Mateo 4
4
Da ñi'iguenataguec so Jesús
(Marcos 1.12-13; Lucas 4.1-13)
1Qaq co'ollaq mashi ime de'eda, nachi so Espíritu Santo ÿauega so Jesús ca tojlec 'alhua, da yaqto' so shiÿaxaua lma'na ÿi'iguen somayi.
2Nachi somayi sa ishit da deque'e, chochi ividaxattrauec soua cuarenta na'axa'te qataq soua cuarenta pe'. Qaq co'ollaq inoxoodeec se'esoua na'axa'te, nachi huo'o na lqouaxa. 3Nachi so shiÿaxaua lma'na nqo'ona so Jesús da ÿi'iguen. Nachi 'enapego', 'eeta':
–Da ÿoqta 'eesa da 'am llalec ñi Dios, qaq no'on qome da nañigui pan 'anqa'en ne'ena coma'pi.
4Nachi so Jesús 'enapeco':
–Naua ñiyigui'shi l'aqtaqa ñi Dios 'eeta': Sa ishit da nachacata aca pan da i'añaqchit ca shiÿaxaua, mayi nataq'en 'enauac na l'aqtacpi ñi Dios.
5Nachi so shiÿaxaua lma'na ÿauega somayi so la ciudad Jerusalén mayi ÿataqta qui'itta. Nachi ÿaviguishiguemec na l-laq aso n'onaxanaxaqui. 6Nachi 'enapega, 'eeta':
–Qom ÿataqta 'eesa da 'am llalec ñi Dios, qaq 'aupadenaxaneec qome. Cha'ayi yi l'aqtac ñi Dios mayi nanettañi 'eeta':
Ñi Dios namaq qome ca lamaxashic piguem l'ec,
da yaqto' 'am ntela'a.
Nachi 'am ÿachitalguete qome naua lhua'q camayipi,
da yaqto' sa ishit da ntoqneto naua 'adchil na coma'pi.
7Nachi so Jesús 'enapeco':
–Nataq'en yi nanettañi l'aqtac ñi Dios 'eeta': Sa ishit qome da 'avi'iguen ñi 'adataxala' Dios.
8Qaltaq ÿi'iguelaxalec so shiÿaxaua lma'na da ÿauega so Jesús aso qaÿoqotchiguemec qasoxonaxa. Nachi ÿachaxanalo 'enauaque naua 'ale'u mayi huetalguete ana 'alhua qataq 'enauac da l'amaqchic namayipi. 9Nachi 'enapeco':
–Aÿim 'am sami' 'enauac ne'ena, da ishit da 'au'alyiñi naua 'adllicte da aÿim 'avi'oxoden.
10Nachi so Jesús 'enapega, 'eeta':
–'Am Satanás, aÿim qoca'ai, cha'ayi yi nanettañi l'aqtac ñi Dios 'eeta': “'Avi'oxoden ñi 'adataxala' Dios, qataq nachaqñita 'au'onataxanot.”
11Nachi so shiÿaxaua lma'na, somayi ca'ai so Jesús, nachi anac so namaxashicpi piguem l'ecpi da qaitauan somayi.
So Jesús co'ollaq chita'ague da do'onataxan, qalaq hueta'a yi Galilea
(Marcos 1.14-15; Lucas 4.14-15)
12Qaq so Jesús co'ollaq l'axaÿaxac da so Juan qoÿanaigui aca ncoñitaxanaxaqui, nachi somayi taÿa yi 'alhua Galilea. 13Qalaxayi sa ishit da naña yi Nazaret. Chaqdata da nqo'ona da naña yi pueblo Capernaum. Yimayi neto'ot na loigue aso lapel late'edai mayi netau'a na loigue yi 'alhua Zabulón qataq yi Neftalí. 14Qaq 'eetec de'eda, yaqto' ipacchigui dam ÿiyiñi co'olloxochiyi so Dios l'aqtaxanaxanec l'enaxat Isaías, 'eeta':
15Qaq 'am 'alhua mayi 'am lalamaxat na llalaqpi so Zabulón qataq so Neftalí,
qataq 'am nqa'aic mayi 'anlectelec aso auaxai mayi 'aupa'aigue da nala' lliguishiguem yi tala Jordán.
'Am Galilea mayi netalec nam sa ishit da judiopi.
16Nam shiÿaxauapi mayi huetaigui na napalaxa,
qalaq namayipi ila'a aso late'edai 'ico' ncoÿadaxanaxaqui.
Nam huetaigui nam ÿataqta lta'adaic lpaqal da nleuaxa,
qalaq namayipi icoÿadelec aso 'ico' coÿadaxanaxaqui.
17Huaña, nachi so Jesús cot da da'aqtaxan, 'eeta':
–Qai'axañiideec qome naua qan'onataxacolli', cha'ayi mashi sa qaÿapeque da l'onataxanaxac ñi Dios mayi neta'ague da piguem da ilo'ogue 'enauacna.
So Jesús nÿaxaañalo soua cuatro ÿi'acoxoiqa
(Marcos 1.16-20; Lucas 5.1-11)
18Qaq huo'o so na'a'q so Jesús queto'ot so loigue aso lapel late'edai mayi huaña yi Galilea. Nachi ila'alo soua dos nqaÿa't. So 'oonolec l'enaxat Simón, da l'enaxat lÿa Pedro. Qaq so lÿa, qalaq l'enaxat Andrés. Soomayi ÿasaqtrapiguiñi so lalegue'c, cha'ayi ÿi'acoxoiqa. 19Nachi so Jesús 'enapegalo, 'eeta':
–Aÿim qoquiigue, yaqto' qami' sanaguilo da qanmichiÿaique na shiÿaxauapi, qoñiita'am ca ÿi'acoxoic.
20Nachi soomayi qaica ca ÿictrega, nachi n'onaxatchiguilo so lalegue'c da ca'atregue somayi.
21Qaq co'ollaq mashi qaÿata'aguelo, nachi so Jesús qaltaq ila'alo soua lÿa't nqaÿa't, Santiago qataq so Juan. Soomayi nachi llalqa so Zebedeo, netrangui aso barco, huaqta'ato so lta'a', napadeeta'pe so lalegue'c. Nachi so Jesús iÿaxanalo soomayi. 22Huaña, nachi soomayi n'onaxatchiguilo aso nbarco' qataq so lta'a', nachi ca'atregue somayi.
So Jesús ÿapaxagueetac so qalota shiÿaxauapi
(Lucas 6.17-19)
23Nachi so Jesús coleetapeguelec 'enauac yi Galilea da dapaxaguenataxaatapoigui ana laponaxaquipi na judiopi yi'iyi 'alhua, i'axattac da no'on qad'axaÿaxac mayi i'axat da ñi Dios ilo'ogue 'enauacna, qataq natadeetac 'enauac na ÿotta'a't lalolaxaguesat na shiÿaxauapi. 24Nachi ivida'a 'enauac yi 'alhua Siria da n'aqtaguec so Jesús. Nachi qanda'a somayi nam ique'eteetac na ÿotta'a't lalolaxaguesat, nam huo'o na l'ec leguemaxaic, copchaxaicpi, qataq na sa da'añiigue. Nachi 'enauac nataden so Jesús. 25Nachi ÿataqta qalota na shiÿaxauapi ca'attague' somayi, nam chigaqaña yi Galilea, qataq yiua diez pueblo mayi qaÿamata'ac Decápolis, qataq yi Jerusalén, qataq yi 'alhua Judea, qataq na pa'aigue da nala' lliguishiguem yi tala Jordán.
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.