E’doza 1
1
E’yo Munguni ’ba ’bazu nyaku beri
1 #
Yoh 1:1, 3; Ebra 1:10; Yob 38:4; Isa 44:24; Rum 1:20; Kol 1:16; Ebra 11:3; Eceza 4:11 Okokele Mungu ’ba ’bu pi nyaku be. 2#Yer 4:23; Isa 40:12Mungu ’ba ’bu pi nyaku be. Nyaku nde ovu pirini, afa alenia yo, angu biza ovu yi aliru ma dria; te Orindi Munguni ri yi nde ma dria ’dani.
3 #
2 Kor 4:6; Zab 33:9 Mungu ’yo ra, Diza ma ovu indi; diza nga di di ani. 4Mungu ndre diza nde ovu onyiru; Mungu nga di diza nde ma esele co angu biza be ndu ndu. 5#Zab 74:16Mungu nga diza ma ru ’da Etu’i, nga angu biza ma ru ’da Ini’i. Te ondre indi, o’biti indi, o’du alu.
6 #
Yob 37:18; Zab 33:6; 136:5; Yer 10:12; 2 Pet 3:5 Mungu ’yo ra, Afa ajaza ma ovu yi nde ma eselia agadua, ma awa yi pi ma esele yi azini be ndu ndu. 7Mungu nga di afa ajaza nderi ede ra, nga yi afa ajaza nde ma etiari pi ma esele co yi afa ajaza ma drilia ururi be ndu ndu. Te eri nga i ’ye ’dini. 8Mungu nga afa ajaza nderi ma ru ’da ’Bu’i. Te ondre indi, o’biti indi, o’du iriri.
9 #
Yob 26:10; 38:8; Zab 33:7; 95:5 Mungu ’yo ra, Yi ’bu ma etiari ma oku yi pari alua, angu a’wiru ma e’da i beni. Eri nga i ’ye ’dini. 10Mungu nga di angu a’wiru ma ru ’da Nyaku’i, ’da vini yi te yi okupi tualuri ma ru Miri’i. Te Mungu ndre eri ovu onyiru. 11#Ebra 6:7; Luk 6:44Mungu ’yo ra, Nyaku ma idu ase, afa idiza ori ’yapi ’diyi pie, pati efi kapi suruti vusi orini ovuzu alenia ’diyi pie dria, nyaku ma dria. Eri nga i ’ye ’dini. 12Nyaku nga di ase idu ra, afa idiza ori ’yapi suruti vusi ’diyi pie, pati efi kapi orini ovuzu alenia ’diyi pie, suruti yini vusi. Te Mungu ndre eri ovu onyiru. 13Ondre indi, o’biti indi, o’du nari.
14 #
Azi 4:19; Yob 25:3, 5; Zab 74:16; 136:7 Mungu ’yo ra, Diza ndu ndu ma ovu afa ajaza ’buari ma alia ci, etu pi ma esele cozu ini be ra; yi ma ovu ecetaru, ewu pi ecezu o’du pie, eli pie, 15yi ma ovu dizaru afa ajaza ’buari ma alia, diza fezu nyaku ma dria. Te eri nga i ’ye ’dini. 16Mungu nga di diza ambo ambo ede iri, diza amboruri dri cezu opiru etu ma drilia, diza wereri dri cezu opiru ini ma drilia; eri ede vini ’bi’bio indi. 17#Zab 8:1Mungu nga yi ’ba afa ajaza ’buari ma alia diza fezu nyaku ma dria, 18dri cezu opiru etu pi ma drilia ini be indi, diza pi ma esele cozu angu biza be ndu ndu. Te Mungu ndre eri ovu onyiru. 19Ondre indi, o’biti indi, o’du suri.
20 #
Zab 104:24
Mungu ’yo ra, Yi mirini ma ezu afa acipi ovupi idri be ’diyi tre tre, aria ma sa nyaku ma drilia uru afa ajaza ’buari ma angu walaruria. 21Te Mungu nga anyapa amboru ovupi yia ’diyi ’ba ra, anyapa dria idri be acipi aci yi ndeni ezule tre ’diyi pie, suruti yini vusi, aria dria opile be ’diyi pie dria suruti yini vusi. Te Mungu ndre eri ovu onyiru. 22Mungu nga di asi ndriza fe yi dri, kini, Emi ma ti, emi ma ezu tre, emi ma ga yi mirini ma alia tre ani, aria ma ezu tre nyaku ma dria indi. 23Ondre indi, o’biti indi, o’du towiri.
24 #
Zab 104:18-23
Mungu ’yo ra, Nyaku ma ezu anyapa idri be ’diyi tre tre, suruti yini vusi: anyapa akua ’diyi pi, afa acipi aci valesi ’diyi pie, anyapa asea ’diyi pie dria suruti yini vusi. Te eri nga i ’ye ’dini. 25Mungu nga di anyapa asea ’diyi o’ba ra suruti yini vusi, anyapa akua ’diyi pie suruti yini vusi, afa dria acipi aci valesi nyakua ’diyi pie dria suruti yini vusi. Te Mungu ndre eri ovu onyiru.
26 #
Zab 100:3; Efe 4:24; Yak 3:9; Zab 8:6 Mungu ’yo ra, Ama ma ede ’ba wura amani vusi, e’daza amani vusi indi; yi ma adri opiru e’bi miria ’diyi pi ma drilia, aria ’bua ’diyi pie, anyapa akua ’diyi pie, angu wudrikuru driari pie, afa acipi aci valesi nyaku dria ’diyi pie dria. 27#1 Kor 11:7; Efe 4:24; Kol 3:10; Mal 2:15; Mat 19:4; Mar 10:6; E’do 5:1-2Mungu nga di ’ba ’ba i ma ngulupi ma wura vusi, ada ’ba eri wura Munguniri vusi; o’ba yi agupi pi oku be. 28#Zab 127:3; 1 Tim 4:3; E’do 9:1, 7; Lev 26:9; Zab 128:3, 4Mungu nga asi ndriza fe yi dri, Mungu nga ’yo yi tia, Emi ma ti, emi ma ezu kakau, ma ga nyakua tre, nyaku ma ovu di emi ma palaa; emi ma ovu di ani e’bi miria ’diyi pi ma drilia opiru beni, aria ’bua ’diyi pie, afa idriru acipi nyaku ma dria ’diyi pie dria. 29#Yob 36:31; Zab 104:14, 15; 136:25; 146:7; ’Yeta 14:17Mungu ’yo ra, Emi ndre, ma fe emi dri afa idiza dria ori ’yapi ovupi nyaku dria ma dria ’diyi pi, pati dria ovupi patiefi ori fepi ’diyi be ’diyi be ’bo; yi nga ovu emi dri nyakaru. 30#Zab 145:15, 16; 147:9; Yob 38:41Ma fe vini ase ibiru nyakaru anyapa dria asea ’diyi pi dri ’bo, aria dria ’bua ’diyi pie, afa dria acipi aci valesi nyaku dria ovupi idri be ’diyi pie dria. Eri nga ovu ’dini. 31#Zab 104:24; 1 Tim 4:4Te Mungu ndre afa erini o’bale ’diyi dria, te mi ndre, eri onyiru tu. Ondre indi, o’biti indi, o’du aziari.
Bible in Lugbara © United Bible Societies, 1966.