Hecho 6
6
Ũpẽarã k'aripapataɨrã siete p'anɨ jɨrɨ atadada
1Mãɨ ewaride chi Jesude ĩjãapataɨrã minachia waripodosidama. Mãɨne chi judiorã griego pedeade pedeapataɨrãpa chi hebreo pedeade pedeapataɨrã k'orea k'ĩruu pedea p'aneesidama. Jarasidama ũpẽarãpa p'ẽtãarã ewaricha chik'o jedautade ãchi p'ẽtãarã k'aripadak'a pasit'a. 2Mãɨ k'orea Jesupa peedaɨrã doce p'anɨpa Jesude ĩjãapataɨrã ãarea ará jeredak'ari nãɨya jarasidama:
—Pia bɨwẽma taipa Tachi Ak'õre pedea jaratea p'anɨ itu bɨdait'a, mãɨ p'ẽtã́ k'aripadai k'orea.#6:2 P'ẽtã́ k'aripadai k'orea. Griego pedeade nãɨya bɨ bɨma: chik'o nek'opataɨde jedadai k'orea. 3Mãɨpuru ũpẽarã, mãranepema siete ẽpẽerã jĩp'a be jɨrɨ atat'ɨ. Ãchi Tachi Ak'õre Jaore minachia uru p'ananai p'anɨma mãɨnepa k'ɨ̃risia minachia p'ananai p'anɨma. Mãɨrã taipa bɨdaipɨ p'ẽtãarã mãɨnepa waapẽarã k'aripadamẽrá. 4Mãɨya taipa p'ue pia Tachi Ak'õrea ɨt'aa chiidi p'ananaipɨ mãɨnepa ichi pedea jara p'ananaipɨ.
5Ãchia jaradada ãareaɨrãpa pia ũrisidama. Mãɨpuru Esteban jɨrɨ atasidama. Mãɨ Estebanpa Jesude minachia ĩjãa basima; Tachi Ak'õre Jaore minachia uru basima. Ichi awara P'elipe, Procoro, Nicanor, Timón, P'armena, mãɨnepa Nicolá Antioquía p'uurudepema jɨrɨ atasidama. Mãɨ Nicolá griego pasima maamina judio jĩra bapachima.#6:5 Griego pasima maamina judio jĩra bapachima. Griego pedeade nãɨya bɨ bɨma: prosélito. 6Mãɨrã chi Jesupa peedaɨrãmá ateesidama. Maapae Tachi Ak'õrea ɨt'aa chiidiutade ãchi jua abaɨ ɨ̃rɨ bɨsidama.
7Mãɨne ũpẽarãpa Tachi Ak'õre pedea minachia pedeapachidama. Mãɨya chi Jesude ĩjãapataɨrã Jerusalene atepe waripodosidama. Mãɨ awara minachia p'aarerã pida ĩjãasidama.
Esteban judiorã chõarãmá ateewãnana
8Tachi Ak'õrepa ichi sõpiadepa Esteban minachia k'aripa basima. Ichi jua chaareapisima ẽpẽerãpa ne p'ue oodak'apɨ́ waibɨa ẽpẽerã t'ãena oo bamẽrá. 9Mãɨne waapẽarã judiorã Cirene tuadepema mãɨnepa Alejandría p'uurudepema p'anasidama. Chi judiorã ará pedeapataɨ te “Chi Ãjã́ Pari P'anɨrã” apachidama. Waapẽarã judiorã Cilicia ĩjũanepema mãɨnepa Asia ĩjũanepema p'anasidama. Ãarea mãɨ judiorã Esteban ome k'ĩruu pedea tuaneesidama. 10Maamina ãchia Esteban p'uedaé pasima, ichi Tachi Ak'õre Jaore k'ɨ̃risiadepa pedeapachi pẽra. 11Mãɨpuru ãchia waapẽarã ẽpẽerã́ erreara teasidama nãɨya sea jaradamẽrá: «Taipa ũrisidama jãɨ ẽpẽrapa Moisé k'orea mãɨnepa Tachi Ak'õre k'orea k'achia pedea bɨt'a».
12Mãɨya ãchia chi p'uurudepemarã, judiorã chi chõarã mãɨnepa judiorã Moisepa bɨda jarateapataɨrã k'ĩruupik'apisidama. Mãɨpuru Esteban jitadak'ari judiorã chi chõarã posoa ará p'anɨmá ateewãsidama. 13Mãɨne sea jaradamẽrá waapẽarã ẽpẽra mãmá ateesidama. Mãɨrãpa nãɨya jarasidama: «Jãɨ ẽpẽrapa Tachi Ak'õre te minachia bɨ k'orea mãɨnepa Moisepa bɨda k'orea k'achia pedea baparima. 14Ichia jarasima Jesú Nazaredepemapa Tachi Ak'õre te minachia bɨ ãriit'a mãɨnepa Moisepa jaratea bada k'ĩra awara ooit'a. Ichia mãɨya pedea bɨt'a taipa ũrisidama».
15Ãarea chi chõarã mãma suak'abari p'anɨrãpa chi Esteban ak'ɨutade unusidama ichi k'ĩra Tachi Ak'õrepa ɨt'aripa peeda k'ĩtarra jĩra bɨt'a.
© (Active), Wycliffe Bible Translators, Inc. All rights reserved.