ÏOANNIS 17
17
U Jisu u duwai na ka bynta la ki synran
1 #
Ïoan. 11:41; 13:31. Ïa kine kiei kiei ruh U Jisu u la kren; bad u la khmied la ki khmat sha bneng, bad u la ong, “Ko Kpa, kata ka por ka la jia; to pyndonburom ïa U Khun jong me, ba uta U Khun ruh un ïoh pyndonburom ïa me: 2kumba me la ai ha u ka bor halor ka doh baroh, ba ïa kita baroh kiba me la ai ha u, un ai ha ki ka jingim bymjukut. 3Kane te ka long ka jingim bymjukut, ba kin ïoh ithuh ïa me U Blei uba shisha tang ma me hi, bad ïa U Jisu Khrist, ïa uba me la phah. 4Nga, nga la pyndonburom ïa me ha ka pyrthei: nga la pyndep ïa kata ka kam ïa kaba me la ai ha nga ba ngan leh. 5#Ïoan. 1:1; 8:58; Php. 2:6.Te mynta, ko Kpa, to pyndonburom ma me ïa nga lem bad ma lade, da kata ka burom kaba nga la don bad me, mynshuwa ba la long ka pyrthei.
6 “Nga la pynpaw ïa ka kyrteng jong me ha kita ki briew kiba me la ai ha nga na ka pyrthei: ki jong me ki la long, te me la ai ïa ki ha nga, bad ki la sumar ïa ka ktien jong me. 7Mynta, ki ïatip ba kiei kiei baroh kiba me la ai ha nga, ki long na me, 8namar kita ki ktien kiba me la ai ha nga, nga la aiti ha ki, ki te ki la pdiang; bad ki tip shisha ba nga la mih noh na me, bad ki la ïangeit ba la phah ma me ïa nga. 9#Luk. 22:32; Ïoan. 14:16.Nga, nga duwai na ka bynta jong ki, ngam duwai na ka bynta kata ka pyrthei, hynrei, na ka bynta kito kiba me la ai ha nga; naba ki long ki jong me. 10Kiei kiei baroh ki jong nga ki long ki jong me ruh, bad kiei kiei ruh ki jong me ki long ki jong nga ruh; te la pyndonburom ïa nga ha ki. 11#Php. 2:9; Jpw. 19:12; Rom. 12:5; Gal. 3:28; Ïoan. 17:21.Te ngam don shuh ha kata ka pyrthei, hynrei, kine ki don ha kata ka pyrthei; nga te ngan sa wan ha me. Ko Kpa Bakhuid, to ri pynim ïa ki ha ka kyrteng jong me ïa kiba me la ai ha nga, ba kin ïalong shitylli, kumba ngi, ngi long. 12#Salm. 41:9; Ïoan. 6:70; 18:9.Mynba nga la don lem bad ki, nga la sumar ïa ki ha ka kyrteng jong me: ïa kita kiba me la ai ha nga, nga la ri kyndong, bad ym don ba la jot noh na ki, hynrei, tang uta u khun ka jingjot, ba yn ïoh pyndep ïa ka jingthoh. 13Hynrei, mynta ngan sa wan ha me; bad nga kren ïa kine kiei kiei ruh ha kata ka pyrthei, ba ki lah ban ïoh ïa ka jingkmen jong nga kaba la pyndap ha ki. 14#Ïoan. 15:19; 8:23.Ïa kata ka ktien jong me nga, nga la aiti ha ki; kata ka pyrthei te ka la shun ïa ki, naba kim long na ka jong ka pyrthei, kumba nga ngam long na ka jong ka pyrthei. 15Ngam duwai ba men shim noh ïa ki na kata ka pyrthei, hynrei, ba men sumar ïa ki na u bymman. 16Kim long na ka jong ka pyrthei, kumba nga ngam long na ka jong ka pyrthei. 17To pynkyntang ïa ki da ka jingshisha: ka ktien jong me ka long ka jingshisha. 18Kumba me la phah ïa nga sha ka pyrthei, kumta nga ruh nga la phah ïa ki sha ka pyrthei. 19Te na ka bynta jong ki; nga, nga pynkyntang ïa lade, ba ki ruh kin ïalong kiba la ïoh pynkyntang khuid da ka jingshisha.
20 “Lymne ngam kyrpad tang na ka bynta kine hi, hynrei, na ka bynta kita ruh kiba ngeit ha nga da ka ktien jong ki; 21#Ïoan. 10:38; 17:11.ba baroh kin ïalong shitylli; kum ma me, ko Kpa, ha nga, nga ruh ha me, ba ki ruh kin ïalong shitylli ha ngi; ba kata ka pyrthei kan ïoh ngeit ba la phah ma me ïa nga. 22Ïa kata ka burom ruh kaba me la ai ha nga; nga, nga la ai ha ki; ba kin ïoh ïalong shitylli, kumjuh kumba ngi, ngi ïalong shitylli; 23ma nga ha ki, bad ma me ha nga, ba kin ïalong ïa kiba la ïa-pynjanai ha kaba shitylli; ba kata ka pyrthei te kan ïoh tip ba la phah ma me ïa nga, bad ba me la ieit ïa ki kumjuh kumba me la ieit ïa nga. 24#Ïoan. 1:14; 17:5; Mat. 25:34.Ko Kpa, ïa kita kiba me la ai ha nga, nga kwah ba ha kaba nga don ma nga ba kita ruh kin ïadon ryngkat bad nga; ba kin ïoh khmih ïa kata ka burom jong nga kaba me la ai ha nga: naba me la ieit ïa nga mynshuwa kaba pynshong nongrim ïa ka pyrthei. 25Ko Kpa bahok, kata ka pyrthei kam shym la ithuh ïa me, hynrei, nga, nga la ithuh ïa me, bad kine ki la ïatip ba la phah ma me ïa nga; 26bad ha ki nga la pyntip ïa ka kyrteng jong me, bad ngan ïaipyntip, ba kata ka jingieit da kaba me la ieit ïa nga, kan ïoh long ha ki, bad nga ruh ha ki.”
The Bible Society of India