Mathew 7
7
1Turpea veveveg, nan wa veveg kamiu. 2Ape mun o sava lea veveg kamiu we veveveg nia, te veveg kamiu mun ilone; wa mun o sava qat towotowo kamiu we towotowo nia, te towo kel mun kamiu mun ilone. 3Wa ape sava ko we ilo o naenaeai alo matan tasima, nava gate nonom qalo o vat tangae alo matama kel? 4Si ko te vava gasei lai mun i tasima wa, Si na sipe savrag gai o naenaeai nan namatama; wa ilo, o vat tangae ti alo matama? 5I sokoi goro, ka savrag amoa o vat tangae nan namatama kel; paso nan, ko qara ilo vaglala we sipe savrag o naenaeai nan namatan tasima.
6Turpea la at o gene we roŋo mun o kurut ŋaŋ; wa turpea savrag nomiu o wo vila ŋaŋ ape nago qoe; nan neira wa varavara siwo mun naraŋora, qara kilau we ŋit sasar kamiu.
7Tur paere, wa te la mun kamiu; tur sike, wa kam te ilo suar; tur niŋniŋ, wa te waka mun kamiu. 8Ape valsei we paere we lav mona; wa isei we sike we ilo suar; wa munsei we niŋniŋ te waka munia. 9Pa o sava tanun mulaŋ amen kamiu, si natuna qe paere o bread amaia, naŋ ni te le tea o vat munia? 10Pa sin qe paere o iga, naŋ ni te le tea munia o mata? 11Pa si kamiu, we toga malkeke, pa we gilala we la o sogov we wia munra mermereimiu, pa i Tamamiu tavunana tete la sal aneane o matai gene ŋaŋ mun rasei we paere munia? 12Wa o val savasava ŋaŋ kamiu we maros o tanun ŋaŋ neira a ge mun kamiu, tur ge momiu tamaine muneira; ape o ike nake o lea wa ira prophet ŋaŋ.
13Tur mule pata ape mategeara mantagai; ape o mategeara we lava, wa o matesala we tawela, we lav rasei ilo matea; wa we qoqo neira we mulemule pata alolona. 14Ape mantagai o mategeara, wa we kokota o matesala, we lavlav ilo esu; wa neira o tapai we sike suar ilone.
15Tur ilo goro kel kamiu nan o prophet soŋsoŋ ŋaŋ, we mulemule qa sur kamiu we saru gorora mun o vin sheep, nava alololora neira o qoe kurkur. 16Kam te gilala laira ape woara. Te tawo lai o wo vine nan o wolakaukau, si o wo fig nan o sou? 17Tamaine gina val matai tangae ti uwa o woai we wia ŋaŋ; nava o sokore tangae ti uwauwa o mala woai gese. 18O matai tangae tete uwa lai o mala woai ŋaŋ, wa o sokore tangae tete uwa lai o woai ŋaŋ we wia. 19Val tangae ta tete uwauwa o woai we wia, te tara reag, wa te savrag vawo av. 20O manigiu o ine kamiu te gilala laira ape woara.
21Gate val sei we vetvet mun nau wa, Lord, Lord, pa wasi te kalo pata lai ilo marana tavunana; nava isei qe ge o maros non i Tamak tavunana. 22Wa alo qoŋ nane ilone neira tar te vet mun nau wa, Lord, Lord, sa si kamam gate ligoligog lai ti alo sasama, we me vasaug lai o vui we tatas ŋaŋ alo sasama, wa me ge lai alo sasama o vasasa ŋaŋ we tar? 23Pa alo ine na te gaganag lue mun neira wa si, Na gate gilala ran ma kamiu; tur totoa reag nan nau kamiu irasei we gagapalag vitag o lea.
24Manigiu o ine isei qe roŋotag mok o vavae ŋaŋ iloke wa we ge tataga, te tenegag ape neia si tama o tanun matanur, me taur mona naimana vawo vat. 25Wa o wena me wena siwo, wa o pei ŋaŋ me vug, wa o laŋ me sawu ma, wa me vus qalo o ima ilone, wa gate masu; ape me map nasagerana vawo vat. 26Wa isei qe roŋotag mok o vavae ŋaŋ iloke pa gate ge tataga, te tenegag ape neia si tama o tanun o qaqae, me taur mona naimana alo one. 27Wa o wena me wena siwo, wa o pei ŋaŋ me vug, wa o laŋ me sawu ma, wa me qeqeŋ ape ima ilone, wa me masu; wa non o masuva ilone we liwoa.
28Wa me ge tamaike, i Jesus me vava vunvun o vavae ŋaŋ iloke, wa o sul we mamakei ape non o vatvatogo; 29ape ni me vatvatogo neira tama isei o mana amaia, wa gate tama ira vatogo ŋaŋ tamaira.
New Testament was published by the British and Foreign Bible Society in 1931.