SAN MATEO 21
21
Tej tocx Jesús tuj tnom Jerusalén
(Mr. 11:1-11; Lc. 19:28-40; Jn. 12:12-19)
1Tejtzen cypon Jesús tuj tnom te Betfagé, jun cocꞌ tnom tcub t-xeeꞌ jwitz Olivos tbi bix nka Jerusalén, e xiꞌ tsmaꞌn Jesús caꞌba t-xnakꞌatz. 2E xiꞌ tkbaꞌnxin cyexin:
—Cyucxatzen tuj jniꞌ tnom n-oc kcyeꞌyen jatzewe. Oj cypona, cꞌoquel cycyeꞌyena junjil bur yoꞌlecjil, bix tuyax jun taljil ttxlajjil. Cypjumeltzen cycaꞌbeljil, bix cyiiꞌntz tzalu. 3Katzen al ma tzꞌoc kanente cyey tiken n-el cypjuꞌna ke jila, cxeꞌl cykbaꞌna: “Ejeeꞌ jilja chi cꞌajbel te Kaawa,” tz̈i cybela, bix chi tzaal tkꞌoꞌn naj texin ejeeꞌjil―tz̈ixin.
4E baj jlu tuꞌntzen tel jax j-e tkba Dios tuꞌnj tyolel jatxe ootxa. E tkba Dios te tyolel cyjulu: 5“Kbanx cye xjal te Israel aj Sión cyjulu: ‘Cꞌulel Cycawela cyuyey. Maansxin, bix tjaxxin tibaj jun tal bur ikel iktz oj tulxin,’ tz̈i tbela,” tz̈i Dios te tyolel.
6Bix e xiꞌkexin, bix e cybinchaxin tisen e xiꞌ tkbaꞌn Jesús cyexin. 7Bix e xiꞌ cyiiꞌnxin bur tuyax taljil te Jesús, bix e jax cykꞌoꞌnxin cyxbalenxin tuj tzalcyiꞌjjil te jun kꞌukbil, bix e jax cykꞌoꞌnxin Jesús tibaj xbalen. 8Bix e xiꞌ bet bur, bix nimxse xjal e bet tuyaxin, bix e cub cykꞌoꞌn cyxbalen tuj tbexin. Atl xjal el cytxꞌomen tkꞌab xaꞌj tuꞌn tcub cykꞌoꞌn tuj tbexin. 9Bix cykilcaxsen xjal nejl twitzxin bix lepch tzinxsen nchi s̈-in:
—¡Tcyꞌiwlanxit tchman David, jaj Kcawel! ¡Chjonte te Dios tiꞌj ja xjal lu o tzul smaꞌn tuꞌnxin te cawel! ¡Jawxit nimset tbi Kaaw Dios tuj cyaꞌj!―tz̈i ke xjal.
10Tejtzen tocx Jesús tuj Jerusalén, e jaw kleeꞌ ke xjal tiꞌj tnimal xjal nchi ocx lpe tiꞌj Jesús, bix e xiꞌ cykbaꞌn:
—¿Alcye ja xjal lu?
11Bix aj cytzakꞌbeꞌn kej xjal lepchec tiꞌj Jesús:
—Ja te Jesús tyolel Dios, aj Nazaret tuj Galilea―tz̈i ke xjal.
Tej tetz tlojoꞌn Jesús ke qꞌueyel tuj tja Dios
(Mr. 11:15-19; Lc. 19:45-48; Jn. 2:13-22)
12Bix ocx Jesús tuj nin tja Dios bix etz tlojoꞌnxin kej xjal eteꞌcx lokꞌol bix qꞌueyel tuj tja Dios. Bix e jaw tpacꞌtzꞌenxin kej mes cyej xjal chꞌixpul twitz pwak tuyax cykꞌukbil cyej xjal nchi qꞌueyen cucuꞌ. 13Bix e xiꞌ tkbaꞌnxin cyexin:
—Tzin tkbaꞌn tyol Dios cyjulu: “Il tiꞌj tuꞌn tajben njaya te nablte nbiꞌya,” tz̈i Dios. Pero cyey, ma tzꞌoc cykꞌoꞌna te jun cyja alakꞌ―tz̈ixin.
14Bix ultzen kej xjal mos̈ bix kej xjal cox tuya Jesús tuj tja Dios, bix e cub tkꞌaꞌnexin cykilca. 15Pero cyej nejenel cye pala bix cyej txꞌolbal ley, tej cylonte jjawnex tipemal e xiꞌ tyeecꞌan Jesús, bix tej cylonte hasta ke neeꞌ nchi s̈-in tuj tja Dios: “¡Tcyꞌiwlanxit tchman David, jaj Kcawel!” e tzaj cykꞌoj tiꞌ Jesús. 16Bix e xiꞌ cykbaꞌnxin texin:
—¿Tzimpa tbiꞌna jnxiꞌ cykbaꞌn kej neeꞌ lu?―tz̈ikexin.
Bix aj ttzakꞌbeꞌnxin:
—Tzin. Yajtzen cyey, ¿bajxpa jaw cys̈iꞌna tuj tyol Dios ti toc tuꞌn tiꞌj lu? Tzin tkbaꞌn cyjulu: “Te cyej neeꞌ bix ẍlak nchi chꞌuꞌn, o txiꞌ tkꞌoꞌna tuꞌn tjaw cynimsaꞌn tbiꞌya,” tz̈i jun xjal te Dios―tz̈i Jesús.
17Bix e cyaj tkꞌoꞌnxin ke xjal, bix etzxin cyuya t-xnakꞌatzxin tuj tnom te Jerusalén, bix e ponxin tuj tnom te Betania, jatztzen e cyjaꞌxin te koniyan.
Tej ttzkij tken higo tuꞌn tyol Jesús jaj mintiiꞌ twitz
(Mr. 11:12-14, 20-26)
18Tetzen juntl kꞌij te klax, tej cypon meltzꞌaj Jesús tuj Jerusalén, oc takꞌ weyaj texin tuj be. 19E xiꞌ tcyeꞌyenxin jun wiꞌ loꞌpj higuera tcub ttziiꞌ be. Pero tejtzen tpon lkꞌexin tiꞌ tken higuera, mintiiꞌ twitz e cnet tuꞌnxin. Nuk oꞌcx t-xaak at. Juꞌ tzunj, e xaꞌ tkbaꞌnxin te tken higuera:
—Junxse maj mlayx tzꞌoctl twitza―tz̈ixin. Bix tujx naj e tzkij jtken higuera.
20Tej cylonte t-xnakꞌatzxin ti otk baj, e jaw kleeꞌkexin, bix e xiꞌ cykanenxin:
—¿Titzen tten xtzkij tken higuero tujx naj?―tz̈ikexin.
21Bix aj ttzakꞌbeꞌn Jesús cyexin:
—Jaxxix cxeꞌl nkbaꞌna cyey, ka ma ke cycꞌuꞌja tiꞌ Dios, bix ka min ma baj cycꞌuꞌja, yaaꞌn nuk oꞌcx jacꞌa bint tuꞌn ttzkij tken higuera cyuꞌna, pero oj t-xiꞌ cykbaꞌna tej witz lu tuꞌn tjaw kꞌukpaj tuꞌn t-xooꞌn tiib tuj mar, ctcuyate witz. 22Bix cykilcaj cxeꞌl cykanena te Dios, ka ma ke cycꞌuꞌja tiꞌj, ccyiikꞌela―tz̈i Jesús.
Tej cyjyoꞌn nejenel cyepala jun kꞌoj tuya Jesús
(Mr. 11:27-33; Lc. 20:1-8)
23Tej tocx Jesús tuj nin tja Dios, akꞌxin xnakꞌtzal. Bix e pon lkꞌe kej nejenel cye pala bix kej nejenel cye xjal tiꞌjxin, bix e xiꞌ cykbaꞌnxin texin:
—¿Titzen jilel toclena tuꞌn tbinchantiya cykilcaj lu? ¿Bix al ma tzꞌoc kꞌonte tajwalela tuꞌn tex tlojoꞌna ke qꞌueyel tuj tja Dios ewe?―tz̈ikexin.
24Bix aj ttzakꞌbeꞌnxin cyexin:
—Jax juꞌx weya cxeꞌl nkanena cyey. Ka ma tzaj cykbaꞌna weya alcyej nkanbila cyey, jaxse jacꞌa txiꞌ nkbaꞌnwe cyey tuya alcye wajwalela ncwaꞌ nbinchaꞌna cykilcaj lu. 25Tej cybautizarj xjal tuj aꞌ tuꞌn Juan Bautista tuꞌn binne cyten xjal tej tul jxjal Scyꞌoꞌn tuꞌn Dios, ¿jaaꞌ e tzaaꞌ tajwalelxin, tuꞌnpa Dios tuj cyaꞌj, ma tuꞌnpa xjalj?―tz̈ixin.
Bix akꞌ kej xin pala bix kej txꞌolbal ley yolel cyxolx ti tten tuꞌn taj cytzakꞌbeꞌnxin:
—Katzen ma txiꞌ kkbaꞌn ka ja Dios e tzaj kꞌonte taakꞌen Juan, bixse cꞌaaltz tkbaꞌnxin ka tuꞌn tiken min oc kbiꞌna tyol Juan. 26Pero ka ma txiꞌ kkbaꞌn e tkꞌumen Juan nuk texxin tyolxin, qꞌuelel cyiiqꞌuen xjal ejooꞌ, cuma tuj cywitz xjal, tyolel Diosxin―tz̈ikexin.
27Juꞌ tzunj, e xaꞌ cykbaꞌnxin te Jesús:
—Min ktzkiꞌnke―tz̈i tzunkexin te Jesús.
Bix aj ttzakꞌbeꞌnxin cyexin:
—Jaxne mlay txiꞌ nkbaꞌna cyey al e tzaj kꞌonte weya woclen.
Jun techel cyiꞌj caꞌba cwal
28Pero cxeꞌl nkanena cyey, ¿ti toc cyuꞌna tiꞌj ja techel lu? At junxin xjal at caꞌba tcwal. E ponxin tuyaj tcwalxin mas nim bix e xiꞌ tkbaꞌnxin: “Ncwala, waja tuꞌn takꞌanana tuj wawala jaꞌlewe.” 29Bix aj ttzakꞌbeꞌnkꞌa: “Min chixa.” Pero yajxitltzen, ajtztl tiꞌ tanemkꞌa, bix e xiꞌkꞌa. 30Jax juꞌx e ponxin tuya juntl titzꞌenkꞌa, bix e xiꞌ tkbaꞌnxin: “Ncwala, waja tuꞌn takꞌanana tuj wawala jaꞌlewe.” Aj ttzakꞌbeꞌn tcwalxin: “Cu, taat.” Pero min e xiꞌkꞌa. 31Tuj cywitza, ¿alcyetzen cyxol cycaꞌbel kꞌa e cybinchakꞌa tajbil cymankꞌa?―tz̈i Jesús.
Aj cytzakꞌbeꞌnxin:
—Jaj kꞌa tzicbaj.
Bix e xiꞌ tkbaꞌn Jesús cyexin:
—Jaxxix cxeꞌl nkbaꞌna cyey, mas cyiw tuꞌn cyocxa tuj tcawbil Dios cywitzj kej xjal chmol chojentj bix kej xuuj aj paj. 32Tzin nkbaꞌna jlu cyey cuma tej tul Juan Bautista kbalte ti tten tuꞌn cyoca jiquen twitz Dios, min e cyocslay jaxin. Pero kej chmol chojentj bix kej xuuj aj paj, tej cybinte jaxxix tyolxin, e cyocsla tyolxin. Pero cyey, amale e cyileta ncyaj cycyeꞌyen xjal cyil, pero min ajtz tiꞌ cyanema tuꞌn cyocslana tyol Juan Bautista.
Jun techel cyiꞌj akꞌanal yaaꞌn baꞌn
(Mr. 12:1-12; Lc. 20:9-19)
33Cybinxa juntl techel. At junxin xjal e cuꞌx tawaꞌnxin cab tken uva bix oc tkꞌoꞌnxin penwen tiꞌj. Bix e jaw tbinchaꞌnxin jun ttemlel uva tuꞌn tel vino tiꞌj, bix e jaw tbinchaꞌnxin jun jaaꞌ nim tweꞌ te cꞌojlablte tawalxin. Bix e cub tnincꞌuꞌnxin cyuya manal txꞌotxꞌ tuꞌn t-xiꞌ cycyeꞌyen tiꞌj tawalxin. Bix exxin tuj tbexin. 34Tejtzen tpon tumel tuꞌn t-xilj uva, e xiꞌ tsmaꞌnxin cab tsanjelxin cyuya manal txꞌotxꞌ te kꞌilte jun tkiyꞌ twitz uva. 35Pero tejtzen cypon tsanjelxin, bix oc cypjuꞌn manal txꞌotxꞌ jun tsanjelxin, bix e cub cybyoꞌn juntl, bix toxen oc cyxooꞌnxin tuya xak. 36Bix e xiꞌ tsmaꞌn taaw txꞌotxꞌ juntl cloj tsanjelxin cyuya t-akꞌanalxin, mas cybet cywitz kej e tzaj tsmaꞌnxin nejl. Pero juntl maj e cybincha t-akꞌanalxin cyiꞌj tisen e cybincha nejl. 37Mancꞌbiltzen e xiꞌ tsmaꞌnxin tcwalxin, bix e xiꞌ tkbaꞌnxin: “Il tiꞌj cybiꞌ manal txꞌotxꞌ ncwala oj tpon,” tz̈ixin tuj tanemxin. 38Pero tej t-xiꞌ cycyeꞌyen ke manal txꞌotxꞌ tcwalxin, e xiꞌ cykbaꞌnxin cyxolxxin: “Lu jkꞌa tcwal jxin taaw txꞌotxꞌ tzule. Tele tekꞌa cyjele ja txꞌotxꞌe te tkabkꞌa. Ko kbyaꞌcꞌakꞌa, tuꞌntzen tcyaj te ke,” tz̈ikexin. 39Bix e tzaj cytzyuꞌnxin jakꞌa, bix ex cyiiꞌnxin tuj cojbil, bix e cub cybyoꞌnxin. 40Cxeꞌl nkanena cyey, ¿ti ctseꞌ jxin taaw awal kej t-akꞌanalxin oj tulxin?―tz̈i Jesús cye pala bix txꞌolbal ley.
41Bix aj cytzakꞌbeꞌnxin te Jesús:
—Chi cwel tbyoꞌn taaw txꞌotxꞌ kej kaꞌ manal txꞌotxꞌ, bix cnincꞌulxin tiꞌj cyuya cabtl xjal tuꞌn tcub cypaꞌnxin cyawalxin tuyaxin oj tpon tumel―tz̈ikexin.
42E xiꞌ tkbaꞌn Jesús cyexin:
—Tisen el iiqꞌuet tcwal taaw txꞌotxꞌ, juꞌxsen qꞌuelel iiqꞌuet jxjal Scyꞌoꞌn tuꞌn Dios. ¿Bajxpa cyila tuj tyol Dios ti toc tuꞌn tiꞌj jlu? Tzin tkbaꞌn cyjulu: “Jxak el cyiiqꞌuen ke binchal jaaꞌ, cꞌoquel xak tej xak mas nintzaj te t-xeeꞌ jaaꞌ. Jatzen Dios cwel meltzꞌunte xak te tbanel xak. Juꞌ tzunj, axse qꞌuelela tuj kwitz,” tz̈i tyol Dios. 43Cxeꞌl nkbaꞌna cyey, cuma ma tzꞌel cyiiqꞌuena Tcwal taaw txꞌotxꞌ, juꞌ tzunj, qꞌuelel kꞌiꞌn tcawbil Dios cyiꞌja, ejeeꞌy tnom te Israel, tuꞌntzen t-xiꞌ kꞌoꞌn te jun wik xjal cyaj txiꞌ cykꞌoꞌn te Dios cuma texin. 44Ja xak ma tzꞌel iiqꞌuet, jatzen xak kbalte ti pjel cyiꞌ xjal. Alj xjal ncub tzꞌak twiꞌj xak lu, biꞌx cwel buchj tuꞌn, bix oj ttzaj tzꞌak jxak lu tibaj jun xjal, biꞌx cwel patzꞌex―tz̈i Jesús cye nejenel xjal te Israel.
45Tej cybinte nejenel cye pala cyuyax ke fariseo ke techel e tkba Jesús, el cyniyꞌ tiꞌj ka cyiꞌjxin otk yolena Jesús. 46Pero tej toc cyipenxin tiꞌj tuꞌn ttzyet Jesús cyuꞌnxin, mintzen e cytzuyxin jaxin tuꞌn cytz̈i jxjal lepchec tiꞌjxin, cuma tuj cywitz xjal, tyolel Diosxin.
© 2000, Wycliffe Bible Translators, Inc. All rights reserved.