Luka 4
4
Shetan ji kihh zhwaan'pee Jesu
Mat 4:1-11; Mar 1:12,13
1Jesu tong Dungg Urdu baa'ji a w'u gihgam sh'i Riin Wu'bhangg, bhi Riin Wu'bhangg ni dum kihh nyi dhighin dh'em. 2Sh'in t'eer laar feerr nhighin bhi Shetan kaah ji kihh zhwaan'pee mwopp nyi. Baah so mee'bii kooh lee mou dhighin t'eer mhizeh ni mwopp weett; kyess nyi bhi kussum laah nyi.
3Bhi Shetan satt nyi le, “Dhok a gha shi a L'aa khi Naan e'h, ghi satt pangg mhize buakhar biisoh sihng.”
4Jesu lapp nyi satt le, “Nyi a rih-ran dhighin pwoo khi Naan le, ‘Baah gurum kihh tong kihh seen a sh'i biisoh kyekk mou.’#WSW 8:3 ”
5Bhi Shetan k'aa dum kihh nyi m'ee pee w'u rhi'reghen, bhi dyingg dhenglong mhi yill mhize mwopp weett nyi dhighin reb tepyit kihmeh. 6Bhi satt nyi le, “An p'ee pihh pee gha kaah mwopp weett, kihhsheh kihh men'rett khimwopp zag, p'ee mwopp pihh mwopp a sarr nah. Ih kihh mak pihh mwopp koohweeh w'u ih kihh dh'om. 7Mihh ghi soyill a'n, bhi mwopp weett a mag'gha.”
8Jesu lapp nyi satt le, “Nyi a rih-ran le, ‘Gha p'ee kurum yill a Naan keegha kyekk; a nyi kyekk a gwooh gha p'ee soyill nyi.’#WSW 6:13 ”
9Bhi Shetan k'aa dum kihh Jesu Urshalima, bhi l'e tihh dharr tihngg-tihngg kih m'ee deell LuhNaan ni w'u reghen mettweett, bhi satt nyi le, “Dhok a gha shi a L'aa khi Naan e'h, ghi mett ghi sam yill pee bihze sihng. 10P'ee nyi a w'u rih-ran dhighin pwoo khi Naan le:
“ ‘Naan p'ee gabbhelepp mhi'lop keeniy mwopp kaah gha,
tihh mwopp kihh tapp gha diy.
11Yakhal mwopp p'ee kihh fw'ang gha sh'i sarr ruh
tapp'baa ghi kihh sakshiiy gha kih m'ee pangg mou.’#KN 91:11,12 ”
12Bhi Jesu pring nyi satt le, “Pwoo khi Naan satt le, ‘Tapp ghi kamm Daah Naan keegha mou.’#WSW 6:16 ”
13Kaarooh Shetan kyes zhwaan'pee ni, bhi dhel yet Jesu diy, seeh p'ar w'u Shetan ni kad m'ee yit niy dyi dhangg.
Mwopp shiih kihh Jesu Nazaret
Mat 4:12-17; Mar 1:14,15
14Kihbwoon bii mihhse, bhi Jesu baa'ji Galili dhighin maa'pee mhi Riin Wu'bhangg, bhi pwookaah nyi kangpee weett koghobyill Galili ni. 15Kihh sh'in kamm dhighin Luh'kang khimwopp, bhi gurum mwopp weett kihh tihghin nyi pwetd.
16Jesu k'aa dum Nazaret, pee w'u gyet yon diy. P'ar Puus Nookdyi, bhi dum Luh'kang kaa kihh lokhot sh'in nyi seh. Kaarooh yakhal dharr p'ee t'ang pwooNaan, 17bhi mwopp pihh haal'ran khi Ishaya gu'wanggshiiy nyi. Kaarooh wangg, bhi kad pee w'u r'an ni satt diy le,
18“Riin khi Daah Naan kaah nah,
p'ee Naan l'e sarr kaah nah,
p'ee yak Pwoo'wurett mhipyaah mwopp.
Lop a'n p'ee yak orr wanggpee mwooh luh'shakhat.
P'ee wangg yit mhivughum mwopp.
P'ee fwoon tengg mwooh mwopp treng mwopp.
19P'ee fwabhelepp kaah yiiy kaahdhoonn khi Daah Naan.”#Ish 61:1,2
20Bwoonrooh Jesu kyes tang'ran ni, bhi mwet haal'ran ni pihh gudhakk Luh'kang ni, bhi tong yill. Yit gurum w'u dhighin Luh'kang ni mwopp weett a kih nyi. 21Bhi shee yakshiiy pwoo w'u t'ang seh mwopp satt le, “Shi-shinn se, bhi r'an mhize gam kom wu.”
22Gurum w'u dhighin Luh'kang ni mwopp saamm nyi pwetd. Aa'phi mwopp pwetd kihh Pwoo'wurett w'u kihh put pwoo nyi, bhi mwopp nang phi shag le, “Gwoh mhize ni a em khi Yusufu mou aa'?”
23Bhi Jesu satt mwopp le, “A ching tihh p'ar w'u satt shumpwoo mhize a'n, wu le, ‘Guyen, ghi bar sak sihng.’ Yakhal wunn p'ee p'ar satt a'n wu le, ‘Ghi sh'in kapp bii w'u mu klihng ghi sh'in bhakk Kafarnahum seh nihghinse kih yill mag zag sihng.’ ”
24Waa satt dyi mwopp le, “Ih satt a zeenn wunn, baah mwopp kihh cham lapp gu'wanggshiiy kih yill m'iin mou.#Yoh 4:44 25Ih satt a zeenn wunn, gyet shwarabkaah mwopp nhighin dhess Isra'ila dhighin yiiy dhakk mhi Iliya gu'wanggshiiy; yiiy w'u Naan shakhat fwan diy p'ee byitt kunn kihh kakhar, harr tekhell taah kih yill ni kihhdihng.#1Das 17:1 26Weett kihhsheh, bhi baah Naan lop Iliya lhidum kihpee m'ee mwopp diy mou; lop nyi lhidum a kihpee m'ee mat'kaah w'u Zarefat diy, koghobyill Sidoniya.#1Das 17:8-16 27Yakhal gyet mhilokhom mwopp nhighin dhess Isra'ila yiiy dhakk mhi Elisha gu'wanggshiiy, dhangg baah Elisha gyet tu'angg lokhom mhi kooh gurum kihmeh dhighin mwopp mou; tu'angg lokhom a Na'aman Gu-Siriya kyekk.”#2Das 5:1-14
28Kaarooh gurum w'u dhighin Luh'kang ni mwopp klihng bii w'u Jesu satt seh, bhi shwal mwopp shipwetd. 29Bhi mwopp shass yakhal dyi-dyarrang seh, mwopp tupp Jesu sh'i bhall lhiput tughuzyill ni; mwopp dum kihh nyi blett phi songg goghod bwumm w'u mwopp dyik tughuzyill ni kihdab, tihh mwopp bed nyi diy meng kaah'zoo lhisam kihh songg goghod ni. 30Weett kihhsheh bhi Jesu nyig b'aa, bhi bheeh pee taah dhel niy naar mwopp.
Jesu pun riin wu'bis dhighin m'ee gurum
Mar 1:21-28
31Bwoon bii mihhseh, bhi Jesu sam dum niy Kafarnahum, w'u a m'ee tughuzyill wu'zeh dyi dhighin yill Galili ni, bhi kihh sh'in kamm nhighin gurum mwopp p'ar Puus Nookdyi. 32Bhi aa'phi mwopp pwetd kihh kamm khinyi, p'ee kihh laa'pwoo sh'i maa'pee pwetd.#Mat 7:28,29
33Kaarooh Jesu kaah kamm dhighin Luh'kang w'u Kafarnahum ni, bhi m'ee gurum nhighin w'u kihh m'ee mumullung kooh riin wu'bis. Gwoh ni shwat kurrai kihh dhekheh niy bhall-bhall le, 34“Wa-a-a-i 'y! Ghi yet munn arr m'uun e'h! A mihyeh kang munn kihh gha ayeh, Jesu Gu-Nazaret? Baa ghi ji a p'ee nyigzheell munn aa'? Ai ih man gha; gha a Gwoohbhangg khi Naan.”
35Jesu tepbhelepp mumullung ni le, “Ghi paah pwoo gha! Put ghi yet gwoh ni diy!” Bhi mumullung ni s'an gwoh ni yill raiy kihkyeen gurum ni mwopp weett, bhi put dhel noott le'laah nyi. 36Bii ni aa'phi gurum ni mwopp weett, bhi mwopp kihh nang phi shag le, “Orr w'u kihh pwat pwoo gwoh mhize ni a kaarangg kihhshe, mwopp'muun? Kihh gab'waar riin wu'bis mwopp sh'i kokhorong kihh maa'pee bhi harr mwopp pwat reen e'h, wunn'!” 37Bhi pwookaah nyi kangpee weett koghobyill mhizeh ni.
Jesu bar mhi'shwal mwopp dhess
Mat 8:14-17; Mar 1:29-34
38Jesu yakhal put Luh'kang ni dum luh Siman, bhi nhikhin khi mat khi Siman kihh m'ee shikwong w'u dhen nyi biarr. Bhi mwopp dhang phi Jesu tihh bar nyi diy. 39Bhi Jesu taah dharr kaah nyi, tepbhelepp diy shikwong ni, bhi shikwong ni yet nyi n'ook wu'khimhi. Abet, bhi nhikhin'mat ni yakhal y'aa dhakk shap shed mwopp.
40Kaarooh puus dheeh arr r'u, bhi kwett mwooh kihh v'ur mhi'shwal mwopp ja kih mhi'shwal ni mwopp Jesu, bhi l'e sarr niy kih kooh meehrangg dhighin mwopp bar mwopp diy. 41A kihhsheh zag, bhi v'ur mumullung w'u dhighin gurum mwopp dhess mwopp pwat reen, mwopp kihh arrap wall mwopp le, “A gha a L'aa khi Naan oou!” Bhi Jesu tepbhelepp mwopp, baah yetpee mwopp tihh mwopp laa'pwoo diy mou, p'ee mwopp man le a nyi a Kristi.
42Kaarooh byitt m'ang, bhi Jesu put dhel dum dh'em. Dw'uu khi gurum ni mwopp y'aa dyoo nyi. Kaarooh mwopp kad nyi, bhi mwopp kihh t'ang d'aam nyi dhen shut, tapp yakhal yet mwopp dum m'ee yill wu'zeh mou. 43Bhi Jesu satt mwopp le, “Nyi a ching tihh ih satt Pwoo'wurett mhi Dhenglong khi Naan ni dhighin kakharr tughuzyill mwopp zag, p'ee a bii w'u Naan lop a'n p'ee sh'in nyi seh.” 44Bhi dhel dum yill Yahudiya, y'aa sokihkyeen kihh satt pwooNaan dhighin Luh'kang w'u yill Yahudiya ni mwopp zag.
©️2022 Luke Initiative for Scripture Translation