TOKSAKHAIH 8
8
1Anih hum o to Saul mah doeh naa krak haih toeng.
Saul mah Khrihca Kangkom Pacaekhlaek
To ni roeroe loa Jerusalem vang ih Khrihca kangkom loa pacaekhlaekhaih katingai pauep amtong. Kawkpatoehnawk tiaialoa taangcanawk boiboih loa Judea prae hoi Samaria prae thungah anghaeh o dingdung. 2Sithaw kazi thoemto mah Stefen to aphum o moa palungkhuek tiah qah o.
3To-e Saul loa Khrihca kangkom to phraek hanah panki; im maeto pacoeng maeto ah caeh o moa nongpa doehsoe, nongpui doehsoe, hruet o moa thongim thungah pakhrak o.#Tok 22:4-5; 26:9-11
Samaria Ah Tamthang Kahoih A Thuih
4Kanghaeh dung taangcanawk loa vang kruekah caeh o moa a phak o hmuenh kruekah tamthang Kahoih to a thuih o. 5Filip loa Samaria vangpui ah a caeh moa to ih kaminawk khaeah Messiah kawng to a thuih. 6Mipuinawk loa Filip mah thuih ih to hoihdak ta-ah tahngai o moa dawnraihaih sak ih to doeh a hnuk o. 7Taqawk kasaenawk to hanghhaih lamhoi kami paroeai thung hoitoah tacawt moa kamkhawn kaminawk hoi khokbai kaminawk paroeai mah hoihhaih a hnuk o. 8Topongah Samaria ah anghoehaih kalen parai to a oh.
9Toah ahmin Simon naa pae ih to a oh moa anih loa angmah ih miklet kophaih hoiah atue kasawk parai thung Samaria kaminawk to dawn a raisak o. Kami kalen longto ah ka oh toeng a tih moa, 10vangpui thungih kami, kathoeng kalennawk boih mah a lok to tahngai pae o. “Anih loa ‘Tharahhaih Kalen,’ tiah kamthang Sithaw ih tharahhaih ni,” tiah a thuih o. 11Miklet kophaih ih mah atue kasawk parai thung kaminawk to dawn a raisak pongah a lok to pazui pae o. 12To-e Filip mah thuih ih Sithaw Poenghaih ih Tamthang Kahoih kawng hoi Jesuh ih kawng to a taang o moa nongpa hoi nongpuinawk mah baptisma to a hak o. 13Simon angmah to doeh a taang toeng moa baptisma to a hak pacoengah Filip taengah a oh poe roeprap, anih mah matsakhaih ih ka khennawk hoi dawnraihaih ihnawk sak ih to a hnuk na-ah a dawn a rai phi.
14Jerusalem ih kaom kawkpatoehnawk mah Samaria kaminawk loa Sithaw lok to talawk o toeng boah tito a thaih o na-ah anihcae khaeah Piter hoi Johan to patoeh o. 15A phak hoi na-ah taangcanawk mah Cai Pakhra to a hak o thai hanah khophoeh pae hoi. 16Kawmawtiah Cai Pakhra to anihcae thungih amita khae nuiah doeh pha ai vop; Angraeng Jesuh hmin hoiah baptisma khueh ni loa a hak o vop. 17Topacoengah Piter hoi Johan mah anihcae nuiah ban to koeng pae hoi moa Cai Pakhra to a hak o.
18Kawkpatoehnawk mah anihcae nuiah ban to koeng pae o na-ah Cai Pakhra o a hak o tito Simon mah a hnuk. Topongah anih mah Piter hoi Johan to tangka a paek moa, 19“Kaimah ban ka koeng ih kami boih mah Cai Pakhra to a hak o thai toeng hanah hi hmuensak thaihaih ih hae kai han doeh na paek hoi toengh ah,” tiah a naa.
20To-e Piter mah, “Sithaw ih langrae to tangka hoiah ka qanh thai, tiah na dawn pongah nangmah hoi tangka to hell thungah krah hoi maek ah! 21Sithaw mikhnuk ah na palungthin to toeng ai pongah kai hnit ih toksakhaih ih pongah na paa hankoi tidoeh om ai. 22Topongah hi hmuen kahoih ai na dawnhaih ih hae dawnpakhuem aloa hibatih dawnhaih kahoih ai to tahmen thai hanah Angraeng khaeah khophoeh ah. 23Kawmawtiah nang loa uthaih kakhaa hoiah na koi moa zaehaih thongim thungah ka krah ah na oh,” tiah a naa pae.
24Simon Piter khaeah, “Na thuih ih boih hae ka nuiah maeto ta doeh a phak han aiah Angraeng khaeah kai hanah kho na phoeh pae ah,” tiah a naa.
25Anih hnit mah a hnuk hoi a tongh ihnawk to a thuih pacoeng hoi Angraeng ih lok to a thuih hoi pacoeng na-ah Johan loa Jerusalem ah amlaem let. Amlaem lam ah Samaria prae thungih vangca zetpui thungah Tamthang Kahoih to a thuih hoi poe.
Filip hoi Ethopia Angraeng
26Angraeng ih vanmi longto mah Filip khaeah, “Amsak aloa aloihbang#8:26 aloihbang tiaibaloa athun tiah doeh thuih thaih. lam, Jerusalem hoitoah Gaza caehhaih lam bangah caeh ah,” tiah a naa pae (Vaihi loa ato loklam loa patoh o ai boah).#loa 8:26 Vaihi loa ato loklam loa patoh o ai boah tiaibaloa Ato loklam loa pahnawt o sut boah tiah oh. 27Topongah Filip loa amsak moa a caeh. Tona thuemah Ethopia sangpahrang nongpui ih tangka pakuemkung angraeng, Ethopia kami tangzat kret ih longto angmah im bang hoitoah kangzo to loklam ah angqum. Anih loa Sithaw bok hanah Jerusalem ah a caeh. 28Im bangah amlaem na-ah hranglaeng nuiah angthueng moa tahma Isaiah cabu to a kroek. 29Cai Pakhra mah Filip khaeah, “Ho ih hranglaeng ah ho caeh aloa ka hnai ret ah om ah,” tiah a naa. 30Filip loa a cawnh moa tahma Isaiah cabu thungih lok ka kroek to a thaih. Anih mah, “Na kroek ih to na thaihkop maw,” tiah a duengh pae.
31Ato angraeng mah, “Mimah doeh na thuihpacaih ai nahaeloa kawbangmaw ka thaihkop thai tih?” tiah a naa. Topacoengah anih mah Filip to hranglaeng nuiah dawh moa anghnut nawn hanah a pacae. 32A kroek toepsoep ih Cabu Kacai lok loa:
“Anih loa boh hanah a yaeh o ih tuu batih ni a oh,
anih loa amui to aah pae o na-ah kamtueng sut tuuca batih ni a oh,
anih loa lok pakhato doeh apaeh o.
33Anih loa azat phawhhaih ih to pauep moa toenghaih hoiah lokcaek o ai,
hi longnui a hinghaih to aboeng boah pongah
angmah ih cadiinawk kawng to mita mah doeh thui o thai mak ai,” tiah a thuih.#Isa 53:7-8
34Ato angraeng mah Fillip khaeah, “Tahma mah ami ih kawng to maw a thuih? Angmah kawng to maw, tiaibaloa mi kalah kawng to maw a thuih? Na thui ah,” tiah a naa. 35Tona-ah Filip mah, hi Cabu Kacai lok hoitoah amtong moa Jesuh kawng Tamthang Kahoih to anih khaeah a thuih pae. 36Loklam ah a caeh hoi poe na-ah tui ohhaih ih ahmuenh to a phak hoi moa ato angraeng mah, “Hiah tui a oh hae. Bapstisma hak hanah timah maw kai hae pakaa?” tiah a thuih. 37(Filip mah, “Na palungthin boih hoiah na taang baloa baptisma na hak tih hmang,” tiah a naa pae. Anih mah, “Ka taang, Jesuh Khrih loa Sithaw Capa ni tiah ka taang,” tiah a naa.#8:37 Thoemto banrikcabu pongah loa kathoeng 37 hae om ai. )
38Ato angraeng mah hranglaeng to angdoetsak, tui thungah to a caeh hoi maek moa Filip mah anih to baptisma a paek. 39Anih hnit loa thui thung hoitoah tacawt na-ah Cai Pakhra mah Filip to a lak ving. Angraeng mah anih to hnuh let ai boah, to-e anghoe phi hoiah im bangah amlaem poe. 40Filip loa Azotas ah angphong let; anih loa Sisaria ah a caeh moa loklam zung avang kruekah Tamthang Kahoih to a thuih poe.
Asang Khongso New Testament in Eastern Khumi © Bible Society of Myanmar, 2023.