wèe enɛ mlù mi fa ce koo wèe nè yè nyor enɛ wèe be ye kɛ, kɛ̀ no kɛ ka'. Mlù mi fa ce koo wèe nè yè nyor foŋ enɛ wèe be yar ba kɛ ka'. Mbò ryǒŋ ŋwɛ̀ li càa byee, nyor ŋwɛ̀ à caa bcɛ̀' a? 26Fyɛ' ka nè bsiŋ. Vi ke byè buu kɛ̀ kep buu kɛ̀ lɛ à bcàŋ ka'. Ka' yi yu wa'a, yè Ta embe bùu ku ce nyaŋ wowèe. Mbò yè ntaa lùu sê, a caa yì bsiŋ a? 27Ŋwɛ̀ efa wěe mʉ ce mlù mi ka' ce koo ye, e kyesè nòŋ mo' mbendù vi mnòŋ enjep ŋgòŋ na a nda? 28Mlù mi ce koo wèe àmbò bcɛ̌' byar njokɛ? Kwà'shi ka nè àmbò bfʉ̀lawǎ à rìŋ vi ke kù'. Vi ke fà' ka', ce ba' bcɛ̀' ka'. 29Ka' yi yu wa'a, m ce suŋ wèe mɛnɛ ka' bcɛ̀' kʉʉ ce Solomʉ̀n à m ce yar ce vi m bòŋ se nà, mo' yi m bòŋ àmbò fʉ̀lawà ka'. 30Nyʉ̀ ka' ce sùsi mjɛɛ efa rìŋ ce mi ke yɛɛti ntìni, e fʉʉ àyàŋsè, a too njep mor, banɛ e be sùsi yi wèe gòr àmbò kɛ? Le rbyemì li yu mʉcàr. 31Banɛ mlù mi fa ce koo wèe tɛ wèe ce làa weenɛ̂, ‘Wèr be ye ba kɛ?’ kɛ̀ enɛ̂, ‘Wèr be no ba kɛ?’, kɛ̀ enɛ ‘Wèr be yar ba kɛ?’ ka'. 32Bèe ce a rìŋ Nyʉ̀ ka' a ke dù yap ba àmbùu buu ca, yè Ta embe bùu à rìŋ enɛ wèe à ba tʉr buu ca. 33Banɛ wèe ròo entombì ba kʉʉ Nyʉ̀, gee ŋgěe yɛɛnì àmbò e ce kòŋ, tɛ e fa wèe buu ca wɛɛwɛ foŋ. 34Banɛ mlù mi fa ce koo wèe à buu cě àyàŋsè ka'. Be ba àyàŋsè tɛ buu ku ba ce mlù mi koo wèe àgho. Ŋgɛ' ŋwɛ̀ ce à nǒŋ mo'sir à ghɛɛte nè ŋgàŋ à nòŋ anà.
Okuqokiwe okwamanje:
Ñwaè' Matïìyoè 6: LNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Limbum New Testament © Bible Society of Cameroon, 2003.
