JOHAN 3
3
Bawipa Jesuh la Nikodemus
1Jew chang gui ah ng’vaipi Nikodemus ming nak ciah pharise tumat cu, khomü ät ung Bawipa Jesuh ah om nak ah law netah, 2“Rabbi, nang cu Khanpughi ah tüih law ah saya ah na kyak ciah kami hmat ci nei. A i ah kyasei ci ung, Khanpughi naw a täng ah kä a om püi ah chang naw, nang ah bi ah cäi aih gui vai cu kä bi hlawt khai nei” cine pyein ci.
3 Bawipa Jesuh naw, “Kei naw akcang ka pyein cu, hnih vei ng’tüi nak kä gah ci naw Khanpughi ah uknak kho kä hmuk khai” ci ne kiak nak ci.
4Nikodemus naw, “Ang vai pyi cu a i cha ah ng’tüi ba khai ang? Anu ah puk khui ah lut ba netah, akhnih vei nak ah ng’tüi ba khai ma?” cine ng’shik ci.
5 Bawipa Jesuh naw, “Kei naw akcang ka pyein cu, tui la Mumcha Theing awn kä ng’tüi cicu Khanpughi ah uknak kho ah kä lut hlawt khai. 6Chang ah sisa ung ng’tüi cicu chang ah kya ba ci, Mumcha theing ung ng’tüi cicu Mumcha Theing ah kya ba ci. 7Akthai ah nami ng’tüi ba vai ka ciah phäh ah kä cäicat vä. 8Khokhi cu akhi nak hlü lam ah khi ci, kho akhi hmat ung phi a hawi täng ah tün ne, a hawi täng ah khi khai ah kä hmat hlawt ah mäih ah Mumcha Theing awn ng’tüi cicu kyak ci,” ci ne m’thein ci.
9Nikodemus naw, “Cun cu a i ah kyak khai” cine ng’shi ba mä khätah;
10 Bawipa Jesuh naw, “Nang cu Israel chang gui ah saya ng’vai ah kia lang ne, cun ka cicu kä na hmat ci ma? 11Kei naw akcang ka pyein cu, keimi naw kami hmat cu pyein u ne, kami hmuh cu kami ngak ci. Cun ung phi keimi ah pyein sak cu nangmi naw kä nami yum ci. 12Khomdek khan ah mawng ka pyein hngaw kä nami yum ung, khankho ah mawng ka pyein cu a i cha ah nami yum khai ang? 13Khankho ah kaa kyum lawk ciah Chang ah Htapa ah kawn ah a u phi khankho ah kä gawk man ci nei.”
14Moses naw bungpuk ah ng’lawi awn k’phyu a tai ah mäih ah chang ah Hta cu m’düih ne tai nak om khai nei. 15Cun ah kyasei ani yum ciah chang phung cu angtäi ghin nak gah khai nei. 16Khanpughi naw khomdek chang gui m’hni aih netah tumat bäng ah A htapa cu yuk m’kyum lawk ci, Ani yum ciah chang phung cu sihnak ung kä gawk ne angtäi ghin nak gah ci. 17Khanpughi naw A Htapa am kyum law cu, khomdek khan ah kat nak m’kat khai ah kä kyak ci, hun phiawn nak pek khai ah kyak ci.
18Khanpughi ah Htapa yum ciah chang cu a hma m’kat nak kä om ci, kä yum ciah chang cu, Khanpughi ah Htapa kä ah yum ah hmawk ah, tuhbäi ge hma m’kat nak gah ci. 19Hma ci m’kat ne m’khoichaa nak ah mawng cu; akdei cu khomdek khan ah gawk lawk ci. Cun ung phi akshe ah om ci gui ah chang gui cun naw, akdei ah mä ak hmüp cu m’hni pi ci gui. 20Akshe ah om ciah chang phung naw, akshe abi ang dang vai kyi ne, akdei cu kä ng’ya hlük ci. 21Cun ung phi ng’düng nak awn om ciah chang cu, Khanpughi ah ng’yak hlü ah a om ah mawng ang dang vai ah akdei ah law hlük ci.
Bawipa Jesuh la Johan
22Cun kawn ah Bawipa Jesuh cu ang düipüi gui awn a täng ah Judea kho pigaw gui yung ah hteit u ne yum ci gui cu tuihnim nak pe ne om ci gui. 23Johan cun phi Salim gawnu pei Anon pigaw ah tuihnim nak pe gui ne om ci. Zum ciah chang gui cu Johan ah law ne tui ng’hnim ci gui.
24(Cun yah ung Johan thawng ung kä kium phak ci.)
25Johan ah khahpüi amshah gui cu, Jew chang gui awn tuihnim nak ah mawng pyein ne ng’cuhcan ci gui. 26Cun ah kyasei, ngami cu Johan ah law u netah, “Saya, Jordan tuinu hei gaa ah nang ah law man ci, a mawng phi na pyein man ah chang cu, na shüm ba ne ang? Ani naw tuhbäi tuihnim gui sei, chang akda ani ah lawk ci gui nei” ci ci.
27Johan naw, “Khanpughi naw kä a peit ung a u naw a i käm khüt ci. 28Kei cu Messiah ah kä ka kyak ci, ani ah ma ung ami nak hma law ah ka kyak ci. Cun ka ci nami ng’yak cicu saksi ah nami kyak ci.
29Ceimah ci khäm cicu chumah ciah kyak ci. Chumah ciah teih püi cun naw, chumah ciah k’o cu ng’düi ne ngai netah, ang yak ung ang htei ah a yeikyai ah mäih ah, kei ang htei ah ka yeikyai pyi ci nei. 30Ani cu hlüngtai law pi khai, kei cu kang neim law pi khai nei,” cik ci.
Khankho ah Kaa Kyum Lawk ci
31Khankho ah kaa kyum lawk ci cu, van nüng ah hlüngtai pi ci. Khomdek ungka lawk cicu khomdek chang ah kya ne, m’dek khan ah mawng cu pyein ci. Cun ung phi khankho ah kaa lawk cicu apäng avan ah hlüngtai pi ci. 32Ani naw a hmuh la ang yak cu pyein sei phi ani ah ng’thu cu a u naw kä dou ci. 33Ani ah ng’thu dou ciah chang naw Khanpughi cu düng nak ah a kiak ah mawng dang sak ci. 34Khanpughi naw a tüih law cu Mumcha awn pleip khai ah akbe ah kia ne, ani cu Khanpughi ah ng’thu bäng pyein ci. 35Apa Khanpughi naw A Htapa cu m’hni aih netah, bämang nak avan cu akut ung ap ci. 36A htapa yum ciah chang cu angtäi ghin nak gah ci. Kä yum ciah chang cu ghin nak kä hmuk khai. Ani ah khan ah Khanpughi ah m’lung she nak om khai.
Cho Bible Common Language © Bible Society of Myanmar, 2016.