TOKSAKHAIH 7
7
Stefen Ih Lokthuih
1Qaihma Kalen mah Stefen khaeah, “A thuih o ih hae tangtang maw?” tiah a duengh pae.
2Stefen mah, “Naukamzanawk, ka lok hae tahngai oah! Aicae ih saeza Abraham to Haran prae ah oh hanah a caeh ai nahlanah, Mesopotamia prae ah lensawkhaih Sithaw to anih khaeah amtueng pae moa, 3anih khaeah, ‘Na imthungtako hoi na prae to tacawt tak aloa kang patuek hanih prae ah to caeh ah,’ tiah a naa. 4Topongah angmah ih prae Khaldea to tacawt tak moa Haran vang ah khosak hanah a caeh. Abraham loa ampa duek pacoengah vaihi a ohhaih ih prae ah hae Sithaw mah angpuensak. 5Tona thuemah hi prae hae Sithaw mah Abraham khaeah ahap apai boe doeh paek ai, pe maeto ta mataeng doeh paek pae ai; to-e Sithaw mah anih khaeah paek hanah lok amaih moa hi prae hae nangmah hoi na cadiinawk iah om tih, tiah a naa. Hi lok amaihhaih ih Sithaw mah a sak nathuemah hae Abraham loa a canawk tawn ai.#Gen 12:7; 13:15; 15:18; 17:8 6Sithaw mah anih khaeah thuih ih loa: ‘Na catawnnawk loa prae kalah ah om o ueloa toah to misong ah om o ueloa saning cumvaipalito thung raekraihaih to pauep o tih.#Gen 15:13-14 7To-e anihcae mah toksak pae o ih caeng kaminawk to kaimah lok ka caek han,’ tihae ni, ‘topacoengah na cadiinawk to ato prae hoitoah tacawt o ueloa hi hmuenh ah kai hae na bok o tih,’ tiah a thuih.#Exo 3:12 8Topacoengah Sithaw mah Abraham to tangzat-hin aahhaih tawkcah to paipi mathaih hanah a paek. Topongah Abraham mah Isaak zah pacoeng tabaihto oh na-ah tangzat hin a aah paeh; Isaak mah a capa Jakob to tangzat hin a aah pae moa Jakob mah doeh aicae caeng ih saeza ahmin kamthang a ca hlaihnet tonawk to tangzat hin a aah pae.#Gen 17:10-14; 21:2-4; 25:26; 29:31—35:18
9“Jakob ih canawk mah amnauk Joseph to ut o moa Izipt prae ah misong ah oh hanah a zawh o. To-e Sithaw mah a oh haih moa,#Gen 37:11,28; 38:2,22 10a raihaih boih thung hoitoah kasueng ta-ah a zaehoi let. Joseph loa Izipt sangpahrang Fero hma-ah amthong na-ah Sithaw mah tuinuenh kahoih hoi ciinghaih to a paek. Fero mah Joseph to prae ukkung angraeng hoi sangpahrang imthungtako ukkung ah a suek.#Gen 41:39-41 11Topacoengah Izipt hoi Kanaan prae bum boih ah takang a thoh moa patang khanghaih katingai a oh. Aicae saezanawk loa caknaek tidoeh hnuh o ai moa,#Gen 42:1-2 12Jakob mah Izipt prae ah oh tito a thaih na-ah aicae ih saeza a canawk to hmaloe koek ah toah to a patoeh. 13A caeh o pahnit na-ah Joseph mah naukamzanawk khaeah a panoeksak moa Izipt sangpahrang mah Joseph ih imthungtako kawng to a panoek.#Gen 45:1,16 14Topongah Joseph mah ampa Jakob khaeah lok a pat pae moa angmah hoi a imthungtako bum boih, kami quisarihto pacoeng pangato to Izipt prae ah angzoh o king hanah a thuih pae.#Gen 45:9-10,17-18; 46:27 15Topacoengah Jakob loa Izipt prae ah a caeh moa toah to angmah hoi a canawk to a duek o.#Gen 46:1-7; 49:33 16Anihcae ih qok to Shekhem ah a caeh o haih moa toah to Abraham mah Hamor caengnawk khaeah tangka hoiah qanh ih taprong thungah to up o.#Gen 23:3-16; 33:19; 50:7-13; Jos 24:32
17“Sithaw mah Abraham khaeah lok amaihhaih a sak ih to a koephaih tue a phak na-ah Izipt prae ih kaom aicae caeng kaminawk loa katingai angpung o.#Exo 1:7-8 18Hnukkhuem ah Joseph kawng panoek ai sangpahrang mah Izipt prae to a uk. 19Anih mah aicae saezanawk to aling moa anihcae to raek o, anihcae ih canawk to dueksak hanah imthung hoitoah tasabang ah a sueksak.#Exo 1:10-11,22 20Hi tue na-ah Mosi to a zah moa krang kahoih phi naukta ah oh. Im ah khra thumto khetzawn o moa,#Exo 2:2 21im hoitoah tasabang ah vah ah oh na-ah sangpahrang ih canu mah pacah moa angmah ih capa batiah a khetzawn.#Exo 2:3-10 22Anih loa Izipt kaminawk ih ciinghaih boiboih to amtuk moa a loklang hoi a sakhaih ih hoiah kami kalen paraiah coengh.#Exo 2:3-10
23“Mosi loa saning quipalito a koep na-ah angmah ih caeng ampui Israel kaminawk to kawbangmaw hing o tito khet koeh pongah a paqai.#Exo 2:11-15 24Kami longto to Izipt kami mah raek li ah ka om to a hnuk, topongah abom hanah a caeh moa Izipt kami to humhaih hoiah lu a lak. 25(Sithaw mah anihcae to loihsak hanah kai hae patoh tih tito angmah ih kaminawk mah panoek kop tih, tiah a dawn e panoek kop o ai). 26Akhawnbang ah Israel kami longhnetto kangpanh to a hnuk moa anih hnit salak ah angdaehhaih sak hanah panki. Anih mah, ‘Ka lok hae tahngai hoi ah, nang hnit loa caeng maeto Israel kami ah na oh hoi qoiqai; tipongmaw hitiah nangpanh hoi loa?’ tiah a naa. 27To-e kalah longto nuiah boe kasae parai to mah Mosi to a nuih moa, ‘Mimah maw kai hnit nuiah ukkung hoi lokcaekkung ah na suem?’ tiah a naa. 28‘Zangduem ah Izipt kami na hum batiah kai hae hum hanah na koeh maw?’ tiah a naa. 29Hi lok hae Mosi mah a thaih na-ah Izipt prae hoitoah a cawnh vik moa Midian prae ah oh hanah a caeh. Toah to ca nongpa hnetto a tawnh.#Exo 18:3-4
30“Saning quipalito laemh na-ah, vanmi longto Mosi khaeah Sinai Mae taeng praetanghaeng ah tangpruem hmai kangqong hoiah amtueng.#Exo 3:1-10 31Mosi loa a hnuk ih to a dawnrai moa kahnai daek hoiah hoihdak ta-ah khet hanah thingsabu haek ah to a caeh. To-e Angraeng ih lok to a thaih: 32‘Kai loa nangcae saezanawk ih Sithaw, Abraham ih Sithaw, Isaak ih Sithaw, Jakob ih Sithaw ah ka oh,’ tiah a naa. Mosi loa zit loiah anghuen sut moa khen vam ai. 33Angraeng mah anih khaeah, ‘Na khokbuen to angkhring ah, kawmawtiah nangdoethaih ih hmuenh loa hmuenh kacai ni. 34Izipt prae ah kai ih kaminawk patanghaih katingai pauephaih o ih to ka hnuk boah. Anihcae ih ahaamhaih lok to ka thaih moa anihcae to loihsak hanah kangzoh boah. Vaihi angzo oah, Izipt prae ah kang patoeh o han,” tiah a thuih.
35“Mosi loa Israel kaminawk mah vah o sut ih kami ni. ‘Kaihnit nuiah ukkung hoi lokcaekkung ah mimah maw na suem?’ tiah a naa pae hoi. Anih loa kaminawk uk han hoi tangpruem hmai kangqong khae hoitoah kamtueng vanmi ih abomhaih hoiah ka loihsak hanah Sithaw mah patoeh ih kami ni.#Exo 2:14 36Anih mah Israel kaminawk to Izipt prae thung hoitoah a zaehoi moa Izipt prae hoi Tuipui Kathim ah saning quipalito thung praetanghaeng ah dawnraihaih ihnawk hoi matsakhaih ihnawk to a sak.#Exo 7:5; 14:21; Nam 14:33 37Mosi loa Israel kaminawk khaeah lok ka thui kami ni. Anih mah, ‘Sithaw mah kai ang patoeh batih toengah tahma longto nangcae khaeah patoeh o tih moa anih loa nangmahcae caeng thungih kami ah om tih,’ tiah a naa. 38Anih loa praetanghaeng ah kamkhueng cu Israel kaminawk hoiah nawnto ka om ni; anih loa toah to aicae saezanawk hoiah a oh moa Sinai Mae ah lok ka thuikung vanmi hoiah ka om nawn ni; anih loa Sithaw ih kahing lok aicae khaeah phaksak patoeng hanah ka lakung ni.#Exo 19:1—20:17; Deut 5:1-33
39“To-e aicae saezanawk mah anih ih lok to tahngai o ai; anih to takhoe o sut moa Izipt prae ah amlaem let han a koeh o. 40Topongah anihcae mah Aaron khaeah, ‘Kaicae zaehoi hanah sithawnawk na sah pae oah. Izipt prae hoitoah kaicae zaehoikung Mosi hae kawbangmaw oh ka panoek o ai boah,’ tiah a naa o. 41Totiah oh pongah maitaw taeta to kraangthoi maeto a sak o, angbawnhaih a sak o moa ban hoiah sakhmang ih to khangzahaih poi to a sak o.#Exo 32:2-6 42Topongah Sithaw mah anihcae to hnukthung tak moa tahmanawk ih cabu thungah tarik ih batiah van sakaenawk a boksak o. Ato Cabu thungah to:
‘Israel kaminawk! Nangcae mah praetanghaeng ah
saning quipalito thung boiinawk na boh o moa
angbawnhaih na sak o ih to
kai khaeah na sak ih na ai ni.#Amo 5:25-27
43Nangcae mah na phawh o ih loa Molek sithaw ih samdai im ni.
Nang sinh o ih kraangthoi loa nangmahcae ih sakae sithaw Refan ih kraang to ni;
Anihcae loa nangcae mah bok hanah sak o ih kraangthoi to ni.
Topongah nangcae loa Babilon prae laep ah kang caehsak han,’ tiah tarik.
44“Aicae saezanawk loa Sithaw to anihcae khaeah oh tito panoek hanah samdai im to praetanghaeng ah a tawnh o toemoe.#Exo 25:9,10 45Ahnuk aloa aicae saezanawk mah ampanawk khae hoitoah a hak o ih samdai im to Joshua khaeah a caeh o na-ah a sinh o; anihcae ih hma-ah Sithaw mah adum ih kaminawk ih prae to Joshua cae hoiah a lak o na-ah samdai im to a sinh o poe moa toah to David dung setto a oh.#Jos 3:14-17 46David loa Sithaw hma-ah mikhmai kahoih to a hak moa Jakob#7:46 Jakob ih Sithaw Thoemto banrikcabu pongah loa Israel kaminawk tiah oh. ih Sithaw ohhaih hanah im maeto sak thai hanah Sithaw khaeah a hnik.#2 Sam 7:1-16; 1 Dung 17:1-14 47To-e im ka sahkung tangtang loa Solomon ni.
48“To-e Sang Koek Sithaw loa kami ban hoiah sak ih im thungah om ai; tahma mah hitiah a thuih:
49‘Van hae kang hnuthaih iah oh moa#Isa 66:1-2
long hae ka khokkoenghaih iah oh, tiah Angraeng mah a thuih.
Kawbatih im maw kai hanah nang sak pae han?
Ka ohhaih hanih hmuenh loa naamaw a oh?
50Hi hmuennawk boih hae kaimah ka sak ih na ai maw?
51“Topacoengah Stefen mah, “Palung na thah o phi hae loa aw! Nangcae ih palungthin loa Sithaw ka panoek ai ih palungthin bae hae! Sithaw lok thaihhaih bangah naa na pangh o hae loa! Nangcae loa nangmahcae saezanawk batiah ni na oh o, nangcae doeh Cai Pakhra to na pakak o toemoe! 52Nangcae saezanawk mah pacaekhlaek ai ih tahma a oh maw? Sithaw ih Tamtoeh katoeng angzohhaih hanah zanghnii zangkhawn ah ka taphongkung Sithaw ih laicaenawk to a hum o. Vaihi loa nangcae mah anih to nangphat o tak moa na hum o. 53Vanminawk mah paek patoeng ah ka om Sithaw ih tawklok ka lakung nangcae hae ni, to-e ato tawklok ka pazui ai loa nangcae toengtoeng bae ni,” tiah a thuih.
Stefen Hlung Hoiah Vah O
54Lokcaekhaih Kawngsi ih kaminawk mah Stefen ih lokthuih to tahngai o na-ah katingai palungphui o moa anih to haa kaekthuih o. 55To-e Cai Pakhra hoiah kakoi Stefen loa van bangah doeng tahang moa Sithaw lensawkhaih hoi Sithaw ih bantang bangah kangdoe Jesuh to a hnuk. 56Anih mah, “Khen oah! Van am-ong moa Sithaw ih bantang bangah kangdoe Kami Capa to ka hnuk!” tiah a thuih.
57Tona-ah Kawngsi ih kaminawk loa ban hoiah naa to tamuep o moa khoeh puiah a hangh o. Topacoengah anihcae boih mah caehthuih o buk roep moa, 58avang thung hoitoah paelaep bangah to ruet o moa hlung hoiah vah o. Hlung hoiah ka vah kaminawk mah angmahcae ih kahninawk to thendoeng longto ahmin Saul ih khokkung ah a suek o. 59Hlung hoiah a vah o li na-ah Stefen loa Angraeng to a kawk moa, “Angraeng Jesuh, ka pakhra hae na talawk pae ah,” tiah a naa. 60Khokkhu samkrawn moa khoeh puiah a hangh moa, “Angraeng! Anihcae ih zaehaih hae palung thungah suem pae hmah,” tiah a thuih moa a duek.
Asang Khongso New Testament in Eastern Khumi © Bible Society of Myanmar, 2023.