JOHANA 3
3
Ng’alalet kaboto Nikodemo
1Kimi chi ne bo Parisaik, ne kigiguure Nikodemo, ki bounindet ne bo Yahudik: 2kinyo chichoto ole mi inendet kemoi, ak kolenji, Rabbi, kingen kele i konetindet ne bunu Jehovah: amu mami chi ne imuchi koyai kaborunoichu iyae inye, ngo mami Jehovah koboto inendet.
3Kowolji Jesu kolenji, Amwaun, iman, iman, ale, Ngot ko ma kisich chi eng’ siget ne leel, ko magoi imuch kogeer bounatetab Jehovah. 4Kolenji Nikodemo inendet, Kisiktoi ano chi ye kagoosit? Imuchi kogetyigei moetab kamet kogeny, ak kesich? 5Kowolji Jesu kolenji, Amwaun, iman, iman, ale, Ngot ko ma kisich chi eng’ beek ak Tamirmiriet, ko magoi imuch komong’ji bounatetab Jehovah. 6Ne kigisich eng’ borto ko borto; ak ne kigisich eng’ Tamirmiriet ko tamirmiriet. 7Amekwong’ amu kamwaun ale, Kanyol kesichok eng’ siget ne leel. 8Usyin koristo ole machei, ak igase cheennyi, ago mengen ole bunu, anan ole wendi: ko u noto chi age tugul ne kagisich eng’ Tamirmiriet.
9Kowolji Nikodemo kolenji, Imuchi kobiitunda ano tuguchu? 10Kowolji Jesu kolenji, I konetindetab Israel, ameguitosi tuguchu? 11Amwaun, iman, iman, ale, Kimwae ne kingen, ak kebaorianjini ne kagegeer; amotaache baornatennyo. 12Ngamwawok tuguk che bo ng’ony, amoyani, omuktoi ano ogan ngamwawok tuguk che bo kipsengwet? 13Mami chi ne kitogosta kipsengwet, kobate inendet ne kichorgei eng’ kipsengwet, inendet ko Weritab chi ne mi kipsengwet.
14Ak ko u ye kiigartat Musa erenet eng’ ong’atet, kigartoti ko u noto Weritab chi matiny: 15si konyor sobondab koigeny eng’ inendet age tugul ne iyani. 16Amu kicham Jehovah ng’ony mising, kot kogoito Werinnyi ne kigii inegei, si malus age tugul ne iyani inendet, ago si konyor sobondab koigeny. 17Amu kima iyokyi Jehovah Werit ng’ony koruokyi ng’ony; ago si kesor ng’ony eng’ inendet.
18Magiruokyin chi ne iyani inendet: ago inendet ne maiyani, ko kagiruokyi, amu ma iyan eng’ kainetab Weritab Jehovah ne kigii inegei. 19Ak ni kiruoget, amu kinyonji ng’ony lapkeiyet, ak kicham bik mesundeito kosiir lapkeiyet; amu ki yaach boisionikwak. 20Amu wechei lapkeiyet chi tugul ne yaei yaitio, ama nyonei inendet ole mi lapkeiyet, si mang’ang’ogis boisionikyik. 21Ago nyonei ole mi lapkeiyet inendet ne yaei imanda, si kobiit kibarta boisionikyik, kele kigiyai eng’ Jehovah.
Baornatet ne bo aeng’ ne kibaorian Kabatisanindet agobo Jesu
22Kingobata tuguchu konyo Jesu ak alamalyennyi emet ne kiguure Judea; ak kibeni oloto koboto ichek, ak kobatisanis. 23Ak kibatisanisiei Johana agine eng’ Aenon ne negite Salim, amu kimi beek che chang’ oloto: ak kibwa bik, ak kigibatisan. 24Amu kitom ketoorji Johana korgoret.
25Kibiit anyun teebutiet eng’ alak che bo alamalyetab Johana ak Yahudiot agobo katililet. 26Ak kibwanji Johana, ak kolenji, Rabbi, ibatisanisiei inendet ne kimi koboten eng’ Jordan komosin, ne kiibaorian agobo inendet, ak bwanjin inendet bik tugul. 27Kowol Johana kole, Magoi imuch chi kotaach kiy, ngo ma kigochi eng’ kipsengwet. 28Kiobaorianja okweget kole, kiamwa ale, Ma a Kristo, ago olen kigiyokwa andoune inendet. 29Sandet inendet ne tinyei mureret: ago baibai mising’ choruetab sandet, ne tononi koepchin it inendet, amu kutitab sandet: isuldaat anyun boiboiyoninyu. 30Nyoljin inendet koeet ne matiny, ago aming’initu.
31O inendet ne bunu barak kosiir tugul: inendet ne bo ng’ony ko bo ng’ony, ak ng’alali che bo ng’ony: inendet ne bunu kipsengwet ko o kosiir tugul. 32Baorianjin inendet kit ne kigogeer ak ne kigogas; ama mi chi ne taachei baornatennyi. 33Inendet ne kagotaach baornatennyi ko kagonde ng’oksennyi, kole bo iman Jehovah. 34Amu ng’alali ng’alekab Jehovah inendet ne kiiyogu Jehovah; amu magonu inendet Tamirmiriet eng’ karogendoet. 35Chamei Kwanda Werit, ak kigonde tuguk tugul eunnyi. 36Tinyei sobondab koigeny ne iyani Werit; ama keerei sobondo ne magase it Werit, ago tebe neregekab Jehovah baragunnyi.
God's word open for all
©Bible Society of Kenya, 2020