Génesis 46
46
Jakobi ka imeri márkuechaksï Ejiptu niraspti
1Israeli iámentu ampe enka xáni jatsikorhepka tánakorhespti ka Berseba niraspti, ka táte jemperi Isaaki, imeri Diósïni kéts'ïtakuspti. 2Ka Diósï, chúrekua Israelini arhispti eranhaskakua ma jimpo imeri jakankurhikua jimpo uantap'aspti: ¡Jakobi, Jakobi! Ixu jarhaska. Uantaspti.
3Diósï arhispti: Ji chéti táteri Diósïska, ásï jama chéni Ejiptu nirani, jimpokakini jima chéti sïrukuani k'éri ma ireta uaxastaaka.
4Ji t'unkeni jinkuni Ejiptu niuaka ka ístuni t'unkeni jinkuni k'uanhatseaka. Ka jiáni enkari uarhiaka Josekini tsïnkuntaati.
5Jakobi, Berseba niraspti, Jakobini ka sapichani ka uarhitichani mótsetarakuarhuksï jatsiraspti enka irecha axakuapka. 6Manakorherichani ka jatsikorhekua enkaksï xani tanaapka Kanaani, Ejiptu pát'asptiksï. 7Jakobi uáp'echa nanaka ka tatakechani, nimakuecha, iámu sïrukua Ejiptu páaspti.
8Íksï jintesti Israeli uáp'echa jakankurhikuecha enka Ejiptu páapka: Jakobi ka uáp'echa, Rubeni enka urhetipka.
9Rubeni uáp'echaksï aripsiti: Janoki, Falu, Jesroni ka Karmi.
10Simeoni uáp'echa arispti: Jemueli, Jamini, Oadi, Jakini, Sójari ka Saúli, Kana anapu uáp'a nanachi.
11Lebi uáp'echaksï arhispti: Guersoni, Koati ka Merari.
12Juda uáp'echaksï arispti: Eri, Onani, Sela, Feresi, ka Séjari. Ka Eri ka Onani Kanaa uarhisptiksï. Faresi uáp'echaksï, Jersoni ka Jamulispti.
13Isakari uáp'echaksï, Tola, Fuba, Jobi ka Simeronisptiksï.
14Sabuloni uáp'echaksï, Séredi, Eloni ka Iajelelispti.
15Íksï iámentu Lea uáp'espti enka Jakobini jinkuni kaapka Paddani Arami, ka ístu uáp'a nanaka Dina. Iámu miiuani uáp'a tata ka nanakechani ma ekuatse ka tempani tanimuesptiksï.
16Gadi uáp'echaksï, Sefoni, Jagui, Esboni, Eri, Arodi ka Arelisptiksï. 17Aseri uáp'echaksï, Imna, Isua, Isbi, Beria ka Serajispti, imecheri pirenchi. Beria uáp'echaksï, Jéberi ka Malkielispti. 18Íksï jintesti Silpa uáp'echa, enka Labani intsïkorhepka uáp'a nanaka Líani; ima Jakobini íntskuspti, tempeni iumu tsimani kaaspti.
19Rakeli uáp'echaksï enka Jakobi jinkuni káapka, Jose ka Benjaminispti. 20Jose, Ejiptu tsimani sapichani káaspti, Manasesi ka Efrainini, enka Asenati jinkuni káapka, ima enka Potifera uáp'epka, enka Oni tátepka. 21Benjamini uáp'echaksï, Bela, Békeri, Asbeli, Gera, Namani, Eji, Rosi, Mupini, Jupimi ka Ardispti. 22Íksï Rakeli uáp'espti enka Jakobi jinkuni káapka, tempeni t'ámuesptiksï.
23Dani uáp'a, Jusinispti. 24Neftali uáp'echaksï, Iajeseli, Guni, Ieseri ka Silenispti. 25Íksï jintespti Bila uáp'echa, enka Labani Rakelini íntskupka eska jántspiri, ima Jakobini jinkuni iumu tsimani káapsti.
26Jakobiri sïrukua enkaksï Ejiptu niaraapka, tanimu ekuatse ka kuimu k'uiripuesptiksï, no miuparini Jakobiri tarhaskuechani. 27Jose uáp'echaksï tsimanispti, enkaksï Ejiptu antap'enupka. Ejiptuksï tanimu ekuatse ka tempeniksï niaraspti enka Jakobiri sïrukuepka.
28Jakobi, Judani axaspti eska Joseni arhipirinka eska nipirinka kúmani Goseni jamperi enka niáraspka k'éri iretarhu Goseni. 29Jose juramuspti enkaksï mótsetarakuani paapirinka táte jempani kúmani enka na exentapka táte jempani kamanharhispti ka kánekua ueraspti. 30Israeli, Joseni arhispti: Iásï enkakini na exentakia eskari tsípiti jarhaska, úaka uarhinia.
31Jose erachi jempechani arhiaspti ka iámentu imechani enkaksï xáni táte jempo anapuepka. Nipa irechani aiankuni ka arhini. Jurhastiksï jucheti táteri márkuecha ka jucheti márkuecha enkaksï Kanaani jápka.
32Ka arhia eskats'ï karichi ka k'arhiri anhantsï erankutiska, ka eskats'ï iámentu ampe juáska enkats'ï xáni jatsikorhepka. 33Enkaksï irecha uantap'aska ka kurhamarheni. ¿Ampets'ï ánchekorhesïnki? 34Arhije Tumpirini uératini ka iásï jamperi jucha manakorheri erankutiska, mák'ueni eskaksï juchari tátecha Ka isïts'ï uák'a Goseni pakarani irekani. Jimpokaksï Ejiptu anapuecha no xenchasïnka karichi erankutichani.
Biblia en P´urhépecha, Michoacán, México © Sociedad Bíblica de México, A.C.