JOHANA 2
2
Katunisiet eng’ Kana
1Ak kimi katunisiet eng’ betut ne bo somok eng’ Kana ne bo Galili; ak kimi oloto kametab Jesu: 2ak kiga kiguurji katunisiet Jesu agine, koboto alamalyennyi. 3Ak ye kingorar divaik, kolenji kametab Jesu inendet, Ma kotinyei divaik. 4Ak kilenji Jesu inendet, Chebiosoni, kiting’ege nee ak inye? Tom koit sainnyu. 5Kolenji kamet otwogik, Kiy age tugul ne kamwawok, oyai.
6Ak kimi oloto terenik lo che eechen che bo beek, che bo koik, ko u biteetab katililetab Yahudik; kiyamei age tugul debeisiek mut anan ko lo. 7Kolenji Jesu ichek, Onyiit beek terenichoto. Kiinyiit anyun mising’. 8Ak kilenji, Osiilu nguno, ak oipchi bounindetab igorta. Ak kiipchi anyun. 9Ak ye kingochamjam bounindetab igorta beek che kagoek divaik, ama nai ole kabunu (ago kiingen otwogik che kasiilei beek), koguur bounindonoto sandet, 10ak kolenji, Igoitoi chi tugul divaik che miach korok; ak ye kagoee bik mising’, kogon che ma miach: kaigonor divaik che miach agoi nguno.
11Taunet nito ne bo kaborunoikyik ne kiyai Jesu eng’ Kana ne bo Galili, ak kiibortoi torornatennyi; ak kiiyan inendet alamalyennyi.
12Kingobata nito, kochortagei Kapernaum, koboto kamet, ak che tupcho, ak alamalyennyi: ak kibeni oloto betusiek che matia.
Kitilili hekalut
13Ak kiga rik paska ne bo Yahudik, ak kitogosta Jesu Jerusalem. 14Ak kinyor kotebei eng’ hekalut che kialdoi eik ak kechirek ak cheptugenik, ak walikab siling’isiek: 15ak kiyai kipcharitit ne bo rogoonik che kisach, ak koon tugul komanda eng’ hekalut, koboto kechirek ak eik; ak koranda siling’isiek che bo walik, ak kogabui mesosiekwak; 16ak kilenji icheget che kialdoi cheptugenik, Oib tuguchu koba eng’ oli; amoyai gotab Baba koek ole kiyae mung’aret. 17Kiibwat anyun alamalyennyi kole kigisir kele, Ama ng’etkonda agobo gong’ung’.
18Kiwolji anyun Yahudik kolenji, Iboruech kaborunet ngoro, amu iyae tuguchu? 19Kowolji Jesu kolenji, Ong’em hekaluni, si ang’eet kogeny eng’ betusiek somok. 20Kile anyun Yahudik, Kigiteech hekaluni eng’ kenyisiek artam ak lo, ak ing’eeti inye eng’ betusiek somok?
21Ago king’alali inendet agobo hekalut ne noto ko bortanyi. 22Ye kinging’eet anyun inendet komong’ eng’ che kibek, kobwat alamalyennyi kole kiga komwa ng’olyondonito; ak kiiyan sirutiet, ak ng’olyot ne kiga mwa Jesu.
23Ye kimi Jerusalem eng’ paska, komi igorta, koyan bik che chang’, kainennyi, kogeerei kaborunoikyik che kiyai. 24Ago kima chamdagei Jesu, amu kiingen bik tugul, 25ak amu kima komage kiy chi ne baoriani agobo chi age; amu kiingen inendet kit ne mi chi orit.
God's word open for all
©Bible Society of Kenya, 2020