Yohanes 19
19
1Wene andi yugugu lagagwama, Yesus nabirok vaga warupwak yiluk, Pilatus en it ap yegen werek ako wogeragagi. 2Wogirigya lagagimu, nabirok vaga watu lagagwarik, waren-waren adok werek menda unggul vaga walinogo danggubaluk, yum mudu elokwe ndimbup-ndimbup agare hak yikbagagwa. 3Yikbagu lagagwarik, Yesus adema ambi lagek, ambi lagek ogagu dugwit, “Avakwa Yakuri Enowa Hinis Ombok yi wa!” yiluk, Yesus unggul ininggis vaga watu lagagwa.
4Watu lagagwama, at Pilatus ako ambi inim weram it ap Yakuri menda enadema wunggu lagagirik, yugirigya dugwit, “Ap yoma! Ap yi, weyak ambi ogagetek higirikmu, hit hinilup arovovok yiluk, wolok wulu wagi.” 5Yugirigya lagagimu, At Yesus unggul vaga nggari-nggari adok-adok werek menda inim, yum mudu elokwe ndimbup-ndimbup agare hak yikbagagwa inim, yirik wulu wagagi. Wulu wagya lagagimu, at Pilatus en, “Ap ako yi hinil yokhanes.”
6Yugirigya lagagimu, it ap imam-imam enasini inim, ap Ala awi valek suam warisagwi menda inim, akoen Yesus inil hugu lagagwarik, enane ombok vaga yugu dugwit, “Yo winik vaga lobalogo bas! Yo winik vaga lobalogo bas!”
Yugu lagagwama, Pilatus en, “Dek. Ap yi, weyak ambi mondok ogagetek higirikmu ma, hit henadigen vagarogo yo vaga lobalogo belales.”
7Yugirigya lagagimu, it ap Yakuri menda en, “Dek! Nit ogagu dogop wene dirup warek musek lendagwi atma, ap yi, ‘An Ala Abut aro,’ yagagi halok, At warup-at imbito.”
8Yugugwis ako, at Pilatus aruk hunggu lagagirik, alon wisane agagi. 9Alon wisane agya lagagirik, ambi inim avakwa enowak dilisagwima akoma nunggwigya lagagirik, Yesus yugugu dugwit, “Hat hawi adem o nggoma en wagagin?”
Yugogogi ovara, At Yesus anedek-at welagagi. 10Anedek welagagimu, at Pilatus en, “Hat wene onggo an yuknirup ambi embetetek agindik? Visilogo hekbagaup a, yo vaga lobalogo bagaup a, an vagago agirik ako Hat hinggut agindik yi?”
11Yugugu lagagimu, At Yesus en, “At mbogot vaga menda en hat An okbanup yiluk andok okbagalipuk en, haren An okbanup vagago duklinbuk. Anderogo atma, hat okneraliga yi ako andi, weyak horogat ovara, at An neyave woknerelok wokhiri waga halok andi, weyak eve iya erogo ogaga,” yiluk, yugogogi.
12Wene andi yugogogi ako at Pilatus aruk hobaluk, Yesus heda visilogo hekbagiluk ogagagi. Heda visilogo hekbagiluk ogagagi ovara, it ap Yakuri menda enane ombok vaga at yugugu dugwit, “Ap ambi en, ‘Ninis ombok aro,’ iri halok, ap andi, Kaisar inim iperen ogorek agarwik. Anderogo atma, hat ap yi, heda visilogo hekbagya heyalok, hat Kaisar inim hunik degat hombarusogom o,” yiluk, yugogogwa.#19:12: Ap Kaisar andi, it ap Oroma menda enasin inis ombok welagagi. Eke, yi awi ndi awi wisane Oroma menda dek ovara, o Oroma enavema welagagwa. It avakwa Iserali menda ogo, o Oroma enavema welagagwa. Anderogo atma, irenen “Ap ambi en, ‘Ninis ombok aro,’ iri halok, ap andi, Kaisar inim ogorek agarik, araro,” yiluk, yugu lagagwa.
13Yugugwis ako at Pilatus aruk hunggu lagagirik, Yesus wolok wasim winggigi. Wunggu lagagirik, wene enowak dilisagwima inis, Helep Ndalek o, yugu lagagwa akoma-at hora yagagi. (Helep Ndalek o, yugu lagagwa ako andi, it Iberani enane vaga Nggavata.) 14Hora yagagi ako andi, isogo Vasika vipuk ogagusigik, o dingga jam 12 vaga at hora yagagi. Hora iri lagagirik, Pilatus en it ap Yakuri menda yugirigya dugwit, “Ap yoma wai! Henasin inis ombok yi hinil yokhanes.”
15Yugirigya lagagimu, “Dek. Wolok laup-at! Wolok laup-at! At yo winik vaga lobalogo balak!”
Enane ombok vaga yugugu lagagwama, at Pilatus akoen, “Anenen henasin inis ombok yo vaga lobalogo baup embetep yi?”
Yugirigya lagagimu, it ap imam-imam enasini ap ombok-ombok en, “Nenasin inis ombok andi, Kaisar adigat!”
16Yugu lagagwama, at Pilatus en Yesus yo winik vaga lobalogo bapwak yiluk, wogeragagi.
Yesus yo winik vaga lobalogo bagagwa wene
(Matius 27:32-44; Markus 15:21-32; Lukas 23:26-43)
Wogirigya lagagimu, Yesus wolok lagagwa. 17Wolok lagusigik, Yesus en At agyo winik ako hedelok, o ambi inis, Unggul Owakma, ako vaga beta inggigi. (O andi, inis Iberani enane vaga, Nggologota.) 18Beta inggya lagagimu, andoma At Yesus ilim lobalogo baluk, ap mberen ambi venak, ambi venak, inim yo winik vaga paku lobalogo bogogwa.
19Bugu lagagwama, at Pilatus en, “Yesus Nasaret menda it ap Yakuri Enowa Inis Ombok yi o,” yiluk, dirup warogo yo winik vaga lobalogo bapwak yiluk yugeragagi. 20Yugeragagi dirup warogo yo vaga lobabagu lagagwama, Yesus yo vaga lobalogo bagagwarikmu akoma andi, kota Yerusalem horogat welagagirikmu, eke, dirup warek ako andi, Iberani enane vaga inim, Oroma enane vaga inim, Yunani enane vaga inim, dirup warek atma, it avakwa Yakuri menda wisane dirup warek ako inil bikhugu lagagwa. 21Inil bikhugu lagagwama, it ap Yakuri menda imam-imam enasini akoen Pilatus yuguri wagu dugwit, “‘It ap Yakuri menda Enowa Inis Ombok yi o,’ yiluk, dirup watin andi anderogo ogarubuk. Ata, ‘It ap Yakuri menda Enowa Inis Ombok Anat, yagas,’ yiluk, dirup waru.”
22Yugugu lagagwama, at Pilatus en, “An dirup watis ako andi, mondok warek-at dogopwak,” yiluk, yugeragagi.
23Yugirigya lagagimu, it ap enayegen werek akoen Yesus yo vaga lobalogo baluk, At asum nggolalek ako ap eneyave 4 en, yum ako eneyave wane-wane-at man erogo hedagagwa. Man erogo hidugu lagagwarik, Yesus asum adup weram menda ako wokbaluk, 24#Mazmur 22:18 yokhanes. ir-it wene mbanggu dugwit, “Avyak yoma wai! Asum yi, libilogo adik-adik hedaup weyak. Ata, ‘Sa hidigya hamwi?’ yiluk, helep enggen vaga wakhasogom,” yagagwa. Anderogo yagagwa ako, Ala wene endak dirup warek vaga en ayat ambi iri dugwit:
“Nasum ovok erogo man erogo hidugwi,
nasum hedasogom yiluk, helep enggen vaga wakhelok hidugwi,
ogasagwi o,”
yiluk, yagagi, dirup watigi ako atma des yupwak yiluk, anderogoat ogagagwa.
25Ogagusigik, At Yesus isa inim, At isa elavogwe inim, Maria ap Keliopas ogwa ako inim, eke, Maria awi Makdalena menda ako inim, Yesus yo winik avema horok andenam-at welagagwa. 26Yesus en At isa inim, At ane waliga menda ambi endawi hunik welagagi ako inim, andenam mendek il inugu lagagirik, At isa ako yugugu dugwit, “Hinya wai. Heyak andi aro.”
27Yugugu lagagirik, At ane waliga menda ambi ako yugugu dugwit, “Naswe. Hat hisa andi aro,” yugugu lagagimu, wene yugeragagi ako hudi At Yesus ane waliga menda akoen Yesus isa inim dogoguluk amwa wolok lagagi.
Yesus hombagagi wene
(Matius 27:45-56; Markus 15:33-41; Lukas 23:44-49)
28Anderogo yugirigya lagagirik, At Yesus en, “Ovok wotok erogoat ogagi,” imbita dugwit, Ala wene dirup warek ako atma des yupwak yiluk, “An is uvup o,” yagagi.
29Iri lagagimu, andoma sogolowak ambi anggur agas eda menda nudik welagagirikmu, suk wambamok amburup vaga yomakbaluk, yo hisop atok vaga hunogo Yesus elagapma mabagagwa. 30Elagapma mabagagwa ako ninggya lagagirik, “Ovok ogagi o,” yiluk, ut sibo iri dugwit, endawi weralhidigya lagagirik, hombagagi.
Yesus eyave agako sapok erogo watigi wene
31O andi vaga Isogo Vasika isarup vipuk ogagusigik, heveret it Yakuri menda samban ombok ogaruguluk welagagwa. Eke, samban ombok ako vaga ap eneyave yo winik vaga dogop enanggon umbutugwa. Enanggon umbutu dugwit, it yo winik vaga lobalek welagagwa ako yiluguluk hambupwak yiluk, inisok hedalogo eneyave wogonombolok lapwak yiluk, it ap Yakuri menda en Pilatus yuguri wagagwa. 32Yuguri wagu lagagwama, it yegen werek ako, lagu lagagwarik, it ap Yesus inim lobalogo bogogwa ambi inggis amotkan welagagi ako isok hedanggwis, eke, venak hwarenggan welagagi ako isok hedanggwis, ogagu dugwit, 33Yesus bikhugu lagagwarik, vage hombagagimu, isok hedanggitek. 34Isok owak hedanggitek ovara, ap yegen werek ambien andi, Yesus eyave agako segowa sapok erogo watya lagagimu, amuya inim is inim mbikit wulu wagagi. 35At ambi il hegek ogagagi akoen avyarat yiluk, vaganggigi. Eke, hit ogo, avyarat ombarovovok yiluk, at avyarat ilup dugwit, vagalogo yugeragagi.
36 #
Keluaran 12:46; Bilangan 9:12; Mazmur 34:20 yokhanes. Anderogo ogagagwa ako Ala wene endak dirup warek atma des yupwak yiluk, ogagagwa. Andi, Ala wene dirup warek vaga en ayat ambi iri dugwit, “At owak ambiat ambi hado yisogon mondok dek o,” yiluk, yagagwa. 37#Zakharia 12:10 yokhanes. Eke, ayat adik ambi iri dugwit, “At eyave segowa sapok erogo watugwa ako inil hagup o,” yiluk, Ala wene endak dirup watugwa ako, atma des yupwak yiluk, ogagagwa.
Yesus eyave wimu mabagagwa wene
(Matius 27:57-61; Markus 15:42-47; Lukas 23:50-56)
38Anderogo okbagu lagagwama, ap ambi inis Yusup, awi Arimateya menda en Yesus eyave warek wagiluk, Pilatus yuguri wagagi. At Yusup ako andi, Yesus ane wigya lagagi ovara, ap ombok-ombok Yakuri menda alon en At ane mbauk erogo wigya lagagi. Yesus eyave wagiluk, Pilatus yugugu lagagirik, at Pilatus en, “E o,” yugugu lagagimu, Yusup lagya lagagirik, Yesus eyave warek wolok lagagi. 39Wolok lagyama, at Nikodemus endak o hup Yesus adema lagagi akoen yoangga-hedangga amben eyave sek menda yo mur amburup inim, yo gaharu iluvulu ako inim, nanggibuk-hanggibuk ogarogo 30 kilogram hak wolok Yusup inim lagagwa.
40Iperen lagu lagagwarik, Yesus eyave wolok it ap Yakuri menda en avakwa hambuguselok, enandogon ogasagwi hak, yoangga-hedangga amben sek menda ako yum mudu obak vaga baluk eyave vaga dinggilogo bagagwa. 41At Yesus yo vaga lobalogo bagagwarikmu horok andenam yavup ogarek welagagi. Akoma wis ambi avakwa bisalagetek ao swi mendagoma andoma-at welagagi. 42It ap Yakuri menda en hutun Isogo Vasika samban ombok ogaruguluk welagagwama, eke, Yesus lobalogo bagagwarikmu en wis andi, horogat welagagirikmu, Yesus eyave warek ako andoma-at mabagagwa.
