John 18
18
Jesus Tugukangat
1Jesus yughaneghmeng taaqluni, maligsaaghtekullghiit aghviqat suqlunghegnekun aatqelghiik Kidron‑meng. Taawanguq inglugkeni olives‑et uqfigit; tawavek aglaqat. 2Jesus‑em uveghpagutistengan, Judas‑em liisimakegkanga taana takukaat, qayughllak Jesus‑enkut maligsaaghtekullghiit tawavek pituqat. 3Enkaam Judas chief priest‑enunllu, Pharisees‑enunllu aqfatkaq kelengakistenengllu, ilangitnengllu Rome‑em pilluwaghtengitneng. Taagken maghyaghquqii uqfigtuqamun. Taakut kelqegkat guututmeng, ilangi unaghsimeng kumangalghiimeng, ilangi kenelghutameng. 4Jesus‑em liisimakegkanga qamaglluku salleghqani, enkaam takuluki aaptekii, “Kina ivaghaqesteggu?” 5Kiimsiqaat, “Jesus Nazareth‑eghmii.” Jesus‑em pikii, “Whanga Jesus‑nguunga.” (Judas‑lu uveghpagutista nekevghalghii pilluwaghteni.) 6Jesus‑em tawaten piyisteng, “Whanga Jesus‑nguunga,” taakut yuget uteghmiiqaghluteng ulleghaatkat. 7Jesus‑em aaplaataqii, “Kina ivaghaqesteggu?” Kiimsiqaat, “Jesus Nazareth‑eghmii.”
8Jesus‑em pikii, “Ungipaatamsi, whanga Jesus‑nguunga. Whangangukan ivaqaghsi ukut yuget aghulaqesteki.” 9Jesus tawaten pikaalghii apeghiighesqelluku whaten pilleni, “Ataay, tagivaqaghpeneng talwa ataasiq yuuk iflamangitaqa.”
10Taagken Simon Peter‑em savigpani nusugaghlluku ilefkaghaghtekaa Malchus‑em aghenqigneq sigutnga. (Malchus, high priest‑em qepghaghtelaaqegkanga.) 11Jesus‑em pikaa Peter, “Savigpagen kanaghtigu. Qayuusiq meghenghillakuun Atam tagivaqaa?”
Jesus Aglaaskangat Annas‑mun
12Taagken pilluwaghtet, umiilgatlu, kelengakistetlu Jews‑et takuluku Jesus, tuguluku asighqegkaat. 13Enkaam sivukluku aglaatkaat Annas‑mun, sakinganun Caiaphas‑em. (Tawani ayumiqulleghmi Caiaphas high priest‑ngulghii.) 14Caiaphas‑em pikaqegkangi Jews‑et igleghutistet, pinighataghaghlleqniluku ataasiq yuuk tuqumatkiyaqan yugnun.
Peter‑em Nallunqegkanga Jesus
15Simon Peter‑emllu, ilanganllu maligsaaghtem kingunganeng maligtekaak Jesus. High priest‑em liisimakegkanga aallgha maligsaaghta. Enkaam legan taam maligsaaghtem maligtekaa Jesus, high priest‑em mangteghaan uvitanganun. 16Peter nekevghamaluku amigem tungangani, aallghan maligsaaghtem, high priest‑em liisimakegkaan, aanluni aleghqughluku aghnaghaq amigniighta iteghtestekaa Peter. 17Aghnaghaam amigniightem aaptekaa Peter, “Elpekluu taam yugem maligsaaghtekaten?” Peter‑em kiimsiqaa, “Nakaa! Maligsaaghtekenghitaanga!”
18Qepghaghtetlu kelengakistetlu charcoal‑meng kumaghtikaalghiit ughugsighnaluteng qayughllak aqlaghalnguq. Peter‑llu tawani ughugsiqaq.
High Priest‑em Aapqughwaaqanga Jesus
19Qama ilungani high priest‑em aapqughwaaqaa Jesus, maligsaaghtenganengllu apeghtughillghanengllu. 20Jesus‑em kiimsiqaa, “Yugtuqami akuziiqunga. Quunpeng apeghtughiiqunga qamaglluteng Jews‑et qerngughutfigitni, synagogue‑ni, Temple‑millu. Sangwaa alngunak aksaqluku akuzitkigataqa. 21Enkaam sangama aapqughwaaghsinga? Aaptiki yuget nagatkat apeghtughillemneng. Liisimakaat sameng pimatka.” 22Jesus tawaten piyan kelengakistem tunganganilnguum qasaghlluku aaptekaa, “Sangan tawaten kiimsighsigu high priest‑a?” 23Jesus‑em kiimsiqaa, “Sameng seghletun akuzimakuma, aapghu seghletun akuzilqa. Iwernga elqughusimakuma sangama qasaghsinga?”
24Taagken Annas‑em, aglaatestekaa Jesus asighqengngaan Caiaphas‑mun, high priest‑mun.
Peter‑em Nallunqellaataqaa Jesus
25Simon Peter nekevghaghmi ughugsiimaluku aaptekaat, “Elpekluu maligsaaghtekaten taam yugem?” Peter mesighaqaq, “Nakaa! Maligsaaghtekenghitaanga!” 26Ataasiq qepghaghtenga high priest‑em tawanlenguq, ilakwaagha yugem, Peter‑em sigutngighaghtekaan. Qepghaghtem aaptekaa, “Esghaghsugnisiken ellnganilluten olives‑meng uqfigtuqami?” 27Allameng Peter mesighaghlaataqaq. Aga tawaninginaq rooster‑a qalghiqaq.
Jesus Aglaaskangat Pilate‑mun
28Taagken unaangupiglluku Jews‑et igleghutistengita aglaatkaat Jesus Caiaphas‑em mangteghaaneng, Rome‑em umiilegpagan palace‑nganun. Taakut igleghutistet iitghumangilnguut palace‑mun, qayughllak ukmangighsaghwaaqaalghiit Moses‑em Liilightuusaan pisqellghatun neghnaluteng Passover‑mi. 29Enkaam Pilate‑em aanvikluki aaptekii, “Sameng anaggusimafta una yuuk?” 30Kiimsiqaat, “Una yuuk taginnayanghitaghput elpenun anaggusimangisaqan.” 31Pilate‑em pikii, “Aglaalluku elpesineng nanqigteggu Liilightuusaghpesi pisqellghatun.”
Pikaat, “Rome‑em liilightuusiitni whangkuta Jews‑eni aghyuughisiqsaghqaqenghitaghput tuqutilleq.” 32(Tawaten akuzillghita apeghiiqaat Jesus‑em apellgha naten tuqulleghqamineng.) 33Taagken Pilate itenqiglluni palace‑mun, tagitesluku Jesus aaptekaa, “Elpaak umiilkaten Jews‑et?” 34Jesus‑em kiimsiqaa, “Elpeneng aapsinga tawaten? Nalighmeng kitum ungipaatkaqaaten whangamneng?” 35Pilate‑em kiimsiqaa, “Sumeghpeni Jew‑nguzingaa? Elpek katam yugpek, chief priest‑etlu tagitkaqaaten whangamnun. Sameng anaggusimazin?” 36Jesus‑em pikaa, “Ataneghpagulqa uum nunam pikenghitaa. Ataneghpagulqa nunameng pinguyaqan, qepghaghtema pilluwaannayaghaatnga Jews‑enun tuunefqaama pisqellunga. Iwernga Ataneghpagulqa nunameng pingunghituq.” 37Pilate‑em pikaa, “Taawa umiilguftuten!” Jesus‑em pikaa, “Elpek umiilguniighpenga. Tagikaagunga nunamun una apalluqluku: apeghnaluku ipapighqelleq yugnun; taana apalluqluku allgeqaagunga. Qamaglluni piniqingalghii ipapilleghmeng nagatkayuguuq whangamnun.” 38Pilate‑em aaptekaa, “Sangaawa ipapighqelleq?”
Tawaten piluni Jews‑et aanviklaataqii. Pikii, “Una yuuk naalkefikenghitaqa sameng anaggusimatanga aghyuughusighqameng. 39Iwernga elpesi nangaghneqegkesi, Passover‑mi whangamnun aanestesugaqegkesi ataasiq anusimingllaghaq. Itemutesugestegguu una umiilga Jews‑et?” 40Akilghuukat, “Nakaa, ellnga pifqaan, Barabbas aanestigu!” (Barabbas wayaghniightengulghii.)
© 2018, Wycliffe Bible Translators, Inc. All rights reserved.