TOKSAKHAIH 6
6
Bomkung Longsarihto
1Atue kra pacoeng kue na-ah hnukbangnawk loa a pop o tahang hruet hruet moa Grik lok kapae Judah kaminawk hoi Judah lok kapae Judah kaminawk salak ah angzoehhaih ih to a oh. Grik lok ka patoh Judah kaminawk mah kaicae ih lumhmainawk loa nithokkruek ah tangka amzet na-ah dawncang o ai, tiah laisaep o. 2Topongah kawkpatoeh hlaihnet tonawk mah taangcanawk boiboih to nawnto ah a kawk cu moa, “Sithaw lok thuih to prawt sut moa tangka pazethaih kawng ngai to thui o nahaeloa amsoem mak ai. 3Topongah naukamzanawk, nangcae thungih Cai Pakhra hoi ciinghaih hoiah kakoi longsarihto qoi o aloa atonawk loa hi hmuen patawnkung ah kang suek o han. 4Kaicae loa khophoehhaih hoi tamthang lok thuihhaih bangah atue boih to ka patoh o han,” tiah a naa pae o.
5Kawkpatoehnawk mah poekhaih tacawt o haih ih to taangcanawk boih mah palung anghoe o moa topongah taanghaih hoi Cai Pakhra hoiah kakoi Stefen, Filip, Prokhoras, Nikanor, Timon, Parmenas hoi Antiok vang ih Gentel kami, tangsuek ah Judah tawk ka pazui Nikolas cae to a qoih o. 6A qoih o ih kaminawk to kawkpatoehnawk khaeah a caeh o haih, anihcae ih a lu nuiah ban koeng pae o moa khophoeh pae o.
7Totiah Sithaw lok to a pung tahang aep aep. Hnukbangnawk loa Jerusalem vang thungah a pung o tahang aep aep moa qaihma paroeai mah taanghaih to talawk o toeng.
Stefen Naehhaih
8Sithaw mah tahamhoihhaih zetpui paek ih hoi tharahhaih hoiah kakoi Stefen mah mipui salak thungah dawnraihaih kalen hoi hnuksakhaih ih to a sak. 9To-e Kaloih kaminawk#6:9 kaloih kaminawk: Hinawk hae misong thung hoitoah kaloih Judah kaminawk ni. ih sinakok ah kacu kami thoemto mah Stefen ih lok to aek pae o; tonawk thungah Sairin hoi Alekzandria banghoi kangzo Judah kaminawk to a paa o. Topacoengah Silisia hoi Asia prae ih Judah kaminawk hoiah doeh lok angaek o. 10To-e Pakhra mah Stefen to ciinghaih to a paek pae pongah lok a thuih na-ah pazawk o thai ai. 11Topongah kami thoemto to ta-un paek o moa, “Mosi hoi Sithaw to kasae ah thuih ih lok ka thaih o,” tiah a thuihsak o. 12Totiah mipuinawk, kacoetanawk hoi Tawklok patukkungnawk to palung angthawksak. Anihcae mah Stefen to a naeh o moa lokcaekhaih Kawngsi hma-ah to a sinh o. 13Topacoengah anih ih kawng amsawn lok ka thui hanah kami thoemto angzoh o haih moa atonawk mah, “Hi kami mah aicae ih kacai Tempal hoi Mosi ih Tawklok to kasae ah a thuih tuektuek. 14Ahi Nazareth vang ih Jesuh mah Tempal to a phraek king moa Mosi khae hoi-ih kangzo tawknawk boih to alaih king han, a tito ka thaih o,” tiah a thuih o. 15Lokcaekhaih Kawngsi ah kanghnu kaminawk boiboih mah Stefen to mik hoiah pacok o moa a mikhmai loa vanmi mikhmai batiah ka om to a hnuk o.
Asang Khongso New Testament in Eastern Khumi © Bible Society of Myanmar, 2023.