Yohana 19
19
YEZU NAZWEKW’ENGATA Y’AMAHWA HA MUTWE. — PILATO NAMULAMULA KUFWA.
1Mbe aho Pilato natwara Yezu, namutez’amasanzu. 2Abasirikale nibazing’engata y’amahwa nibagita ha mutwe gwe, kandi nibamuhumbira omwenda gumutuku. 3Nibamwizaho nibagira bati: Kasinge, Mukama w’Abayahudi! nibamuter’empi. 4Mbe Pilato nasuba kuhuruka hanza, nabagambira ati: Ngugwo namubaletera hanza, niho mumanye okwo ntamusangaho ntambala. 5Mbe Yezu naba wo kuhuruka azwer’engata y’amahwa n’omwenda gumutuku. Nabagambira ati: Ngugu omuntu! 6Aho abakuru b’abasaserdoti n’aberu ka bamubwene, nibayomba, nibagira bati: Mulege, mulege ha musalaba. Pilato nabagambira ati: Imwe nimumutware, mumulege ha musalaba; nawe ine tinamusangaho netambala. 7Abayahudi nibamusubiramo bati: Itwe tuli n’ekilagiro, kai ha bw’ekilagiro echo ahikire kufwa, kuba yegira Mwana wa Mungu. 8Mbe Pilato ka yahulire ekigambo echo, natina muno.
9Nasuba kutaha mu lukale, nabuza Yezu ati: Oli wa hai? Yezu nabura kumusubiramo kigambo. 10Aho Pilato namugambira ati: Tokunfumorera si? Tokumanya okwo ndi n’obuhicha bwo kukulega ha musalaba n’obuhicha bwo kukusindika kugenda? 11Yezu nasubamo ati: Tiwakugizire obuhicha n’obuke hal’ine, okiba otabuherwe oluguru. Nich’echo omuntu ayandetera hal’iwe ali n’ekiheno kihango kukiraho. 12Kurug’aho Pilato narozya kumusindika kugenda. Nawe Abayahudi nibayomba nibagira bati: Okasindika onu kugenda, toli munwani wa Kaizari; buli muntu akwegira mukama, akugomera Kaizari. 13Pilato ka yahulire ebigambo ebyo, nahurucha Yezu hanza, naikara ha kitebe cho kulamuliraho, ha mwanya ogwo bakweta bati: Litostrotos, kai mu kiyahudi bati: Gabata#19, 13 “Litostrotos” nikwo kugira oti: obwalansi bw’amabale.. 14Lwaliga luli lulaliriro lwa Paska#19, 14 Lora Matayo 27, 62., kuti saha mukaga. Nagira Abayahudi ati: Nguwo omukama wanu. 15Nawe bonene nibayomba bati: Musagare, musagare, mulege ha musalaba. Pilato nabagambira ati: Ndege omukama wanu ha musalaba? Abakuru b’abasaserdoti nibasubamo bati: Tituli na mukama, atali Kaizari wenka. 16Mbe aho namubaha, bamulege ha musalaba.
YEZU NALEGWA HA MUSALABA. — NIBAGABANA EBIZWARO BYE.
Nibatwara Yezu nibamusagara. 17Nayetegulira omusalaba, nahuruka kuza ahantu ahakwetwa Kalvariyo, mu kiyahudi bati: Golgota#19, 17 Lora Matayo 27, 34., 18niyo nibamulegera ha musalaba, n’abandi babili hamo nage oku n’oku, Yezu ali hagati. 19Pilato nayandika olwandiko naluta ha luguru lw’omusalaba. Lwaliga lwandikirwe luti: Yezu Omunazareti, Omukama w’Abayahudi. 20Olwandiko olwo banamwingi mu Bayahudi bakalusoma, obwo ahantu aho Yezu yalegerweho haliga hali hehi n’ekikale. Lwaliga lwandikirwe mu kiyahudi na mu kigereki na mu kilatini#19, 20 Niz’enuguta ezikubonwa ha misalaba zindi ziti: I. N. R. I. mu kilatini ziti: Jesus Nazarenus, Rex Judaeorum.. 21Abasaserdoti b’Abayahudi nibagambira Pilato bati: Leka kwandika oti: Mukama w’Abayahudi, nawe okwo wenene yagizire ati: Ndi mukama w’Abayahudi. 22Pilato nasubamo ati: Echo nayandikire nayandika.
23Mbe abasirikale ka bamazire kumulega ha musalaba, nibatwar’ebizwaro bye, nibabigiramo migabo ina, buli musirikale mugabo gumo, n’enkanzu ye. Enkanzu yaliga etaliho bubazirire, erukire yona fu. 24Mbe nibagambirana bati: Tuleke kugitemura, nawe tugyesere olweso, tulore owe elagwaho. Niho Olwandiko niluhika olukugira luti: Bakagabana ebizwaro byange, enkanzu yange nibagyesera olweso. Mbe nibyo abasirikale bagizire batyo.
YEZU NASIGIRA YOHANA NINA. — NACHUMITWA MU LUBAZU. — KUZIKWA KWA YEZU.
25Hehi n’omusalaba haliga hemerereho nina Yezu, na muhara wabo nina, Maria muka Kleofasi, na Maria Madalena. 26Mbe Yezu ka yabwene nina n’omuhemba owe yayendaga aimerereho, nagira nina ati: Mukazi, ngugwo omwana wawe. 27Kandi nagira omuhemba ati: Ngugwo noko. Mbe kuruga olunaku olwo omuhemba namusagara owe. 28Kumara Yezu, obwo yamanyaga okwo byona byahwa, niho Enandiko zihike, nagira ati: Ndi n’eliho. 29Mbe haliga haliho enzoga eizwire esara. Bonene nibata h’ebingo ikobyo lizwire esara, nibasagara ha munwa gwe. 30Yezu ka yayanankwire esara, nagira ati: Ganu gahwa. Nayenamya omutwe, omwoyo niguhwamo.
31Mbe Abayahudi, obwo lwaliga luli lw’olulaliriro, emitumbi zitekara ha musalaba ha lwa sabato, kuba olunaku lwa sabato olwo lwaliga luli lukuru, nibasaba Pilato bachwagure amaguru gabo, babahanantureho. 32Mbe abasirikale nibeza nibachwagul’amaguru go wo kutandika n’ag’ondi ayaliga alegirwe nage. 33Nawe ka bahikire hali Yezu, nibabona okwo yaliga yafwire, tibamuchwagwire amaguru; 34nawe omo wo mu basirikale nachumita olubazu lwe, aho n’aho nerugamo ensagama n’amenzi. 35Ayabwene niwe yamanyisize, kai kumanyisya kwe kukomereze. Na wenene akumanya okwo yagambire agakomereze, niho n’emwe mwikirize. 36Kuba ebyo bikagwa, niho Enandiko zinu zihike: Igufwa lye tilyasonzwerweho. 37Kandi Olwandiko lundi luti: Bakabona owe bachumisire.
38Ebyo ka byahwere, Yozefu w’Arimateya nasaba Pilato atware omutumbi gwa Yezu, obwo yaliga ali muhemba we, nawe bwesereke ha bwo kutina Abayahudi. Pilato naikiriza. Mbe naiza naihaho omutumbi gwa Yezu. 39Nikodemu wena naiza, ayaliga aizire hali Yezu kutandika mu kiro, ali na mira etobanisize n’aloesi y’endengo igana. 40Mbe nibatwar’omutumbi gwa Yezu, nibagusemberanya mu mwenda n’ebintu ebikununka kuzima, nk’okwo Abayahudi baliga bamanyire kuzik’abafu. 41Aho balegereho Yezu ha musalaba haliga haliho ensambu; mu nsambu egyo halimo ekituro kihya, echaliga kitakazikwamoga muntu. 42Mbe okwo niyo nibamuzika, kuber’ olulaliriro lw’Abayahudi, obw’ekituro chaliga kili hehi.
First published in 1946 by the White Fathers. Published online with the permission of the White Fathers.