Yohana 20
20
MADALENA NA PETRO NA YOHANA HA KITURO. — KUBONEKERWA KWA MADALENA.
1Olunaku lwo kutandika lw’obwoyo#20, 1 Lora Matayo 28, 1., Maria Madalena naiza ha kituro, bwanencha hakiragwire; nabona ibale lihiringisize ha kituro. 2Mbe nairuka naiza hali Simoni Petro n’omuhemba ondi owe Yezu yayendaga, nabagambira ati: Behire Omukama mu kituro, titukumanya aho bamusagere. 3Mbe Petro nairuka n’omuhemba ondi oliya, nibeza ha kituro. 4Niberuka hamo ha bubili bwabo, omuhemba ondi nairuka muno, natanga Petro, natandika kuhika ha kituro. 5Ka yenamire, nabona emyenda zitere aho; nawe tiyatahiremo. 6Mbe Simoni Petro naiza namuruba, nataha mu kituro; nabona emyenda zitere aho, 7ekitambala, echaliga kili ha mutwe gwe, chaliga kitali hamo n’emyenda zindi, nawe kitageneho, kikubire kili handi. 8Mbe niho omuhemba ogwo natahamo, ayatandikire kuhika ha kituro; nabona, naikiriza. 9Kuba baliga batakamanyire Enandiko, okwo yaliga ali no kuzoka mu bafu. 10Mbe abahemba nibasuba mu ka.
11Nawe Maria yaliga ali ha kituro hanza nalira. Mbe aho yaliga nalira, akenama nayetegereza mu kituro. 12Nabona bamalaika babili bazwere zimwera, bekere, ondi ha mutwe, ondi ha maguru, omwo baliga batereho engingo za Yezu. 13Aho nibamugambira bati: Mukazi we, okulizibwa ki? Nabagambira ati: Kuba batwere Omukama wange, kai tinkumanya aho bamuta. 14Ka yafumwere ebyo, nayekebuka enuma, nabona Yezu aimerere; nawe tiyamanyire okw’ali Yezu. 15Yezu namugambira ati: Mukazi we, okulizibwa ki? okuronda ga? Wenene nachwa ati: n’omulimi, namugambira ati: Nineka, raba n’iwe omwihiremo, nongambire ah’omutere; ine mmutware. 16Yezu namugambira ati: Maria! Wenene nayekebuka namugambira ati: Rabboni! (nikwo kugira ati: Mwolekerezi). 17Yezu namugambira ati: Otankoraho, kuba tinkahanamire hali Tata. Nawe ogende ha batabani betu, obagambire oti: Nahanama hali Tata wange na So wanu, Mungu wange na Mungu wanu. 18Maria Madalena naiza natengera abahemba ati: Nabona Omukama, lora ebyo yangambire.
YEZU NABONEKERA ABAHEMBA BE KABILI.
19Mbe ka habere kebazo ha lunaku olwo lwo kutandika lw’obwoyo, emilyango z’enzu eyo abahemba baliga basumbiremo zaliga zikingire kuber’obutini bw’Abayahudi, Yezu naiza, naimerera hagati, nabagira ati: Omulebo gube n’emwe. 20Ka yagambire atyo, naboleka ebiganza n’olubazu. Abahemba nibasemererwa, ka babwene Omukama. 21Nawe nasuba nabagira ati: Omulebo gube n’emwe. Nka nikwo Tata yantumire, nikwo n’ene nkubatuma. 22Ka yatengire ebyo, nabahaha, nabagambira ati: Muhabwe Mwoyo Mutakatifu. 23Abantu abo mulikiz’ebiheno byabo, balikizibwa; abo muligumiza mu biheno byabo, bilibagumiraho.
24Nawe Toma, omo w’ekumi na babili akwetwa Didimo, yaliga atali nabo, aho Yezu yezire. 25Mbe abahemba bandi nibamugambira bati: Twabona Omukama. Nawe wenene nabagambira ati: Ntabwene mu biganza bye aho bafumwize emisumari, nkata echara change mu bibwa by’emisumari, kai nkata mu lubazu lwe ekiganza change, tinkwikiriza. 26Mbe naku munana ka zarabireho, abahemba baliga basubire kusumba mu nzu omwo, na Toma wena aliho nabo. Aho Yezu naiza, emilyango zikingire, naimerera hagati, nagira ati: Omulebo gube n’emwe. 27Mbe hatyo nagambira Toma ati: Leta kunu echara chawe, olore ebiganza byange; leta ekiganza chawe, otahye mu lubazu lwange; niho oleke kwanga, nawe oikirize. 28Toma nasubamo namugambira ati: Mukama wange, Mungu wange! 29Aho Yezu namugambira ati: Toma, obwo wambona, nicho wekiririza; abekiriza batabwene bali n’omugisa. 30Kandi Yezu akakola mu meso g’abahemba be amahano mengi n’agandi agatayandikirwe mu kitabo kinu. 31Nawe ganu gakayandikwa, niho mwikirize okwo Yezu ali Kristu, Omwana wa Mungu, hatyo mwekirize, mubone obulame mw’izina lye.
First published in 1946 by the White Fathers. Published online with the permission of the White Fathers.