SAN MATEO 20
20
Jun techel cyiꞌj ke akꞌanal
1Bix e xiꞌ tkbaꞌntl Jesús cye t-xnakꞌatz:
—Jpjel oj tul tcawbil Dios tisenj e baj jun maj tuj tawal jun xjal taaw txꞌotxꞌ. Ex taaw txꞌotxꞌ te kskix jyol akꞌanal tuꞌn cyakꞌanan tuj tawal. 2E binttzen tiꞌj tuꞌnxin cyuya t-akꞌanalxin jun denario pwak twiꞌ cycꞌuꞌj jun kꞌij. E cycuya akꞌanal, bix e xiꞌ tsmaꞌnxin ejeeꞌ tuj tawalxin.
3Tej tpon beljaj hora te klax, ex taaw txꞌotxꞌ juntl maj, bix e tilxin cab xjal eteꞌ tuj plaza mintiiꞌ cyaakꞌen. 4Bix e xiꞌ tkbaꞌnxin cye: “Jax juꞌx cyey, cyucxa cyey tuj wawala tuꞌn cyakꞌanana, bix oj tex kꞌij, cxeꞌl nkꞌoꞌna cykꞌija,” tz̈ixin.
Bix exkexin akꞌanal.
5Tej tpon chil kꞌij, juntl maj ex taaw txꞌotxꞌ jyol akꞌanal. Bix te oxe hora te kale, e jyonxin akꞌanal tuꞌn cyakꞌanan tuj tawalxin. Bix te cykilca akꞌanal, e xiꞌ tkbaꞌnxin tuꞌn t-xiꞌ tkꞌoꞌnxin cyexin cykꞌijxin.
6Tejtzen tpon tajlal jweꞌ hora te kale, juntl maj e xiꞌxin cyxol xjal, bix e cnet juun xjal tuꞌnxin mintiiꞌ cyaakꞌen. Bix e xiꞌ tkbaꞌnxin cyexin: “¿Tuꞌn tiken nuk n-ex cykꞌija waꞌlkey tzalu?” tz̈ixin.
7E xiꞌ cytzakꞌbeꞌnxin: “Min-al jun xjal ma tzaj tkꞌoꞌn kaakꞌena,” tz̈ikexin.
E xiꞌ tkbaꞌnxin: “Cyucxa cyey cyuya juntl wakꞌanala tuj wawala, bix oj tbaj kꞌij, cxeꞌl nkꞌoꞌna cykꞌija,” tz̈ixin.
8Tejtzen tex kꞌij, e xiꞌ tkbaꞌn taaw txꞌotxꞌ te tmayordomo: “Txcontza ke akꞌanal bix kꞌonxa twiꞌ cycꞌuꞌj. Nejl, kꞌonxa twiꞌ cycꞌuꞌj kej akꞌanal e xiꞌ akꞌanal te yaj. Ja tzunj kej ẍi akꞌ akꞌanal nejl, mancꞌbiltzen cxeꞌl tkꞌoꞌna twiꞌ cycꞌuꞌj,” tz̈ixin.
9Tejtzen cyul kej akꞌanal otk chi akꞌ akꞌanal te jweꞌ tajlal te kale, teeyle juun e cyiikꞌ jun denario. 10Juꞌ tzunj, tej cyul kej akꞌanal otk chi akꞌ akꞌanal te klax, tuj cywitz at tuꞌn cychjet mas twiꞌ cycꞌuꞌj. Pero juꞌx e chjeteke tuꞌn junx denario. 11Tej cyiikꞌente twiꞌ cycꞌuꞌj te jun denario, e jaw yolenke tiꞌ taaw txꞌotxꞌ. 12E xiꞌ cykbaꞌnxin: “Kej xjal lu ẍi pon akꞌanal te mancꞌbil, nuk junx hora ẍi akꞌanan. Pero ma txiꞌ tkꞌoꞌna jun twiꞌ cycꞌuꞌj tisenx keya, bix ma ko sicta tuj akꞌuntl bix ma tziyꞌx tiꞌ kꞌij cykil kꞌij kuꞌna,” tz̈ikexin.
13Pero aj ttzakꞌbeꞌnxin te jun cyxolxin: “Jay wuyena, mintiiꞌ kaꞌ tzin nbinchaꞌna cyey. ¿Yaaꞌmpatzen xbint tiꞌj kuꞌn tuꞌn jun denario pwak twiꞌ tcꞌuꞌja? 14Kꞌinxa twiꞌ tcꞌuꞌja, bix cutxey. Cyej akꞌanal ẍi pon akꞌanal te mancꞌbil, waja txiꞌ nkꞌoꞌna jun twiꞌ cycꞌuꞌj junx tuyey. 15Inayena taaw ntxꞌotxꞌa bix taaw npwaka. ¿Yaaꞌmpa tumel tuꞌn nbinchantiya alcye waja tiꞌj jweya? ¿Tiken ma tzaj tkꞌoja tuꞌn ma txiꞌ nkꞌoꞌna wanema cyej xjal lu?” tz̈i taaw txꞌotxꞌ te jun akꞌanal.
16Juꞌ tzunj, nim xjal nintzaj tuj cywitz jaꞌlewe, chi oqueltzen te chꞌin tuj mancꞌbil kꞌij. Bix nim xjal yaaꞌn nintzaj jaꞌlewe, chi oqueltzen te nintzaj laꞌ alcye jun kꞌij―tz̈i Jesús cye t-xnakꞌatz.
Tej tyole Jesús juntl maj ka tuꞌn tcyim
(Mr. 10:32-35; Lc. 18:31-34)
17Tej chꞌitk tpon tumel tuꞌn t-xiꞌ Jesús tuj Jerusalén, ex ttxcoꞌnxin ke cablaaj t-xnakꞌatzxin cyjunalxxin tuj be, bix e xiꞌ tkbaꞌnxin cyexin:
18—Cybintz nyola. Ko xeꞌl tuj tnom te Jerusalén, jaaꞌj chin xeꞌla kꞌoꞌn tuj cykꞌab ke nejenel cye pala bix ke txꞌolbal ley. Ejeeꞌ tzunxin chi kbalte tuꞌn nbyeta, 19bix cxeꞌl cykbaꞌn tuꞌn nxiꞌ kꞌoꞌna tuj cykꞌab nmak xjal te Roma. Ejeeꞌtzen xinj chi oquel xmucchante weya, inayena, jxjal Smaꞌn tuꞌn Dios tuꞌn ntena cyuya xjal. Cxeꞌl cykꞌoꞌn kej xjal yaaꞌn judío lu tzꞌuꞌn wiꞌja, bix chin cwel cybyoꞌna twitz cruz. Pero te toxen kꞌij ncyimlena oj njaw itzꞌjtla juntl maj―tz̈i Jesús.
Tej t-xiꞌ tkane cytxu Juan bix Jacobo jun xtalbil te Jesús
(Mr. 10:35-45)
20E pontzen twitz Jesús t-xuꞌl jxin Zebedeo cyuya talxuj, Juan bix Jacobo. E tajbexuj tuꞌn t-xiꞌ tkanenxuj jun xtalbil, bix e cub majexuj twitzxin. 21Bix e xiꞌ tkbaꞌnxin texuj:
—¿Alcye taja?
Aj ttzakꞌbeꞌnxuj:
—Oj toc tey te cawel, waja tuꞌn cycawen kej caꞌba wala lu tuyey, jun tuj tmankꞌaba bix juntl tuj tneẍa―tz̈ixuj.
22Pero aj ttzakꞌbeꞌn Jesús:
—Min tzꞌel cyniꞌya tiꞌj ti jilel ntzaj cykanena weya. ¿Jacꞌapatzen tziyꞌx cyey cyuꞌn oj tiyꞌ aꞌ cycꞌuꞌja tisenj at tuꞌn tiyꞌx wuꞌna?―tz̈ixin.
Bix aj cytzakꞌbeꞌnxin:
—Cbinel ke kuꞌn―tz̈i tzunkexin.
23E xiꞌ tkbaꞌnxin cyexin:
—Jax cyuꞌna qꞌuiyal aꞌ cycꞌuꞌja cyuꞌna tisenj weya. Yaltzen cykanbila weya, yaaꞌn inayenwe chin kbalte al ccawel wuyena oj woca te cawel. Jatzen ma txiꞌ kꞌoꞌn tuꞌn Nmana te alcyekej tuꞌn cycub ke ntxlaja tuꞌn cycawen wuyena―tz̈ixin.
24Toctzen cybiꞌn jlaajtlxin t-xnakꞌatz Jesús tyol Jacobo tuya Juan, bix oc chiꞌl chꞌinkexin. 25Pero e tzaj ttxcoꞌn Jesús cykilcakexin, bix e xiꞌ tkbaꞌnxin cyexin:
—Cytzkiꞌntl tzuna kej cawel te twitz txꞌotxꞌ nchi cawen tuꞌn t-xiꞌ cyyeecꞌan nim cyajwalel cye xjal. Bix cyiw nchi oc cyiꞌ xjal tjakꞌ cycawbil. 26Perotzen cyey cyxol, yaaꞌntzen juꞌ ctemela tewa. Al tzunj taj tuꞌn tten nintzaj cyxola, cꞌoquel tipen tiꞌj tuꞌn tajben cyey. 27Bix alcye taj tuꞌn toc te nejenel cyxola, nejl cꞌoquel te tajbel te cykilcatl cyey. 28Chi oquela tisen weya. Min in ula tuꞌn cyajben xjal weya. Nuk oꞌcx in ula tuꞌn wajbena cye xjal, bix tuꞌn t-xiꞌ nkꞌoꞌna nchunkꞌlala tuꞌn cycoꞌpj nim xjal tuj tkꞌab il―tz̈i Jesús.
Tej tul tnaabl cywitz caꞌba mos̈ tuꞌn Jesús
(Mr. 10:46-52; Lc. 18:35-43)
29Yajcꞌatltzen, bix e pon Jesús cyuya t-xnakꞌatz tuj tnom te Jericó. Tejtzen cyetz Jesús tuj Jericó, nimxsen xjal oc lpe tiꞌjxin. 30Attzen caꞌba xjal mos̈ kꞌuklcꞌa ttziiꞌ be. Tej cybintexin tzul Jesús, e jawxsen s̈-inkexin:
—Taat, tiyꞌjil David, kꞌontza lastim keya―tz̈ikexin.
31Kej xjal eteꞌ tuya Jesús, oc ilente ke mos̈ tuꞌn miꞌn tzꞌel cywiꞌ. Pero mas el cys̈iꞌnxin cywiꞌxin, bix e xiꞌ cykbaꞌnxin juntl maj:
—¡Taat, tiyꞌjil David, kꞌontza lastim keya!―tz̈ikexin.
32Tej toc tbiꞌn Jesús ke mos̈, bix e weꞌxin, bix e xiꞌ tsmaꞌnxin xjal tuꞌn t-xiꞌ cyiiꞌn ke mos̈ twitzxin, bix e xiꞌ tkbaꞌnxin cyexin:
—¿Ti cyaja tuꞌn tbint wuꞌna cyiꞌja?―tz̈ixin.
33Bix aj cytzakꞌbeꞌnxin texin:
—Taat, kꞌontza keya tuꞌn kcyeꞌyena―tz̈ikexin.
34Bix e jaw tlastim Jesús cyiꞌjxin, bix oc tmocoꞌnxin tbakꞌ cywitzxin. Bix n-ultl tnaabl tbakꞌ cywitzxin, bix akꞌ xeꞌl lpekexin tiꞌjxin.
© 2000, Wycliffe Bible Translators, Inc. All rights reserved.