JOHAN 2
2
Kana Gawnu ah Hta ami M’um nak
1Hnüüp goi a lüng kawn ah Kalile kho Kana gawnu ah hta m’um nak om ci. 2A cu ah Bawipa Jesuh ah nu cu om tuk ci. Bawipa Jesuh la angdüihpüi gui cun phi hta m’um nak ah khü tu gui ci gui. 3Hta m’cüüm nak sapyit tui ng’pyi khätah, Bawipa Jesuh anu naw, “Ami sapyit tui ng’pyi ci nei” cine Bawipa Jesuh-am m’thein ci.
4 Bawipa Jesuh naw, “Kei naw bi kabi vai kä nam cäi ä, ka bi vai akhin kä gawk law phak ci nei” cik ci.
5 Bawipa Jesuh ah nu naw, “A pyein päng ah om vä” ci ne ami shäm gui-am pyen na gui ci.
6Acun ung chang gui naw, ami m’simsäi nak vai tui taang goi ci ah yu nak ah hlüng nu gui chuk om ci. 7Bawipa Jesuh naw, ami changshäm gui-am, “Khlüng gui cä, tui k’be vä” ci khätah, khlüng avan pleeip khai ah k’be ci gui. 8Bawipa Jesuh naw, “Khlüng ungka tui sook ne, imah ang vaipi am thak vä” ci sei, sook ne thak ci gui. 9Ang vaipi naw tui ng’ploüh ciah sapyit tui cu aw shüm ci. Tui than ci gui naw, sapyit tui a i ungka ng’khukhlat lawk ciah ami hmat ung phi, ang vai naw kä hmat ci. 10Cun ah kyasei ang vai naw chu mah cu khü netah, “Chang gui naw, sapyit tui asü cu cung ma u netah, akhnu ah aktai cu cung ba man ci gui, nang läi tuhgüt asü na gim ci” cik ci.
11Cun ah Bawipa Jesuh cu Kalile kho Kana gawnu ah cäi aih vai ah abäimang nak dang law htük khätah, angdüihpüi gui naw yum lawk ci gui.
12Cun kawn ah Bawipa Jesuh cu, anu ni, anau gui ni, angdüihpüi ni awn, a täng ah Kapernaum gawnu ah hteit ne, hnüüp goi thum om tuk ci gui.
Bawipa Jesuh Pum Imah Hteit ci
(Mt 21:12-13; Mk 11:15-17; Lk 19:45-46)
13Jew chang gui ah phiawn nak pawi ng’et law sei, Bawipa Jesuh cu Jerusalem ah hteit ci. 14Jerusalem pum im ung, sepat ni, htome ni, mümkha ni, yoi ci gui, tangka m’thawnghlai ci gui cu, 15Bawipa Jesuh naw hmu gui netah, htome ni seipat ni gui cu pum im ungka htung awn that ne k’täm gui ci. Ami ngui gui huk pe gui ne, ami tawnglang phi lat pe gui ci. 16Cun kawn ah Bawipa Jesuh naw, “Shin gui avan hteh püi ba vä, Kapa ah im cu sumlei hmun ah kä kyak ci” cine mümkha yoi ci gui-am pyen na gui ci. 17Cun kawn ah ang düihpüi gui naw, Ka taigü nak Khanpughi ah im theing ah hmawk ah, kamlung kyong cu mei cang ah mäih ah ng’ling aih ci” ciah cacim cu shüm ba ci gui.
18Jew chang vai gui naw, “Nang naw shin gui na bi hning ah mawng kami hmat vai ah, cäicat vai a i ang nam dang hning kaw?” cine ng’shik ci gui.
19 Bawipa Jesuh naw, “Shin ah pum im phi phye ne phlu vä, hnüüp thum ah kyong ung ka co ba khai nei” cik ci.
20Jew chang gui naw, “Shin ah pum im cu, kho kum phli-kip lei-chuk ung kami cawh nei, hnüüp thum ung na co ba hning khai ma?” cik ci gui.
21 Bawipa Jesuh naw, pum im a cicu amät ah pumsa a pyein ah kyak ci. 22Cun ah kyasei angdüihpüi gui naw, Bawipa Jesuh sih nak ungka a thawh ba kawn ah, Bawipa Jesuh ah pyein gui ah thu m’kha la cacim cu shüm ba u netah yum law pi ci gui.
Bawipa Jesuh naw Chang-ah M’lung Ngaih Hmat Yawp Ci
23 Bawipa Jesuh naw, phiawn nak (Pasakha) pawi yah ung Jerusalem ah cäi aih vai abi gui cu, chang gui naw hmu u netah, chang akda naw yum lawk ci gui. 24Cun ung phi Bawipa Jesuh naw ami m’lung ngaih hmat gui yawp ci kia ne, kä ngaih gep gui ci. 25Ani naw ngami ah m’lung ngaih hmat gui yawp ci kya ne, ngami ah mawng cu a u naw am thein vai kä hlü ci.
Cho Bible Common Language © Bible Society of Myanmar, 2016.