Génesis 41
41
Jose irechani arhisïnti ampe tsánharhikua arhikuekani jaka
1Enka tsimani uéxurhini nitamapkia, irecha tsánharhispti ima exekorheni jarhani iurhekuarhu uanamukutini jarhani. 2Iumu tsimani uákasï kánekua sési jarhati ka teparhaticha iurhiekuarhu uémeni, ka uitsakuaksï akuatani jarhani. 3Ka máteruksï iumu tsimani uákasï k'arhisïcha ka ikichakueni jarhatichaksï iurhekuarhu uémeni, ka iurhekuarhu uanamukutini jarhaniksï, jima no iáuani enkaksï uákasï sési jarhaticha jápka, 4uákasï k'arhisïcha ka ikichakueni jarhastichaksï ántaaspti uákasï sési járhatichani, ka irecha tsíp'anharhispti.
5Ménteru k'uintaspti ka menteru tsánharhispti eska triju ma iumu tsimani jukaparhaspka, kánekua sési jarhasti ka k'énhari, 6ka máteruksï iumu tsimani triju uéparhaaspti k'arhirhati ka kuikuirarhati tarhiatani jimpo, 7ka triju kuikuirarhati antaasïrempti triju amparhatichani, irecha tsíp'anharhispti ka exespti eska tsanharikua maéspka.
8Pauntekuarhu irecha kánekua uantanheaxapti, ka iámentu enkaksï tsánharhikuechani úempka arhini ampe enka arhikukuempka ka mimixetichani Ejiptu anapuechani tánantaaspti, irecha aiánkuantaspti ampe enka tsánharhipka ka no nema úspti uantantani ampesï arhikuekaemi tsánharhikua. 9Tátsekua ubasï itsïrhuta jatsiraticheri urhets'ïkuri irechani arhispti: Iásï miántaska eskani miripakurhispka.
10Imani jurhia enka cha irecha ikiani jápka ka kurhinta úrini ka jinteni ónhatarkorhepka, jima k'ataperakuarhu enka p'urhekuticheri urhets'ïkurio jaka. 11Imani chúrekua, ji ka kurhinta úri tsánharispkachi táchani ampe, 12jima, jucha jinkuni tumpi ma jarhaspti enka Ebreo anapuepka, enka p'urhek'uticheri urhets'ïkutiri jántspiri jempepka, imants'ïni sési aiánkuntaspti ampesï arhikuekueni ima enkani jucha tsánharhipka. 13Ka ísï úkorhespti eska ima na arhiapka eska úkorhepirinka.
14Irecha Joseni juarkorhespti ka sontku sontku k'ataperakuarhu petarkorhespti, ima tisïnharhikua p'ikunharhispti ka mórhekorhespti ka niraspti jima enka irecha p'itak'orheni jápka. 15Ka ima arhispti: Ísï míteska eskari úsïnka arhini ampe enka arhikuekak'a tsánharhikua, ka ji tsánharhiska ka no nemarini úsïnti aiánkuni ampesï arhikuekak'i tsánharhikua.
16Jose irechani arhispti: No jiska, Diósï arhiati irechani ampesï tsánharhikua arhikuekak'i.
17Irecha aiánkuspti nénasï tsánharhipi: Ji exekorhexapka, anhantetini jarhani, iurhekuarhu uánamukutini, 18iurhekuarhu iumu uákasï teparhaticha uémespti ka kánekua sési jarhaticha, imaksï uitsakua akuataxapti. 19Máteruksï iumu tsimani uakasï k'arhisïcha ka ikichakueni jarhaticha uémespti, kánekua ikichakueni járhati, no meni exeaspka Ejiptu xarhati. 20Ima uákasï ikichakueni jarhati ka k'arhisïcha, uákasï sési járhatichani antaspti. 21Na uék'i enkaksï xáni antapkia, mák'ueniksï k'arhisïspti ka ikichakueni járhani. Tátsekua tsíp'anharispka.
22Ménteru tsánharispka iumu tsimani trijuechani enkaksï kánekua jukanharhipka ka ma axat'akurhuksï uét'arhaspti. 23Máteruksï iumi tsimani triju uét'arhasïrempti kánekua k'arhirati, xáni tarheata jimpo, 24ima enkaksï uét'arhapka arhasïremptiksï imani enkaksï kánekua sési jaxepka ka uinhinharhini, aiánkuantaskia imechani enkaksï úk'a tsánharhikuechani arhini ampe enka arhikuekak'a.
25Jose irechani arhispti: Ima tsimani tsánharhikua ma ampek'usï arhikuek'ati, Diósï, ampe ma uékaxatikini aiánkuntani.
26Iumu tsimani uákasïcha, iumu tsimani uéxurhini arhikuekasïnti, ka iumu tsimani trijuecha sési járhaticha, iumu tsimani uéxurhini arhikuekasïnti. Ma echakua tsánharikuesti. 27Ka iumu tsimani uákasïcha ikichakueni járhaticha imat'uksï iumu tsimani uéxurhinisti ka ístu iumu tsimani triju ikichakueni jarhati imát'usï iumu tsimani uéxurhinisti enka k'arhinta jauaka. 28Íni ampesï arhikuekani jati irecheri tsánharhikua. Diósï, irechani aiánkuxati ampe enka eratseni jaka úni. 29Jurhaxati iumu tsimani uéxurhini sési jakua ka enka Ejiptu kánekua p'ikunhantaaka. 30Ka tátsekua iumu tsimani uéxurhini k'arhintakua juati, ka Ejiptu mirikurhinhaati imani uéxurhinichani enka k'arhimakua xerheaka k'éri iretani. 31Xáni káneati k'arhinta enka nóteru jamperi miánhaaka ima jurhiatecha enka kánekua jatsikorhenhapka. 32Enka cha irecha tsimani xanharhi tsánharhika arhikuekasïnti enka ACHA ísï úaka ka eska no ióntani úaka.
33Cha irecha, jirinhapirinkats'ï nemani enka kánekua mítepirinka ka eska urhets'ïkupirinka Ejiptu iretani. 34Uétarhesïnti eskats'ï urhets'ïkurichani perauaka, ka eskaksï patsaaka iumu arhutakata enkaksï Ejiptu iumu tsimani uéxurhini kánekua japoaka ka p'ikuntaaka. 35K'uaniati patsatani t'irekua p'ikuntskata íni uéxurhinichani enka jurhani jaka, ka eska cha juramuaka eskaksï triju patsaaka, ka eska jiáni marhuatanhaaka iretecharhu enka k'arhinta jauaka. 36Ka ima t'irekua jatsiati eska patsanhaaka, ka jiáni úranhani enka iumu tsimani uéxurhini k'arhinta k'éri iretecharhu Ejiptu jauaka. Ka ísï jamani no uarhinhaati.
Jose, Ejiptu juramutispti
37Irecha ka imeri jántspiricha sési exespti ima ampe enka arhipka, 38ka irecha jántspirichani arhiaspti:
¿Uáchi máteru xásï tatachini exentani eska i, enka Diósïri espiritu ima jinkuni jauaka?
39Arhispti Joseni: Enkakini Diósï mítetaraka íni ampe, no jarhasti máteru xáni mimixeti eska t'u.
40T'úri jucheti k'umanchekuarhu juramuaka, ka iámentu iretakini t'únkeni kurhach'aati, jík'uni sánteru k'eriuaka t'únkeni jinkuni enkani irecheka. 41Irecha, Joseni arhispti: Exe jíkini iámu Ejiptu ireta urhets'ïkuri úxaka.
42Irecha inchak'urhakua p'íkuspti ka Joseri játsikuspti, ka ampakiti takusï linu arhikateri xukuparhataspti, ka uekach'akua tiripitiri ma jatsichakuspti. 43Tátsekua mótsetarakuarhu tsimantarhu jatsiraspti ka arhiaspti k'uiripuni eskaksï imani japantiru uinhachapirinka: ¡T'inkuixurhitini! Ka iámu Ejiptu urhes'ïkuri úspti.
44Irecha arhispti Joseni:
Ji irecheska, k'óru no nema úati manakorheni enkari t'ú no juramuaka ixu Ejiptu.
45Irecha, Joseni Safenati-panéa jakankurhitaspti, Ejiptu anapu jakankurhikua, ka Asenati jinkuni tempuchataspti ima jinkuni enka PotiFera uáp'epka, enka Oni k'éri ireta tátepka. Jose, Ejiptu ísï niaraspti juramutini. 46Jose ma ekuatse tempeni uéxurhini jatirispti enka irecha jinkuni jápka. Irecha japantiru uéraspti jima enka jápka ka niraspti iámu Ejiptu uanaakurhani.
47Iumu tsimani uéxurhini kánekuaksï p'ikuntaspti, ka kánekua t'irekua japosti. 48Jose iámu p'ikuntskata ka t'irekua patsaspti enka xáni japopka iumu tsimani uéxurhini, k'éri iretecharhu patsaspti enka jima uirhipantani jápka. 49Jose kánekua triju tánaspti, xáni kánespti eska ch'éri k'éri japuntarhu anapu, xani kánespti enka no jamperi uémpka miunhani.
50Nótki niáraxapti k'arhinta enka Jose tsimani tataka sapichani káapka, Asnati jinkuni káaspti, Potifera uáp'a nanaka, tata k'éri Oni anapu. 51Imani enka urheta antap'enupka Manasesi jakankurhitaspti, jimpoka uantaspka: Diósïrini jucheti uantanheatechani ka jucheti márkuechani mirikutasti. 52Ka imani enka tátsekua antap'enupka Efraini jakankurhitaspti, jimpo uantaspka: Diósïrini imani iretarhu enkani ji xani no sési nitamanchani jápka, sapini kónteasti.
53Iumu tsimani uéxurhin enka Ejiptu xani ampe t'irekua japopka ka kánekua p'ikunhantani, k'amakurhispti. 54Ka iumu tsimani uéxurhini k'arhinta uenaspti, ísï eska Jose na uantapka. K'arhinta iápuru ísï jarhaspti, k'óru iámu Ejiptu jarhaspti ampe t'irenhani. 55Enka na sánteru káneni jápkia k'arhinta Ejiptu, k'uiripu kurhakusïrempti irechani eska t'irekua íntsaapirinka, ka irecha Ejiptu anapuecha arhiaspti: Jose jinkuni níje, ka ísï úje eskaksï ima na arhiaka.
56K'arhinta uímanhentu arhixaptia k'éri iretarhu. Jose iámu mítaspti jima enkaksï xáni triju ka t'irekua patsakata jápka, ka Ejiptu anapuechani atarakuantasïrempti, jimpo kánekua k'arhimanhaxapka. 57Iápuru anapuechaksï Ejiptu jurhasïrempti, Joseni triju ka t'irekua piákuni, jimpoka iápuru ísï jarhaspka k'arhinta.
Biblia en P´urhépecha, Michoacán, México © Sociedad Bíblica de México, A.C.