Génesis 42
42
Joseri erachichaksï Ejiptu niraspti
1Jakobi mítespti eska Ejiptu t'irekua jarhaspka, arhiaspti uáp'echani: ¿Ampets'ï úxaki jimini eratperani jarhani? 2Arhispti: Ísï kurhantiska eska Ejiptu tirekua jarhaska, níje jini t'irekua piani, jimpokachi uarhiaka xáni k'arhimani.
3Tempeni erachecha Joseri nirasptiksï k'étsemani Ejiptu t'irekua piani, 4k'óru Jakobi no axaspti Benjaminini, Joseri erachini jimpoka uantaspka: Ásï jimesï ampe ma úkorhenche. 5Kánekua k'arhintespti Kanaani, jimpoksïsï Israeli uáp'echa imat'uksï nípti t'irekua piani.
6Jose juramutispti jima, ka ima atarakuantasïremti iámentu enkaksï xáni nirempka t'irekua piani, enkaksï Joseri erachi jempecha niárapka jima, tsérhukuaksï antaskueraspti. 7Enka Jose exepka erache jempechani, miteantaspti, k'óru isï jamaspti eska no míteani, uinhamarhekuaspti uantaxeni ka arhiaspti:
Ka chá ¿Nanits'ï uératini jurhasïnki?, Imaksï uantaspti:
Kanaa anapueskachi ka jini uératinichi jurhaska t'irekua piani.
8Jose sési míteantaaspti erachi jempechani, ka imaksï no mítentaspti. 9Jose miántaspti tsánharikuechani enka imechani tsánhariaapka ka arhiaspti:
Cháts'ï erantskani jurhaska ixu, ka exentsï jurhaska nenats'ï uarhipea jucha jinkuni.
10Imaksï auantaspti: No ísïsti juchari acha, jucha chári jántspiricha, t'irekua jurhaska piáni. 11Jucha iámentuecha tata ma kaxumpiti uáp'eska, jucha sési jarhati k'uiripueska, no ménichi nani erantskani jamaska.
12Jose arhiaspti: No ísïsti, cháts'ï erantskani jurhaska íni k'éri echerirhu.
13Imaksï auantaspti:
Jucha chári jántspiri tempeni tsimani erachiska, tata kaxumpiti uáp'eskachi Kanaani echeri anapu. Juchari erachi sapichu no jurhasti ima juchari táte jinkuni pakaraspti, ka máteru erachi uarhistia.
14Jose arhiaspti: Ji mák'ueni uantaxaka, ¡Cháts'ï erantskarani jurhaska ixu!
15Íni jimpoksï tsék'uaka, Irecheri tsípekua jimpoksïni arhixaka eskats'ï cha no uéakuntaka ixu, enka chári erache sapichuni no jurhaska ixu. 16Ne ma nínte ka eska juaka chári erachi sapichuni, cháts'ï ixu ónhakata pakaraaka. Iásïchi míteaka eskats'ï jurhimpitku uantantaxaka. Ka enka no ísïka irecheri tsípekua jimpo, eskats'ï cha erantskarani jurhaska ixu.
17Jose tanimu jurhiatekua ónhaaspti. 18Tanimu jurhiatekua jimpo, Jose arhiaspti: Ji janhanharhisïnka Diósïni, úje inteni ampe enkaksï arhini jaka ka irekakats'ï.
19Enkats'ï sési jarhati k'uiripueka, ixu pakata je ma chári erachini, ka materuecha ni je t'írekua pani chénio eska no k'arhimanhani janhaaka. 20K'óru chari erachi sapichuni ixu juaje, ka ji ísï míteaka eska cha jurhimpekua junkuni uantantaxaka ka nóts'ï uarhiaka. Ka imaksï ísï úspti.
21Imaksï arhiperasïrempti:
Sési jimpo no sésichi niataska juchari erachini jinkuni, imats'ïni k'ómu arhixapti eskachi jarhoatapirinka, ka nóchi p'amok'uska, jimpochisï iásï íni uantanheata jatsika.
22Rubeni arhiaspti:
Jíksïni arhixapka, eskachi nóma úkupirinka sapini, cháts'ïni no k'urhach'aska ¡Iásïchi maianpentaka imani!
23Imaksï no mítespti eska Jose imecheri uantakua jimpo kurhankusïrempka, jimpoka Jose jatsikorhespti uantakua mónhantstini. 24Jose kéntikuspti jima ka niraspti jirikorheni ueraspti, ménteru k'uánhatsentaspti imechani jinkuni uantaxeni, ima Simeonini erakuspti eska jima pakarapirinka onhakata. 25Jose juramuspti eskaksï triju jatakua uinirakuapirinka, ka eskaksï tumina triju jatakuarhu k'uanhaskukuantapirinka, t'irekuaksï intsïnhaspti enkaksï xanharhi jimpo apirinka, ka ísïksï kánhaspti eska Jose na juramupka. 26Imaksï ch'ancha'akichani kuiparhataaspti triju ka níntasptiksï.
27Enka ma triju jatakuani mítapka ch'anch'akini t'irekua p'itakuni, eranhaspti eska jima jataspka tumini enka maiampepka t'irekua jimpo. 28Aiankuaspti erachi jempechani:
Tuminats'ïni ixu jatsirachentasti, exeje ixu jatarixati.
Tsítsirasïksï aparheraspti ka arhip'erasptiksï:
¿Ampets'ïni úcheski Diosï?
29Enkaksï niántapka Kanaani ireta, táte jempani Jakobini aiánkutaspti ampe enka xáni úkorhepka. Ka arhisptiksï:
30Ima achamasï jima anapu juramuti, uinhamentuts'ïni uantaxechesti ka ísïts'ïni arhisti eskani jucha jima erantskarani niraspka. 31Jucha arhispka: Jucha sési jarhati k'uiripueska ka nómenichi jamaska nani erantskani nirani. 32Jucha tempeni tsimani erachispka enkachi juchari táte uáp'eka, ma erachi uarhistia ka sapichu juchari táte jinkuni pakarasti Kanaani echeri. 33Ima achatits'ïni arhispti ima enka jima anapu juramutika: Ísï míteaka eskats'ï sési jarhati k'uiripueska, ixu jurak'u je chári erachini, ka cha níje t'irekua páni chénio, 34ka juáchets'ïni chári erachi sapichuni ixu, ka ísï míteaka eskats'ï cha no jurhaska ixu erantskani, eskats'ï cha sési jarhati k'uiripueska. Jíksïni íntskuntaaka chári erachini ka cháts'ï uák'a ampe atarantani ka p'iani.
35Enkaksï na trijuni móntani japkia, jimaksï exespti eska tumina jima jatarixapka triju jatakuarhu. Enkaksï ima ka táte jempa exepka eskaksï k'uanhaskukuantaspka tumina kánekuaksï chéspti. 36Jakobi táte jempa arhiaspti:
Chats'ïni iámu sapichani tsïtataraxaka, Jose nóteru jucha jinkuni jarhastia ima uarhistia ka Simeoni ima jini pakarasti, ka iásïts'ï Bejamini uékasïnka pani. I amperini jinteni uantikuati.
37Rubeni táte jempani arhispti:
Eskakini no juánkucheaka Benjamini, jucheti tsimani tataka sapichani uantikucheauaka. Jíntenirini jurak'uche Benjamini, jíkini juánkucheaka.
38Jakobi arhispti:
Jucheti sapi no niuati chá jinkuni, ma uarhistia, iásï enka inte ampe ma úkorhenchaska xanhari jimpo, cháts'ï uantikuaka íni achamasïni enka iámu t'upuntsïkia.
Biblia en P´urhépecha, Michoacán, México © Sociedad Bíblica de México, A.C.