SAN MARCOS 16
16
Jesús causarishcamanta
(Mt 28.1-10; Lc 24.1-12; Jn 20.1-10)
1Samana punzha*f** tutayamucucpimi, Magdala pueblomanta Mariapish, Jacobopac mama Mariapish, shinallatac Salomé huarmipish mishquilla ashnacucta Jesuspac cuerpopi churangapac randircacuna. 2Chai huarmicunaca semana callari domingo tutamanta inti llucshimucucpimi, Jesusta enterrashca jutcumanca rircacuna. 3Paicunaca:
—Jutcu pungupi churashca jatun rumitaca, ¿pitac anchuchingayari?— ninacushpami ricurcacuna.
4Paicuna chayashpa ricucpica, jutcuta huichcashca rumica ña anchuchishcami cashca carca. Chai rumica jatun rumimi carca. 5Chai ucuman yaicushpaca, alli lado maquiman shuc moso sunilla yurac churanata churashca tiyacuctami ricurcacuna. Paita ricushpaca, munaimi mancharircacuna. 6Ashtahuanpish paica:
—Ama mancharichicchu. Nazaret pueblomanta cruzpi chacatashca Jesustami cancunaca mashcacunguichic. Paica ña causarircami, ña mana caipichu. Maipi paita churashcapi ricuichic. 7Cunanca Pedroman, shinallatac caishuc yachacuccunamanpish: ‘Pai huillashca shinallatacmi, Galilea llactaman cancunapac ñaupata rin. Chaipimi paitaca ricunguichic’ nishpa, utca huillagrichic— nirca.
8Shina nicpi chai huarmicunaca manchaihuan chucchushpami, jutcumanta llucshishpa rircacuna. Chashna manchaihuan cashpami, piman imata mana nishpa upalla rircacunalla.
Magdala pueblomanta Mariaman Jesús ricurishcamanta
(Jn 20.11-18)
9[Jesús causarishpaca, semana callari domingo punzha ña pacarimucucpimi, Magdala pueblomanta Mariaman punta ricurirca. Chai Mariamantami Jesusca canchis supaicunata llucchishca carca. 10Paimi Jesushuan puriccunamanca Jesús ricurishcata huillagrirca. Paicunaca llaquillami huacacurcacuna. 11“Jesusca causacunmi, ñucami ricurcani” nicpipish, paicunaca mana crircacunachu.
Ishcai yachacuccunaman Jesús ricurishcamanta
(Lc 24.13-35)
12Chai q'uipaca, paipac yachacuccunapuramanta ishcai yachacuccuna pueblomanta llucshishpa ricucpimi, Jesusca shuctac laya ricurirca. 13Chashna ricuricpica, caishuc yachacuccunamanmi huillagrircacuna. Paicuna huillacpipish, mana crircacunachu.
“Huillagringuichic” nishpa, Jesús mingashcamanta
(Mt 28.16-20; Lc 24.36-49; Jn 20.19-23)
14Chai q'uipaca, Jesusca paipac chunga shuc yachacuccuna micucucpimi ricurirca. Chaipi ricurishpaca: “Ñuca causarishcata ricuccuna huillacpica, rumi shungu cashpami cancunaca mana crircanguichic” nishpa rimarirca.
15Shinallatac caitapish paicunataca nircami:
—Cancunaca tucui llactacunata rishpa, quishpirinamanta alli huillaita tucui gentecunaman huillagrichic. 16Maijanpish cai alli huillaita crishpa bautizarictaca, quishpichishcami canga. Ashtahuanpish cai alli huillaita mana crictaca, huiñaitami llaquiman cachashca canga. 17Ñucata criccunaca pi mana ruhuaipaccunatami ruhuanga. Ñuca shutipimi supaicunatapish llucchishpa cachangacunami, jaicapi mana uyashca rimaicunatapish rimangacunami. 18Culebracunata maquihuan japirishpapish, ima venenocunata ubiashpapish, mana ima tucungacunachu. Shinallatac ungushcacunapac uma jahuapi maquita churacpica, alliyangacunallami— nirca.
Jahua pachaman Jesús rishcamanta
(Lc 24.50-53)
19Apunchic Jesús paipac yachacuccunata chashna mandashca q'uipaca, Taita Dios paita pushacpimi, jahua pachaman rirca. Chaipimi paipac alli lado maquiman tiyarirca. 20Yachacuccuna rishpaca, maipipish tucui gentecunamanmi huillarcacuna. Chashna huillacucpica, Apunchic Jesusmi imapipish paicunataca ayudac carca. Pi mana ruhuaipaccunata ruhuachishpami, Jesusca paicunahuan cashcataca ricuchicurca.]#16.20 Maijan quillcacunaca versículo 9 manta versículo 20 camanca mana nincunachu.
Quichua Cañar Nuevo Testamento © United Bible Societies in Ecuador, 1996.