Acts 10
10
Peter nia Cornelius
1Caesarea na Cornelius ta thaming ta ashey miqwa angta. Piq sha Italy waan na shashey ralkoltey tang ajongwa angta. 2Piq sha thong somtey miq angta; piq nia uhimtey tang thaji Shkewa ma chota. Etho Jehudi tangshit tang ma rapney nong ta etho salwet Shkewa ma romtam chuta. 3Saal shey rangja atom rangham mal o piq aa máng khita, eshi máng sho Shkewa rangkamwa thu eq piq ma batta, “Cornelius.”
4Piq aa ethi rangkamwa tha siingsin ta etho cho eq batta, “Tatalteywa, chamli aa?”
Rangkamwa thawel batta, “Shkewa ba romtam shima etho tangshit miqtang ma nong u shima sungrang angta etho Shkewa nangma thawel ma kacha ang aa. 5Thanga Joppa na ashey miqwa takat eq Simon Peter shi tahal u. 6Piq jungku kang na tongtey ngamqhup phintey Simon him shina winwa.” 7Baluk o rangkamwa bara piq jamoq wantit chey ta tha jol ching wang ta, Corniluis aa ani sanga etho ashey phong ralkoltey tha halta. 8Etho ning ma thaji raaq tha bat eq Joppa haq náng takat ta.
9Rangney kampang tho, ning qhing eq Joppa relna thu atho, Peter romtam ma himkho na lang wangta. 10Piq chamlal khongta, eshirangma phaksat ma nukta; tilsong chey ta, ethi kamtho piq aa máng khita. 11Piq aa mungtan thalak atha khita, etho ethiwang ajong khatnup sha sokbali o lo eq anim konáng haq nàng thamchey ta. 12Esho mingkang wang uphan jatngam tang, jongbal etho jat wo tang angta. 13Etho ashey raaq batta, “Peter shat u; tikwat eq phak u!”
14Etharin Peter aa batta, “Teyhungwa, jin ang moq; chammatakoi nga baluk otho anaan nia jashit phan sha phak wey mong.”
15Etha raaq eq wey batta, “Bara Shkewa tasang ta, eshima nang aa anaan ta nak raaq u.”
16Irimal juktom angta, etho mungtan náng eshi khatnup tha wey thawel somta.
17Peter ethi máng tha tathintak kamtho, miqwa tang bara Cornelius aa takatta, ning aa Simon him bi eq kap chongta, etho thanga ning ni ran kalung na langta. 18Ning tom aa hal eq pitta, “Iri na winwa Simon Peter atha i?”
19Peter aa thang nángduk umáng tha tathin chey ta, etho Tsija wang piq ma batta, “Watom irina nang bi phu. 20Req kacha eq anim náng ju u, etho nán hunga ning jamoq ka u, chammatakoi ning tha nga hun takat taphang.” 21Req Peter anim náng ka eq miqwa tang thima batta, “Nga raa nim aa bi phin tha. Nim shi chamma ka taphin?”
22Ning aa batta, “Shashey waan ralkoltey ajongwa Cornelius takat taphi. Piq sha asing nia Shkewa ma chotey etho thaji Jehudi tang aa piq tha rapney rangka aa. Nang piq him náng hal eq baching wang raaq tat ma Asang rangkamwa aa piq ma batta.” 23Peter aa ning tha himmong náng halta etho rangpal o eshina tong ta. Saalji na piq ning jamtho kata; etho Joppa wang chamtey uhantey tang piq jamoq kata. 24Saalji na, piq Caesarea náng thuta etho Cornelius aa piq himtey tang etho unokwa tang thajoq eq ning tha banta. 25Peter him náng wángma ang atho, Cornelius aa piq tha chong eq piq jaa o bon eq piq tha shumnuk ta. 26Etharin Peter aa piq tha tashat eq batta, “Shat u, nga tho ashey miq hun.” 27Peter piq jamtho wan eq himmong náng wáng atho daqhan miqtang thajoq atha khita. 28Piq aa ning thima batta, “Nim aa usam eq inn, Jehudi tang Gentile miq jamoq tachong tia thajun wa thong na ahung. Etharin Shkewa nga ma takhi taphang, nga utang miq ma tho anaan tia ashit miq ta raaq ching ang moq. 29Ethirangma nim aa baluk o nga haltaphin, nga chamtho raaq hunga kataphang. Thanga nim ma pit phang, nim aa nga chamli jaksom ma hal taphin?”
30Cornelius aa batta, “Saal tom jakho iri rangham atom o, ihimna romtam chu chey táng. Kalo hun ashey miqwa khatlip sam eq i jakho na langta. 31Etho batta, ‘Cornelius, ba romtam etho tangshit miqtang ma nong u sha Shkewa tasik ta. 32Req chamtey Joppa náng Simon Peter miqwa relnáng takat u. Piq jungku relna ngamkhu phintey Simon himna winwa ang eq tong aa.’ 33Eshirangma nga nang kalo thokma miqwa tang takat taphang etho nang irináng kat sha rapney jaqhal. Eshirangma Teyhungwa í ma chamli bat kot rangma nang ma raaqkhat kot ta, esha tat ma í Shkewa jakho na tong i.”
Peter raaq
34Etho Peter aa batta, “Nga asing sam sey ang, Shkewa thaji sha arum aa siin aa. 35Etharin utang piq ma chotey etho asing jaksom tey sha phan ajat siin hunga Shkewa tat aa. 36Shkewa aa Israel miqtang ma takat ta raaq tha nim aa usam eq inn, ira raaq thaji sha Teyhungwa Jesu Khristo tungkang o nungmay tungtang qhal. 37John junglam raaq phanchan jio Galilee wang taphang eq, thaji Judea na chamlang ang ta tha nim aa usam eq inn. 38Nim aa Nazareth Jesu tung aa raaq sam eq inn etho chammal Shkewa piq ma Asang Tsija etho tarong kot ta tha tho usam eq inn. Piq aa thaji haq náng ka eq jaqhal jaksom somlo ta etho thang eq rum aa miqtang haan wang tha tho phanchak ta, chammatakoi Shkewa piq jamna angta. 39Piq aa Israel mung na etho Jerusalem na chamli somlo ta tha í raa miikkhi kottey. Ning aa piq tha bólq náng bot eq tatik chakta. 40Etharin saaltom o Shkewa piq tha utik wang thalun eq takhi ta. 41Thaji miqtang ma piq tha taqhi ma kot moq angta, etharin Shkewa talta miikkhi tey tang ma takhita. Eshi miikkhi tey tha í etho piq utik wang lun jio, í piq jamoq ling phaksa ti. 42Etho miqtang ma phanchan ma etho atharang nia amáng miqtang sha phung ma Shkewa piq tha shingta ta miikkhi kotma í ma raaqkhat kot taphi. 43Utang eq piq han aa, piq miing tungkang o ngarey tang sha tolchak kapna ta thaji rangsamal tang aa piq tung aa raaq miikkhi kot aa.”
Gentile tang aa Asang Tsija kap aa
44Peter aa bat chey ta tho, thaji miq eq raaq tat chey ta tang thima Asang Tsija thuta. 45Jehudi kamtey miqtang bara Joppa wang Peter jamoq kata, Shkewa Asang Tsija jakkot sha Gentile tang ma tho ukot eq aa tha khi eq ning patja ta. 46Chammatakoi ning aa adak adak raaq ni raaq na Shkewa tha tasapsey tha ning aa tat ta. Etho Peter aa batta: 47“Iri miqtang rey tho í aa kapti mal Asang Tsija kap aa. Irimal ang ajo ning aa junglam ma utang eq jin táng na?” 48Req ning ma Jesu Khristo miing o junglam ma raaqkhat kot ta. Etho ning aa Peter ma saal shey ni ning jamoq tong ma tin thanin eq batta.
CC BY-NC-ND 4.0