युहान्ना 17
17
येसुमि पारठाना
1हाङ् आक्खा खानावाँ इसिटु हाङ् येसुऎ पारु पोट्टा खाङ्से लोसु, “आपो, ह ल टाखॆडा। आम् निङ्लावा खाङ्मिॽमाम् लागि आम् पासा निङ्लावाबि सिॽमिटॆ। 2मान्ठाभनॆ आनॆ खो चोब्न याॽमिचि सक्पि ढुप्पाट्ट पिडुना। हाङ् आनॆ खो पिॽमिम्पा चोब्न याॽमिचि खोसॆ हानाम्स सिखॆनॆ हिङ्खामा पिट्टुचिर। 3हाङ् हानाम्स सिखॆॽनॆ हिङ्खामा चाइ खोचिऎ आना एक्क टे चाइबानऎ निवाँहाङ् लेसुचिर हाङ् आनॆ पाङ्हाङ्मिम्पा येसु खिरिस्ट लेसुचिर लोमॆ रेम। 4हाङ् आनॆ काङा लॆटॆ कामानुङ् पिॽमिम्पा योम्पक् लुक्पिॽमानुङ् काङॆ आना बाखाटेम्पि निङ्लावा पिडाना। 5हाङ् आपो, बाखाटेम् लिमाबाङ् याॽल आनाम् ङारिङ्पि काम् मान्टक्मा निङ्लावा चुआ ह म निङ्लावाब्न युङ्ङॆ।
6“हाङ् बाखाटेम्बाङ् आनॆ काङा पिॽमिम्पा याॽमिचि कॆ आना खाङ्मिडुङ्चि। हाङ् आक्खा याॽमिचि आनाम् लॆटामि हाङ् आनॆॽन खोचि काङा पिट्टिङ्ना हाङ् आक्खाचिऎ आम् खानावाँ खेम्डुचि। 7हाङ् काबि चुहा चोब्न खानावाँ आनॆॽन काङा पिॽमिम्पा रेम कामानुङ् आक्खाचिऎ लेकुचि। 8मान्ठाभनॆ आनॆ काङा पिॽमिम्पा खानावाँ काङॆ खोचि पिडुङ्चि। हाङ् खोचिऎ आक्क निवाँयुङ् लॆटुचि। हाङ् आनॆॽन काङा पाङ्हाङ्मिम्पा रेम कामानुङ् निवाँयुङ् लॆडुचि।
9“हाङ् बाखाटेम्पिहा याॽमिचिम् लागि ग हॆॽनॆ, टर आनॆ काङा पिॽमिम्पा याॽमिचिम् लागि काङा पारठाना लॆःॽमॆ पाइङा मान्ठाभनॆ खोचि आनाम् याॽमिचि रेम। 10कानुङ् चुहा चोब्न आनाम्, हाङ् आनानुङ् चुहा चोब्न काङाम् रेम। हाङ् आक्खाचिबि काम् निङ्लावा खाङ्मु। 11काङा चाइ ह ग बाखाटेम्पि लिङानि, मान्ठाभनॆ काङा आनाबि टामे पाइङा टर खोचि चाइ बाखाटेम्पिॽन लिक्मि। ओ, सॆङसॆङॆ आपा, आनॆ का पिॽमिम्पा चॆकुवॆ निङ्पि आक्खाचि नुःर कोबॆचॆडोबॆचॆ, मसॆ खोचि कानि रक्न एक्क लिहिमिर। 12हाङ् काङा आक्खाचिनुङ् लिमार आनॆ काङा पिॽमिम्पा चॆकुवॆ निङ्बाङ् खोचि कॆ नुःर खाङुङ्चि। हाङ् नासॆ लिमान लॆऎबाङ्#१७:१२ येसुऎ लोमिम्पा आक्क याॽमि चाइ येसु बङ्सिखुबा याहुडा इस्कारियोट लॆटा। होइढाचि माङ्स लिमा मापिॽङाचि मान्ठाभनॆ निवाँनेन् साब्चिराबि चुऎ खानावाँ लिमान लॆटा।#खोम्मिम्पासाम् ४१:९; युहान्ना १३:१८
13“टर काङा चाइ आनाबि टामे पाइङा। हाङ् आक्खाचिम् निवाँ काम् हाङ्हाङ्ऎ चॆप्खॆटुर कामानुङ् बाखाटेम्पि चुःॽङा रक्न कॆ इघा खानावाँ इकुङ। 14हाङ् काङॆ खोचि आनाम् खानावाँ खेम्मिटुङ्चि। हाङ् बाखाटेम्पिहा याॽमिचिऎ खोचि सिच्चाउचि मान्ठाभनॆ काङा रक्न खोचि सङ्क बाखाटेम्पिहाचि हॆॽनाहाचि। 15हाङ् खोचि ग खाबाटेमबाङ् लाखॆटॆचॆ कामानुङ् ग पारठाना लॆःॽङानि, टर खोचि साइटानबाङ् हिङ्पकॆचॆ कामानुङ् पारठाना लॆःॽङा। 16मान्टहाङ् काङा ग बाखाटेम्पिऎङा हॆॽङानॆ मरहाङ्न खोचि सङ्क ग बाखाटेम्पिहाचि हॆॽनॆ। 17हाङ् आम् चाइबानऎ खानावाँबाङ् आक्खाचि सॆङ्सॆङॆ मुसॆचॆ। हाङ् आनाम् खानावाँ चाइबानऎ यो। 18हाङ् मान्टहाङ् आनॆ काङा बाखाटेम्पि पाङ्हाङ्सिङ्ना, मरहाङ्न कॆ खोचि बाखाटेम्पि पाङहाङ्डुङ्चि। 19हाङ् आक्खाचिऎ चाइबान टाङ्पा आनामि चाइबानऎ खानावाँबाङ् सॆङ्सॆङॆ मुसुचिर कामानुङ् काङॆ सङ्क काम् टाङ्पान सॆङ्सॆङॆ मुडुङ।
20“हाङ् काङॆ इघा टिङ्खुबाचिम् लागि टे हॆॽनॆ, टर खोचिम् खानावाँ खेम्मानुङ् का सक्पि निवाँयुङ् लॆखुबाचिम् लागि स पारठाना लॆःॽङा। 21मसॆ आक्खाचिम् निवाँ एक्क लिर हाङ् मान्टहाङ् आना काबि चुःक्ना हाङ् का आनाबि चुःॽङा, मरहाङ्न खोचि सङ्क कानिबि लिहिमिर हाङ् काङा आनॆ पाङ्हाङ्पा कामानुङ् बाखाटेम्पिहा याॽमिचिऎ निवाँयुङ् लॆहिसुचिर। 22हाङ् काङानुङ् आना एक्क लिमिम्पा रक्न खोचि सङ्क एक्कन लिहिमिर कामानुङ् आनॆ काङा मान्टक्मा निङ्लावा पिडिङाना, आक्क निङ्लावान कॆ खोचि स पिडुङ्चि। 23हाङ् काङा आक्खाचिनुङ् चुःॽङा हाङ् आना कानुङ् चुक्ना। हाङ् आक्खाचि सङ्क चाइबान एक्क लिमिर हाङ् आनॆॽन काङा पाङ्हाङ्पा रेम हाङ् काङा नाम्नाम् पिसिन्टक्न खोचि सङ्क नाम्नाम् पिसिकुचिना लोमॆ खानावाँ बाखाटेम्पिहा याॽमिचिऎ वाबुचिर।
24“आपो, आनॆ काङा पिॽमिम्पा याॽमिचि काङा हाबि चुःॽङा, आक्कुब्न लिमिर कामानुङ् काङा मिनुॽङा। हाङ् आनॆ काङा नाम्नाम् पिसिम्पासॆ बाखाटेम् लिमाबाङ् याॽलऎबाङ् पिॽमिम्पा निङ्लावा खोचिऎ खाङ्हिसुचिर।
25“निवाँनेन् आपा, बाखाटेम्पिहा याॽमिचिऎ आना लेमिनि, टर कॆ चाइ आना लेक्ना। हाङ् इघा टिङ्खुबाचिऎ आनॆॽन काङा पाङ्हाङ्पा कामानुङ् लेकुचि। 26काङॆ खोचि आना लेमिडुङ्चि हाङ् लेॽमिढाङ्कुङ्चि स, मान्ठाभनॆ आनॆ काङा मान्टहाङ् नाम्नाम् पिसिटिङ्ना, खोचिबि सङ्क म नाम्नाम् पिसिॽमॆ खानावाँ लिर हाङ् काङा खोचिबि लिङार।”
© 2023, Wycliffe Bible Translators, Inc. and Nepal Bible Society