SAN LUCAS 8
8
Jesusta servic huarmicunamanta
1Chai q'uipami Jesusca tucui pueblocunapipish, uchilla llactacunapipish Taita Dios mandacucmanta alli huillaita huillashpa, paipac chunga ishcai yachacuccunandic puricurca. 2Shinallatac maijan huarmicunapish c'aticurcacunami. Paicunatami maijancunataca supaicunata llucchishpa, maijancunataca ung:uicunamantapish Jesusca alliyachishca carca. Chai huarmicunapurapica, Magdala pueblomanta Mariapish carcami. Chai huarmimantami Jesusca canchis supaicunata llucchishca carca. 3Mandac Herodespac huasipi mandachun churashca, Chuza runapac huarmi Juanapish, Susana huarmipish, shinallatac caishuc huarmicunapish imalla charishcacunahuan Jesusta ayudaccunami carca.
Tarpuc runamanta Jesús chimbapurashpa parlashcamanta
(Mt 13.1-9; Mr 4.1-9)
4Mai pueblocunamantapish achcacuna Jesuspacman tandanacumucpimi, Jesusca cai yuyaita japina parlota cashna parlarca: 5“Shuc tarpuc runami muyuta jichangapac llucshirca. Muyuta pai jichacucpica, asha muyuca ñanpimi urmarca. Ñanpi urmashca muyu sarurishpa siricucpimi, zhutacuna shamushpa mururca. 6Cutin maijan muyucunaca rumi allpapimi urmarca. Chashna huiñashpapish, mana achca allpa tiyashcamantami usiaipica chaquircalla. 7Cutin maijan muyucunaca casha chaupipimi urmarca. Shina cashpami, casha huiñashpa ñiticpica aguarirca. 8Cutin maijan muyucunaca alli allpapimi urmarca. Chaimantami sumacta huiñashpa, shuc muyumanta pasac granota p'ucurca” nirca.
Chashna nishca q'uipami Jesusca: “Maijanpish rinrita chariccunaca, cai ñuca huillashcata alli uyaichic” nishpa, sinchita nirca.
Imamanta Jesusca yuyaita japina parlocunata parlashcamanta
(Mt 13.10-17; Mr 4.10-12)
9Jesús chashna nishca q'uipami, paipac yachacuccunaca:
—Cashna parlashpaca, ¿imatatac nisha ninguiyari?— nircacuna.
10Chashna tapucpica:
—Taita Diosca pai mandacucmanta pimanpish mana yachachishcatami, cancunamanca yachachishca. Cutin shuccunamanca paicuna mashnata ricushpapish, mana ricushca shinallatac ama ricuchun, mashnata uyashpapish, mana uyashca shinallatac ama yuyaita japichunmi, cashna yuyaita japina parlocunallahuan yachachini.
Tarpuc runamanta parlashcata Jesús entendichishcamanta
(Mt 13.18-23; Mr 4.13-20)
11Cai ñuca parlashcaca, cashnami nisha nin: Muyu shinaca, Dios rimashca shimimi. 12Ñanpi urmashca muyu shinaca, uyaccunami. Paicuna uyashpa, ama crishpa quishpirichunmi, Satanás*f** shamushpa cungachin. 13Rumi allpapi urmashca muyu shinaca, Dios rimashca shimita huillacpi cushilla chasquiccunami. Shina cashpapish mana ucuta sapiyashca shina cashpami, ashacamanlla crincuna. Llaquicuna japicpica, ña mana c'atishun nishpa saquirincunallami. 14Casha chaupipi urmashca muyu shinaca, Dios rimashca shimita uyaccunami. Chashna uyashpapish ima munaicuna, chayucyana yuyaicuna, cai pachallapi cushicuna yuyaicuna shamucpimi, uyashcacunaca aguaric shina chingarinlla. Shina cashpami, mana alli p'ucuc shina ricurincuna. 15Ashtahuanpish alli allpapi urmashca muyu shinaca, Dios rimashca shimita tucui shunguhuan uyashpa, alli cazushpa mana cungariccunami. Chashna c'atishpami, alli p'ucuc shina ricurincuna.
Ima pacalla ruhuashcapish ricurina cashcamanta
(Mr 4.21-25)
16Maijanpish luzta japichishpaca, imahuan tapangapac, mana cashpaca cama ucupi churangapacca mana japichinchu. Pipish ucuman yaicucpi achicyachichunmi, luztaca pata jahuapi churan. 17Shinallatac ima pacashcapish mana pacalla saquiringachu, tucuimi ricuringa. Pi mana yachashcapish tucuimi yacharinga.
18Chashna cacpica, ima shina uyashcata alli yuyarichic. Taita Diosca maijanpish alli yuyaita chariccunamanca ashtahuanmi cunga. Mana charicmantaca, pai charishami nishpa yuyacushcatapish quichungami— nirca.
Jesuspac mamapish, huauquicunapish paipacman shamushcamanta
(Mt 12.46-50; Mr 3.31-35)
19Chashna huillacucpimi, Jesuspac mamapish, huauquicunapish pai maipi cashcaman chayarcacuna. Shina cashpapish achca gentecuna chaipi cashcamantami, Jesuspacmanca mana cuchuyai pudircacuna. 20Chaimantami Jesusmanca:
—Cambac mama, cambac huauquicunami canhuan tupangapac canzhapi shuyacuncuna— nishpa huillarcacuna.
21Chashna huillacpimi Jesusca:
—Maijanpish Taita Dios ima nishcata uyashpa, chaita pactachiccunallami ñuca mama, ñuca huauquicuna— nirca.
Huairatapish, jatun cucha yacu cuyuricuctapish
Jesús parachishcamanta
(Mt 8.23-27; Mr 4.35-41)
22Shuc punzhami Jesusca paipac yachacuccunahuan canoapi tiyarishpaca:
—Cai jatun cucha yacuta chimbashun— nirca.
23Cuchata ña chimbacushpami, Jesusca suiñurca. Cungailla cuchapi yalli huaira jatarishpa, yacuta caiman chaiman cuyuchicpimi, canoapi yacu jundai callarirca. Chaimantami canoaca ña ucuyagrirca. 24Chashna tucucpimi, yachacuccuna Jesuspacman cuchuyashpaca:
—¡Yachachic, Yachachic, ñami ucuyagrinchic!— nishpa ricchachircacuna.
Chashna nicpi Jesús riccharishpa, huairatapish yacutapish:
—¡Casilla cai!— nirca.
Chashna nicpica huairapish, yacupish casilla tucurcallami.
25Chai q'uipami Jesusca yachacuccunataca:
—¿Ima nishpatac ñucataca mana crircanguichic?— nirca.
Chashna nicpi paicunapura munai mancharishpa, mana amirinacushpa:
—Cai runa, ¿ima cacpitac huairapish, yacupish pai nishcataca cazunyari?— nishpa tapunacurcacuna.
Gadara llactapi supai japishca runata
Jesús alliyachishcamanta
(Mt 8.28-34; Mr 5.1-20)
26Chai q'uipami Jesusca paipac yachacuccunandic, Galilea llactamanta chimbapurapi cac Gadara llactaman chayarcacuna. 27Ña chai llactaman chayashpa, canoamanta Jesús uricucpica, pueblomanta shuc runami ñapish Jesuspac cuchuman shamurca. Chai runaca unai huatacunatami supaicuna japishca carca. Chashna cashpami churanapish illaclla, huasipipish mana causashpa, panteonllapimi causac carca. 28Chai runaca Jesusta ricushcahuan, paipac ñaupapi cungurishpaca:
—Jahua pachapi causac Taita Diospac Churi Jesús, ¿imatatac nic shamungui? ¡Ñucataca ama llaquichichu!— nishpa caparirca.
29Jesús chai runamanta supaita “llucshi” nicucpimi, chashna nirca. Tauca cutinmi chai supaica runapi yaicushpa llaquichic carca. Chaimantami maquicunatapish, chaquicunatapish cadenacunahuan huatashpa charic carcacuna. Chashna huatacpipish, chai runaca cadenacunata p'itishpa, mai shitashca pambaman supai apacpica ricllami carca.
30Chai runatami Jesusca:
—¿Ima shutitac cangui?— nishpa tapucpica:
—Ñucaca Huaranga Huaranga shutimi cani— nirca.
Huaranga huaranga supaicuna japishca cashcamantami, paica chashna nirca. 31Chai supaicunaca:
—Ama ñucanchicta ucu pacha jutcuman cachaichu— nishpami mañarcacuna.
32Achca cuchicuna urcupi micushpa puricucpimi, supaicunaca:
—Chai cuchicunapi ñucanchictaca yaicuchun saqui— nishpa mañacpica, Jesusca yaicugrichun saquircallami. 33Supaicunaca ña chai runamanta llucshishpa cuchicunapi yaicucpimi, chai tucui cuchicunaca jahua quinraimanta cuchaman singushpa, yacupi aguarishpa huañurcacuna.
34Chashna tucucta ricushpami, cuchicunata michiccunaca callpashpa rishpa llactacunapipish, pueblocunapipish tucui ima tucushcata huillarcacuna. 35Chaita uyac gentecuna Jesuspacman ña chayamushpaca, supaicunata llucchishca, churanatapish churashca, ña alli yuyaihuan Jesuspac ñaupapi tiyacuctami chai runataca ricurcacuna. Chashna ricushpaca, munaimi mancharircacuna. 36Chai supai japishca runata ima shina Jesús alliyachishcata ricuccunami, chai shamuccunamanca tucui parlarcacuna. 37Chashna parlacpi Gadara llactamanta tucui shamuccunaca, manchaihuan cashcamantami Jesustaca: “Caimanta rilla” nircacuna. Chashna nicpi Jesusca cutin canoapi yaicushpa rigricucpimi, 38supaicunata llucchishca runaca:
—Ñucatapish pushashpa riyari— nishpa, mailla mañarca.
Chashna nicpipish Jesusca:
39—Dios canta llaquishpa alliyachishcataca, cambac huasiman cutirishpa huillagri— nirca.
Chashna nicpimi, chai runaca Jesús ima shina paita alliyachishcataca, chai tucui pueblopi causaccunamanmi huillagrirca.
Jairopac ushimantapish, Jesuspac churanapi
tuparic huarmimantapish
(Mt 9.18-26; Mr 5.21-43)
40Jesús ña cutimucpica, paita shuyacuc achca gentecunaca munai cushicushpami tuparcacuna. 41Ña chaipi tandanacuna huasipi mandac Jairo runami Jesuspacman shamurca. Paica Jesuspac ñaupapi cungurishpami:
—Ñuca huasiman jacuyari— nishpa, mailla mañarca.
42Chai runaca ancha ungushca, chunga ishcai huatayuc shuclla ushitami charirca. Jesús ña Jairohuan ricucpi, achca gentecunami paihuan pacta ñitirinacushpa ricurcacuna. 43Chaicunapurapica, chunga ishcai huatata yahuar cacharirishpa causac ungushca huarmimi c'aticurca. Chai huarmica jambiccunapacpi jambiricushpallami, tucui charishcacunata tucuchishca carca. Pi jambicpish paitaca mana alliyachishcachu carca. 44Chai huarmi huashata shamushpa, Jesuspac churana puntapi tuparicpica, yahuar shamunaca jarcarircallami. 45Chashna tuparicpimi Jesusca:
—¿Pitac ñucapi tuparinchu, imami?— nirca.
Shina tapucpi tucui gentecunaca:
—Pi mana tuparinchicchu— nircacuna.
Shina nicpi Pedropish, paihuan caccunapish:
—Yachachic, cai tucui gentecunami ñitirinacun. ¿Chashna cashca jahuachu ‘¿pitac tuparin?’ ningui?— nircacuna.
46Chashna nicpipish Jesusca:
—Ñucapi maijanchari tuparicpimi, ñuca alliyachiclla cashcahuan ña alliyachini— nirca.
47Chashna nicpi, chai alliyashca huarmica alliyashcata mana pacaipac cacpimi, manchaihuan chucchushpa shamushcahuan Jesuspac ñaupapi cungurirca. Chaimantaca paipac churanapi imapac tuparishcatapish, shinallatac tuparishcahuan alliyashcatapish chai tucui gentecunapac ñaupapimi huillarca. 48Chashna huillacpimi Jesusca:
—Huahua, can crishcamantami ña alliyashcangui. Cunanca cushicushpa rilla— nirca.
49Jesús chashna nicucllapitacmi, mandac Jairopac huasimanta shuc runa shamushpa, Jairotaca:
—Cambac ushica ñami huañun. ¿Imapactac Yachachictaca ashtahuan p'iñachicungui? Saquilla— nirca.
50Chashna nicta Jesús uyashpaca:
—Ama mancharichu, ñuca alliyachinata crilla. Cambac ushica causaringallami— nirca.
51Ña Jairopac huasiman chayashpaca, Jesusca Pedrota, Jacobota, Juanta, shinallatac huahuapac taita mamallatami pushashpa yaicurca. Ashtahuanca pita mana yaicuchircachu. 52Tucui chaipi cac gentecuna chai huahuamanta caparishpa huacacucpimi, Jesusca:
—Ama huacaichicchu. Huahuaca mana huañushcachu, suiñucunllami— nirca.
53Chashna nicpica, ña huañushca cashcata yachashcamantami, tucui chaipi caccunaca paita asircacuna. 54Ashtahuanpish Jesusca chai huañushcata maquimanta japishpaca:
—¡Huambra, jatari!— nishpami, sinchita nirca.
55Chashna nicpica causaita cuc espíritu cutimucpimi, chai huañushca huambraca causarishpa jatarirca.
Chashna jataricpimi Jesusca:
—Cunanca micunata caraichic— nirca.
56Chaita ricushpa, taita mama mancharishpa mana amiricucpimi, Jesús paicunataca:
—Cashna ruhuashcataca pacta piman huillanguichicman— nirca.
Quichua Cañar Nuevo Testamento © United Bible Societies in Ecuador, 1996.