Yohanes 18
18
Yesus vagatugwa wene
(Matius 26:47-56; Markus 14:43-50; Lukas 22:47-53)
1At Yesus ako samban ogagya lagagirik, At ane welagwi menda inim is Hidon elavikit lagu lagagwarik, andoma yo saitun yagoma nonggagagwa.
2At Yesus ane welagwi menda inim yo saitun yagoma akoma ndugurek-ndagarek lagu lagagwarikmu, At Yesus warupwak yiluk wogeragagi Yudas ako ogo, yo yagoma andoma at ilup welagagi. 3Ilup welagagirikmu, it ap imam-imam enasini inim, ap Varisi menda inim, akoen ap enayegen werek ambi homago inim, ap Ala awi valek suam watu lagagwa menda inim, lakbogogwa. Lakbugu lagagwama, yegen segowa wugwi, undwa hali yevedek wugwi, ogagu lagagwarik, Yudas en wogonombolok yo yagoma akoma-at lagagi.
4Yesus ako At okbaup ovok erogo ilup welagagi atma, it ako Yesus adema lagu lagagwama, At ako enadema wagya lagagirik yugirigya dugwit, “Hit sa belalit wagep?”
5Yugirigya lagagimu, iren “Nit Yesus awi Nasaret menda belalit wagyo.”
Yugugu lagagwama, Yesus en, “Andi An aro,” yiluk, yugeragagi. It anderogo yugeragagi ako, ap Yesus warupwak yiluk wogeragagi Yudas ako inim atma yugeragagi. 6“Andi An aro,” yugirigya lagagimu, higil helagu lagagwarik, wema ndun yagagwa. 7Ndun yugu lagagwama, At Yesus en ane ambi inim yugirigya dugwit, “Hit sa belalit wagep?”
Yugirigya lagagimu, “At Yesus awi Nasaret menda belalit wagyo.”
8Yugugu lagagwama, At Yesus en, “An vage yukhirigi ovara! Hit An belalnetek wagep halok, it naswei yi, lapwak yiluk hekbisenes,” yiluk, yugeragagi. 9Anderogo yugeragagi ako andi, endak Yesus en, “Hat woknigigin ako it ambi yelemele yegetek o,” yiluk, Ala yugogogi ako atma des yupwak yiluk, yugeragagi.
10Anderogo yugirigya lagagimu, Simon Peterus ako varam vagago werekma, nggigis erogo ap imam-imam enasin inis ombok ayeloman inis Malukus ako aruk amot vikit sobalogo bagagi. 11Aruk sobanggya lagagimu, Yesus en at Peterus yugugu dugwit, “Peterus wai. Heyaga awi elola yekbetoman. Iwak elola nudik hak An okneraup Nasin en hologo baninggigi yi, An naup meyan nembeten yi? Dek. Nayogon aro,” yiluk, yugogogi.
Yesus ap Hanas adema wolok wagagwa wene
12Andi okbaluk, it ap yegen werek ambi homago enowa inim, eke, it ap Yakuri menda Ala awi valek suam watu lagagwa menda inim, iren Yesus vakbaluk heda magagwa. 13Heda mabagu lagagwarik, endak at Hanas adema wolok wagagwa. Ap Hanas andi, it ap imam-imam enasin inis ombok tahun andi vaga welagagi ap inis Kayapas omal akoat. 14Ap Kayapas andi, endak aren it Yakuri menda yugirigya dugwit, “Ap ambien nit avakwa nenake hambup andi sek o,” yiluk, yugeragagi ako andi, arat.
Simon Peterus en, “Yesus an ninggut,” yagagi wene
(Matius 26:69-70; Markus 14:66-68; Lukas 22:55-57)
15-16Ap Hanas adema wolok lagu lagagwama, Simon Peterus inim, ap Yesus ane waliga menda ambi inim, Yesus ambetaga lagagwa. Ambetaga lagu lagagwarik, Peterus sup nunggwisagwima weram hegek, Yesus ane waliga menda ambi, ap imam-imam enasin ombok ako ilup welagagirikmu, Yesus iperen ap imam-imam enasin ombok ako awi mbumbumu nonggagagwa. Nunggu wagu lagagwarik, andi en, Yesus ane waliga menda ambi ap imam-imam enasin ombok ilup akoen, hwavyak sup mbanggutmu welagagi ako yuguri wunggu lagagirik, Peterus wolok umwa nonggagagi. 17Wolok umwa nunggwigya lagagimu, hwavyak sup mbanggutmu welagagi akoen Peterus yugugu dugwit, “Hat ogo At ane welagwi menda ako ai?”
Yugugu lagagimu, Peterus en, “An dek!” yugeragagi.
18Yugirigya lagagimu, o andoma soges welagagirikmu, ap imam-imam enasin ombok ayelomani inim, ap Ala awi valek suam watu lagagwa menda inim, hali hubaluk, soges isakhidugusim, at Peterus inim soges isakhedagagi.
Ap imam-imam enasin ombok en Yesus hemethagagi wene
(Matius 26:59-66; Markus 14:55-64; Lukas 22:66-71)
19Soges isakhidugusigik, at ap imam-imam enasin ombok akoen Yesus hemethigya dugwit, “Hane welagwi menda andi sani? Eke, wene mamulirigya lagen ako andi, nggarogo?” yiluk, hemethagagi. 20Hemethigya lagagimu, At Yesus en, “It avakwa o wen vaga yoma agarwik ako wene mamulirigya dugwit, An mbauk hwilagoma mamulirigya lagetek. Ata, sigam adigat yugirigya lagi. It Yakuri samban ogasagwima inim, Ala awi valekma inim, it avakwa Yakuri menda homasagwima andoma ovok erogo mamulirigya lagi ovara, 21hat nggarogo yiluk, An hemetneraliga? An wene ngga menda yugirigya lagi ako, it hunggu lagao inilup atma, iren yukhurupwak yiluk, hemerinisin.”
22Wene andi, yugirigya lagagimu, ap Ala awi valek suam warisiga menda ambi andenam mendek welagagi akoen inggis ena Yesus elokwe vaga watya dugwit, “Ap imam-imam enasin ombok akoen wene yukhugu hegek, onggo anderogo yugurup sek embeten?”
23Yugugu lagagimu, At Yesus en, “An weyak iri neyagen halok andi, weyak yegen o, yuknirup ovara, avyarat iri neyagek, hat nggarogo yiluk, nasiga?”
24Yugugu lagagimu, at Hanas en Yesus heda marek at ap imam-imam enasin ombok Kayapas ako adema lakbalagagi.
Simon Peterus en ambi inim, “Yesus andi an ninggut,” yagagi wene
(Matius 26:71-75; Markus 14:69-72; Lukas 22:58-62)
25Adema lakbalagagi lagya hegek, at Simon Peterus ako ao soges isakhidigyaim, it ap andoma welagagwa akoen at yugugu dugwit, “Hat ogo, At ane welagwi menda akora?”
Yugugu lagagwama, aren, “An dek!”
26Yugirigya lagagimu, ap imam-imam enasin ombok ayeloman ap Peterus en aruk sobanggigi ako aswe ambien Peterus yugugu dugwit, “Hat ogo hiperen yo saitun yagoma andenam hinigis akora?”
27Yugugu lagagimu, at Peterus en ambi inim “An mondok dek,” iri lagagimu, ayam ane yagagi.
Yesus ap Gubernur Pilatus adema wolok lagagwa wene
(Matius 27:1-2, 11-14; Markus 15:1-5; Lukas 23:1-5)
28Ayam ane iri lagagimu, it Yakuri menda enowai akoen ap Kayapas amwa en Yesus vagakluk ap enowak dilisagwima Gubernur agarikmu akoma wolok lagagwa. O ao yanggo yegetek hegek wolok lagagwa. Wolok lagu lagagwarik, isogo ombok Vasika isaguselok, ugun naup atma, “Nit Yakuri menda en ap Yakuri dek menda enamwa nunggugu dugwit neneyave weyak okhedaup,” umbutu dugwit, enowak dilisagwima nonggegetek, weram mbuverek welagagwa. 29Weram mbuverek werekma, at Pilatus ako enadema wunggu lagagirik, “Ap yoma! Ap yi, nano ogagya halok, wolok wagep?”
30Yugirigya lagagimu, iren, “Dek o. Ap yi weyak ogagya duklipuk en, nit wolok waklubuk.”
31Yugugu lagagwama, at Pilatus en, “Hirenenat At ap yi wolok lagu dogomundik, Yakuri ogagu dogop wene hobalek dirup warek ako vaga owak dililales.”
Yugirigya lagagimu, it ap Yakuri menda en, “Meyan! Ap Yakuri menda en ap owak dilogo mondok inirup andi, moga o, yiluk, hit ap Oroma menda wene henavema agurik atma, nit At owak dilogo mondok warup meyan,” yugogogwa. 32Wene yugogogwa ako andi, Yesus en, “An nggarogo okbaniluk natuselok, hambisogon,” yugeragagi ako, atma des yupwak yiluk, yugogogwa.
33Anderogoat yugugu lagagwama, at Pilatus akoen ambi inim nunggu wigya lagagirik, Yesus eyanggup yagagi lagya lagagimu, yugugu dugwit, “Avakwa Yakuri menda enowa inis ombok ako, Harat?”
34Yugugu lagagimu, At Yesus akoen, “Hat yegen andi, hadik hendawi imbita dugwit yegen a, ata it ninen An navok yikhigamu yegen a?”
35Yugugu lagagimu, at Pilatus akoen, “An ap Yakuri menda nembeten yi? Hat howa-hasin inim, ap imam-imam enasini inim, irenen heyave woknigarwikmu, nggarogo ogagen?”
36Yugugu lagagimu, Yesus en at yugugu dugwit, “An Ninis ombok dugwit, navema bisaligama ako andi, o wen vaga yoma dek. Navema bisaligama o wen vaga yoma duklipmu en, An neyave wogogo it ap Yakuri wogorugu saoen yiluk, An naori inim ndup sumbutu duklip. An navema bisaligama ako andi, o adik ambi hunogoma agarik.”
37Yugugu lagagimu, at Pilatus en, “Andi halok, Hat avakwa enowa hinis ombok ai?” Yugugu lagagimu, At Yesus en, “Ninis ombok yuknigin andi, avyarat yuknigin. An anderogoat dogogiluk endaklagagis. Eke, avyarat wene vagalogo yukhirigya dogogiluk, o wen vaga yoma wambu wagagis! Avyarat wene yugeraliga ako wuguselok, Ala aburi atma, An nane hulisagwi.”
38Yugugu lagagimu, at Pilatus en, “Avyarat wene andi ngga?” yiluk, yugogogi.
“Yesus mondok warup,” yagagwa wene
(Matius 27:15-31; Markus 15:6-20; Lukas 23:13-25)
At Pilatus en wene andi, yugugu lagagirik, ap Yakuri menda wasim enadema wunggu lagagirik, yugirigya dugwit, “Avyak! Ap yi, weyak ambi mondok ogagetek-at higi. 39Hit ap Yakuri isogo ombok Vasika isasagwi vaga adigat, ‘Ap heda mago ambi andi visilogo woknerano,’ yugu hiniselok, anen visilogo wokheraliga ako, hit ap Yakuri menda henowa inis ombok yi, yogak visilogo wokheraup ombasagwi a, dek a?”
40Yugirigya lagagimu, it enane ombok vaga yugugu dugwit, “Ap yi dek. Ap Barabas akoat visilogo wokneran,” yugogogwa. At Mbarabas ako “Nenadik arusogom,” yugu dugwit, at heda marogo mabagagwa akova yugogogwa.
