YOHANE Alki/ituú niiná daanduú kitaábuuwihe
Alki/ituú niiná daanduú kitaábuuwihe
Yohane a goousmoó kitaábuú tsiyáhh oo Ya/abtór hho' ar Yesu Kristo. Inós a garmoó Sebedayo, inós a eeharusmoó wák baraá eeharuuseedá' mibaá nee tsár ar Yesuwo. Inós nee hhiyaawós Yakobo nee Petro an eeharuusér ló'wa tseew dír bihhaá Yesu, inós an eeharusmoó wák baraá eeharuuseedá' tame, tidár dinkwa nee Yesu qoomár kaloó Yesu iwa warqáy, nee qoomár Yesu iwa baraá gurhaamírií dirii'i baraá asalmo Get-semane, nee qoomár Yesu dasír Yairo ngiwa waaslee/atís. Yohanewí an kudá' Yesu aa aayoorósií saayín.
Goousmoó kitaábuuwí muruudá' aa gooín inós guna araa'ár ilaawose qoomár iwa tleehharuumiti, nee qoomár muruudá' aa tleehharuumiít ga xuu' sleeme. Qoomaadá' Yesu iwa iwiít dír afkú hhalaangw ga xuu' (4:6). Faarór sidoodaá baraá duuxór Kanár yaamaá Galilaya ga xuu' (2:6). Tlaxór mooyangwdá' Maria aa Yésúr slík ga xuu' nee uroó mooyangwdae (12:3,5). Aluuwo Paulo Yohane nee Petro nee Yakobo gina báy, Uheemaá tám awa kaniísa (Gal 2:9).
Baraá kitaábuuwihe kaa geehhooeés adór Yesu tar /aymuú Mungú oo alhhe'eesay wásl. /Aymuuwí an kudá' Mungú umuú gaaro ngira tleéhh (1:3,4). Yesu kuna slaqamís nee muruú baraakaá yaamu as kahhó' kuwa tsaahhaan. Kuna slaqás nee ma'aá slafíngw koomá', nee muruú /aymár slafiingw, nee sabiíbuú ló', nee De'eemusmoó hhoó', nee loohi, nee gwa/aateemaá ló'. Layu faanqw awa Yesu aa tleéhh kaa gooín baraá kitaábuuwí. Kitaábuuwí kuna gooín as kahhó' kawa haratlintiiaan adór Yesu tar Kristo, garmoó Mungú, nee sleeme slafiingw kuwa slawaan baraá umuuwós wa ale, asma kuwa haratlintiiaán (20:31). Asma Yesu ina oó', «Mungú múk baraakaá yaamu guna ló'wa slaá' tam garmaawós oo kilós nguri haniís as umuúqo heewo oo gwaa haratlintii' miwa qwaár, ala masók slafíngw alhhe'eesay wásl gun sláy.»
Digir wakeetíngw kitaábuuwí:
Axweesantá geera 1:1-18
Yohanedá' Baatimaamiís nee eeharuusér geera ar Yesu 1:19-51
Yesu gadiyeé ngiwa tleéhh ar geehhooeema 2:1—12:50
Deeloorós ar alhhe'eesaay iwa baraá Yerusalemúrií dirii'i nee inslaawaydá' 13:1—19:42
Aako Yesu niwa waasleé/ nee tiwa geehhooeés 20:1-31
Wa'aá hatlá' awa Yesu tiwa geehhooeés baraá Galilayaro 21:1-25
The Bible in Iraqw © Bible Society of Tanzania, 2004.