पेरित 1
1
1माननिय थियोफिलस, येसुन गर्ल काम र सिकाइल सेब्बे कुरो मुइनिन पइलार किताबनाइ लेखिसक्लाछु।#लुक १:१-४ 2आफिन छान्लाइ पेरितकाइ येसुन पबित्र आत्माकर सक्तिबान आग्या दिलपछि येसु स्वर्ग उठाइ लाकाइल दिनसम्मकर सेब्बे कुरो ह्व किताबनाइ आछि। 3येसुन धेरइ दुख भोगिकइ कुरुसनाइ मर्लपछि आफि साँच्चि ने जिउँते हक्ल कुरो भिन्दे-भिन्दे तरिकाबान देखाइले, र चालिस दिनसम्म घरि-घरि होल्कोनाइ देखा पर्ले। अनि होल्कोसिन परमेसोरकर राज्यकर बारेनाइ कुरो गर्ले। 4येसु होल्कोसिन हक्तिन होल्काइ इन्खा आग्या दिल्याक, “ब्वान तोराल्काइ दिछु बाजिके पर्तिग्या गर्ल बरदान बइपाउन्जेलसम्म तोरा यरुसलेम छाडिके कत्थुनि जुनजाओ। हेक्र बारेनाइ तोराल्किन पइला ने मुइबान सुनिसक्लाछो।#लुक २४:४९ 5किनारइभने युहन्नान ता पानिकर बप्तिस्मा दितेल, तर अबकर केइ दिन पछि तोराल्किन पबित्र आत्माकर बप्तिस्मा पाइनारआछो।”#मति ३:११; मर्क १:८; लुक ३:१६; युह १:३३
येसुलाइ स्वर्ग उठाइ लाकाइल
6पेरितलत येसुसिन जम्मा हक्ल बेलानाइ होल्किन येसुलाइ सोद्ला, “पर्भु, केति तुइनिन हेइ समयनाइ ने इज्राएलकर राज्य फेरि खडा गर्नार आछस?”
7येसुन होल्काइ बल्-ल्याक, “हेक्र समय तोक्नार अधिकार ता ब्वासिन मात्र आछि, ह्य जान्नार तोराल्को काम बया। 8तर पबित्र आत्मा तोराल्कोनाइ आइल पछि तोराल्किन सक्ति पाइनारआछो, र तोरा यरुसलेमनाइ, सेब्बे यहुदियानाइ, सामरियानाइ र धर्तिकर कुना-कुनासम्म मोर साछि हक्नारआछो।”#मति २८:१९; मर्क १६:१५; लुक २४:४७-४८ 9येसुन ह्य कुरो बाजिसक्ल पछि होल्किन हेर्तिन-हेर्तिन येसुलाइ स्वर्ग उठाइ लाकाल्ते। बादलिन येसुलाइ छोपल्ते र येसु होल्को आँखिबान नाठ्ले।#मर्क १६:१९; लुक २४:५०-५१
10जब होल्किन येसुलाइ आकासदिस उचालि लाकाइधर्ल एकोरो हेरिधर्लाइ रइला, तब एक्कासि एकदम गोरो लुगा लाइलाइ दुइटाइ मान्छे होल्को छेउनाइ ठडाइला। 11होल्किन बाज्ला, “गालिलकराइ मान्छे हो, तोरा किनारइ आकासदिस हेर्तिन ठडाइधर्लाछो? येसु ता स्वर्ग जाइसक्ले, जिनिखे अखन तोराल्किन येसुलाइ स्वर्ग जाइधर्ल देख्लाछो, उनिखे ने येसु फेरि आइनारआछ।”
यहुदाकर ठउँनाइ मतियास छानिल
12अनि पेरितलत जइतुन डाँराबान यरुसलेम फर्किला। यरुसलेमदेखि ह्व डाँरा लगभग एक किलोमिटर बद्दुर आछि। 13यरुसलेम पुग्ल पछि होलत आफि बस्नार घरकर उपल्चो तालाकर कोठानाइ पस्ला। उछिका पत्रुस, युहन्ना, याकुब, अन्दिरियास, फिलिप, थोमा, बारथोलोमाइ, मति, अल्फयसकर बेटाक याकुब, देसभक्त बल्ल सिमोन र याकुबकर बेटाक यहुदा रइल।#मति १०:२-४; मर्क ३:१६-१९; लुक ६:१४-१६ 14होल्कोसिन केइ बेटिलत, येसुकरि आमेक मरियम र येसुकर भाएकलत एकसाथ जम्मा हकिके निरन्तर पार्थना गरिधर्तेला।
15ह्व बेला उछि लगभग एक सय बिस जन येसुलाइ बिस्वास गर्नाराइ मान्छेलत जम्मा हक्लाइ रइला, अनि पत्रुस होल्को माजनाइ ठडाइके बाजइ लाग्ले, 16“दाजि-भाइ हो, धर्मसास्तरनाइ लेख्ल बचन पुरा हकइ पर्नार रल्ति, जुन बचन येसुलाइ पक्राइनारको अगुवा यहुदा इस्करियोतकर बारेनाइ दाउदकर मुखबान पइला ने पबित्र आत्मान बाज्ल रइल। 17ह्व हाइसिन ने गनिल रइल, र पर्भुकर काम गरइलाइ ह्व हाइसिन ने छानिल रइल।”
18होइनिन अधर्मकर काम गरिके कामाइल पइसान खेत किन्ल रइल। होइ खेतनाइ उँधोमुन्टो हकिके झर्ले र होक्र पेट फुटल्ते, अनि सेब्बे आति-भोटि निस्कल्ते। 19ह्य कुरो यरुसलेमनाइ बस्नाराइ सेब्बाल्किन था पाइला। होल्किन ह्व खेतकर नाउँ आफ्ने भासानाइ “आखेल्दामा” धर्ला। हेक्र अर्थ “रकतकर खेत” हो।#मति २७:३-८
20पत्रुसिन बाज्ले, “भजनसङ्ग्रहकर किताबनाइ इन्खा लेख्लाछि,
‘होक्र बासस्थान खालि हक्दिक,
उछिका कोइ पुनि बास जुनबस्दिखन।’
ह्य पुनि लेख्लाछि,
‘होक्र कामकर जिम्मा अर्केन ने लिदिक।’#भजन ६९:२५;१०९:८
21“होइहुदान हाम्रो माजनाइ येसु जिउँते हक्ल साछि देइलाइ हाम्रो समुहबान इन्खा एउटो मानुसलाइ छानइ आबस्यक आछ, जुन मानुस पर्भु येसु हाम्रो माजनाइ हकिके भित्र बाइर गर्तिन सदइ हाइसिन रइल, 22अर्थात युहन्नान बप्तिस्मा दिल समयसिन लिके येसु मर्लबान जिउँते हक्तिन देख्ल र स्वर्ग उठाइ लाकाइल दिनसम्म हाइसिन हक्ल हकइ पर्छि।”#मति ३:१६; मर्क १:९; लुक ३:२१;२४:५१
23ह्य कुरो सुनिके उछि जम्मा हक्लाइ मान्छेल्किन दुइटाकाइ अगि सार्ला। एउटो चाइ योसेफ रइल, ह्यलाइ बारसाबास अर्थात युस्तस पुनि बाज्तेला, अनि अर्को चाइ मतियास रइल। 24होल्किन इनिखे पार्थना गर्ला, “हे पर्भु, तुइनिन सेब्बाइ मान्छेल्को हिर्दयनाइ हक्ल कुरो जान्छस, ह्य दुइटाइ मद्दे तुइनिन जुन्टोलाइ चुन्लाछस ह्व हाइलाइ देखाउ, 25र होइनिन ह्य सेवा र पेरितकर काम गरइ सक्दिक, किनारइभने ह्य सेवाबान यहुदा भट्किकइ जाइले र आफ्ने निज ठउँनाइ मर्ले।” 26होल्किन ह्व धेउटाल्को नाउँनाइ चिठ्ठा हाल्ला। मतियासकर नाउँनाइ चिठ्ठा परल्ते, अनि एघार पेरितकोसिन होक्र गन्ति हकल्ते।
© 2024 (Active), Mother Tongue Translators Society and Wycliffe Bible Translators, Inc. All rights reserved.