John 17
17
Jesus‑em Yughaatkegkangi Maligsaaghteni
1Jesus taaqsami akuzineghmeng sivuglluni qilagmun yughaqaq, “Ataay, aghneq kaatuq. Quulvaghhu Ighneghen, quulviisqelluten Ighneghpenun. 2Ighneq Atanengllaqaqan tamaghhaanun yugnun. Enkaam kenlengilnguq unguvalleq tuunꞌngwaa tamaghhiitnun tuunegkaghpenun ellnganun. 3Yuget kenlengilngughmeng unguvallengaqut liitelleghmegteggun elpek, taananginaghhaq Kiyaghneghpigaq, liitelleghmegteggunllu Jesus Christ‑a elpek kayagtekan. 4Quulvaamaamken nunami whani apeghiillemkun qepghaqaq qelghutkan whangamnun pisqelluku. 5Enkaangam Ataay, manugpenisimalunga quulvaghnga quulvalleghmeng whanga piksaqemneng elpenillunga, sivungani nunam ulimallghan.
6“Liitestekaqaqa natetulen yugnun tagivaqaghpenun nunameng whaken. Elpek piksaqeten tagivaqaghten whangamnun. Qaatkegkaqiit akuziteten. 7Qenwatlu liitiit sangwaat qamaglluki tagivaqaghten elpeneng pingutangi, 8qayughllak apeghtuusaqegkaghten whangamnun apeghtuusaqegkaqanka ellngitnun. Tugukliimiit enkaam liitaat ipapestaaq tagikaatka elpeneng. Ugpeqaatlu elpenun kayagtekaatka.
9“Yughaatkengngwaanka ellngit. Yughaatkengngunghitanka yuget nunam pingi. Yughaatkengngwaanka tamaakut tagivaqaghten qayughllak elpek pikegketen. 10Qamaglluki whanga pinka elpek pikaten; qamaglluki elpek piten whanga pikanka. Ellngitgun aangelleghllaka kelgulluni ayuquq. 11Aglaghyaghtungestaghtunga elpenun, nunamennanighyaghtungestaghtunga, iwernga ellngit nunamellequt. Agleghnalghii Ata, aflengakiki aghtughyaghqaanghillghakun ateghpek, tagivaqaghten whangamnun, ataasiisqelluki ataasiillemtegetun. 12Ellngitnillunga aflengakegkaqanka aghtughyaghqaanghillghakun ateghpek, tagivaqaghten whangamnun. Kelengakegkaqanka, enkaam talwa ataasiq iflallghituq, iwerngaqun ataasiq yuuk iflayaghqaq, Akuzitet Igaqegkat apeghiighesqelluki. 13Whaa maaten elpenun aglaghnaqunga. Iwernga tawaten yughaghtunga paninang nunamellunga, quyalqa ilungitnitesqelluku whanga pima. 14Aapqaqanka Akuziteten ellngitnun, enkaam nunam yugan ugumikii qayughllak nunam pikenghilkangi whangamtun. 15Yughaatkengngunghitanka elpenun iqitesqelluki nunameng. Iwernga yughaatkengngwaanka elpenun aflengakaghtesqelluki Tughneghaghmeng. 16Nunam pikenghitii katam whanga pikenghitellghatun. 17Aaftiki elpenun ipapilleghqun; akuziten ipapillghuuq. 18Kayagtekaqanka nunamun, kayagtelleghpetun whanga. 19Ellngit apalluqluki whangamneng aaftekaagunga elpenun, ellngitlu aaftesqelluki akuzitegpegun ipapilleghqun.
20“Yughaatkengngwaanka taakut yuget, yughaatkengngwaanka tamaakutlu yuget ugpeqiyaghqat whangamneng ungipaqillghitgun maligsaaghtema. 21Yughaghtunga qamaglluki ataasiisqelluki. Ataay, yeqay ilumtegnitestiki katam tawaten elpek ilumnitelleghpetun, whanga elpek ilugpenitellemtun. Ilumtegnitestiki nunam yuganun ugpeqesqelluku elpenun kayagsimatka. 22Quulvaqaqanka katam tawaten quulvalleghpetun whanga, ellngit ataasiisqelluki katam tawaten whangkutung ataasiillemtegetun. 23Whanga ilungitnitunga, elpek ilumnituten ellngit ataasiightengngwaaghesqelluki. Enkaam nunam yugan liilleqaat elpenun kayagsimatka. Liilleqaatlu piniqellghen tamaakunun ugpeqilghiinun whangamneng, whangamnun piniqelleghpetun ayuqelghii.
24“Ataay, ukut yuget tagivaqaghten whangamnitesuwaqanka, ellngitnun esghiisqelluku nighughqelqa. Piniqutegpeneng taana nighughqelleq tagivaqaqan sivungani nunangllallghem. 25Kaay elqughutngalghii Ata, nunam yugan nallukaaten; whanga liisimakamken. Taakutlu tagivaqaghpek liisimakaat elpenun kayagsimatka. 26Liitestekaqanka natetulegpeneng. Liitesimanginaghnaqamken piniqellghen whangamnun ilungitnitesqelluku, whangallu ilungitninnalunga.”
© 2018, Wycliffe Bible Translators, Inc. All rights reserved.