Luka 3
3
Yohanna Gu-Baptisma dhakk arr ji khi Kristi
Mat 3:1-12; Mar 1:1-8; Yoh 1:19-28
1Gyet dhighin byitt bh'aar wu'kaghapaad baa'paad mhi Kaisar Tiberius, yiiy w'u Pontiyos Em Bilatus wu'nyi gyet a Govno mhi gaar'yill Yahudiya, Hiridus wu'nyi gyet a Miskakhamm songgyill Galili, em'nhikhin nyi Filip gyet a Miskakhamm songgyill Ituriya kihh yill Trakonitis, yakhal Lisaniyas wu'nyi gyet a Miskakhamm songgyill Abilene. 2Gyet yiiy mhizeh ni, bhi Annas mwopp kihh Kayafas phi dhakk-prist Wu'yon kihshag, bhi Naan laa'pwoo kihh Yohanna, Em Zakariya, dhighin dh'em. 3A nyi seh bhi Yohanna ni mw'aan dum v'ur kwangpee w'u koghob Dungg Urdu weett tihh kihh satt orr baptisma w'u kihh kamm le gurum mwopp tu'wapp tihh Naan fwa shigbis khimwopp diy. 4Bii mihhseh a kaa nyi a rih-ran dhighin klap'ran khi Ishaya gu'wanggshiiy se le,
“Dhekheh m'ee gurum kihh peetpee dhighin dh'em le,
‘Wu dhakk arr Daah Naan,
Wu zan arr ni lhidum fyaad
5Wu gam moghol-bwumm mwopp weett,
Wu toss v'ur bwumm mwopp kihh v'ur zhwakk mwopp weett lhisam.
Wu zan arr w'u gihgrong lhidum fyaad,
Wu per arr w'u kihh gihkhit lhidum chl'am.
6A kihhsheh bhi gurum weett p'ee naah bh'am khi Daah Naan.’#Ish 40:3-5 ”
7A nyi seh bhi Yohanna kihh tepbhelepp dw'uu gurum w'u mwopp pwat ja tihh sh'in baptisma diy mwopp le, “Zhepp khi gokktaah wu'bis! A wuyeh shep delkom wu tihh wu shwa diy kihh tukhupdyeell khi Naan w'u kihh ji? #Mat 12:34; 23:33 8Pee'mhinyi bhi wu sh'in dhakk'wurett w'u tihh kamm diy le tu'wapp keewu ni a zeenn. Tapp wu kihh ryeeh seh wu le, ‘Ai munn kihh Ibrahim a puup mu.’ Ih kihh satt nah wunn, Naan kihh mak shikhir kihh pangg mhize tihh mwopp buakhar zhepp khi Ibrahim diy.#Yoh 8:33 9Kooh mwasseh kihhshe maah, bhi baa seb a sh'i kug sheep ni mwopp. Pee'mhinyi, bhi kooh a sheep wu'rangg w'u baah la zhepp wu'rett mou, bhi mwopp p'ee eep nyi ming dhighin wus.” #Mat 7:19
10Dw'uu gurum ni mwopp nang phi Yohanna mwopp le, “A mihyeh a bii w'u munn p'ee sh'in nyi ayeh?”
11Bhi Yohanna lapp mwopp satt le, “Gwooh kihh bh'aar vel, bhi pihh wu'zeh gwooh noott bh'aar; yakhal gwooh kihh biisoh sh'in a kihhsheh zag.”
12Mhi-lappwapp wu'mwopp zag ja tihh Yohanna sh'in baptisma diy mwopp, bhi mwopp nang phi nyi mwopp le, “Gukamm, wu'munn ee, a mihyeh a bii w'u munn p'ee sh'in nyi?” #Luk 7:29
13Bhi satt mwopp le, “Tapp wu lapp wapp ni dhel kih bii w'u mwopp l'e wunn lapp nyi mou.” 14Pakk mhi'lek mwopp nang phi nyi a kihhsheh zag mwopp le, “Wu'munn ee, a mihyeh a bii w'u wu'munn p'ee sh'in nyi?”
Bhi Yohanna lapp mwopp le, “Tapp wu kihh yak shaghal khi gurum mwopp wu lapp kih bhall mou, kooh wu raabhelepp kaah menguh mou; wu dharr kaah shaghaltarr keewu.”
15Kaarooh gurum ni mwopp kaah le'yit p'ee naah ji khi Kristi, bhi mwopp kihh blihp dhighin phitukhup ru kooh kyed a Yohanna a Kristi#3:15 Kooh Almasihu shi aa'h, h'aa shiih'pee a nyi oh. 16Bhi Yohanna satt mwopp le, “Nyi a zeenn wu'an phi sh'in baptisma wunn sh'i am, dhangg m'ee gwooh mett wu'an kudyi p'ee ji. An ih mak dheeh kromm w'u p'ee shwat kwaghashag shiiy nyi mou. A nyi p'ee sh'in baptisma wunn sh'i Riin Wu'bhangg, kihh wus zag. 17Nyi kihh kihhtut keeniy nyakk sarr niy, tihh f'ii laapp keeniy diy bhangg-bhangg, tihh shwan y'ee dhebhenn keeniy diy looh dyaarr, bhi shaan flipp ni mwopp sh'i wus w'u kihh p'in pid mou.” 18Yohanna dwakk gurum ni mwopp sh'i Pwoo'wurett w'u kihh satt mwopp sh'i arr shi'nyi-shi'nyi.
19Dhangg kaarooh Yohanna ni gwakbhelepp Miskakhamm Hiridus pee'rooh gyet lapp Herodiyas, mat khi em'nhikhin, Filip, kihh v'ur pakk bii wu'bis w'u gyet Hiridus ni kihh mwan sh'in, 20weett kihhsheh bhi Hiridus kihh sihkhitt bibil, bhi y'aa Yohanna shakhat luh'shakhat. #Mat 14:3,4; Mar 6:17,18
Yohanna sh'in baptisma Jesu
21Kaarooh gurum mwopp weett kaah lapp baptisma, bhi Jesu wu'nyi zag lapp baptisma. Bhi kaarooh nyi kaah dhangNaan, bhi dhengNaan wangg, 22yakhal Riin Wu'bhangg sam kaah nyi sh'i shik mhi shoopshik w'u kaa duu'duu se. Bhi m'ee dhekheh tong put kih dhengNaan satt le, “Gha a L'aa keena w'u ih kihh wall gha, ih klihngshangg kihh gha pwetd.” #Shb 22:2; KN 2:7; Ish 42:1; Mat 3:17; Mar 1:11; Luk 9:35
Shumm mhishak khi Jesu mwopp
Mat 1:1-17
23Kaarooh Jesu wull kaa byitt laar kunn se bhi y'aa dhakk keeniy. Sh'i p'an khi gurum mwopp bhi nyi gyet a em khi Yusufu,
w'u a em khi Heli
24em khi Matat,
em khi Levi, em khi Melki,
em khi Janai, em khi Yusufu,
25em khi Matatayas, em khi Amos,
em khi Nahum, em khi Esli,
em khi Naggai, 26em khi Ma-at,
em khi Matatayas, em khi Semein,
em khi Josek, em khi Joda,
27em khi Jo'anan, em khi Resa,
em khi Zerubabel, em khi Shealtiel,
em khi Neri, 28em khi Melki,
em khi Addi, em khi Kosam,
em khi Elmadam, em khi Er,
29em khi Joshua, em khi Eliyaza,
em khi Jorim, em khi Matat,
em khi Levi, 30em khi Simiyon,
em khi Yahuda, em khi Yusufu,
em khi Jonam, em khi Eliyakim,
31em khi Melea, em khi Menna,
em khi Matata, em khi Natan,
em khi Dauda, 32em khi Jessi,
em khi Obed, em khi Boaz,
em khi Salmon, em khi Nahshon,
33em khi Aminadab, em khi Amin,
em khi Ani, em khi Ram,
em khi Hezron, em khi Perez,
em khi Yahuda, 34em khi Yakub,
em khi Ishaku, em khi Ibrahim,
em khi Terah, em khi Nahor,
35em khi Serug, em khi Re'u,
em khi Peleg, em khi Eber,
em khi Shelah, 36em khi Kainan,
em khi Arfazad, em khi Shem,
em khi Nuhu, em khi Lamek,
37em khi Metusela, em khi Enok,
em khi Jared, em khi Mahalalel,
em khi Kenan, 38em khi Enosh,
em khi Set, em khi Adamu,
em khi Naan.
©️2022 Luke Initiative for Scripture Translation