Génesis 47
47
1Jose, irechani niraspti aiankuntani ka arhispti: Jucheti táte ka jucheti erachichaksï Kanaani uératini jurhasti ka Goseni jarhasptiksï, iámentu ampeksï juasti, karichichani ka uákasïchani ka enkaksï xáni jatsikorheka. 2Sánteru sapirhati erachichani páaspti irechani jinkuni. 3Irecha kurhamarheaspti: ¿Cha ampe ánchekorhesïnki? Ka imaksï arhispti: Jucha manakorheri erankuani, mák'ueni eskaksï juchari tua anapuecha.
4Ka arhisptiksï irechani: Jucha ixu jurhaska irekani, jimpoka Kanaani no jukastia uitsakua enkaksï manakorhericha t'ireaka, Kanaani kánekua k'arhitekua jarhasti, kómu arhixakaksïni eskats'ï jiáretaaka Goseni pakarani irekani.
5Irecha, Joseni arhispti: Chéti táte ka chéti erachichaksï, t'unkeni exentani jurhasti.
6Ejiptu echeri jimini jarhaspti, jima pa irestani chéti táteni ka erachichani nani enka sánteru ampakitika echerika, Goséni. Ka t'úri míteska ne enka sánteru sési manakorheri erankutika, imani erankutaraa jucheti manakorherichani.
7Jose táte jempani Jakobini paspti irechani jinkuni, mítepirinka Jakobini ka eska úch'akurapirinka. 8Irecha, Jakobini kurhamarhespti: ¿Namuni uéxurhini jatiriskia?
9Jakobi, irechani arhispti: Kuimu ekuatse ka kuimu ka tempeni (130) uéxurhini jatiriskia, xáni jamaskia uanaakurhani, no uánesti uéxurhinicha ka komu irekaska, nótkini xáni jatirixaka eska jucheti táte na xani jatiripka.
10Jakobi úch'akuraspti irechani, ka uéntaspti jima. 11Jose ísï jamani jima irestaspti táte jempani ka erachichani Ejiptu, Ramsesi echerirhu ísï eska irecha na juramupka. 12Jose táte jempani ka erachi jempechani, ka iámentu táte jamperi márkuechani t'ireraaspti.
Echeriri juramukua enka José úpka
13No nani japospti t'irekua ka kánekua k'arhintespti. K'arhintekua jimpo nóteru úspti echeri ánchetanhanhani ni Ejiptu ni Kanaani. 14Jose kánekua tumina tánaspti Ejiptu ka Kanaani enka xáni t'irekua atarantapka. Tumuni tánakata irechani íntskuntaspti. 15Enka k'amakurhipka tumina Ejiptu ka Kanaani, Ejiptu anapuechaksï nirapsti Jose exeni ka arhisptiksï: Íntskuts'ïni t'irekua. Nóts'ïni úaka ísku exeni jarhani na enkani jucha uarhiaka xáni k'arhimani, tumina no jatsirini.
16Jose arhiaspti: Enkats'ï tumina nóteru jatsikia, manakorherichanits'ïni juachea ka imani jinkunchi mót'akuaka t'irekua.
17Imaksï manakorherichani Joseni pákuaspti ka Jose t'irekua jinkuni mót'akukuapsti. 18Ima uéxurhini k'amarhuxaptia, enka máteru uéxurhini imaksï niraspti ménteru exeni, no nema uát'i óch'akurani eska tumina iápuru ísï k'amakurhiska, ka eska manakorhericha nóteru juchaariskia. Nóteruchi ampe jatsiskia ampe jinkuni mót'akuni, echeriterkia ka jucha eska k'uiripuecha.
19Jarhoatats'ini ka jucha no uarhiaka, piántsï juchari echerichani ka piatsïntsïni, ka íntskunts'ïni t'irekua, jucha irecheri jántspiriuaka. Íntskuts'ïni tríju ka jucha tríju jatsintaaka ka jatsiakachi ampe t'ireni jarhani, ka echerirhu jukaati t'irekua.
20Jose ísï jamani iámu piáaspti Ejiptu anapu echerinicha ka imaksï echericha irecherispti, jimpokaksï Ejiptu anapuecha iámu atarantaaspti echerichani xáni k'arhimani. 21Ima sapirhati iretechani iámu móskuaspti k'éri iretarhu páani iámu Ejiptu. 22Tátecheri echerichani no píaaspti jimpokaksï ima no atarantaspka echerichani, jimpoka irecha íntsasïrempka t'irekua.
23Jose iretarhu anapuechani arhispti: Iásïksïni píáskia, ka ístuni chári echerichani píaaskia, iásïts'ï irecheriskia. Ixu jarhasti tríju enkats'ï jatsintaaka ka ánchetani echeri.
24P'ikuntsïkatats'ï iumu arhutaaka, ka ma arhutakata irecheriuati, ka máteru t'amu arhutakata cháriuati, tríju jatsije echerichani ka p'ikuntsï je t'irekua ka t'irerani chári márkuechani ka chári sapichani.
25Imaksï uantaspti: Uarhikuarhuts'ïni p'ímutantaska, cha juchari acha, chats'ï kánekua p'amokutpitiska, ka sésichi jántpekua irechani.
26Jiáni uératini Jose juramuspti eska irecha intsïnhapirinka imueri arhutata, ma arhut'ata Ejiptu. Tátechaksï imaksï no íntspesïnti, jimpokaksï no irecherispka.
Ampe enka Jakobi uarhini jamani kurhak'orhepka
27Ísï jamaniksï Israel anapuecha Ejiptu pakaraspti irekani, Goseni, jimaksï irekaspti ka jimaksï uánespti. 28Jakobi, Ejiptu tempeni iumu tsimani uéxurhini irekaspti, Jakobi iumu tsimani ekuatse ka iumu tsimani (147) uéxurhini jatirispti enka uarhipka.
29Ima jurhia enka niárapka Iraeliri uarhikua, ima Joseni uantap'aspti ka arhispti: Ma ampekukini kurhacheaka, jua ják'i ka t'uruk'ani tsíkatakuarhu pera, ka arhini eskari ísï úaka ka eskari sési kamaaka. ¡Ásïri Ejiptu jatsinta!
30Enkani ji uarhiaka ka juchari tátechani jinkuni niántani, imecha jinkuni jatsintaaka ka Jose arhispti: Ísï uák'a eskari na kurhacheni jaka.
31Israeli arhispti: Sési jimporini arhi eskari ísï úaka Jose tspérhukua jima péraspti enka ima apots'ïkupka.
Biblia en P´urhépecha, Michoacán, México © Sociedad Bíblica de México, A.C.