YOHANE 1
1
/Aymu iwa slaqwa tleehhiít
1Iimír iimu/uungo /aymu i daadeer. /Aymuuwí amór i dirii'i a amór Mungú. Nee /aymuuwí an Mungú. 2Kwí iimír iimu/uungo i dinkwa nee Mungú. 3Mura' sleémeero ina tleehharuút ar inós. Geera bar inoseeká, gár aa tleehharut i káhh, baraá muruuwí sleémeero aa tleehharuuti. 4Slafíngw alhhe'eesay wásl in baraawós i dirii', nee slafingwí an gwa/aateemaá muu sleémeero. 5gwa/aateemaaká' nin baraá giwtír wa gwa/aatiyá', nee giwti gaasaro gaa aleesleeriiká.
6Heeko nina hardáh, kunguna amór Mungú wa ya/aáw. Umuuwós a Yohane. 7Heewí nina hardáh as lamabu'uungw, gwa/aateemaadá' ngiwa lamabu'un, as muu sleémeero iwa haratlintii'i ar inós. 8Inósuuwí a gwa/aateemaadaeeká, ala nina hardáh as gwa/aateemaadá' ngiwa lamabu'un. 9Ala gwa/aateemaá ló' kudá' umuúqo heewo ngu gwa/atamiisá', i baraá yaamií hi'iitiyá'.
10Inós i baraá yaamií dirii', tam yaamu nina tleehharuutiyé' ar inós, ala inós kwaa tsaahhiiká nee muu. 11Inós nina ayaawós i hardáh, ala kwa ilaoohiiká nee mukósuú kilá'. 12Ala kudá' sleémeero ngwa ilaoohiye', gina aleesleemuú i haniís, tawa na/aá Mungú tleehhiti. Inooín an kudá' inós ngwa haratlintii'iye'. 13Kudá' taa laqwaliiká adór na/iír ale, laqaá ar sla'aarír slaqwa, laqaá ar sla'aarír hee, ala ar sla'aarír Mungú.
14/Aymuuwí ina hee tleehhiít, iri amoorén wa hoót. Atén xirfuuwós ngway araán, i ló'wa haats gurtleemuuwo nee looeemawo. Xirfuuwí guna amór Baabá wa sláy, asma inós a Garmoó kilós oo Mungú.
15Yohane ina lamabu'ún, iri tseé' iri oó', «Kwí an kudá' kangós naa alki/iít niwa kah, ‹Heedá' aluueé' wa hardáh a kudá' geeraaeé' haár, asma án niwa deeruuta inós i qaroó daadeer.› »
16Asma baraá hatsmuuwose atén tsuuqa ina slaslawaán daanduú kuqá' wa ale. 17Asma hara'aya kana haniís ar dákw Mose, ala gurtleemu nee looeema nina hardihiyé' ar dákw Yesu Kristo. 18Heé Mungú gwa baloó ar i kaahh. Garmoó kilós oo Mungú, kudá' dír Baabá i dirií', inós an kudá' Baabá ngwa geehhooatis.
Lamabu'úngw Yohanedá' Baatimaamiís
(Mat 3:1-12; Marko 1:1-8; Luka 3:1-18)
19Múk Yahudi oo baraá Yerusalemu kaahamuusér Mungú nee múk tlahhoó Laáwi kina ya/aáw amór Yohane, as kuwa yaahaasi tawa kaahi, «Kuúng a heemá?»
20Yohane baraá lamabu'uungose looeema gaa si'iiká ooaro, tiri geehhooatís iwa kaahi, «Aníng a Kristowooká.»
21Kuri yaahaás, «Kuúng a heemá ala? Kuúng a Eliyáwo?»
Iri oó', «Aníng a Eliyawooká.»
Tari oó', «Kuúng a aarusmoodáe?»
Iri oó', «Aasla'áy.»
22Naagáy kuri báy, «Kuúng a heemá ala? Mukdá' atén taa ya/aaw mu bawaán? Kuúng ma kát daanduuwoge?»
23Yohane iri oó', «Aníng a,
‹Afór hee ar tseeamiim baraá darmuú wa ale, ar kah,
Loohír Aako amohhe'eesaak.› »
Adór aarusmo Isaya ngira oó'.
24Mukdá' taa ya/aáw amór i dahhi a amór múk Farisayo. 25Kuri yaahaás kuri báy, «Ahaá ala, mas baatimís, kuúng bar Kristowooká, laqaá Eliyawooká, laqaá aarusmoodaeeká?»
26Yohane giri báy, «Aníng an baatimiís ar ma'aay. Heé kuungá' ta xua'aaká aa sihhiít baraá tla/angwhúng i alé. 27Inós an kudá' ni aluueé' wa hardáh. Tam aníng a hariimaaká himuú ya/atirós nguwa slakwekwe'ees.»
28Kaangwí dír iwa tleehharuút a amór yaamaá Betania, gayuú yaaér Yordani, amoodá' Yohane iwa baatimiisi.
Deelmoó bee/i oo Mungú
29Bál tsár Yesu iwa amór Yoháné kay, kuri ár nee Yohane. Yohane iri oó', «Ga/aawaak Deelmoó bee/i oo Mungú, kudá' tlakweemaá muu gi hingeemiís. 30Kwí an kudá' kangós aníng naa alki/iít niwa káh, ‹Hee ni aluueé' wa hardah, ala a kudá' geeraaeé' gaa haar, asma án niwa deeruuta, inós i qaroó daadeer.› 31Aníng inós ugwa xuiiká, ala aníng nina hardáh niwa baatimiis ar ma'aay, as inós kuwa xu'utisi dír múk Israeliwo.»
32Yohane iri malé lamabu'ún iri oó', «Án Qeeruú hhoohhoó' oo Mungú una ár iwa gawaá doorí wa awdiiti adór hhooki, nee iri gawaawósí iwiít. 33Ala inós aníng ugwa xuiiká. Kudá' aníng iga ya/aaw as niwa baatimiis ar ma'aay, inós aníng ina báy, ‹Heé Qeeruú hhoohhoó' oo Mungú aa i aweér bura aán, kwí an kudá' baatimiís ar Qeeruú hhoohhoó' oo Mungú.› 34Nee tí aníng aga ár, slám aga lamabu'uúm adór kwí tar Garmoó Mungú.»
Eeharuusér Yesu ar geera
35Slám bál tsare Yohane i sihhimiit dinkwa nee eeharuuseerós ar tsár. 36Yesu kuri ár iwa hi'iimiti. Yohane iri oó', «Ga/aawaak Deelmoó bee/i oo Mungú.»
37Eeharuuseedá' tsár Yohane gwa axas qoomár iwa axweesi, Yesu guri eehát. 38Yesu iri warqáy, eeharuuseedá' gu eeharahaar gari ár gari báy, «Gár ta leelehhita' a milá?»
Eeharuuseedá' iri ó', «Intsaahhatusámo, kuúng dír ta hot a diimá?»
39Yesu giri báy, «Qwalaasé' dír ni hoot artá awaare'.» Tari tláy, dír i hooti kari ár. Tari deél dír do'ós i aleeró baalaadae. Nee qoomaadaádá' a qoomár looár mibaangw.
40Andrea, hhiyoó Simon Petro, a heé wák baraá eeharuuseedá' tsár Yohane gwa axamis nee Yesu gwaa eehat. 41Andrea hhiyaawósuú kilá' kudá' ta bay Simon guri geerií ár, guri báy, «Atén Masihi una araán.» (Gídaabárós a Kristo.)#1:41 Kristo: Gídaabárós a kudá' taa dí/tár iimbalaáx. 42Simon kuri huúw amór Yesu.
Yesu iri qaytsiít amór Simon, iri oó', «Kuúng a Simon, garmoó Yohane. Nee kuúng tu bay Kefa.» (Gídaabárós a Petro, laqaá Tlaa/a).
Yesu Filipo nee Natanaeli ngiwa ateét
43Looitleérose Yesu iwa Galilayár keemuú wa slai, Filipo guri ár. Yesu guri báy, «Aníng eeharáng.» 44Filipo a heé Bet-saida, gixsár Andrea nee Petro. 45Filipo Natanaeli guri ár, guri báy, «Kudá' gooír Mose nar aaruuse i kat, atén ugwa araán. Inós a Yesu, garmoó Yosefu, heé gixsár Nasareti.»
46Natanaeli iri oó', «Gár hhoo' ar baraá gixsár Nasaretír wa ti'iit iqo deéro?»
Filipo iri oó', «Qwaláng, areek.»
47Qoomár Yesu Natanaeli nguwa ár iwa amoorós kay, Yesu iri oó', «Ga/aaweek, heewí a heé Israelú kilá'. Waaqooda i káhh baraawose.»
48Natanaeli Yesu guri yaahaás, guri báy, «Ahaá, án kuúng adór ira tsáhh a adoomá?»
Yesu iri oó', «Qoomár kuúng Filipo uwa ateetiiká, kuúng tawa baraá guruú /aantsírí dirí', án kuúng ugwa qaroó ár.»
49Natanaeli iri oó', «Intsaahhatusámo, kuúng a Garmoó Mungú. Slám kuúng an Waawutmoó múk Israeli.»
50Yesu guri báy, «Gár tasa haratlintí' a tidaádá' uwa báwi, ‹Án kuúng una qaroó ár qoomár kuúng tawa baraá guruú /aantsír i diri'›? Ala muruú urén oo kwí gu baá/ u aán.» 51Yesu Natanaeli guri báy, «Án a kah, doori iqo aandá' adór nir gweeritiya', nee malaykér Mungú iwa tsa/a/aan nee iwa awdit gawaá Garmoó Hee.»
The Bible in Iraqw © Bible Society of Tanzania, 2004.