Luk 22
22
Ḅẹrẹḅia Jizọs Ḅe Pịrị Mị
(Mat 26.1-5; Mak 14.1-2; Jọn 11.45-53)
1Suka Fịturu Alalị mị ḅo kpeki sịkị mị, ini Saḅaḅọrọ nwọse chịn ye mị. 2Tịḅịnịapụma na, Oloko ḍieapụma na ḅọịma Jizọs Ḅe ḅaaḅịa ḅọkọ ḍọkị simemẹ anịatịḅị ini tomonima nwọ ḍikiḅalafamẹ.
Judas Ḅe Ḅerenimẹ Ò Jizọs Ḅe Se Ịbafịḅịa
(Mat 26.14-16; Mak 14.10-11)
3Anịsịkị Oru ḅe Judas ḅe ḅie sọmẹ, Ịskarịọt ini nwọse chịn ḅọ ḅe, oyimaịn ọḅụḍukoapụ fịnjịma ḅie gbọrịḅọ-ẹ. 4Anị Judas ḅe nwẹngị paka so mun tịḅịnị agbamịẹapụma na Tamụnọ Oputẹkẹwarị koru apụma ḅe tịḅịnịma na ọkwẹịnmaye-ẹ, ọ̀ ḅara wẹrịma Jizọs Ḅe ḅọrọma ini pịrịḅịa ọkụ. 5Ini ḅieḅẹlẹmẹ se pịkị igbiki ḅereni ọ̀ pịrịmẹ. 6Judas ḅe anị ḅereni ọkịmẹ se sakị achọ ḍọkịmẹ Jizọs Ḅe seni ịbafị ini pịrịḅịa ḅara tomonima anị gbolomaye nemika ḅụ.
Jizọs Ḅe Ḅụkarakaramamẹ Saḅaḅọrọ Fịye Mị Fị Ḅụ
(Mat 26.17-25; Mak 14.12-21; Jọn 13.21-30)
7Ene mị ḅo lamẹ, Suka Fịturu Alalị sịkị mị ḅụ, ini Saḅaḅọrọ fịye ananama nwọ ḅaaḅịa sịkị. 8Jizọs Ḅe Pita ḅe na Jọn ḅe na fịrịma pakụma se nwọse ini ḅẹmẹ: “Ó mun wa se mịna Saḅaḅọrọ fịye fịḅịa ye nwọ karakarama.”
9Ini ò gbelamẹ, “Nde ị́ ḅi wa anị karakarama nwọḅẹ nyọ?”
10Ọ̀ nwọ ḅẹmẹ, “Ó poki! Ómine opuama mị ḅie sọmun sịkị mengi ojongo pụra gbọrị owuḅọ ómine na ịrịaḅịa, ómine ò ḍuko ọ̀ sọḅịa warị mị ḅie sọ. 11Se nwọse warị mị nyanaḅọ ḅe ḅẹ: ‘Yeḍieḅọ ḅe nwọ ḅẹmẹ, Nde ị̀ya ọḅụḍukoapụma na ị̀rị̀ na Saḅaḅọrọ fịye mị fịḅịa ḅie mị?’ 12Ori ọgọnọ warị ḅụ ḅirima sa gbọrị opu ḅie nwọse ó ḍieḅịa, anị ó yegoyegoye nwọ karakaramaḅịa nyọ mị-ẹ.”
13Ini pakasomẹ, se Jizọs Ḅe ḍuko ini pịrị ḅara mị anị anị paka ọkụ-ẹ, se Saḅaḅọrọ fịye mị ini nwọ karakaramamẹ.
Nyanaḅọ Ḅe Saso Fịye Mị
(Mat 26.26-30; Mak 14.22-26; 1 Kọr 11.23-25)
14Sịkị mị ḅo lasịkị, Jizọs Ḅe Oria kiri nwọ ọkịmẹ dẹbụl mị ḅụ okunwẹngịapụma na ori na. 15Ọ̀ nwọse ini ḅẹmẹ, “Àrị opuma ḅimẹ àrị ómine na mị Saḅaḅọrọ fịye mị fị, ma à tọrụsiọrịka simeogbo! 16Anịatịḅị à ḍuko ọ́ pịrịaḅẹ, na à ḅarị jịn sịkị se anị fịẹkẹ ọkịmun ini Tamụnọ Amanyanakiri mị ḅie anị mịẹ ḅeinmaḅịa sịkị la.”
17Anịsịkị Jizọs Ḅe ọmọngọ mị ọkị mịẹḅaka se Tamụnọ Ḅe ḅẹ, se nwọ ḅẹmẹ, “Ọ́ mịn mị ọkị, se anị seni ọ́mịna ogboku ḍia. 18Anịatịḅị à ḍuko ọ́ pịrịaḅẹ na mịọkụ sakị mị iru mị à ḅarị ḅu ẹkẹ ọkịmun Tamụnọ Amanyanakiri mị ḅoḅịa sịkị mị laḅịa.”
19Anịsịkị ò fịturu mị ọkịmẹ, mịẹḅaka se Tamụnọ Ḅe ḅẹmẹ, anị pu se anị seni ini pịrị se nwọ ḅẹmẹ, “Mịn ị̀ya oju mị-ẹ, ini seni ọ́ pịrịye mị. Mịn mị mịẹ, ị̀ se ḅiekoroma ḅụ.” 20Anị gbọrị ḅara ḅụ ori ọmọngọ mị se ini pịrịmẹ, saso fịye mị ini nwọ fịso sịkị, se nwọ ḅẹmẹ, “Mịn ọmọngọ mị anị Tamụnọ Ḅe ịwọ ọḅọkụ mị-ẹ, ini ị̀ya pulo se anị mịẹ kụrọmaye mị, ini ó gose ọsụn ye mị-ẹ.
21“Ọkụma, ḍiki! Ị̀ se ịbafịarịḅọ ḅọ ḅe ọ̀ mịanga mị dẹbụl mị ḅụ ị̀rị̀ na omi-ẹ! 22Anịatịḅị Tomoniḅọ Tọkụ Ḅe ọ̀ fịḅịa, Tamụnọ Ḅe anị tọn sa ḅara ḅụ, ọkụma anị ḅalafamaye sọ ori ḅọ ḅe pịrịọkụ ḍiki, nwọ ò se ịbafị ḅọ ḅe!”
23Anị ini sakị inia ogboku gbelaye-ẹ inia ḅie ḅụ ineda ò seni mịn ḅara mị mịẹḅịa ḅọ mị.
Opu Kiri Simeḅịa Ḅọ Gboloma Jineaye
24Ḅẹrẹjinea ọḅụḍukoapụma ogboku pakaḅomẹ inia ḅie opu sọtẹịnḅịaḅọ gbolomaye ḅụ. 25Jizọs Ḅe nwọse ini ḅẹmẹ, “Mịn tomonikiri mị ḅe amanyanapụma inia tomonima ḅụ kụrọ nyanamẹ, ini pịkị ‘Tomonima Ikiapụ’ nwọ seni ḅẹrẹtọn-apụma chịnmẹ. 26Ọkụma mị ḅara mị anị nwọ sime ọ́ pịrị ẹkẹ; anịnakaraka, ọ́mịna ḅie opusọtẹịnḅọ ḅe bokatẹịnḅọ ḅara nwọ sime, se tịḅịnị ḅọ ḅe pịkị fịrịnwẹngịḅọ ḅara nwọ sime. 27Tụḅọ opuḅọ, sọtẹịn, dẹbụl ḅụ kpọnjị sime fịye fị àrị ḅọ ḅe mụnọ se fịrịnwẹngị ọ̀ pịrịarị ḅọ ḅe? Anị sime ḅara, kpọnjị sime ḅọ ḅe-ẹ. Ọkụma ị̀rị̀, ọ́mịna ogboku fịrịnwẹngịḅọ ḅara ḅụ omi-ẹ.
28“Ómine ị̀rị̀ na simemẹ, ị̀ya ḍaḍiki sịkị mị mgba; 29Ị̀ Ḍaḅe ḅẹrẹtọn kụrọ nwọse ị̀ pịrị ọkụ mị, anị ị̀rị̀ sọ pịkị ḅẹrẹtọn kụrọ se ọ́ pịrịḅịa ọkụ-ẹ. 30Ómine ị̀ya dẹbụl ọgọnọ ị̀rị̀ na yefị pịkị ḅuḅịa ị̀ya Amanyanakiri mị ḅie, ọ́ pịkị Amanyanapụ ngadama ọgọnọ sime se ḅẹrẹkọn Izrẹl oyimaịn furo fịnjịma pịrịḅịa.
Jizọs Ḅe Pita Ḅe Ò Pikiḅịa Ịkịan Nwọ Koromẹ
(Mat 26.31-35; Mak 14.27-31; Jọn 13.36-38)
31“Saịmọn, Saịmọn! Poki! Oru ḅe ọ̀ kụrọ ọkịsam ómine mgba ḍaḍikiḅịa ẹrẹchị, anị ozu kọrị ḅọ ḅe osirosiroḅa ḅụ ịpịamgba sẹlẹ sikima ọkụ mị. 32Ọkụma à tẹkẹ ị́ pịrịsam, Saịmọn, mịẹse ị́ya ḅereni ḅụ ị́ ḅịkịẹka ḅara. Se ị́ vinpịkị ị̀ daḅịa sịkị, ị́ ḅarachụa ị́ya mịnapụma pịrịḅịa.”
33Pita ḅe pẹkẹrẹmẹ, “Nyanaḅọ, à ḅụkarakaramamẹ ị́ ḍuko ikoli ḅie sọ, pịkị ị́ ḍuko fị!”
34Jizọs Ḅe nwọ ḅẹmẹ, “À ḍuko ị́ pịrịaḅẹ, Pita, mị ḍin ọḅọkọ ma paịnka simeogbo ị́ tẹrẹ-a sịkị se ị̀ pikiḅịa na ị́ ị̀ nemikẹ.”
Igbiki Chụa Akpa, Ḅara Ọlọ Akpa, Na Okola-agiji Na
35Anị Jizọs Ḅe nwọse ini gbelaye-ẹ, “Igbiki chụa akpa, na ḅara ọlọ akpa na, akpaka na ofori ḅụ àrị ọ́ fịrịma pakụma sịkị mị, ye ọ́mịna ḅụfụkama?”
Ini nwọ pẹkẹrẹmẹ, “Ẹn-ẹn, ḅụfụkamaye ofori-ẹ.”
36Jizọs Ḅe nwọ ḅẹmẹ, “Ọkụma mịọkụ igbiki chụa akpa, anịkanịka ḅara ọlọ akpa nyanaḅọ goyegoye ye iniḅọ anị ọkị, se okola-agiji nyanaka ḅọ goyegoye ye iniḅọ mịna ḅụchụaye nwọ dẹrị se gbọrịye fẹ ọkị. 37À ḍuko ọ́ pịrịaḅẹ na Fịafịa Ḍiri mị ḍuko na, ‘Ini ò se oloko kan-apụma na chụa kịẹn gbolomamẹ nwọḅẹ ye mị,’ ị̀ḅụ anị mịẹ ḅeinmaḅịa.” Anịatịḅị ị̀ḅụ ini ḍuko ye mị anị ḅo kọkọmaye sọ-e ḅoaḅẹ.
38Ọḅụḍukoapụma nwọ ḅẹmẹ, “Ḍiki mama okola-agiji mịanga omi-ẹ, Nyanaḅọ!”
“Anị iḅisam!” ọ̀ nwọ pẹkẹrẹmẹ.
Jizọs Ḅe Oliv Tụndụ Ọgọnọ Tẹkẹmẹ
(Mat 26.36-46; Mak 14.32-42)
39Jizọs Ḅe opuama mị koromaso se Oliv Tụndụ ọgọnọ mun mẹ, ọ̀ mịẹmịẹ ḅara ḅụ, se ọḅụḍukoapụma ọ̀ ḅụ sọ mun mẹ. 40Ò mun nyọ mị lasịkị, ọ̀ nwọse ini ḅẹmẹ, “Ọ́ tẹkẹ, mịẹse ó telima ḅie sọẹka ḅara.”
41Anịsịkị ori ini wẹrị sikimamẹ, mun kpẹrẹkị se tẹkẹmẹ. 42Se nwọ ḅẹmẹ, “Ḍaḅọ, ị́ ḅerenimẹ ḅẹḅẹ, ị̀ ḅara mị tọrụsiọrị ọmọngọ mị ọkịsin. À ḅi ḅarakẹ, anị simeọkụ simeọkụ sọnị, ọkụma ye ị́ ḅereniye mị mịẹ.” 43Enjẹlḅọ soḅie koroḅo ọ́ ḅụ seni ò ḍie pịkị ịnyọ se ọ̀ ḅụ chụamẹ. 44Opu kururu ḅụ ọ̀ kụrọma tẹkẹmẹ, ọ̀ ḅụ paka imo mị oju ḅụ kpoinkpoin kiri koroarị pulo simeọkụ simemẹ.
45Tẹkẹ ḅụ ọ̀ sịsẹ sịkị ò vinpịkị ọḅụḍukoapụma damamun se ini mọnọarị ọkụ nwọ ọrịmẹ, ngịrị pịkị inia ḅụ ịnyọ famamẹ. 46Se nwọse ini ḅẹmẹ, “Nde ó gose mọnọarịye? Ọ́ sịsẹ se tẹkẹ, mịẹse ọ́ ḅịkị telima ḅie sọẹka ọkụ.”
Jizọs Ḅe Kun Mị
(Mat 26.47-56; Mak 14.43-50; Jọn 18.3-11)
47Jizọs Ḅe ọkwẹịn simearịogbo tomonikpo ḅo lamẹ, Judas, oyimaịn ọḅụḍukoapụ fịnjịma ḅie gbọrịḅọ inia tọrọkọ damẹ. Ò Jizọs Ḅe damaḅomẹ ọ̀ ḅịpị nọnjụḅịa ẹrẹchị. 48Ọkụma Jizọs Ḅe nwọ ḅẹmẹ, “Judas, ḅịpị nọnjụ ị́ nwọse Tomoniḅọ Tọkụ Ḅe se ịbafị-ao?”
49Jizọs Ḅe na sime ọḅụḍukoapụma paka-ẹ tọn àrị ye mị nwọ ọrị sịkị ini nwọ ḅẹmẹ, “Nyanaḅọ, wa mịna okola-agiji ma se ini gbogbo nọ?” 50Se inia ḅụ gbọrịḅọ Gele Agbamịẹḅọ ḅe omoniḅọ ḅe amaḅara anga ḅeri pẹlẹsinmẹ.
51Ọkụma Jizọs Ḅe nwọ ḅẹmẹ, “Iḅisam ọ́ ḅarị jịnye mịẹma!” Ori ọ̀ ḅara se nweniḅọ ḅe ḅeri lama se ọ̀ gwọmẹ.
52Anịsịkị Jizọs Ḅe nwọse tịḅịnị agbamịẹapụma ḅẹmẹ, Oputẹkẹwarị mị ḅie fịrịnwẹngịapụma na pịkị sẹnịapụma na anị ḅo ori ọkị-ẹ ḅo apụma, “Oloko kanḅọ ḅara ọ́ nwọse okola-agiji ma na imgbelema na se ị̀ damaḅo? 53Àrị ómine na ene mamgba Oputẹkẹwarị mị ḅie simemẹ, ómine ị̀ kun ḍụkụkẹ. Ọkụma mị ọ́ kụrọ kọnḅịa sịkị mị-ẹ, anị kanakana mị ḅe kụrọ mị ḅẹrẹtọn àrị sịkị mị.”
Pita Ḅe Jizọs Ḅe Pikimẹ
(Mat 26.57-58,69-75; Mak 14.53-54,55-72; Jọn 18.12-18,25-27)
54Ini Jizọs Ḅe kunmẹ se ori ọkị se Gele Agbamịẹḅọ ḅe warị mun mẹ se Pita ḅe sasaju sime ini ḍukomẹ. 55Ḅẹrẹkọn warị mị nụngọ ogboku ḅụ, ini fịnị tọnọmẹ, se Pita ḅe sọ inia ḅụ sọ fịnị mị temimẹ. 56Fịrịnwẹngịarị eremeni-awọ ma ḅie gbọrị eremeni tọkụ ori ini na fịnị anga simeọkụ ọrị sịkị, á tọrụ se ọ̀ da se nwọ ḅẹmẹ, “Ḅe ḅọ ḅe sọnị ọ̀ ḅụ ḅọ-ẹ!”
57Ọkụma Pita ḅe anị pikimẹ, “Eremeniḅọ, ò nemi sọnị àrị ò nemikẹ!”
58Ḅịpị kalaye ḅọrọ sịkị, gbọrị owuḅọ ọ̀ ḅụ elekima chụa se nwọ ḅẹmẹ, “Ị́rị́ sọnị inia ḅie gbọrịḅọ-ẹ!”
Ọkụma Pita ḅe pẹkẹrẹmẹ, “owuḅọ, ị̀rị̀ ka-o!”
59Se gbọrị awa pembe ye ḅọrọ sịkị, jịn owuḅọ kụrọma ḍukomẹ, “Pikipikiye ofori-ẹ ḅe ḅọ ḅe sọnị ọ̀ ḅụ ḅọ-ẹ, anịatịḅị ori sọnị Galili ḅọ-ẹ!”
60Ọkụma Pita ḅe pẹkẹrẹmẹ, “Owuḅọ, ị́ ḍukoarịye tịḅị à nemikẹ!”
Anị kirikiri ọ̀ pa ọkwẹịn àrị ogbo, gbọrị owoi-ọḅọkọ paịnmẹ. 61Nyanaḅọ Ḅe vinpịkị, gbụkụkụma Pita ḅe ḍikimẹ, se Pita ḅe Nyanaḅọ Ḅe se ọ̀ ḅẹye mị nwọse ḅiekoromamẹ na, “Owoi-ọḅọkọ mị ḍin ma paịnka simeogbo, ị́ tẹrẹ-a sịkị se ị̀ pikiḅịa.” 62Pita ḅe nwẹngị paka se ọ̀ ḅụ akụ ḅara se owumẹ.
Ini Jizọs Ḅe Kombo Pịkị Ò Fomumẹ
(Mat 26.67-68; Mak 14.65)
63Jizọs Ḅe koru simeapụma ò se kpọti pịkị ò fomumẹ. 64Ini ye seni ọ̀ tọrụmgbọlụma fịna se ò gbelamẹ, “Mgbamgba! Tụḅọ ị́ ḅakụ?” 65Ini pịkị tọn-a wọlọ ọkwẹịn nwọ kọn ọ̀ pịrịmẹ.
Ini Jizọs Ḅe Se Ḅẹrẹchiri Mị Tọrọkọ Ḅomẹ
(Mat 26.59-66; Mak 14.55-64; Jọn 18.19-24)
66Ene ḅa Sịkị, Ju ama sẹnịapụma na, tịḅịnị agbamịẹapụma na Oloko ḍieapụma na ịrịamamẹ, se ini Jizọs Ḅe ọkị inia ḅẹrẹchiri mị ḅomẹ. 67Ini nwọ ḅẹmẹ, “Ḍuko wa pịrị, Mẹsaya Ḅe Ị́rị́?”
Ọ̀ pẹkẹrẹmẹ, “À ḍuko ọ́ pịrị sọnị, ómine ị̀ ḅereni ẹkẹ; 68à pịkị ḅẹrẹ se ó gbela sọnị ọ́ pẹrẹkẹ ḍụkụ-ẹkẹ. 69Ọkụma mịọkụ ọkị tọrọkọ mun Tomoniḅọ Tọkụ Ḅe Kụrọmamgba Nyana Tamụnọ Ḅe amaḅara anga ḅụ simeḅịa.”
70Inimgba nwọ ḅẹmẹ, “Anịọkụma, Tamụnọ Tọkụ Ḅe Ị́rị́?”
Ori ini pẹkẹrẹmẹ, “Ómine mị ọkọ ḅẹye-ẹ, na Ị̀rị̀-ẹ.”
71Se ini nwọ ḅẹmẹ, “Wa ḅarị jịn onyechịẹ apụ ḅikẹ! Mine sọ ḅarana ò ḍukoye naasam!”
The Bible Society of Nigeria