Mathew 6
6
1Tur ilogoro nan kamiu wa gagapalag momiu o liŋe taniniga alo nagora tanun si neira a ilo; pa si ta tamaine kamiu tete taur o rusarusai amen Tamamiu we tavunana.
2O manigiu o ine alo ko we la nom o aleŋa ŋaŋ, nipea we uwuw o tauwe alo nagoma, tama ira gale we ge alo ima siwo tuwale ŋaŋ, wa alo matesala ŋaŋ, si o tanun ŋaŋ a sotalira; we nun na we vava mun kamiu wa, Neira me taur veta nor o rusarusai. 3Pa alo ko we la nom o aleŋa ŋaŋ, nipea nagalaoma a gilala o sava namatuama we ge. 4Si te toga pata nom o aleŋa ŋaŋ; wa i Tamama we iloilo alo masaoi we toga pata te wono pug muniko apena.
5Wa alo kamiu we tataro, nipea we tama ira gale; ape neira we maros we tira we tataro alo ima siwo tuwale ŋaŋ wa ape waŋare matesala ŋaŋ, si a tira lue mun o tanun ŋaŋ. We nun na we vava mun kamiu wa, Neira me taur veta nor o rusarusai. 6Pa iniko, ko qe tataro, ka kalo pata ilo ninima, wa me tipag paso o mate nin, ka tataro mun i Tamama we toga pata; wa i Tamama we iloilo alo masaoi we toga pata te wono pug muniko apena. 7Pa kam qe tataro, turpea paepaere kelkel vagaqoqo tama iragai talo sul ŋaŋ we sea. Pa neira we nonom si te roŋotagira alo neira we paepaere vagaqoqo. 8Pa turpea tama ineira apena. Ape i Tamamiu me gilala veta o gene ŋaŋ kamiu we maros ran, alo kamiu gate paere tiqa. 9Nava tur tataro tamaike wa, Tamamam tavunana, Nasasama ni roŋo. 10Nom o marana ni mule ma. Nom o maros ni lai, alalaŋana tama avunana. 11Le ma qarig mun kamam o sinaga we tira ape qarig. 12Wa ka nomvitag napugumam, tama ikamam we nomvitag munragai momam o pug avunara. 13Wa nipea ukeukeg kamam ilo galeva, pa ka lav kamam nan o ganganor. 14Ape si kam qe nomvitag napugara tanun ŋaŋ, i Tamamiu tavunana te nomvitag mun kamiu. 15Pa si kam qe tete nomvitag napugara tanun ŋaŋ, i Tamamiu mulaŋ tete nomvitag napugamiu.
16Wa alo kamiu we garagara mamasa, turpea tama ira gale ŋaŋ, nanagomiu we maŋitŋit apena; ape neira we ge tatas nanagora, si neira tira lue mun o tanun ŋaŋ si we garagara mamasa; we nun na we vava mun kamiu wa, Neira me taur qet veta nor o rusarusai. 17Nava iniko, alo ko we garagara mamasa, ka urai naqatuma, wa ka aqo nanagoma; 18nan ko wa tira lue mun o tanun ŋaŋ si we garagara mamasa, panava mun i Tamama we toga pata; wa i Tamama we ilo alo masaoi we toga pata te wono pug muniko apena.
19Turpea sogsogon tuwale momiu o moegene ŋaŋ alo tano, o rupe wa o waliai te gana mosiu aia, wa o tanun pal we tike sau wa we palu. 20Pa tur sogon tuwale momiu o moegene ŋaŋ avunana, o rupe wa o waliai tete gana mosiu aia, wa o tanun pal tete tike sau, tete palu. 21Ape nomiu o moegene ŋaŋ qe avea, natoqamiu te toga mulaŋ aia. 22O pul tape turiai o matai; pa si namatama qe mamalete, naturiama nol te marmararan nol apena. 23Nava si namatama qe malkeke, naturiama nol te silsiliga apena. Pa si o valawar we toga alo loloma qe siliga, tama avea gai o siliga ilone!
24Isei tete mawmawui sorakorua goro lai ira vatraŋ: ape ni te ŋustup i tuara wa te tape o varuei, si ni te pul tuwale amen i tuara wa te vasigtag o varuei; kam tete mawmawui lai sorakorua goro God wa Mamon. 25Manigiu iloke na we vava mun kamiu wa, Turpea nononom teqateqa ape esumiu, kam te gana o sava, si te ima o sava; wa nipea mulaŋ ape turiamiu si te saru goro mun o sava. Pa gate raka sage o esu nan o sinaga, wa o turiai nan o siopa? 26Tur sagsagarag o manu ŋaŋ tavunana, si neira gate savsavur, gate gorogoro, gate sogsogon tuwale ilo qea ŋaŋ, wa i Tamamiu tavunana we vaŋanira. Pa gate mava aneane kamiu nan neira? 27Isei tamen kamiu, ni ta nonom teqateqa apena, we tuan lai natarapena mun o sogosiwo ta vatuwale? 28Wa ape sava kam we nononom teqateqa ape siopa? Tur nonom nurnur ape nalnal ŋaŋ talo malatou, we poapoa gasavai; neira gate mawmawui gate galgalomtag. 29Pa na we vava mun kamiu wasi, i Solomon alo leŋasina nol gate saru goro iloa tama tuwale nan o ine ŋaŋ. 30Pa si God we saru goro tamaine o valis talo malatou, we toga qarig, wa amaran te savrag ilo um; sa si ni tete saru goro raka sage kamiu, ira nom qerqeret? 31O manigiu iloke turpea nononom teqateqa, we varus wa, Nina a gana o sava; Nina a ima o sava? si, Te saru goro nina mun o sava? 32Ape iloke ŋaŋ nol o sul ŋaŋ we sea we sikesike mora apena; o manigiu i Tamamiu tavunana we gilala si kam we maros ran iloke ŋaŋ. 33Panava tur sikesike amoa o marana non God wa non o taniniga, wa te tuan nol mulaŋ mun kamiu o ike ŋaŋ. 34Pa turpea nononom teqateqa ape amaran; manigiu o maran te nonom ape neia kel. We sasarita ape valqoŋ o malagene ŋaŋ tapena.
New Testament was published by the British and Foreign Bible Society in 1931.