E’doza 2
2
1’Bu pi ma ’baza de di yi ra nyaku pie, ongulumu yiniri be dria. 2#Efu 31:17; Ebra 4:4, 10O’du azirisi Mungu de azi erini ’yoleri ra, eri nga di ava li o’du azirisi azi dria erini ’yeleri ma vutia. 3#Efu 16:22-30Mungu nga di asi ndriza fe o’du aziriri dri, nga eri ’ba alatararu, a’disiku o’du ndesi Munguni ava lile azi dria erini ’bale azini ’yeleri ma vutiarisi.
E’yo Adamu pini ovuzu amvu Edeniari
4’Baza ’bu pini nyaku beri ma e’yo ndra ’dini, ndra erini yi ’baria, o’du Yehova Munguni ’bu pi edezu nyaku berisi. 5#Zab 104:14; 65:9, 11Afa idiza amvuari ndra nga nyakua yo, ase nyakaru amvuari engani ndra nga ku, Yehova Munguni ndra nga ozoo fele ’dizu nyaku ma dria kurisi, azini vini indi ’ba ngapi amvu ’yapirini ndra nga ovule yorisi; 6te luru adri ndra tu nyaku driasi, yi fezu angu ma dria dria. 7#1 Kor 15:45Yehova Mungu ede ndra ’ba ma wura irifura nyakuarisi, vu ava idriniri eri ma omvulea ci; ’ba nde ofu di ani ovuzu orindi idri beriru. 8#E’do 13:10Yehova Mungu ede ndra amvu, kala etuni efuzurialeruria Edenia; ’ba ndra agu nde erini edeleri alenia ’daa. 9#Eze 31:8; E’do 3:22; Eceza 2:7; 22:2, 14Yehova Mungu fe pati dria ovupi ndrizaru ndrezasiri pi ma enga nyaku ma alia, pati dria onyiru nyakasiri pie, pati idriniri indi amvu ma eselia agadua pati onitani onyi pi ma e’yo nizu onzi beri be.
10 #
Zab 46:4
Yi ara efu Edeniarisi razu yi fezu amvu nde dri, engazu ’dasi nga i awa eca ovuzu yi e’busiru su. 11#E’do 25:18Okori ma ru Pisoni’i; ’diri yi ara angu dria Havilani, pari meleni ovuzuri, acepi kururi’i; 12mele angu ndeniri onyiru tu; aya bideliumiruri pi indi ’daa oni onukiruri be. 13Yi ara iriri ma ru Gihoni’i; yi ara nde angu dria Kusini acepi kururi’i. 14#Dan 10:4Yi ara nari ma ru Hidekeli’i; eri yi ara efupi Asuria ma driliari’i. Yi ara suri ma ru Ufirate’i.
15Yehova Mungu nga agu nde ’du ra, nga eri ’ba amvu Edeniari ma alia azini ngazu azini ageini tezu. 16Yehova Mungu nga e’yo azi ’ba nderi ma tia kini, Mi eco pati amvu ma alia ’diyi ma efi nya dria mini lelerile; 17te mi ma nya pati onitani onyi pi ma e’yo nizu onzi beri ma efi ku, a’disiku o’du mini efini nyazurisi mi nga dra adada.
18Yehova Mungu ’yo ra, Agu ndeni ovuzu a’dule ’dini ovuni onyiru ku; ma nga ’ba eri aza kopi ecopi eriniruri ’ba ra. 19#Zab 8:6Yehova Mungu nga anyapa dria asea ’diyi pi ede nyakusi, aria dria ’bua ’diyi be, nga yi eji agu nde vu, ndrezu kani eri nga yi ma ru o’da ngoni ngoni yani; te afa dria idriru ’diyi ma ru agu ndeni ’daleri ka ndra ngoni ti, nga ovu ruruni. 20Agu nde nga ru fe anyapa akua ’diyi pi dri, aria ’bua ’diyi pie, anyapa dria asea ’diyi pie dria; te agu nde dri yi isuni nga ’ba eri aza kopi ecopi eriniruri ku. 21#E’do 15:12Yehova Mungu nga fe o’du ma ’be agu nde dikilidi, eri nga di o’du ko ani; eri nga ejefala erini nze alu ra, nga zani omvi parinia dika; 22#O’be 18:22; Ebra 13:4Yehova Mungu nga ejefala erini nzele agu nde ma ruaari ede okuru, nga eri eji agu nde vu. 23#E’do 29:14; Lip 9:2; 2 Sam 5:1; Efe 5:30; 1 Kor 11:8Agu nde nga ’yo ra,
’Diri curu’do fala maniri ma azi,
eri za maniri ma azi indi;
yi nga eri ma ru ’da Oku’i,
yini eri nzele Agupi ma ruaarisi.
24 #
Zab 45:10; Mat 19:5; Mar 10:7-8; 1 Kor 6:16; Efe 5:28-31 E’yo ’disi ’bani nga i ma ati pi ku i andri be, nga i ebi oku ini be, yi iri tro nga efu rua aluru.
25 #
Efu 32:25; Isa 47:3 Yi ndra iri tro pililiru, agu nde pi oku erini be, te yi ovuni ndra drinza be ku.
Bible in Lugbara © United Bible Societies, 1966.