ATÜNNAK 4
4
Kain la Abel
1Cun kawn ah Adam cu achu Eve awn ip om ni neta Eve cu kämah lawk ci. Ani cu pamihta ah hta law sei “Khanpughi ah na m’gein nak ah kyak ci” cine a ming cu Kain ah sui ci. 2Cun kawn ah ani cu Abel ah phi hta ba ci.
Abel cu htawshäm ah kyak ci, Kain cu lo k’bi ah kyak ci. 3Akhin a gawk law ung Kain naw m’dek ung a geit gui amshah cu law püi ne Bawipa cu khawihnah ci. 4Abel naw a htawme gui ah hta htük gui ungka akplan pi ghü ne law püi ne, ngawn neta, akni pi gui m’küm ne, Bawipa cu khawihnah ci. Bawipa naw Abel la a khawihnah nak cu dou ci.
5Cun ung phi Kain la a khawihnah nak cu kä dou ci. Cun ah kya khäta Kain cu a thang she sei m’lung k’she ci. 6Khanpughi naw Kain am, “A i ah kyasei na m’lungshe ang?
A i ah kyasei na hmai nam kyum ang? 7Ng’düng ciah bii na bi vaisü ung na hmai kiang khai süte; cung phi akshe na bik ci kyasei, katnak cu na m’kawt ung ng’boop ci nei. A cun naw ning uk vai ci nei, cun ung phi nang naw na m’khüt vai nei” cik ci.
8Kain naw anau Abel am, “Lo ah ni hteit kaw” ci sei, lo ah hteit ni neta, Kain naw a nau cu ng’hlah shi ne ngawn ci.
9 Bawipa naw Kain am, “Na nau Abel a hawi ang?” cine ng’shik ci.
Kain naw, “Kä ka hmat ci nei, kei naw ka nau cu ka ngäng ciah kyasei ang?” cik ci.
10Khanpughi naw, “A i ah kyasei shin ah akshe na bi ang? M’dek ung long ciah na nau ah si naw phu tuk vai ah mäih ah k’aw awn na khü ci nei. 11Na ngawn ah na nau ah si awk khai ah a shai m’aan ciah khomdek naw nang cu ning m’kyuk pyi ci nei. 12Tuhbäi ung tün ne k’tha na ne na geit ung phi kä ng’taang hlawt khai, khomdek khan ah na im kä om sei ng’plon shüi shüi ne na om khai nei” cine pyen nak ci.
13Kain naw Khanpughi ah ma ah, “Shin ah m’kyuk nak cu kä m’khüt vai ah nui aih ci nei. 14Nang naw kei cu shin ah khomdek ungka, na na k’täm pyi ci, nang phi kä ka ning hmu ba ci nei. Kei cu khomdek khan ung a im kaa ah kya ne ka om khai nei. Na hmuk ci naw kei cu na ngawn khai nei” cine ng’hui ba ci.
15Cun ung phi Bawipa naw, “Cun ah kä kyak khai, nang ning ngawn ci a om ah a kyak ung chang sing chih naw ning phu nak khai nei,” ci neta, Kain cu hmuk ci naw kä a ngawn vai ah Khanpughi naw yuk m’hnüt ci. 16Kain cu Khanpughi ah ma ungka dawng ne Eden dum ah hni law lam Nak ah khaw ah hteit ne om ci.
Kain Ah Htangshon Gui
17Kain ah akchu cu pamihta ah hta law sei, a ming cu Enok ah sui ci gui. Cun kawn ah Kain naw gawnu sa neta, a hta ah ming ah Enok mang gaw ah sui ci. 18Enok ah hta pami Irad, Irad ah hta pami Mehujaela, Mehujaela ah hta pami Mehtushalah, Mehtushala ah hta pami Lamek ah kyak ci.
19Lamek cu Adah la Zillah hnih chu nak ci. 20Adah cu Jabalah ah hta ci. Jabalah ah htangshon gui cu seime vuhchah ne pyu im ne om ci gui.
21A nau cu Jubalah ah kyak ci. Jubalah ah htangshon gui cu, tingtäng la pyung tum ci gui ah kyak ci. 22Zillah cu Tubalah Kain ah hta ci. Ani cu kyei shep ci, m’sii shep ci gui ah ami saya ah kyak ci. Tubalah Kain ah abe cu Naamah ah kyak ci.
23Lamek naw a chu goi am,
“Adah la Zillah awi,
na ngai ni ä:
kei nak shedam nak ciah
chang nong tumat cu
ka ngawn ci nei.
24Kain naw
chang sing chih a phu nak ung,
kei ami na ngawn läi ung
chang chih kip la chih
ka phu nak khai nei” cine
pyen ci.
Seth la Enosh
25Adam la Eve cu pamihta ah hta ba ni neta, “Kain naw a ngawn ka hta Abel ah hnün ung Khanpughi naw ana pek ba nei” cine Seth ah aming sui ci. 26Seth cu pamihta ah hta ne Enosh ah a ming sui ci. Cun sangung chang gui naw, khawihnah nak ung Khanpughi ah ming theing cu htungmang lawk ci gui.
Cho Bible Common Language © Bible Society of Myanmar, 2016.