Acts 9
9
Saul aa ukam eq aa
(Acts 22:6–16; 26:12–18)
1Eshi rangham tho Saul aa Teyhungwa jiphantey tang tha tikwat ma tachopan chey ta. Piq ajong tingwa tang solwa relnáng kata, 2etho Teyhungwa lam phantey miqnu nia miqwa tha khak eq Jerusalem náng sol kat ma, Damascus synagogue tang ma iri likwit raa chuta.
3Saul Damascus relna sey thu atho, photla rangkang wang wallit ka eq piq tha timchak ta. 4Piq haq thináng bon atho ashey raaq tatta, “Saul! Saul! Nang aa nga ri chamma tahitham phu?”
5Piq aa pitta, “Teyhungwa, nang utang aa?”
Piq aa thawel batta, “Nga Jesu, bara nang aa tahitham phu. 6Etharin shat u etho samhaq náng ka u, etho nang aa chamli som ching sha eshina nang ma bat kotna.”
7Saul jamoq miqwa qhingta tha tho jin raaq moq sey angta; chammatakoi ning aa raaq kap tatta etharin utang eq tho khi moq angta. 8Saul haq wang tunshat ta, umiik tha kalta, etharin chamtho khimoq angta. Piq jam wang miq they piq tha jak o lo eq Damascus náng solkat ta. 9Saaltom piq aa jin khimoq angta, etho eshi rangham tho piq aa chamtho jinling phaksat moq angta.
10Damascus na ashey jiphantey miq bara piq miing tha Ananias ta angta, Ananias máng na Teyhungwa piq ma batta, “Ananias!”
Piq aa batta, “Teyhungwa, nga irina.”
11Teyhungwa piq ma batta, “Kacha eq, ‘Achal lam’ ta thaming aa lam náng ka u, etho Judas him náng thu eq Tarsus haq wang ashey miq miing Saul ta miing aa shi bi u. Chammatakoi piq aa romtam chu aa, 12etho máng na piq aa Ananias ta ashey miqwa khita bara thu eq piq o ujak shingta etho piq aa jin khi sey ta.”
13Ananias aa thawel batta, “Teyhungwa, piq aa Jerusalem na ba asang miqtang o jashit jaksom somlo aa ta nga iri miqwa tung aa raaq daqhan miqtang ching wang kap tat táng. 14Ba miing haltey miqtang tha lot ma ajong tingwa tang ching wang authority som eq irináng thuta.”
15Etharin Teyhungwa piq ma batta, “Ka u, chammatakoi Gentile tang etho ning lungwang tang etho Israel miqtang imiing tasam ma, nga piq sha taltáng, 16etho imiing rangma chamli tsamnang ching sha piq ma takhi náng.”
17Req Ananias him náng wangta, etho piq aa ujak Saul kho o shing eq batta, “Ino Saul, Damascus náng kat lam tho nang ma takhita Teyhungwa Jesu aa nga takat taphang. Ba miik eq wey khi eq ma etho Asang Tsija eq shey ma piq aa nga takat taphang.” 18Photla hun Saul miik wang miik ship mal qhat ta etho jin khi sey ta. Etho piq shat eq junglam ta. 19Etho piq aa Phaksat jio tarong kapta.
Saul aa Damascus na phanchan aa
Saul saal daqhan jiphantey jamoq Damascus o tong ta. 20Piq achal eq Synagogue náng kata etho Jesu raa Shkewa Miqwasa ta phanchan ta.
21Thaji miqtang rapney patja eq pitta, “Jerusalem na iri miing haltey tha tatik chaktey iri miq raa ang moq i? Etho piq ira ro ning tha khak eq ajong tingwa tang jamoq solma thupha moq angta pha i?”
22Etharin Saul phanchan na rapney rong eq, Jesu raa hun khristo ta tatal kot ta etho Damascus na tongtey Jehudi tang aa thawel bat ma chamtho ahung sey angta.
23Saal daqhan sey chuwang ta tho, Jehudi tang tachong eq Saul tatik ma kara wanta. 24Etharin ning raaq wan tha Saul aa usam eq ta. Piq tha tatik ma rangwung rangpal ning aa samhaq palkang tang tha siintan chey ta. 25Etharin Saul jiphantey tang aa rangpal o piq tha ashey khong o tatong ta etho wangthuk kho wang taqhat ta.
Saul Jerusalem na
26Saul Jerusalem náng thu atho, Jesu jiphantey tang jamoq kata. Etharin piq raa jiphantey ta ning aa han moq angta, etho ning thaji piq ma ucho angta. 27Req Barnabas aa Saul tha apostle tang jamnáng sol eq thuta, chamal eq Saul aa lam na Teyhungwa khita etho Teyhungwa aa piq jamoq chamalang ta wanta, etho Saul aa chamal eq cho hunga Damascus na Jesu miing phanchan ta ta bat eq ning ma bat kot ta. 28Irimal ang eq Saul ning jamoq tong ta etho Jerusalem na ling qhing eq Teyhungwa miing chopan hung aa bat kot ta. 29Piq raaq tho uwan angta etho Greek raaq tey Jehudi tang jamoq raaq wan nia thadan ta, etharin ning aa piq tha tatik ma tathin ta. 30Uhantey tang aa iritang raa samta tho, ning aa Saul tha Caesarea náng thok solta etho Tarsus náng takatta.
31Etho irimal thaji Judea, Galilee, etho Samaria mung mondoli tang aa nungmay kapta, etho urong ang chey ta; etho Teyhungwa ma cho wang tong ta etho Asang Tsija tinthajong o mondoli tha cha chey ta.
Peter sha Lydda nia Joppa mung na
32Irimal ang eq Peter thaji náng lingqhing ta, Lydda na tongtey Asang miqtang jamna tho thuta. 33Eshina piq Aeneas ta miing aa miqwa jamoq tachong ta, bara jak aa jaa jin thamot moq jibching na pang ashat sey angta. 34Peter aa Aeneas ma batta, “Aeneas, Jesu Khristo aa nang taqhal taphu. Shat u etho ba jibching ni taqhal u.” Photla piq tunshat ta. 35Lydda etho Sharon na thaji tongtey piq tha khi eq Teyhungwa relnáng thuta.
36Joppa shina Tabitha ta miing aa ashey uhantey tong ta. Piq miing sha Greek na Dorcus angta, Dorcus ta “Khohi.” Iri miqnu re rapney jaqhal jaksom etho tangshit tang sha nong chey ta. 37Eshi neynap tho piq tak eq ti ta. Piq máng tha jaqhal eq takhol eq aluk him sho thajib ta. 38Lydda tha Joppa relna angta; etho uhantey miqtang aa Peter Lydda na ta tatta, ning aa miqwa ani takat eq piq ma tin thanin eq batta, “Karel hunga í jamnáng kaphu.” 39Req Peter shat eq ning jamoq kata. Piq thu atho, piq tha aluk him khok náng sol qhanta, etho thaji notinu tang piq jamoq lang ta etho Dorcus atharang tok tho khat phin kot ta khat tang tha notinu tang aa qhap eq piq ma takhita. 40Peter aa thaji tha ran náng takatta, etho langku o shongtong eq romtam chuta; piq hanphung ko thináng ngik eq raaq ta, “Tabitha, shat u.” Etho piq aa umiik tha kalta, etho Peter tha khi eq piq shat tong ta. 41Peter aa ujak tha kot eq piq tha tashat ta. Etho piq aa asang miqtang etho notinu tang tha tho hal eq Peter aa Dorcus tha thalun eq ning ma kot chakta. 42Joppa wang thaji miqtang iri raaq tha tatta etho daqhan miqtang aa Teyhungwa tha hanta. 43Peter ngamqhup phintey Simon jamoq Joppa na saal daqhan tong ta.
CC BY-NC-ND 4.0