Hecho 5
5
Anania mãɨnepa Sap'ira
1Ichiaba ẽpẽra Anania apataɨ basima.#5:1 Mãɨ Anania abapuru nãɨ capítulo 5de pa bɨma. Capítulo 9de mãɨnepa 22de abaɨ Anania k'orea bɨ bɨma. Mãɨnepa capítulo 23de abaɨ Anania k'orea bɨ bɨma. Ichi k'ima Sap'ira apachidama. Ãchia pida ĩjũa netosidama. 2Maamina Anania chi k'ima ome pedea ausidama chi erreara ãarea teadaemaapa. Mãɨya Ananiapa mãɨ errearadepema ichi pae ãpia atak'ari, maapae chi erreara beeda Jesupa peedaɨrã́ teasima. 3Mãɨne Pedropa jarasima:
—Anania, pɨa ¿k'ãre k'orea tiore pɨ sõne itu wãpisima? Pɨa Tachi Ak'õre Jaore sea bɨma. Pɨ ĩjũa netodadepema erreara waapẽarã mẽra uru bɨma. 4Jãɨ ĩjũa netoi naena ¿porewẽ pasik'ãra? Netok'ari chi erreara sida ¿porewẽ pasik'ãra? Ãarea teai k'ɨ̃riawẽ pasipɨra ¿k'ãre k'orea jãɨya pɨ sõne seai k'ɨ̃risiasima? Pɨa ẽpẽra seaé pasima, mãɨpari Tachi Ak'õret'u seasima.
5Mãɨ ũriside Anania jeeda baewãk'ari, piusima. Chi mãɨyana ũrinaanarãpa minachia wap'easidama. 6Maapae k'ũtãarãpa chi piuda p'arupa pɨradak'ari, ateewãnak'ari t'ɨbarisidama.
7Mãɨ ora k'ak'o ũpea padak'ari Anania k'ima Sap'ira chesima. Anania mãɨyana ichia atua basima. 8Pedropa ichiá idisima:
—Mɨá jarase ¿Ĩjũa netosidak'ãra pɨ k'imapa jara bada jĩra?
Sap'irapa p'anoosima:
—Ãjã, mãɨya netosidama.
9Mãɨpuru Pedropa jarasima:
—Mãrapa ¿k'ãre k'orea pedea ausidama Tachi Chipari Jaorepa sak'á ooi k'awadayá? ¡Ak'ɨse! Chi pɨ k'ima t'ɨbaride wã p'anana jãma cheutama. Ara nãɨena pɨ sida t'ɨbaride ateewãnaipɨ.
10Ara mãɨ jaraside ichi Pedro jĩru k'ait'a piuk'ari baewãsima. K'ũtãarã eda cheutade ichi piubari bɨt'a unusidama. Mãɨne tajatá ateewãnak'ari chi k'ima k'ait'a t'ɨbarisidama. 11Mãɨpuru ũpẽarã mãɨnepa ãarea chi mãɨ ũrinana ne wap'easidama.
Jesude ĩjãapataɨrãpa ẽpẽerã minachia jɨpa beepidada
12Mãɨ ewaride Jesupa peedaɨrãpa ẽpẽerãpa ne p'ue oodak'apɨ́ minachia ook'oapachidama. Abarik'a k'ɨ̃risiadepa ũpẽarã ãarea Tachi Ak'õre te ãpɨtea p'ɨrrɨapataɨ Salomoné apachidaɨde ará posoa p'anapachidama. 13Chi p'uurudepemarã waapẽarã ne wap'eapa ãchi ome ará baridak'a pasima, maamina ãchi k'orea pia pedeapachidama. 14Mãɨne minachia ɨmɨk'ĩrarãpa mãɨnepa wẽerãpa Tachi Chiparide ĩjãasidama. Mãɨya chi ĩjãapataɨrã waripodosidama. 15Jesupa peedaɨrãpa ẽpẽerãpa ne p'ue oodak'apɨ́ minachia oo p'anɨ pẽra ẽpẽerãpa chi k'ɨdade be ne uapataɨde o ik'idá bɨpachidama, mãɨ Pedro p'asa wãrune chi ichi jaorepa ãchi ãpia pida t'õmarimẽrá. 16Ẽpẽerã minachia Jerusalén k'ait'a be mãɨnepa p'uurudepema pida ãchi k'ɨdade be mãɨnepa jaore mietá paara be ãchimá ateewãpachidama. Maapae ãareaɨrã jɨpa beepik'oapachidama.
Tachi Ak'õrepa ɨt'aripa peedapa Jesupa peedaɨrã k'aripa bada
17Chi p'aare minachia k'awa bɨ mãɨnepa saduceorã chi ichi paara p'anana sõk'achia p'aneesidama. 18Mãɨpuru Jesupa peedaɨrã jitadak'ari jɨ̃a nɨbɨsidama. 19Maamina ara mãɨ teamasi chi Tachi Chiparipa ɨt'aripa peedapa chi eda wãpataɨ ewak'ari maapae ãchi awara peesima. Maapae jarasima: 20«Tachi Ak'õre te minachia bɨdea wãnak'ari chi chok'ae bapiparí pedea ẽpẽerã́ jarat'ɨ».
21Ãchia ũrinana ĩjãasidama. Norema tap'ede Tachi Ak'õre te minachia bɨdea wãnak'ari jaratea p'aneesidama. Mãɨmisa chi p'aare minachia k'awa bɨpa mãɨnepa chi ichidirã ome p'anɨrãpa Israeldepema chõarã t'ɨ̃sidama ará posoa pedea p'ananai k'orea. Maapae chi Jesupa peedaɨrã chi ẽpẽerã jɨ̃a nɨbɨpataɨ tedepema enemeepisidama. 22Maamina ẽpẽerã jɨ̃a nɨbɨpataɨ te ot'eapataɨrã chesidaɨde ãchi ununaé pasima. Mãɨpuru jĩitea wãsidaɨde, nãɨya jarasidama:
23—Ak'ɨde wãsidaɨde, chi ẽpẽerã jɨ̃a nɨbɨpataɨ te pia jɨ̃a nɨbasima, mãɨnepa chi ot'eapataɨrãpa chi eda wãpataɨ pia ak'ɨmaa p'anasidama. Maamina chi eda wãpataɨ ewasidaɨde, aba pida ununaé pasima.
24Mãɨ pedea ũrisidaɨde Tachi Ak'õre te minachia bɨdepema ot'eapataɨrã chi atepe bɨpa mãɨnepa chi p'aarerã chi mãɨrã chaarearãpa k'awa k'ɨ̃risiadaé pasima mãɨnepa k'awadaé pasima mãmãɨpa naa sãmaasã́ beeit'a.#5:24 P'aarerã chi mãɨrã chaarearãpa. Griego pedeade chi eda waapẽarã k'art'ade nãɨ sida bɨ bɨma: p'aarerã minachia k'awa bɨ. 25Mãɨya p'anɨne ẽpẽra chek'ari jarasima:
—¡Chi mãrapa jɨ̃a nɨbɨdaadarãpa Tachi Ak'õre te eda jaratea p'anɨma!
26Mãɨ ũrisidaɨde chi Tachi Ak'õre te minachia bɨdepema ot'eapataɨrã chi atepe bɨ mãɨnepa chi waapẽarã ot'eapataɨrã paara ãchi jitade wãnak'ari, wap'eapa ãchi k'ĩruupidawẽa enemeesidama, p'uurudepemarãpa ãchi mawarapa bat'adayade a k'ɨ̃risiasidada pẽra. 27Ateewãnak'ari chi ará pedea p'anapataɨde k'ĩrari nɨbɨsidama. Maapae chi p'aare minachia k'awa bɨpa ãchiá jarasima:
28—Naena taipa minachia jarasidama mãrapa jãɨ ẽpẽra t'ɨ̃nepa waa jarateapidaemaapa. Maamina mãrapa ãarea Jerusalenepemarã́ jaratea p'anɨma. Mãɨ awara jãɨ ẽpẽra peadada k'orea tai nepɨra pará p'anɨane a jara k'ɨ̃ria p'anɨma.
29Mãɨne Pedro mãɨnepa chi waapẽarã Jesupa peedaɨrãpa p'anoosidama:
—Ẽpẽerãpa jara p'anɨ k'aepẽra Tachi Ak'õrepa jara bɨt'a ĩjãanai p'anɨma. 30Mãrapa Jesú k'urusude barijira bɨk'ari peasidama.#Deuteronomio 21:22-23. Maamina mãrapa peadada tachi chõarãenapemarã Ak'õrepa mãɨ chok'ae p'irabaripisima. 31Tachi Ak'õrepa Jesú ichi juaraari bɨsima Tachi Chipari mãɨnepa Tachi K'aripaparí bamẽrá. Ichidepa israel ĩjũanepemarãpa nemietá itu bɨdak'ari mãicha Tachi Ak'õremá p'ue chedaipɨ. Mãɨyara ãchia nemietá oodada Tachi Ak'õrepa k'ɨ̃risia atuaipɨ. 32Mãɨ taipa ara jarapatama. Tachi Ak'õre Jaore pida abarik'a jaraparima. Tachi Ak'õrepa ichi Jaore chi ichide ĩjãapataɨrã́ teaparima.
33Mãɨ ũrisidaɨde chi chõarã minachia k'ĩruunak'ari, chi Jesupa peedaɨrã pea k'ɨ̃ria p'aneesidama. 34Mãɨne p'ariseo Gamaliel apataɨ basima. Mãɨ Gamaliel Moisepa bɨda jarateaparí chi minachia k'awa bɨ pasima. Ãareaɨrãpa ichi minachia wap'ea p'anasidama. Gamaliel p'irabarik'ari chi Jesupa peedaɨrã tajatá ateewãpisima. 35Maapae chi chõarã́ jarasima:
—Israeldepemarã, mãrapa mãɨ ẽpẽerã sãmaasã́ oodai k'orea minachia k'ɨ̃risiat'ɨ. 36K'ɨ̃risiat'ɨ naena ẽpẽra Teudas apataɨ chi waapẽarã k'aepẽra ara ichi chi atepe ba k'ɨ̃ria basima. Ichi ome ẽpẽerã 400 p'anasidama. Maamina romanepemarãpa ichi peasidaɨde ãarea ichi ome p'anana jĩichoasidama. Maapae ãarea chi ichia ooi k'ɨ̃risia bada jõsima. 37Mãɨya nak'ari Romanepemarãpa ẽpẽerã k'awadayá joisiapiutade, Juda Galileadepema sida mãɨ Juda jĩra k'ɨ̃risia basima. Mãɨ Judapa ẽpẽerã minachia ichi ome uru basima. Maamina romanepemarãpa ichi peasidaɨde ãarea chi ichi ome p'anana jĩichoasidama. 38Mãɨpuru mɨa jararuma: nãɨ ẽpẽerã itu bɨt'ɨ. Ãchi oorãt'ɨ. Ãchia ara ãchi k'ɨ̃risiadepa jaratea p'anɨpɨra tãaraawẽane ãarea jõipɨ. 39Maamina Tachi Ak'õrepa mãɨ oopi bɨpɨra, mãrapa p'uedaiwẽma. Mãɨpuru jĩrak'aua p'anat'ɨ Tachi Ak'õre ome k'ĩruunaemaapa.
Gamalielpa jarada ãareaɨrãpa ĩjãasidama. 40Maapae Jesupa peedaɨrã mãicha t'ɨ̃ peesidama. Soapa p'epidak'ari ãchiá jarasidama waa Jesú t'ɨ̃nepa ẽpẽerã́ pedeapidaemaapa. Maapae ãjã́ pari bɨsidama. 41Ara mãɨne Jesupa peedaɨrã chi judiorã chõarã ará p'anɨmãɨpa arapá wãsidama. K'awasidama Tachi Ak'õrepa ãchi pia unusit'a, Jesú t'ɨ̃ k'orea mĩasida pẽra. 42Ewaricha jarapachidama chi pedea pia Jesú Tachi Ak'õrepa Tachi K'aripaparí teai jarada k'orea. Mãɨ jarateapachidama Tachi Ak'õre tede mãɨnepa techa.
© (Active), Wycliffe Bible Translators, Inc. All rights reserved.