SAN LUCAS 7
7
Soldadocunata mandacpac servicta Jesús alliyachishcamanta
(Mt 8.5-13)
1Jesús paita uyac gentecunaman ña tucuita parlashca q'uipaca, Capernaum pueblomanmi rirca. 2Chaipica, Roma*f** llactamanta pasac soldadocunata mandacpac c'uyashca, shuc servicmi ungushca ña huañugricurca. 3Chai mandacca Jesusmanta parlanacucta uyashpami, israelcunata*f** cunac yuyaccunataca:
—Ñucata servic runata alliyachingapac, ñuca huasiman Jesús shamushpa cuchun nigrichic— nishpa cacharca.
4-5Paicuna Jesuspacman chayashpaca:
—Soldadocunata mandacmi canta c'ayacun. Paica ñucanchic llactata c'uyacmi. Paillatacmi ñucanchic tandanacuna huasitapish shayachichirca. Chashna cashcamanta paimanpish allita ruhuashpa cuiyari— nishpa, mailla mañarcacuna.
6Jesús paicunahuan rishpa, ña huasiman chayagricucpica, chai soldadocunata mandacca paipac ricsishca shuc runacunatami Jesuspacman cashna nichun cacharca:
—Apunchic Jesús, cantaca mana p'iñachisha ninichu. ¿Ñuca ima alli cacpitac, ñuca huasimanca shamugringuiyari? 7Chashna cashpami, ñucallatac c'ayangapacllapish mana rircani. Chashna cacpipish alliyachun nillari. Chaipica ñuca servicca alli tucungallami. 8Ñucapish mandaccunapac mandashca, soldadocunata mandacllami cani. Maijan soldadota ñuca ‘ri’ nicpica, rinllami. Cutin maijanta ‘shamui’ nicpipish, shamunllami. Shinallatac ñuca servictapish ‘imata ruhuai’ nicpica, ruhuanllami— nishpa, nichun cacharca.
9Chashna nicta Jesús uyashpaca, mana amirishpami, paita c'aticcunata tigraricushpa:
—Cashna alliyachina cashcata crictaca, israelcunapurapish mana tarishcanichu, chaica chashnatacmi— nirca.
10Chai cachashcacuna huasiman cutimushpaca, ungushcataca ña alli tucushcatami ricurcacuna.
Shuc viudapac c'ari huahuata Jesús causachishcamanta
11Chai q'uipami Jesusca Naín puebloman paipac yachacuccunandic, shinallatac achca gentecunandic ricurca. 12Jesús chai puebloman ña yaicugricucpimi, gentecuna shuc huañushca huambrata enterrangapac huandushpa ricurcacuna. Chai huañushcaca viuda huarmipac shuclla c'ari huahuami carca. Chai pueblopi causaccunaca achcacunami llaquinacushpa, enterrangapac chai huarmihuanca ricurcacuna. 13Apunchic Jesusca chai viuda huarmi huacacucta ricushpa llaquishpami:
—Ama huacaichu— nirca.
14Shina nishpa Jesús cuchuyashpaca, chai huandushcapimi tuparirca. Chashna tuparicpica, huandushpa riccunapish shayarircacunami. Chashna cacpimi Jesusca chai huañushcataca:
—Huambra, cantami jatari nini— nirca.
15Chashna nicpimi, chai huañushca huambraca tiyarishcahuan parlai callarirca. Jesusca chashna causachishpami, mamaman curca. 16Chashna ruhuacta ricushpaca, tucui chaipi cac gentecunami mancharishpa:
—Cai ñucanchicpurapica, Diosmanta jatun huillacmi ricurishca. Pai acllashca gentecunataca, Taita Diosmi llaquishpa ricungapac shamushca— nishpami, Taita Diostaca “allimari cangui” nircacuna.
17Jesús chashna ruhuashcataca Judea llactapi causaccunapish, tucui muyundic llactacunapi causaccunapish tucui mashnami yachac chayarcacuna.
Bautizac Juanpac yachacuccuna Jesusman tapushcamanta
(Mt 11.2-19)
18Jesús chashna ruhuashcacunataca, Bautizac Juanpac yachacuccunami Juanmanpish parlarcacuna. 19Chaimantami Juanca paipac yachacuccunamanta ishcaita c'ayarca. Paicunataca: “ ‘¿Canchu chai shamuna cashca Quishpichic Cristoca cangui? Mana cashpaca, ¿shuctachu shuyana canchic?’ tapugrichic” nishpami, Jesuspacman cacharca. 20Ña Jesuspacman chayashpaca:
—‘¿Canchu chai shamuna cashca Quishpichic Cristoca cangui? Mana cashpaca, ¿shuctachu shuyana canchic?’ nishpami, Bautizac Juanca tapuchun cachan— nircacuna.
21Chai tapuccuna chaillapitac cacpimi, Jesusca imapish ung:uihuan llaquilla causaccunatapish, supai japishcacunatapish, shinallatac ñahui mana ricuccunatapish achcacunata alliyachirca. 22Chashna Jesús ña alliyachishpaca:
—Juanmanca cancuna imata ricushcatapish, uyashcatapish huillagrichic. Ñahui mana ricuccuna ricucushcatapish, suchucuna alli puricushcatapish, lepra*f** ung:uihuan ungushcacuna alliyashcatapish, rinri mana uyaccuna uyacushcatapish, huañushcacunata causachishcatapish, shinallatac huacchacunaman alli huillaita huillashcatapish huillagrichic. 23Maijanpish ñuca ima ruhuacushcata ricushpa, crishpa mana pandaricmanca, mai cushicuimi— nirca.
24Juan cachashcacuna Jesusman tapushpa ricpica, chaipi caccunaman Juanmanta Jesús parlashpaca:
—Cancunaca shitashca pambapica, ¿imatatac ricugrircanguichic? ¿Huairahuan caiman chaiman cuyucuc carrizollatachu ricugrircanguichic? 25Mana cashpaca, ¿imatatac ricugrircanguichic? ¿Shuc alli churanata churashca runatachu ricugrircanguichic? Chashna alli churanata churashcacunaca, chayuccunahuanmi cushicushpa, jatun mandaccunapac huasicunapi causan. 26Shinashpaca, ¿imatatac ricugrircanguichic? ¿Diosmanta huillactachu ricugrircanguichic? Ari, chaitami ricurcanguichic. Juanca Diosmanta huillacmantapish yallimi. 27Dios quillcachishcapi Juanmanta rimashpaca:
‘Ñucamanta huillactaca,
Quishpichic shamuna ñanta
allichichunmi ñaupachishpa cachani’ ninmi.
28Cai pachapica, Bautizac Juanmanta yalli alli huillacca manatac tiyashcachu. Chashna cacpipish jahua pacha Taita Dios mandacucpica, yangalla, imapish mana cacmi Juanta atishpa alli nishcaca. Chaica chashnatacmi can— nirca.
29(Juan huillashcata uyashpami, tucui chaipi cac gentecunapish, impuestota japiccunacaman Taita Dios cashcata ruhuac cashcata yachashpa Juan bautizacucpica, paicunapish bautizarircacuna. 30Ashtahuanpish fariseocunapish,*f** shinallatac mandashcacunata yachachiccunapish Taita Dios ima shina paicunaman allita ruhuasha nishcataca mana chasquishun nishpami, Juan bautizacucpica, mana bautizarircacuna).
31Chaimantami Apunchic Jesusca:
—Cunan cai punzhapi causaccunataca, ¿imahuan chimbapurashpatac nisha? ¿Ima shinatac cac yuyachin? 32Paicunaca plaza pambapi pucllacuc huambracuna shuc huambracunata caparishpa: ‘Flautapi tocacpipish, mana bailarcanguichicchu. Llaquillata cantacpipish, mana huacarcanguichicchu’ nic shinami. 33Chashnallatacmi vinota mana ubiac, micunatapish mana micuc Bautizac Juan shamucpica, cancuna paitaca: ‘Supaihuanmi can’ ninguichicmi. 34Shinallatac Runa Tucungapac shamushca*f** ñuca chayamushpa, imatapish micuc, vinotapish ubiac cashcamanta cancunaca: ‘Cai runaca imatapish yalli micuclla, vinotapish ubiaclla, impuestota japiccunahuanpish, ñucanchic ch'icanyachishca caishuc juchayuc gentecunahuanpish tandariclla’ ninguichicmi. 35Cancuna chashna nicucpipish, Taita Dios yachac cashcataca paita cazuccunami allita ruhuashpa ricuchicuncuna— nirca.
Simón fariseopac huasipi Jesús cashcamanta
36Chai q'uipami, fariseocunapuramanta*f** shuc runa Jesustaca: “Jacu, ñuca huasipi micungui” nirca. Chashna nicpi ña rishpaca, micungapac mizapi tiyarirca. 37Chai fariseopac huasipi Jesús micucucta yachashpami, chai pueblopi millaillapi causac shuc huarmica, alabastro rumimanta ruhuashca botella junda mishquilla ashnacucta apashpa shamurca. 38Chai huarmica Jesuspac huashata shamushpami cuchuyarca. Chaiman cuchuyashpaca munai huacashpami, huiquihuan chaquita jucuchirca. Chaimantaca acchahuan chaquichishpami, chaquipi mucharca. Chashna muchashca q'uipaca, pai apamushca mishquilla ashnacuctami Jesuspac chaquipi churarca. 39Chashna ruhuacta ricushpami, micungapac Jesusta c'ayac fariseoca: “Cai runaca Diosmanta huillactac cashpaca, ima shina causac huarmi paipac chaquipi tuparicuctaca yachanmanchari. Cai huarmica millaillapi causac huarmimi” nishpami yuyacurca.
40Chashna yuyacucta Jesús yachashpami, chai fariseotaca:
—Simón, canmanca shuc imallatami nisha nini— nicpi fariseoca:
—Nilla, Yachachic— nirca.
41Chashna nicpi Jesusca:
—Ishcai runacunami cullquita mañachic shuc runaman cullquita mañashcata charirca. Shucca pichca pasac denario*f** cullquita, caishucca pichca chunga denario cullquitami mañashcata charirca. 42Chai cullquita mañaccuna mañashca cullquita mana cutichi pudicpimi, cullquita mana chasquishpa saquircalla. Chashna saquicpi chai ishcai runacunamantaca, cullquita mañachic runataca, ¿maijantac ashtahuan c'uyanga?— nirca.
43Jesús chashna tapucpi Simonca:
—Maijanmi ashtahuan achcata mañac runami ashtahuan c'uyanga, yuyanimi— nirca.
Shina nicpi Jesusca:
—Ari, allitami nishcangui— nirca.
44Chashna nishpaca, chai huarmita ricuchishpami, Jesusca Simontaca:
—¿Cai huarmi ima ruhuacta ricunguichu? Ñuca cambac huasiman yaicumucpica, chaquita jahuangapacca yacullatapish mana curcanguichu, ashtahuanpish cai huarmica paipac huiquihuanmi ñuca chaquitaca jucuchishpa acchahuan chaquichin. 45Canca ñucataca: ‘Allillachu cangui’ nishpapish mana mucharcangui, ashtahuanpish cai huarmica yaicumushcahuanmi, ñuca chaquita muchanata mana saquishca. 46Canca aceitehuanpish ñuca umapica mana churarcanguichu, ashtahuanpish cai huarmica mishquilla ashnacuctami ñuca chaquipica churan. 47Chaimantami cantaca cashna nini: Paipac achca juchacunata perdonashca cashcamantami, paica ashtahuan c'uyan. Ashtahuanpish ashalla juchacunata perdonashcacunaca, ashallatami c'uyan— nirca.
48Shina nishpa chai huarmitaca:
—Cambac juchacunataca ña perdonanimi— nirca.
49Shina nicpimi, Jesushuan mizapi micucuccunaca:
—Cai runaca, ¿pi cashpatac ‘cambac juchacunataca ña perdonanimi’ ninyari?— ninacurcacuna.
50Chashna ninacucucpipish, Jesusca chai huarmitaca:
—Can crishcamantaca, ña quishpichishcami cangui. Cunanca cushicushpa rilla— nirca.
Quichua Cañar Nuevo Testamento © United Bible Societies in Ecuador, 1996.