SAN MATEO 19
19
Tej tyole Jesús tiꞌj paxjlenel
(Mr. 10:1-12; Lc. 16:18)
1Tejtzen tbaj tkbaꞌn Jesús kej yol lu cye t-xnakꞌatz, etzxin tuj Galilea, bix e xiꞌxin tuj jun lugar nka departamento te Judea jlajxe nimaꞌ Jordán. 2Bix nimxsen xjal oc lpe tiꞌjxin, bix e cub tkꞌaꞌnexin kej xjal yaab jatzewe. 3Bix e pon cabxin fariseo tuyaxin. Nuktzen ti cyajaxin tuꞌn tcub tzꞌakxin tuj tyolxin. Juꞌ tzunj, e xiꞌ cykanenxin texin:
—¿Kꞌoꞌnpale tuꞌn ley tuꞌn tel tpaꞌn tiib jun xinak tiꞌ t-xuꞌl nuk tuꞌn tlaj jun tiixjatiꞌ?―tz̈ikexin.
4Bix aj ttzakꞌbeꞌnxin cyexin:
—¿Bajxpa jaw cys̈iꞌna tuj tyol Dios ti toc tuꞌn Dios tiꞌj jun moj xjal tej tbint tuꞌn? Tzin tkbaꞌn tyol Dios cyjulu: “E cub tbinchaꞌnte Dios xinak tuya xuuj. 5Juꞌ tzunj cyjela tkꞌoꞌn xinak tman bix ttxu tuꞌn toc maje tuya xuuj. Cycaꞌbeltzen chi elel tisen junx xjal bix tuꞌn cyel junx,” tz̈i tyol Dios. 6Juꞌ tzunj, yaaꞌn caꞌbatl cybet, sino tisen jun xjal mlay tzꞌel pax. Juꞌ tzunj, j-o tzꞌoc tmojbaꞌn Dios te junx, yaaꞌn tuꞌn tcub cypaꞌn cyiib―tz̈i Jesús cyexin.
7E xiꞌ cykbaꞌnxin texin:
—¿Tikentzen e tcuya te Moisés tuꞌn t-xiꞌ tkꞌoꞌn xinak jun uꞌj te xuuj tzin tkbaꞌn otk chi cub pax?―tz̈ikexin.
8Bixse aj ttzakꞌbeꞌn Jesús cyexin:
—Juꞌtzen tcyajlen tkbaꞌn Moisés tuꞌn tex cylojoꞌna cyxuꞌla, pero tuꞌn cyyuwinela. Pero tuj tneel yaaꞌn juꞌ tewa. 9Jatzen weya, cxeꞌl nkbaꞌna cyey, alj ma tzꞌel tpaꞌn tiib tiꞌ t-xuꞌl, bix ka mintiiꞌ nbint tuꞌn t-xuꞌl, bix ma maje tuya juntl xuuj, tzin tbinchaꞌn pajlel―tz̈ixin.
10E xiꞌ cykbaꞌn t-xnakꞌatz Jesús te:
—Ka juꞌ tten xinak tuya xuuj, masetpele baꞌn tuꞌn miꞌn maje jun xjal tuya jun xuuj―tz̈ikexin.
11Pero aj ttzakꞌbeꞌnxin cyexin:
—At juun xjal mas baꞌn tuꞌn miꞌn chi maje tuya jun xuuj. Pero mlay bint tuꞌn cykilca xjal tuꞌn miꞌn maje, nuk oꞌcx kej xjal ma kꞌoj tuꞌn Dios tuꞌn miꞌn chi maje. 12At juun xjal mlay tuꞌn cymaje cuma cyitzꞌjlenx mixbe tuꞌn cyoc ipan cyiꞌ xuuj. At juuntl xjal mlay tuꞌn cymaje cuma ma chi cpet cyuꞌn xjal. Bix at juuntl xjal ma tzꞌoc cykꞌon cyiib tuꞌn miꞌn chi maje nuk tuꞌn cyajben te Dios tuꞌn ttz̈ꞌiy tcawbil Dios. Alcyej xjal jacꞌa bint jlu tuꞌn, e tbinchante―tz̈i Jesús.
Tej tcub tcyꞌiwlaꞌn Jesús ke neeꞌ
(Mr. 10:13-16; Lc. 18:15-17)
13Yajcꞌatltzen, bix e xiꞌ cyiiꞌn xjal ke cyneeꞌ twitz Jesús, tuꞌntzen tcub tkꞌoꞌnxin tkꞌabxin cyibaj, bix tuꞌn tnaꞌnxin Dios cyiꞌj. Pero bix akꞌ ke t-xnakꞌatzxin te cawlec cye xjal.
14Pero e xiꞌ tkbaꞌn Jesús:
—Cytzakpiꞌnctz kej neeꞌwa tuꞌn cytzaj wiꞌja, cuma nuk ka juꞌ tanem jun xjal tisen ejeeꞌ neeꞌwa, baꞌntzen tocx tuj tcawbil Dios―tz̈ixin.
15Bix e cub tkꞌoꞌnxin tkꞌab cyibaj neeꞌ, bix exxin.
Tej tyole junkꞌa cwal kꞌina tuya Jesús
(Mr. 10:17-31; Lc. 18:18-30)
16Ultzen junkꞌa xjal tuya Jesús, bix oc tkanenkꞌa te:
—Xnakꞌtzal baꞌn, ¿alcye baꞌn cbinel wuꞌna tuꞌn ncamana nchunkꞌlala te junx maj?―tz̈ikꞌa.
17Aj ttzakꞌbeꞌn Jesús tekꞌa:
—¿Tikentzen nchin oca tkꞌoꞌna te baꞌn? Min-alte jun xjal baꞌn. Nuk ja te Dios baꞌn. Yal tzunj tkanbila, ka taja tuꞌn tcamana tchunkꞌlala te junx maj, nimanx kej mandamyent e cyaj tkꞌoꞌn Dios―tz̈i Jesús.
18Bix e xiꞌ tkanenkꞌa:
—¿Alcyetzen ke mandamyent tuꞌn tbint wuꞌna?
Bix e xiꞌ tkbaꞌn Jesús:
—Miꞌn chi byona xjal. Miꞌn chi jyona juntl xuuj te pajbaj. Miꞌn chi alkꞌana. Miꞌn chi ẍtakꞌena. 19Chi nimala twitz cymana bix cytxuy. Bix cꞌoquelxix takꞌ jun xjal cyey tisen n-oc cyey cyakꞌ cyey―tz̈i Jesús.
20Bix e xiꞌ tkbaꞌn jkꞌa xjal te Jesús:
—Cykilcaj lu o bint wuꞌna. ¿Alcyetzen juntl minaꞌx tbint wuꞌna?―tz̈ikꞌa.
21E xiꞌ tkbaꞌn Jesús tekꞌa:
—Ka taja tuꞌn toca tzꞌaklxix, qꞌueyex tikꞌch tey, bix kꞌonxse twiꞌ cye mebe. Juꞌtze cnetela tkꞌinemala tuj cyaꞌj. Ojtzen tbint tuꞌna, lpetztzen wiꞌja―tz̈i Jesús.
22Tej tbintekꞌa jyol lu, e tzaj tbiskꞌa bix exkꞌa, cuma kꞌina xsunkꞌa.
23Bix e xiꞌ tkbaꞌn Jesús cye t-xnakꞌatzxin:
—Jaxxix cxeꞌl nkbaꞌna cyey, cyiwxsen tuꞌn tocx jun kꞌina tuj tcawbil Dios. 24Cxeꞌl nkbaꞌntl cyey, mas cyiw tuꞌn tocx jun kꞌina tuj tcawbil Dios twitzj tuꞌn tex junjil tz̈ej tuj tẍyoꞌp bak―tz̈ixin.
25Toctzen cybiꞌn t-xnakꞌatzxin jlu, e jaw kleeꞌkexin, bix e xiꞌ cykanenxin:
—Ka juꞌ ttena, ¿titzen tten tuꞌn tclet jun xjal?―tz̈ikexin.
26Toctzen tcyeꞌyenxin ejeeꞌxin, bix e xiꞌ ttzakꞌbeꞌnxin:
—Cye xjal, mlay bint cyuꞌnx tuꞌn cyocx tuj tcawbil Dios. Pero jatzen te Dios, cykilca baꞌn tbint tuꞌn―tz̈ixin.
27Bix akꞌ Pedro kbalxte texin:
—Taat, ttzkiꞌna o cyaj kkꞌoꞌna tikꞌch keya tuꞌn koc lpeya tiꞌja. ¿Alcyetzen ctzaal kꞌoꞌn keya?―tz̈i Pedro.
28Aj ttzakꞌbeꞌn Jesús:
—Jaxxix cxeꞌl nkbaꞌna cyey, oj toc cykilca te acꞌaj, bix oj ncub keya tuj nkꞌukbila jawnex tuꞌn ncawena tibaj cykilca, jax juꞌx cyey, ejeeꞌy ma chi oc lpeya wiꞌja, ckꞌojel cyey tuꞌn cycub key tuj cykꞌukbila tuꞌn cycawena cyibaj jcablaaj cloj tiyꞌjil Israel. 29Bix alcyej nuk wiꞌja ma cyaj tkꞌoꞌn tja, bix ma titzꞌen, ttzicy, tman, ttxu, ke tcwal, ttxꞌotxꞌ, nimxsen ctzaal kꞌoꞌn te, bix ctiikꞌeltzen tchunkꞌlal te junx maj. 30Pero nim xjal nintzaj jaꞌlewe, ejeeꞌ tzunj chi oquela te chꞌin tuj tcawbil Dios. Bix nim xjal yaaꞌn nintzaj jaꞌlewe, ejeeꞌ tzunj chi oquel te nintzaj tuj tcawbil Dios tzul―tz̈i Jesús.
© 2000, Wycliffe Bible Translators, Inc. All rights reserved.