Luk 23
23
Ini Jizọs Ḅe Se Paịlet Ḅe Tọrọkọ Mun mẹ
(Mat 27.1-2,11-14; Mak 15.1-5; Jọn 18.28-38)
1Bebe tomonikpo mị mgba sịsẹ se Jizọs Ḅe ọkị Paịlet ḅe tọrọkọ mun mẹ, 2ini sakị ḅẹrẹ se ọ̀ pụnụmamẹ: “Wa Ḅe ḅọ Ḅe kunmẹ ọ̀ mịna tomonima nwọ dairima àrị ogbo, ḍuko ini pịrịaḅẹ na ini ama ocho igbiki ocho Sẹdaḅọ ḅe pịrịma, pịkị Ọ̀ ḅụ ḍiepakụmaḅẹ, na Ori anị Mẹsaya, Amanyanaḅọ Ḅe-ẹ.”
3Paịlet ḅe Ò gbelamẹ, “Juapụ amanyanaḅọ Ḅe Ị́rị́?”
Jizọs Ḅe pẹkẹrẹmẹ, “Ị́rị́ mị ọkọ ḅẹye-ẹ.”
4Anịsịkị Paịlet ḅe nwọse tịḅịnị agbamịẹapụma na tomonikpo mị na ḅẹmẹ, “À gose ḅẹrẹpẹlẹ Ḅe ḅọ Ḅe ḅara simaḅịaye à nwọ ọrịkẹ.”
5Ọkụma ini kụrọma ḍuko se nwọ ḅẹmẹ, “Oria ḍieaye ma ḅụ, Ori ama fiemaḅịaye nwọ mịẹ-aḅẹ tomonima ogboku, bebe Judia mgba ḅie. Galili ḅie Ọ̀ sakịmẹ, mịọkụ Ò ḅo mịanga lasam.”
Ini Jizọs Ḅe Se Hẹrọd Ḅe Tọrọkọ Ḅo Mẹ
6Paịlet ḅe mịn mị naa sịkị, ò gbelamẹ, “Ḅe ḅọ Ḅe Galiliḅọ?” 7Ò ḅo nemi na Jizọs Ḅe Hẹrọd ḅe ḅẹrẹtọn àrị nyọ ḅụ ḅomẹ nwọḅẹ sịkị, ori Ò se Hẹrọd ḅe fịrịmamẹ, anịsịkị Hẹrọd ḅe sọnị ò Jerusalẹm ḅie omi-ẹ. 8Hẹrọd ḅe ò ḅie opuma ḅẹlẹmẹ ò Jizọs Ḅe ọrị sịkị, anịatịḅị ori ọ̀ ḅụ ḅẹrẹ nwọ naasam, se ḅọlọ sịkị ngịsị ori ori-ọrị ḍọkịmẹ. Ọ̀ tọrụ se Jizọs Ḅe mịẹḅịa ḅụgbiripumaye nwọ ọrị ḍọkịmẹ. 9Anị Hẹrọd ḅe tọn-a ḅẹrẹ seni Jizọs Ḅe gbelaye-ẹ, ọkụma Jizọs Ḅe gbọrịye sọnị Ọ̀ pẹkẹrẹkẹ. 10Tịḅịnị agbamịẹapụma na Oloko ḍieapụma na pakaḅo se kụrọma ḅẹrẹ ḍuko Jizọs Ḅe pụnụmamẹ. 11Hẹrọd ḅe na oria owunima na Jizọs Ḅe nwọse kpọti se ḍikisima ḅara nwọse Ọ̀ mịẹmẹ, ini iḅi pịkị ḍikitọrụgbẹịn koro opu ḅụchụaye se Ọ̀ chụa se Ò se pịkịna Paịlet ḅe fịrịmamẹ. 12Anị gbọrị ene mị ḅụ Hẹrọd ḅe na Paịlet ḅe na ikia sọmẹ; taraka ḅụ ini simemẹ anị ene mị ma laka sịkị.
Ini Fị Ḅẹrẹḅarasi Pẹlẹ Jizọs Ḅe Pịrịmẹ
(Mat 27.15-26; Mak 15.6-15; Jọn 18.39—19.16)
13Paịlet ḅe tịḅịnị agbamịẹapụma na ama tịḅịdapụma na, tomonima na nwọ chịn koḅirimamẹ, 14se nwọse ini ḅẹmẹ, “Ó Ḅe ḅọ Ḅe nwọ ọkị ḅo ị̀ pịrịmẹ, se nwọ ḅẹmẹ, na Ò tomonima dairimaḅẹ. Mịọkụ, ọ́mịna tọrụkuḅu ḅụ àrị Ò pekele ḍikisam, ó seni Ọ̀ pụnụma ayema ḅụ Ọ̀ ḅara siye ofori-ẹ. 15Hẹrọd ḅe sọnị Ọ̀ ḅụ si ḍọkịḅo ọrịka ḅara ḅụ Ò se pịkị wa sẹịnmamẹ. 16Anịgose àrị Ò fomu se Ọ̀ ḅụ ḅarasin se Ò soḅịa.”
17[Saḅaḅọrọ Alalị goyegoye Paịlet ḅe gbọrị ikoliḅọ ḅụ ḅarasin ini pịrịpịrịmẹ.]
18Bebe tomonikpo mị olokumẹ, “Ọ̀ ḅaa! Barabas ḅe ḅụḅarasin wa pịrị!” 19(Barabas ḅe ini nwọse ikoli ḅie chumẹ, anị opuama mị ḅie koro ama owu mị na pịkị nweni ḅaa na gose.)
20Paịlet ḅe ḅimẹ ó Jizọs Ḅe ḅụ ḅarasin, anị ọ̀ pịkị kpoto ọkwẹịn tomonikpo mị pịrịye-ẹ. 21Ọkụma ini pịkịna olokumẹ, “Ọ̀ ḅakụḅaa! Ọ̀ ḅakụḅaa!”
22Paịlet ḅe tẹrẹ-a sịkị karama se nwọse ini ḅẹmẹ, “Ọkụma che oloko Ọ̀ nwọ koro? Àrị ineda Ò mịẹse fị gbẹịnye nwọ ḍọkịḅokẹ! Anịgose àrị Ò fomu se Ọ̀ ḅụ ḅarasinḅịa.” 23Ọkụma ini pa pụkọ deki gelema olokuaḅẹ na ini Jizọs Ḅe nwọse mgbẹsẹchịn ḅụ ḅakụḅaa; se anịa kuluma inia oloku tịḅịḅie ma ọmụḅaraiḅi nyanamẹ. 24Anị Paịlet ḅe ḅẹrẹpẹlẹ Jizọs Ḅe ḅarasimaye-ẹ, ini ḅi ḅara mị ḅụ. 25Se ini ḅi ḅọ ḅe ḅụ ḅarasinmẹ, anị ama fiema na pịkị nweniḅaa na gose ini se ikoli ḅie chu ḅọ ḅe. Se Jizọs Ḅe ḅọrọma ini pịrịmẹ na ini Ò se inia ḅụḅẹlẹ ḅara mịẹ.
Ini Jizọs Ḅe Se Mgbẹsẹchịn Ḅụ Ḅakụḅaa Mẹ
(Mat 27.32-44; Mak 15.21-32; Jọn 19.17-27)
26Owuni ma Jizọs Ḅe ọkị somẹ, ini mun-arị sịkị ini Saịmọn nwọ chịnḅọ na ịrịamẹ, Saịrini ama ḅọ ḅe. Jịn ama ḅụ ò so Jerusalẹm opuama mị ḅie sọ ḅoaḅẹ. Ini ò kun se mgbẹsẹchịn mị se oria ọgọnọ gbana, se ori anị pụra Jizọs Ḅe ḍukomẹ.
27Ḅaka tomonikpo Ò ḍukomẹ; inia ḅie eremeni sọ omi-ẹ, ini owu pịkị ngịrị ḅụ ò ḍukoaḅẹ. 28Jizọs Ḅe vinpịkị ini ḍiki se nwọ ḅẹmẹ, “Jerusalẹm eremeni! Ómine ị̀ gose owu ma, ọkụma ómine ọ́mịna ḅụ ma na ọ́mịna awọma na tịḅị gose owu. 29Anịatịḅị enema àrị ḅoaḅẹ tomoni nwọḅẹḅịa sịkị na, ‘Ḅẹlẹma sime ma jịn sịkị awọ nyanaka eremeni ma na, ma jịn sịkị awọ ḍẹkịka eremeni ma na pịkị ndo seni awọ pịrịka apụma na pịrị!’ 30Anịsịkị mị ḅụ mị tomoni nwọse tụndụma ḅẹḅịaye-ẹ, ‘Ḅịkị wa pụnụma!’ Pịkị nwọse chịngịma ḅẹḅịa, ‘Wa ḅọị!’ 31Anịatịḅị nwọ sime aye nemikase chịn mị ḍumo ịwọ ịnyanya chụa àrịogbo mịẹmẹ nwọ ḅẹ ọkụma, anị nde nde sime ḅe chịn mị samịnaḅịa sịkị?”
32Ini pịkị jịn mama apụ nwọ ọkịmẹ, mama apụ mamgba siye mịẹapụ-ẹ, ini se Jizọs Ḅe na chụa ḅaaḅịa ẹrẹchị. 33Ini ḅo “Kukure Tịḅị” nwọ chịn anga mị lasịkị, ini anịnyọ Jizọs Ḅe se mgbẹsẹchịn ḅụ ḅakụmẹ, oloko kan mama apụma na, gbọrịḅọ Oria amaḅara anga ḅụ, ísíḅọ ḅe pịkị Oria ereḅara anga ḅụ. 34Jizọs Ḅe nwọ ḅẹmẹ, “Ḍaḅọ, ḅarasin ini pịrị! Anịatịḅị ini mịẹarịyema ini nemikẹ.”
Ini Oria ḅụchụayema ḍiama ọkịmẹ ịkịan wakị ḅụ. 35Tomonima anịanga sime se Juapụ tịḅịnịma nini wakịma Ò okomboarị ọkụ mị ḍiki se nwọ ḅẹmẹ: “Ọ̀ jịn apụ ḍụaḅọrọmamẹ; ye Ọ̀ pịkị Ọ̀ ḅụ ḍụaḅọrọma, Ori nemikase Tamụnọ Ḅe sẹlẹ ọkị Mẹsaya Ḅe-ẹ nwọ ḅẹḅẹ!”
36Owuni ma sọnị Ò okombomẹ: ini Ọ̀ damaḅo se yelaka iru se Ọ̀ da, 37se nwọ ḅẹmẹ, “Ị́ ḅụ ḍụaḅọrọma, Ị́rị́ nemikase Juapụ amanyanaḅọ Ḅe-ẹ ḅẹḅẹ!”
38Ọ̀ tịḅị ọgọnọju ḅụ ma ọkwẹịn ma ini nwọ gịẹịnmẹ: “Ḅe anị Juapụ Amanyanaḅọ Ḅe-ẹ.”
39Anịanga sololo sime oloko kan apụma ḅie gbọrịḅọ wọlọ ọkwẹịn kọn Ọ̀ pịrịmẹ: “Mẹsaya Ḅe Ị́rị́ka? Ị́ ḅụ na mine na nwọ ḍụaḅọrọma!” 40Ị́sị́ ḅọ ḅe, ò ḍiki ịganị se nwọ ḅẹmẹ, “Ị́ Tamụnọ ḍikiḅalafaka? Ị́rị́ ori na gbọrị ḅẹrẹḅarasi mị ḅie omi-ẹ. 41Mịnaye mị, anị simeọkụ simeọkụ sọnị, karakaramẹ, anịatịḅị wa mịẹye ḅe gbẹịnye mị wa nyana àrị ye-ẹ, ọkụma Ori Ọ̀ mịẹ siye ofori-ẹ.” 42Se ọ̀ nwọse Jizọs Ḅe ḅẹmẹ, “Jizọs, ị̀ se ḅiekoroma, Amanyanaḅọ ḅara Ị́ nwọse ḅoḅịa sịkị!”
43Jizọs Ḅe nwọse ọ̀ ḅẹmẹ, “À ḅereni ị́ pịrịmẹ na mịmgba ị́ ị̀rị̀ na Paradaịs ḅie simeḅịa.”
Jizọs Ḅe fị Mị Kọn Ḅara
(Mat 27.45-56; Mak 15.33-41; Jọn 19.28-30)
44Anị ḅo pa oyimaịn so fịnjị pembe ye nwọ lasam ịrụa mị ḅarị ḅịakẹ, se kanakana bebe ama mị mgba nwọ gbẹịn wẹrị ọkịmun tẹrẹ-a so ḅiri lamẹ. 45Se Tamụnọ Oputẹkẹwarị mị ḅie sime kikichụa ḅịtẹ mị maịn pumẹ. 46Jizọs Ḅe gele pụkọ se oloku se nwọḅẹmẹ, “Ḍaḅọ! Ị́ ḅara ḅie mị àrị ị̀ tẹmẹ mị se chụaye-ẹ!” Ọ̀ mịn mị ḅẹ sosịkị, Ori ịnyọ binmamẹ.
47Ọmụ tịḅịnịḅọ ḅe pakaye mị nwọ ọrị sịkị, ọ̀ Tamụnọ Ḅe boma se nwọ ḅẹmẹ, “Pikipikiye ofori-ẹ na Ḅe Tomoniḅọ Ḅe Ò siye mịẹkẹ, karakara Tomoniḅọ-ẹ!”
48Anịnyọ koḅirima ye ḍiki sime apụma pakaye mị nwọ ọrị sịkị, ini ḅara se inia kuḅie ma gbolo se ngịrị ḅụ vinpịkị so warị mun mẹ. 49Jokoma Jizọs Ḅe nemi apụ mamgba, Galili ḅụ wẹrị Ò ḍukoḅo eremeni ma se chụa, sasaju ḅụ wẹrị chịẹ sime mayema ḍikimẹ.
Jizọs Ḅe Ḍipi Mị Kiri Ọkị Ḅara
(Mat 27.57-61; Mak 15.42-47; Jọn 19.38-42)
50Josẹf ini nwọse chịn gbọrịḅọ omi-ẹ, ori Juapụ sẹ mị ḅie Arịmatia ḅọ-ẹ, ori Sẹkẹnị ogbo apụma ḅie gbọrịḅọ-ẹ, iḅi pịkị karakara tomoniḅọ-ẹ, 51ḅe ḅọ ḅe ini tọn ayema na ini mịẹayema na ọ̀ ḅịpị sọkẹ. Ori Juapụ sẹ mị ḅie Arịmatia ḅọ-ẹ, se ọ̀ pịkị Tamụnọ Amanyanakiri mị ḅe ḅo mị koruaḅẹ. 52Ọ̀ Paịlet ḅe damamun se Jizọs Ḅe oju mị ḅimẹ. 53Anị ori oju mị sin koroma, lọkọ ḅịtẹ se anị fangala, se ḍụparị ḅụ ini soku se ma ini ḍụẹịn se ḍipika iḍupu ḅie anị se ḍipiye-ẹ. 54Anị Chọchị Sọnọ-a Ḍin ene-ẹ, ḅụkarakarama ene mị-ẹ. Ịnyọsara Ene mị sọ la-ẹtọn-aḅẹ.
55Galili ḅụ Jizọs Ḅe ḍukoḅo eremeni ma Josẹf ḅe ḅụ sọ mun mị iḍupu mị na pịkị Oria oju mị ini nwọse anịa ḅie ḍipi ọkụ mị na nwọ ọrịmẹ. 56Anị ini vinpịkị so warị mun, se ye kụnụmaye na kụnụ olo na nwọ karakarama Oria oju mị pịrịye-ẹ.
Ịnyọsara Ene mị ini nwọse ịnyọsaramẹ, Oloko mị ḍuko ḅara ḅụ.
The Bible Society of Nigeria