ATÜNNAK 3
3
Chang Naw Ng’thu Kä A Ngaih Nak
(Rm 5:12-21)
1Khanpughi ah tüisho avan ungka k’phyu cu ng’khailang pikbäih ciah kyak ci. K’phyu naw hnumi am, “Shin ah dum ung om ciah ak ghing nü ah am theih cu kä na ni ei vai ah Khanpughi naw akcang ah pyen ne ma, cine ng’shik ci.
2Hnumi naw, “Shin ah dum ung om ciah ak ghing nü ah am theih cu kami ei vai kyak ci. 3Cun ung phi Khanpughi naw, “Ang lung ung ghing ciah am theih cu kä nami ei vai, tawn ah phi kä nami tawn vai, nami ei ah a kyak ung nami sik khai cine pyen ci” cik ci.
4K’phyu naw, “Cun ah kä kyak ci; nangni kä nani sik khai. 5Shin ah theih nami ei ah a kyak ung Khanpughi ah mäih ah nani kya tuk khai, akni akshe nani ng’thumcha thei khai, cun cu Khanpughi naw hmat neta a pyen ah kyak ci” cik ci.
6Cun ah am theih cu kyom ne, ei hlü vai kya ne, cüivai nak vai kyak ciah hnumi naw hmu neta, k’bit ne ei ci, a cei am phi m’bei tu sei, a cei naw phi ei tuk ci. 7Ngani cu ani ei vai am ani mik m’dei law sei, ani k’plui ah ani om cu hmat lawk ci goi. Khuhnah gui m’ghuh ne pyang ne ng’shung ci goi.
8Cun ah mühun ung dum ah kyong ah Khanpughi a law cu ng’ya ni neta, ngani cu sing ghing hmu ah ng’thup ci goi. 9Bawipa Khanpughi naw chang cu khü neta, “A hawi ah nei ba om?” cine ng’shik ci.
10Chang naw, “Dum ah kyong ah na law cu ka ng’yak ci nei; kei cu ka k’plui ah ka om ci kyasei kyi ne, ka ng’thup ci nei” cine m’shang ci.
11Khanpughi naw, “Nang na k’plui ciah a u naw ang a pyen? Kä ei vai ah ka pyen ah am theih cu na ei ne ma?” cine ng’shik ci.
12Chang naw, “Nang naw na law püi ah hnumi naw sing theih cu na pe sei ka ei ci nei” pyen ci.
13 Bawipa Khanpughi naw, hnumi am, “A i vai ang cun ah na bi” cine ng’shi khäta;
Hnumi naw, “K’phyu naw na ei sak sei ka ei ci nei” cine pyen ci.
Khanpughi Ah M’khoichaa Nak
14Khanpughi naw k’phyu am, “Nang cu shin ah na bi ah hmawk ah ning m’kyuk vai, ak ghing nü avan ungka nang cu ning taam vai. Nang cu na poi awn ng’zawi ne, na ghin ah chuih m’vut ei ne na om vai. 15Hnumi la nang, hnumi ah ng’shon la nang ah ng’shon cu gaa ah nami kyak khai ah ka bik khai. Ani naw nang ah lu cu ning deeng khai, nang naw ani ah khawlek cu na m’yawk khai” cine pyen nak ci. 16Ani naw hnumi phi, “Kä mah ne na yaica nak cu ka shou sak khai, na hta ung geinvai ne na ng’khokhüt khai, na cei ah pyen ah om ne, na cei ah uknak ah kaa ah na om khai.
17Ani naw pami am phi, “Na chu ah ng’thu na ngai ci, kä ei vai ka ciah sing theih na ei ci. Cun ah nang naw na bi ah hmawk ah khomdek cu taam nak gah ci. Na ghin nak chuih cümbawng ne bii bi neta, khomdek ah m’theih pai cu na ei khai. 18Khomdek naw hling shun gui cu m’thawk sak khai, nang naw khu m’ghaw gui cu na ei khai. 19Nang cu na ng’tüi law nak ah khomdek ung kä na hteh ba pha ah chuih na m’hutui long sei bii bi ne na ei khai. Nang cu m’dek khui ungka na ng’tüi lawk ci kyasei, m’dek khui ung na hteit ba khai” cine pyen nak ci.
20Adam naw akchu cu Eve ah aming sui ci, a i ah kyasei ci ung ani cu hnicim chang avan ah nu htük ah kyak ci. 21Bawipa Khanpughi naw, Adam la Eve ah hmawk ah savun cu suinu ah pyang ne m’sui goi ci.
Adam La Eve Cu Eden Dum Ungka Naw K’tääm Goi Ci
22 Bawipa Khanpughi naw, “Chang cu mikmi ungka tumat mat ah mäih ah kya pyi ci, akni la akshe phi hmu hmat pyi ci. Tuhbäi ung chang cu ghin nak ah sing ah theih bit ne ei ne angtäi ghing nak gah khai ah kä khin ba ci nei” ci neta, 23Khanpughi Bawipa naw chang cu ang tüi law nak ah khomdek ung kholo khai ah Eden dum ungka naw k’tääm ci. 24Cun ah chang cu ak tääm kawn ah Eden dum ah hnilaw lam ah mei m’lei ah tawt ne ng’laam ciah khimsem la Cherubim gui cu m’düih ne, ghin nak ah sing ghing cu ngäng sak ci.
Cho Bible Common Language © Bible Society of Myanmar, 2016.