San Mateo 2
2
Karai kuéra arandu ou pe Niño andúvo
1Jesús onace va'ekue pe ciudad Judea pegua Belén héravape, Rey Herodes tiémpope. Upéramo oguahẽ Jerusalénpe kuarahy resẽguio karai kuéra iñarandúva, 2ha oporandu hikuái:
--¿Mamópa oime pe mitã onace va'ekue Israelita kuéra ruvicha guasu? Rohecha niko kuarahy resẽme ijestrella, ha roju romomba'eguasu haguã ichupe.
3Rey Herodes oikuaávo upéva ipy'atarovaite ha Jerusalengua kuéra avei. 4Ha pe Rey ohenoiukapa umi pa'i ruvicha kuérape ha Ñandejára ley rehe oporombo'évape ha oporandu ichupe kuéra mamópa onace vaerã ra'e pe Cristo. 5Ha ha'e kuéra he'i ichupe:
--Belén Judea peguápe; pe ñemoñe'ẽhára upéicha omoĩ va'ekue kuatia rehe he'i ramo:
6Ha nde Belén Judea pegua,
na ne michĩvéi mba'evéichavo
upe tetã megua mburuvicha kuéra apytépe;
osẽtagui nde hegui
peteĩ mburuvicha guasu
oñangareko vaerã che retã Israel rehe.
7Upérõ Herodes ohenoiuka ñemiháme umi karai arandu kuérape ha oporandu ichupe kuéra araka'etépa ojehechauka ra'e upe estrella. 8Upérõ omondo ichupe kuéra Belénpe ha he'i ichupe kuéra:
--Tapeho ha peporandu porã pe mitã rehe; ha pejuhu rire che momarandu, che avei aha haguã amomba'eguasu ichupe.
9Ohendu rire pe rey ñe'ẽ, umi karai kuéra oje'ói. Ha pe estrella ohecha va'ekue hikuái kuarahy resẽvo, oho henonderã kuéra ha opyta pe mitã oiha ári. 10Umi karai arandu ohechávo pe estrella ovy'a eterei; 11ha oikévo pe ógape ohecha hikuái pe mitãme isy María ndive. Ha oñesũ ha omomba'eguasu pe mitãme, ha upéi oipe'a ikarameguã ha ome'ẽ ichupe óro, incienso, ha mirra. 12Ha oñemomarandu rire iképe anive haguã oho Herodes rendápe, oje'ói jevy hikuái hetãme tape ambue rupi.
José ogueraha pe mitãme Egíptope
13Oho rire umi karai arandu kuéra katu peteĩ ángel Ñandejára remimbou ojehechauka Josépe iképe ha he'i ichupe:
--Epu'ã, eraha nendive pe mitã ha isýpe, ha pya'e tereho Egíptope, ha epyta upépe che romomarandu peve, Herodes ohekaukátagui pe mitãme ojuka haguã.
14Upérõ José opáy ha upe pyharépe voi ogueraha pe mitã ha isýpe Egíptope, 15ha opyta hikuái upépe Herodes omano meve. Upéicha ojehu oiko haguã hekoitépe pe Ñandejára he'i va'ekue ñemoñe'ẽhára rupi, he'i ramo, “Egíptogui ahenói va'ekue che Ra'ýpe.”
Herodes ojukauka mitã kuérape
16Ha Herodes ohechakuaávo umi karai ombotavy hague ichupe, ipochy eterei ha omondo ojukaukapa haguã mitã kuimba'e kuéra omboty'ỹva gueteri dos años oĩ va'ekue Belénpe ha ijerekuévo, he'i haguéicha ichupe umi karai arandu pe estrella rehe. 17Upéicha oiko hekoitépe ñemoñe'ẽhára Jeremías omoĩ va'ekue kuatia rehe:
18Oñehendu Ramáme
tasẽ ha jahe'o soro;
Raquel ojahe'óva imemby kuéra rehe,
ha ndaikatúi iñangapyhy,
omanombáma hague rehe.
19Herodes omano rire katu, peteĩ Ñandejára ángel ojehechauka iképe Josépe, Egíptope, ha he'i ichupe:
20--Epu'ã, eraha pe mitã ha isýpe ha tereho jevy Israélpe, omanóma umi ojukase va'ekue pe mitãme.
21Upérõ José opu'ã ha ogueraha pe mitã ha isýpe Israélpe. 22Ha José oikuaávo Arquelao oiha mburuvicha guasu ramo itúva Herodes rendaguépe okyhyje oho haguã upépe, ha oñemomarandúgui iképe, oho Galiléape. 23Ha oguahẽ rire upépe oho oiko pe ciudad Nazaret héravape. Upéva ojehu oiko haguã hekoitépe umi ñemoñe'ẽhára kuéra he'i va'ekue, pe mitã oñembohéra va'erãha Nazareno.
Guaraní New Testament, Buenas Nuevas para el Paraguay © Paraguayan Bible Society, 1970.