Luka 13
13
Tengulukenu ku wubi wenu ndelewa mukaloba
1Ha shikati shiyo bantu bekalile kuyo batongwezele Yeshu bya Bangalileya baya azihile Pilato oho batupwilenga zinkombela zabo kuli Nyambi. 2Niho Yeshu waba kumbwile ngayi, “Kati mu kuhanganika ngayi bayo Bangalileya bengile bakawubi kupitakana Bangalileya bamina oho bayandile ha byuma bya noho ndi? 3Byo, kaliha noho! Ngoboni nikumitongweza ngayi, ndele mutenguluke ku wubi wenu, ndelewa nanenu kami nimwenu mukafwa. 4Hinge baya likumi na mutanu na bahatu kawililile kapeshi ka Shilome na ku baziha, mu kuhanganika ngayi bekalile na mulandu wakupitakana bantu nimwabo bazikile mu Yelushalema ndi? 5Byo, kaliha noho! Ngoboni nikumitongweza ngayi ndele mutenguluke, ndelewa nanenu kami nimwenu mukanonga.”
Nguli ya mutondo wa mukuyu wakubula mikabo
6Yeshu wabatongwezele eye nguli ngayi, “Muntu umo wekalile na mutondo wa mukuyu wakuniwile mu mfuba yendi ya shinyanca, wezile na ku shingako mikabo, ngoboni kaliha wayiwanineko. 7Pe wambile na ndimi wa mfuba yendi ya shinyanca ngayi, ‘Mona, yengakale myaka yihatu nezinga na kushinga mikabo ku nou mutondo wa mukuyu, ngoboni nawananga kowa. Wuteme, bihi ukubipishila limvu?’ 8Ngoboni ndimi wamukumbwile ngayi, ‘Hekulu, ulehe taha na mwaka uno kami, nilimeko, pe niyakeko wilo. 9Ndi ukayima mikabo mwaka ukwiza, pe shashiwahe, ndi kukayima wufwako, ukawutema.’ ”
Yeshu ukunyongomanisha mbuyama wa shihole ha Mutena Wakukatala
10Ha Mutena umo Wakukatala Yeshu walongeshelenga mu shinangonge. 11Mwekalile mbuyama wekalile na mayimbwe amwingishile wuhole mu myaka likumi na mutanu na yihatu. Wongomanine kami kaliha watweshele kunyongoloka. 12Oho Yeshu amumonene wamwihanine, pe wambile kukwendi ngayi, “Obe mbuyama washobolokakale ku wulweli wobe.” 13Wamukambikile maboko, hohobene wanyongolokele, kami wayemezele Nyambi.
14 #
Kut 20:9-10; Nday 5:13-14. Ngoboni mukulwane wa shinangonge wapilamine, ndaba Yeshu wanyongomanishile ha Mutena Wakukatala. Wambile ku bantu ngayi, “Kwekala matena mutanu na limo awa ba ku fwanina bantu kutenda milimo, niwo matena mu ku fwanina kwiza na kunyongomanishiwa, ngoboni kaliha ha Mutena Wakukatala!”
15Niho Mwene amukumbwile ngayi, “Enu bakashishweka! Kati enu nimwenu, kaliha mwamangululanga ngombe hinge mbongolo mu mulaka na kumutwala na kunwa mema ha Mutena Wakukatala ndi? 16Haya ou muzukulu wa Abulahama amangile Shatana myaka likumi na mutanu na yihatu, kati ku fwanina shifwako ngayi ashoboloke ha Mutena Wakukatala ndi?” 17Oho akumbwile noho, bamalamo bendi nimwabo bayenene, ngoboni bantu nimwabo bawahililile ndaba ya byuma byabiwahe nimwabyo ebye atendelenga.
Nguli ya mbuto ya mashitandi
(Mateo 13:31-32; Mako 4:30-32)
18Nohobene Yeshu wepwile ngayi, “Kati Wene wa Nyambi ukufweka ngo bishini? Kami nikuwufwekesha na bishini? 19Ukufweka ngo lupeka lwa mashitandi, luyo ashimbile muntu na kulukuna mu mfuba yendi. Lwakulile, kami lwengile mutondo, pe tuyoni twatendelele mahwa ku myahi yawo.”
Nguli ya mumena
(Mateo 13:33)
20Yeshu kami wepwile ngayi, “Wene wa Nyambi nikuwufwekesha na bishini? 21Ukufweka ngo mumena uyo ashimbile mbuyama, wawuvubile na muhunga wawingi wa loto, hantu noho muvuba watundulukile nimwawo.”
Shipana sha kushinana
(Mateo 7:13-14, 21-23)
22Oho Yeshu ayilenga ku Yelushalema, walongeshelenga mu minzi yayinene na mu tuminzi. 23Niho muntu umo ambile kukwendi ngayi, “Mwene, kati bantu babashe tuhu bakapuluka ndi?”
Yeshu wambile kukwabo ngayi, 24“Ezekenu shikuma kwingina mu shipana sha kushinana, ndaba bantu babengi bakezeka kwinginamo ngoboni kukatwesha bafwako. 25Oho mwine litala akakatuka na ku shinka shihala, mukemana ha munkanda na kungongomweza ha shihala na kulambilila ngayi, ‘Hekulu, tushinkwilileko,’ pe ukamikumbula ngayi, ‘Kumilimuka nifwako, kami kulimuka oku mu kufuma nifwako.’ 26Pe mukamba ngayi, ‘Twalilenga na kunwa nobe hamo, kami walongeshelenga mu zimbanza zetu!’ 27#Nyi 6:8. Ngoboni ukamikumbula ngayi, ‘Kumilimuka nifwako, kami kulimuka oku mu kufuma nifwako. Fumenu kukwami, nimwenu enu bakakutenda byabibi. 28#Mat 8:11-12; 22:13; 25:30. Kuyo mukalila na kulikekenya ku mayewe, oho mukamona Abulahama na Ishaki na Yakobo na bamiluwe mu Wene wa Nyambi, ngoboni enu bakamiyumbila ha munkanda. 29Bantu bakafuma ku mushamuko na ku mponci, ku ncelele na ku mabukubuku, bakekala ku shimbo sha mayambwayambwa mu Wene wa Nyambi. 30#Mat 19:30; 20:16; Mako 10:31. Niho aba banengi bamamaninino, bakenga bakutatika, kami bakutatika bakenga bamamaninino.”
Yeshu ukulilila Yelushalema
(Mateo 23:37-39)
31Ha shikati shiyo bene kwezile Bafwalishi bamo bezile kuli Yeshu bambile ngayi, “Fuma kuno uye kwashenge, ndaba Helonda ukushinga kukuziha.”
32Yeshu waba kumbwile ngayi, “Yenunga mukatongweze uya mumbwe ngayi, ‘Nishili kufumisha mayimbwe na kunyongomanisha bantu, lelo na nzona, mutena wa wuhatu nikamanisha mulimo wami.’ 33Ngoboni nafwanini kwenda lelo na nzona na nzuzi, ndaba muluwe wa Nyambi kaliha wafwanina kufwila kwashenge ndele mu Yelushalema.
34“Obe Yelushalema, Yelushalema! Obe mukakuziha bamiluwe na kupuha mamanya baya Nyambi anatumu kukwobe! Bikati binga nashingile kukungula bantu bobe nimwabo ngonehe nkazikuku akungulanga bana bendi mu nceto ya mbando zendi, ngoboni mwakanine! 35#Nyi 118:26. Monenu, Litala lyenu lya Nyambi likashiyiwa. Nikumitongweza ngayi kukamona kami mufwako, hantu haya mukamba ngayi, ‘Uli na mfuywezi ou ukwiza mu lizina lya Mwene.’ ”
Libuka Lya Kuyela © Bible Society of Zambia, 2020.