युहान्ना 18
18
येसु लाप्मिम्पा
(मट्टि २६:४७-५६; मारकुस १४:४३-५०; लुका २२:४७-५३)
1हाङ् पारठाना लॆसिटाहाङ् येसु खोम् टिङ्खुबाचि नुङ् किडरोन लोमॆ मिछुॽमा हङ्मा मॆआरॆङऎ जाइटुनमि बोटा चुहा ठालबि खारा। 2हाङ् आक्क ठावाँ चाइ येसु बङ्सिखुबा याहुडाऎ स लेॽयुङ्सु, मान्ठाभनॆ येसु खोम् टिङ्खुबाचि नुङ् आक्कुबि खॆड्ढाङ्युक्सा। 3मसॆ याहुडा चाइ आक्कबि ढ्या याटाङ्पाचि हाङ् फारिसिचिऎ पाङ्हाङ्पा रोमि टिलिङ्गाचि हाङ् निवाँहाङ्मि खिम् हुङ्खुबाचि चिःक्मानुङ् टाआ। खोचि ओप्लिङ्, मिः हाङ् आप्चिरा खिन्मानुङ् टाआमि।
4हाङ् येसुऎ खो सक्पि लिमा परक्डॆ चोब्न खानावाँ वाप्सिम्पा लॆटु, मसॆ याॽल खाराहाङ् आक्खाचि लोसुचि, “आन्नॆ आसा यक्मे पाइकाम्नॆ?” 5हाङ् आक्खाचिऎ लोसुचि, “नासाराटबिऎ येसु।” हाङ् येसुऎ लोसुचि, “आक्क काङान।” हाङ् खो बङ्सिखुबा याहुडा स आक्खाचिनुङ्न आक्कुबि येप्ढाङ्मिम्पा लॆटा। 6हाङ् येसुऎ आक्खाचि “आक्क काङान” लोमा अक्सि खोचि मिउ खाइटामि हाङ् टेःक्लिङ् खारामि। 7हाङ् होइखेपा सङ्क येसुऎ आक्खाचि सिमुचि, “हॆॽनि आन्नॆ आसा चाइ यक्मॆ पाइकाम्नॆ?” आक्खाचिऎ लोसुचि, “नासाराटबिऎ येसु।” 8हाङ् येसुऎ आक्खाचि लोसुचि, “काङॆ आन्ना लोसिडानि, काङा खोन, आन्नॆ काङान यक्ङानॆ हाङ्ग इघा याॽमिचि चाइ लेहाक्साम्नॆ।” 9हाङ् खोसॆ “आनॆ पिॽमिम्पाचिबाङ् कॆ एक्क स मामाइॽङाचि” कामानुङ् लोमिम्पा खानावाँ लिमाम् लागि आक्र लिसा।
10हाङ् सिमोन पाट्रुसऎ चाइ खोनुङ् चुऎ फेया सुबिक्ट बिःक्पकु हाङ् चोब्बाङ् ढ्या याटाङ्पामि योम्पक् मुबिखुबा माल्खुस लोमॆ याॽमिमि चुप्ठिङ् पोट्टाऎ नाबाक् पॆॽलाङ् पिट्टु। 11मसॆ येसुऎ पाट्रुस लोसु, “आनामि फॆया डाप्हङ्सि युक्सॆ! माल् आपॆ काङा पिॽमिम्पा डुखामि खरॆबाङ् काङॆ ऎडुङ्मॆ?”
चोब्बाङ् ढ्या याटाङ्पामि ङारिङ्पि येसु
12हाङ् टिलिङ्गाचि हाङ् उम्चि टुङ्घङ्पा हाङ् निवाँहाङ्मि खिम् हुङ्खुबा याॽमिचिऎ येसु लाबुचि हाङ् ठुबुचि। 13हाङ् आक्खाचिऎ येसु याॽल हान्नास् लोमॆ याॽमिबि लाखॆटुचि। हान्नास चाइ आक्क निङ्ऎ चोब्बाङ् ढ्या याटाङ्पा काइयाफामि नाम्पा लॆटा। 14आक्क काइयाफा लोमॆ याॽमिऎन चोब्न याहुडि हॆॽनिबारेक्चि लुक्खॆॽमा बाङ्ग उम्चि लागि एक्क याॽमि सिखॆॽमा नुऎ लि कामानुङ् याहुडि टुङ्घङ्पाचि लोमिम्पा लॆटुचि।
पाट्रुसऎ येसु लेॽनानि लोमिम्पा
(मट्टि २६:६९-७०; मारकुस १४:६६-६८; लुका २२:५५-५७)
15हाङ् सिमोन पाट्रुस नुङ् होइक एक्क टिङ्खुबॆ येसु डॆङ्डॆङ् टिङ्खॆटाचु। म होइक टिङ्खुबॆ चाइ चोब्बाङ् ढ्या याटाङ्पा लेॽमिम्पासॆ खो सङ्क चोब्बाङ् ढ्या याटाङ्पामि पालुम् हङ्सि भेना। 16टर पाट्रुस चाइ लम्भॆरॆङ्माबिॽन येप्ढाङ्मिम्पा लॆटा। हाङ् चोब्बाङ् ढ्या याटाङ्पा लेक्खुबा म होइक टिङ्खुबा लम्भॆरॆङ्मा हुङ्खुबा मेॽनुङ्माबि खारा हाङ् खानावाँ टङु हाङ् पाट्रुस हङ्सिॽयु लाटॆटु। 17हाङ् आक्क लम्भॆरॆङ्माबि पेन्खुबा मेॽनुङ्माऎ पाट्रुस हङ्सिउ भॆन्मॆसिसार लोसु, “हॆॽनि, आनास आक्क याॽमिमि टिङ्खुबाचिबाङ् एक्क याॽमि हॆॽनॆ?” पाट्रुसऎ लोसु, “काङा हॆॽङानॆ।”
18हाङ् चुङ् लुमिम्पासॆ योम्पक् मुखुबाचि हाङ् निवाँहाङ्मि खिम् हुङ्खुबाचि मिः टुम्पक्मानुङ् मिः हुङ्चासे येप्ढाङ्पा लॆटामि। हाङ् पाट्रुस स आक्खाचिनुङ्न मिः हुङ्चासे येप्ढाङ्पा लॆटा।
चोब्बाङ् ढ्या याटाङ्पॆ येसु सिम्मिम्पा
(मट्टि २६:५९-६६; मारकुस १४:५५-६४; लुका २२:६६-७१)
19हाङ् चोब्बाङ् ढ्या याटाङ्पॆ येसु खोम् खानावाँ हाङ् टिङ्खुबाचिम् बारेबि सिमु। 20हाङ् येसुऎ लोसु, “काङॆ चोब्न याॽमिचिऎ खेम्मे गारि लोडुङ्चि। हाङ् काङॆ चोब्न याहुडिचि टामानुङ् खोचि खोम्ठाम् ठाल हाङ् निवाँहाङ्मि खिम्पि चिन्डुङ्चि। काङॆ चुम्सेम माङ्स खानावाँ माचिन्टिॽङाचि। 21मान्ठा आनॆ काङा सिम्ङानॆ? काङॆ चिन्मिम्पा याॽमिचिन सिमॆचॆ, कॆ माङ् चिनुङ्चॆ लोमॆ आक्खाचिऎ लेकुचि।” 22हाङ् येसुऎ आक्रहाङ् खानावाँ इमिम्पासॆ खोम् कॆक्पि येप्ढाङ्खुबा निवाँहाङ्मि खिम् हुङ्खुबा एक्कसॆ येसु ङाचिक्पि फॆक्मानुङ् लोसु, “चोब्बाङ् ढ्या याटाङ्पा नुङ्स यायाबि काग्नॆ?” 23हाङ् येसुऎ आक्क याॽमि लोसु, “काङॆ हुन्नऎ खानावाँ इडुङ् हाङ्ग, माङ् चाइ इसुङॆ? टर चाइबानऎ खानावाँ इडुङ् हाङ्ग मान्ठा रगुक्ङानॆ?” 24मबाङ् हान्नासऎ येसु हिक्मिम्पाबिॽन चोब्बाङ् ढ्या याटाङ्पा काइयाफाबि पाङ्हाङ्सु।
पाट्रुसऎ फेरि येसु लेॽङानि लोमिम्पा
(मट्टि २६:७१-७५; मारकुस १४:६९-७२; लुका २२:५८-६२)
25हाङ् सिमोन पाट्रुस सङ्क आक्खा याॽमिचिनुङ्न येप्से मिः हुङ्चाढाङ्पा लॆटा। आक्रल आक्खाचिऎ खो लोसुचि, “माल् आना स आक्क याॽमिमि टिङ्खुबाचिबाङ् एक्क हॆॽनानॆ?” हाङ् पाट्रुसऎ गर लोसुचि, “काङा हॆॽङानॆ।”
26हाङ् चोब्बाङ् ढ्या याटाङ्पामि योम्पक् मुबिखुबा एक्क याॽमि सङ्क आक्कुबि चुआ आक्क याॽमिमि खोम् टाङ्पाम् एक्क याॽमिमि नाबाक् पाट्रुसऎ पॆॽलाङ्मिम्पा लॆटु। खोसॆ पाट्रुस लोसु, “माल् आना कॆ चोप्लिङ्पि आक्खाचिनुङ् खाङ्मिम्पा हॆॽनॆ?” 27हाङ् होइखेपा पाट्रुसऎ “हॆॽङानॆ” कामानुङ् लोसु। हाङ् मरक्लन हॆॽवा अगा।
येसु पिलाटसमि ङारिङ्पि
(मट्टि २७:१-२,११-३१; मारकुस १५:१-२०; लुका २३:१-५,१३-२५)
28हाङ् खोचिऎ येसु नाम्सङ् माॽमि काइयाफामि खिम्पाङ् रोमि हाङ्खिम्पि लाखॆटुचि। टर खोचि हाङ्खिम् हङ्सि चाइ माभॆनामि मान्ठाभनॆ आक्क हङ्सि भॆनि हाङ्ग सॆङ्सॆङॆ मॆड्डिङ्मा लिकि हाङ् फाक्मा लोमॆ चाडामि भोजा चाटकिनि कामानुङ् खोचि किसिम्पा लॆटामि।#१८:२८ पिलाटस चाइ याहुडि हॆॽनॆ। मसॆ आक्खा याहुडिचि हाङ्खिम् हङ्सि माभॆनामि। खोचि आक्कुबि भॆनामि ग उम्चि चालाना रक्न खोचि सॆङ्सॆङॆ मॆड्डिङ्मा लिखुबा लॆटामि। 29मसॆ रोमि टुङ्घङ्पा पिलाटस बाहिरा आम्पकाहाङ् लोसुचि, “आन्नॆ ग याॽमि सक्पि माङ् आब्डिक् टिकाम्नॆ?”
30हाङ् आक्खाचिऎ खो लोसुचि, “ग याॽमि आब्डिक नुङ्मा लॆ हाङ्न आनाबि लाटॆडुङ्का।”
31हाङ् पिलाटासऎ आक्खाचि लोसुचि, “ग याॽमि लखॆटाम्नॆ हाङ् आम्नि यायेॽमा रक्न न्यायॆ लॆटाम्नॆ।” हाङ् खोचिऎ लोसुचि, “टर काङ्कानुङ् याॽमि सेॽमॆ ढुप्पाट्ट माआ।”
32येसुऎ खो मान्टहाङ् सिखॆॽमा लॆऎ कामानुङ् लोमिम्पा खानावाँ लिमाम् लागि आक्र लिमिम्पा लॆटा।
33हाङ् पिलाटास होइखेपा सङ्क हङ्सिउ भॆनाहाङ् येसु सेःरुहाङ् लोसु, “माल आना याहुडिचिम् हाङ्ना हॆटा?”
34हाङ् येसुऎ लोसु, “ग खानावाँ आनॆॽन लोमिम्पा रु होइढा याॽमिचिऎ आना काम् बारेबि इमिम्पार?”
35हाङ् पिलाटासऎ खो लोसु, “माल् आनॆ काङा याहुडिङाऎ मिङानॆ? आनाम् हॆॽनिबारेक्चि हाङ् ढ्या याटाङ्पाचिऎन न्यायॆमि लागि आना काङाबि टॆःॽमिम्पा यो। आनॆ माङ् लॆटुनॆ?”
36हाङ् येसुऎ लोसु, “काम् हाङ्डाम् चाइ ग बाखाटेम्पिऎ हेॽनॆ। काम् हाङ्डाम् ग बाखाटेम्पिऎ लॆटा ग काम् टिङ्खुबाचि चुङ्खुबा लॆटामि हाङ् काङा याहुडिचिम् हुक्पि आसिक्खुबा लॆटिङ। टर काम् हाङ्डाम् गुबिऎ हॆॽनॆ।”
37हाङ् पिलाटासऎ खो सिमु, “माल् आना हाङ्ना हॆटा?”
येसुऎ लोसु, “काङा हाङ् लोमॆ खानावाँ आनॆॽन इमे पाइकुना। चाइबान लोमार काङा गमि लागिॽन जान्म लिडिङॆ, हाङ् चाइबानऎ चुमॆक्सङ् पिस्सि बाखाटेम्पि टाडिङॆ। आसॆ चाइ चाइबानऎ खानावाँ नेन्चाकु, आक्कसॆ काम् खानावाँ खेमुकु।”
38हाङ् पिलाटसऎ “चाइबानऎ खानावाँ चाइ माङ्र?” कामानुङ् येसु सिमु। हाङ् बाहिरा आम्पकाहाङ् याहुडिचि लोसुचि, “कॆग ग याॽमिबि माङ्स आब्डिक् माखाङ्ङा। 39टर आम्नि चालाना रक्न चोब्न निङ् फाक्मॆ लोमॆ चाडाबि सॆक्ढिङ्खॆम्पा एक्क याॽमि काङॆ लेहाङ्मा लॆ। माल् ग निङ् चाइ आम्नि लागि याहुडिचिम् हाङ् लेहाङ्सुर मिङ्कानिहॆ?”
40टर खोचि फेरि एक्क साम्लाबि गर कासामि, “आक्क याॽमि हॆॽनॆ, टर काङ्कामि लागि बाराब्बा चाइ लेहाङ्पिच्चिमॆ” कामानुङ् याकासामि। बाराब्बा चाइ हाङ्टेम्खिसा लॆटा।
© 2023, Wycliffe Bible Translators, Inc. and Nepal Bible Society